close

გამოგონება - ინოვაცია

ასტრონომია - კოსმოსიგამოგონება - ინოვაცია

ინოვაციური ჟილეტი კოსმონავტებს რადიაციისგან დაიცავს

ებრაელმა გამომგონებლებმა სპეციალური ჟილეტი შექმნეს, რომელიც ასტრონავტებს ღრმა კოსმოსში მზის სასიკვდილო ნაწილაკებისგან დაიცავს.

,,AstroRad Radiation Shield-ი” თელ-ავივში დაფუძნებულმა კომპანიამ – ,,StemRad-მა” – შექმნა. შეგახსენებთ, აღნიშნულ კომპანიას ეკუთვნის სპეციალური ქამრები, რომელიც მაშველებს ბირთვული კატასტროფების (ჩერნობილი, ფუკუშიმა) შედეგად წარმოქმნილი გამა სხივების რადიაციის ზემოქმედებისგან იცავს.

ჟილეტი დაიცავს  ადამიანის სასიცოცხლო ქსოვილებს, განსაკუთრებით ღეროვან უჯრედებს, რომელიც შესაძლოა ღრმა კოსმოსში ან მარსზე არსებული მეჩხერი ატმოსფეროს პირობებში მზის რადიაციამ გაანადგუროს.

აშშ-ის კოსმოსური სააგენტო – „ნასა“ – 2030 წლისთვის მარსზე ასტრონავტების გაგზავნას აპირებს.

დამცავი ჟილეტი კონტურული რუკის მსგავსი საფენებისგან შედგება. ის ყველა ასტრონავტისთვის სპეციალური შეკვეთით დამზადდება. თითოეულ დამცავზე არალითონური დამცავი მასალა განთავსდება, რათა თითოეული ასტრონავტის სხეულის ორგანოები დაფაროს.

StemRad-ი აცხადებს, რომ კონცეფცია ლაბორატორიულად დამტკიცებულია, თუმცა ტესტირება ჩატარდება  კოსმოსურ ხომალდ „ორიონზე“, რომელიც Lockheed Martin-ის, ნასასა და ევროპული კოსმოსური სააგენტოს ერთობლივი პროექტია.  „ორიონი“ ახალი თაობის კოსმოსური ტრანსპორტია, რომლის გამოყენებას ნასა მარსზე გასამგზავრებლად გეგმავს.

„ორიონს“ მზის ქარიშხლის ან მცხუნვარებისგან დასაცავად პატარა თავშესაფარი ექნება. მეცნიერები აცხადებენ, რომ ახალი ჟილეტი ასტრონავტებს საშუალებას მისცემს კოსმოსური ხომალდის დანარჩენ ნაწილშიც დაცულები იყვნენ.

 

წყარო: Reuters

მასალა მოამზადა: თამარ ტაბატაძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

სრულად ნახვა
გამოგონება - ინოვაციასაქართველო

სათამაშო ჟილეტი რეალური შეგრძნებებით – ქართველი ახალგაზრდების წარმატებული პროექტი

  ილიას სახელმწიფო უნივერსიტეტისა და ილიაუნის სამრეწველო ინოვაციების ლაბორატორიის (FabLab Iliauni) მეშვეობით  საზოგადოებისთვის ბევრი ახალგაზრდის ინოვაციური პროექტი გახდა ცნობილი, ერთ-ერთი მათგანია Laser Combat-ი —  სამი  ახალგაზრდის მიერ შექმნილი  ჟილეტი, რომელიც მოთამაშეებს თამაშის რეალურად და უმტკივნეულად შეგრძნების საშუალებას აძლევს. ,,დოქტრინა“ გაესაუბრა იდეის ერთ-ერთ ავტორს  – გივი ბერიძეს, რომელმაც დაწვრილებით ისაუბრა ამ პროექტის შესახებ.

          პროექტის ავტორები მათემატიკისა და კომპიუტერული მეცნიერებების მე-3 კურსის სტუდენტები გივი ბერიძე, ნიკოლოზ სიხარულიძე,  თორნიკე ფარცახაშვილი და აგრარული უნივერსიტეტის ელექტრო ინჟინერიის ფაკულტეტის სტუდენტი ირაკლი მსხილაძე არიან. ჯგუფის წევრებს იდეა მაშინ გაუჩნდათ, როდესაც საქართველოს ინოვაციებისა და ტექნოლოგიების სააგენტომ ისინი მიიწვია ნუნისში გამართულ ,,ინოვაციების ბანაკში“, სწორედ ეს გახლდათ პირველი შესაძლებლობა, რომელმაც მათ საშუალება მისცა შეექმნათ იდეის პირველადი პროტოტიპი და წარედგინათ ის დუბაიდან მოწვეული ინვესტორების წინაშე.

ჟილეტის შექმნის იდეა ახალგაზრდებს ბავშვობის მოგონებებმა შთააგონა, როცა თუნდაც ხის ჯოხებით თამაშის დროს რეალიზმის შეგრძნება არ არსებობდა, შესაბამისად, გადაწყვიტეს, შეექმნათ ჟილეტი სახელად Laser Combat-ი, რომელიც შეგრძნებებს ტოვებს და, ამასთანავე, უსაფრთხო და უმტკივნეულოა.

Laser Combat-ი მთლიანადაა სენსორებით აღჭურვილი და როდესაც რომელიმე წერტილში ხვდება ლაზერის სხივი, სწორედ იმ წერტილში უჩნდება მოთამაშეს ვიბრაციის შედეგად გამოწვეული უსიამოვნო შეგრძნება, რაც აგრძნობინებს, რომ ტყვია მოხვდა. აღსანიშნავია, რომ ეს ტექნოლოგია მაქსიმალურადაა მიმსგავსებული უკვე არსებულ უბრალო ჟილეტებს, მაგრამ  სწორედ რეალიზმის შეგრძნებაა ის, რაც მას გამოარჩევს უკვე არსებული კონკურენტებისგან, მაგალითად, როგორიცაა – ,,Airsoft Paintball-ი“ და ა.შ.

,,ინოვაციების ბანაკში“ გამარჯვებასთან ერთად,  დუბაის ინვესტორი კომპანიები – “TURN8“ და “I360accelerator“ გამარჯვებული გუნდს ყოველთვიური გრანტის დაწესებით დაეხმარნენ იდეის ხორცშესხმაში. ამის შემდეგ, სტუდენტებმა საკუთარი იდეა  ,,MACS ლაბორატორიის“ ხელმძღვანელს, ზვიად სულაბერიძეს, გაუზიარეს და სწორედ ამ ლაბორატორიაში შეიქმნა სრულფასოვანი პროტოტიპი.

გამოცდილების არქონის გამო სტუდენტებს რთული გზის გავლა მოუწიათ, სანამ სერიოზული ინევსტიციის მოპოვებას შეძლებდნენ, ნელ-ნელა  მათ შეძლეს კომპანია Edison.ge-ს ჩამოყალიბება, რომელიც სხვადასხვა ორგანიზაციასა თუ ფიზიკურ პირს სთავაზობს შექმნან ნებისმიერი სირთულის ტექნოლოგიური მოწყობილობა, Web, Mobile ან Desktopაპლიკაცია, თუნდაც 3D ან 2D ობიექტები სხვადასხვა თანამედროვე ტექნოლოგიის გამოყენებით.

სწორედ ამის შემდეგ, ჟილეტის იდეა წარადგინეს ,,სტარტაპ საქართველოზე“, სადაც 20 მონაწილე პროექტიდან მე-5 ადგილზე გავიდა და ძალიან ბევრი ინვესტორის მოწონება დაიმსახურა, აღებული 100 000 ლარიანი ინვესტიციით კი უკვე შეძლეს პროექტის ბაზარზე გატანაც. ახლაგაზრდები, ამ ეტაპზე, საქართველოში ბევრ მოლაპარაკებას აწარმოებენ, რათა გახსნან პირველი სათამაშო კლუბი, სამომავლოდ კი ევროპის ბაზარზე გასვლაზეც ფიქრობენ.

 

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი  – ,,დოქტრინა”

 

 

სრულად ნახვა
გამოგონება - ინოვაციასაქართველო

ქართველი ახალგაზრდების გამოგონება, რომელიც ნარჩენების გატანის ოპტიმალურ გეგმას გვთავაზობს

ილიას სახელმწიფო უნივერსიტეტისა და ილიაუნის სამრეწველო ინოვაციების ლაბორატორიის (FabLab Iliauni) მიერ  გამართული მეიქათონის „შენი სტარტაპიდეა რეალობაში“ ფარგლებში, კიდევ ერთი საინტერესო პროექტი წარსდგა საზოგადოების წინაშე,  ეს არის “PAPU“ (,,ფაფუ“) – მცირე ზომის სენსორული მოწყობილობა, რომელიც მუნიციპალიტეტებს დანახარჯების შემცირებასა და რესურსების ოპტიმალურად გადანაწილებაში დაეხმარება, ,,დოქტრინა“ გაესაუბრა იდეის ერთ-ერთ ავტორს – მედეა ტლაშიძეს, რომელმაც დაწვრილებით გვიამბო გამოგონების არსზე.

მედეას გარდა, პროექტის ავტორები არიან –  ელენე ბერიძე და ირაკლი ლონდარიძე,  გოგონები ილიას სახელმწიფო უნვერსიტეტის ბიზნესის ფაკულტეტის მეოთხეკურსელები არიან, ირაკლი კი პროფესიით ITსპეციალისტია. როგორც მედეამ ჩვენთან საუბარში აღნიშნა, პროექტის იდეა ქალაქში ყველასთვის აქტუალური პრობლემიდან გამომდინარე გაჩნდა, ,,პრობლემა, რომელიც თითქმის ყოველდღიურად ექმნებოდა თითოეულ ჩვენგანს არის – საცობები, რომელსაც ნაგავმზიდი მანქანები ქმნიან. შემდგომ დავინტერესდით და აღმოჩნდა, რომ სტატსტიკურადაც ნაგავმზიდი მანქანების 70% ცარიელი ბრუნდება მარშრუტიდან, შესაბამისად, იხარჯება ზედმეტი რესურსებიც. ჩვენ გვინდოდა, რომ გამოგვესწორებინა ეს და შეგვექმნა ქალაქში ნარჩენების გატანის ოპტიმალური გეგმა, ნაკლები დანახარჯებით.  ჩვენ გვინდა, რომ ვიცხოვროთ თანამედროვე ქალაქში და მიგვაჩნია, რომ  მსგავსი პრობლემების გადაჭრა ძალიან მნიშვნელოვანი იქნება ამ საქმისთვის,“-აღნიშნა მან.

“PAPU” არის მოწყობილობა, რომლის დამაგრებაც ყველა ტიპის ნაგვის ყუთზეა შესაძლებელი და GSMმოდულის საშუალებით ატყობინებს ნარჩენების დონეს ურნაში კონკრეტულ ობიექტზე, შემდგომ, პროგრამის საშუალებით, ნაგავმზიდებისთვის იხაზება ოპტიმალური მარშრუტი, თუ რა თანმიმდევრობით უნდა მიაკითხონ მათ. მოწყობილობა განსაზღვრავს ურნაში სამ დონეს –  სავსე, საშუალო და ცარიელი.  შესაბამისად, თუკი ეს გამოგონება ფეხს მოიკიდებს, ნაგავმზიდი მანქანები ნაკლებად გახდება  საცობის მიზეზი, მაშინ, როცა, რეალურად, ურნები ცარიელია და საწვავიც ზედმეტად იხარჯება.

ამ ეტაპზე ახალგაზრდები ილიაუნის სამრეწველო ინოვაციების ლაბორატორიის და პრეაქსელერატორ ,,ZOOMOUT-ის” დახმარებით პროტოტიპირებაზე მუშაობენ.  21 თებერვალს მათ მიიღეს მონაწილეობა ,,Start up battle-ში” და უკრაინელი ინვესტორების წინაშე წარმატებით წარსდგნენ. ,,ფაფუმ“ ინვესტორების დაინტერესება შეძლო და ასევე მოხვდა ,,Wolves Summit-ზე”, სადაც მსოფლიოს მასშტაბით 350 სტარტაპიდან ხდებოდა შერჩევა. ღონისძიება პოლონეთში, ვარშავაში ჩატარდება და ჩვენი ახალგაზრდა გამოგონებლები უკვე მარტის ბოლოს გამეგზავრებიან ინვესტორებთან შესახვედრად, ,,დოქტრინა“ კი წარმატებებს უსურვებს  და ელის სასიამოვნო სიახლეებს მათგან!

 

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

 

 

 

 

 

სრულად ნახვა
გამოგონება - ინოვაციასაქართველო

ქართველი გოგონების გამოგონება, რომელიც სასურველი ნივთის ან ადგილის პოვნაში დაგვეხმარება

გასული წლის ნოემბერში, ილიას სახელმწიფო უნივერსიტეტმა და ილიაუნის სამრეწველო ინოვაციების ლაბორატორიამ (FabLab Iliauni)  ჩაატარა მეიქათონი – „შენი სტარტაპიდეა რეალობაში“, რომლის ფარგლებშიც მონაწილე გუნდები ერთმანეთს ინოვაციური და უნიკალური იდეების შეზღუდულ დროში შექმნაში შეეჯიბრნენ. შემდეგ კი, ქართველი თუ უცხოელი ექსპერტების მენტორობით, იდეის პირველადი პროტოტიპები შექმნეს. საერთო ჯამში სტარტაპში 19 საინტერესო პროექტი შეიქმნა, მათ შორის ,,კვარკი“ – ბურთი რომელიც ნავიგაციაში გვეხმარება.

პროექტის ავტორები არიან სან დიეგოს სახელმწიფო უნივერსიტეტის სტუდენტები, ლანა რეხვიაშვილი და ანა ლომაშვილი, ასევე, თბილისის სახელმწიფო უნივერსიტეტის სტუდენტი, ეკატერინე დადიანი. გოგონებმა ერთმანეთი 2015 წლის ილიაუნის ჰაკათონზე გაიცნეს და მას შემდეგ არაერთ პროექტსა თუ კონკურსში მიუღიათ ერთად მონაწილეობა. მათ შორის აღსანიშნავია ,,ტედიბოტი“,  რომელიც შარშან საქართველოში 5 საუკეთესო კომპანიაში დაასახელეს SeedForum-ზე და საერთაშორისო ინვესტორთა კონფერენციაზეც იქნა წარდგენილი.

,,კვარკის“ იდეა კი გოგონებს, როგორც ლანამ ,,დოქტრინასთან“ საუბარში აღნიშნა, ხელოვნების სიყვარულმა შთააგონა, იდეა გაგვიჩნდა გამომდინარე იქიდან, რომ ძალიან გვიყვარს მუზეუმებში სიარული და ასეთი გიდის ყოლა ბევრად უფრო სასიამოვნოს გახდიდა ჩვენთვის ამ აქტივობას,“ –  აღნიშნავს იგი.

კვარკის ამჟამინდელი პროტოტიპს მცირე ზომის სამართავი პულტი აქვს, რომლის მეშვეობითაც მომხმარებელს შეჰყავს მისთვის სასურველი ნივთისა თუ ადგილის პარამეტრი. პულტი იღებს ბრძანებას და გადასცემს „კვარკს“, რომელიც ამ დროს დგას თავის პლატფორმაზე და იტენება. ბრძანების მიღებამდე „კვარკი“ ლურჯია, ბრძანების მიღების შემდეგ ფერს იცვლის და მწვანდება, ბრძანების შესრულების შემდეგ კი, როცა სასურველ ადგილს ან ნივთს მიაგნებს, წითლდება. კვარკი წითელია მანამ, სანამ მომხმარებელი არ მივა დანიშნულების ადგილას, შემდეგ კი უფერულდება. ფერის ცვლილება ამარტივებს მომხმარებელსა და „კვარკს“ შორის კომუნიკაციას.

საინტერესოა თვითონ სახელწოდებაც, რომელიც რა თქმა უნდა კვლავ ახალგაზრდა გამომგონებლების ინტერესის სფეროდან გამომდინარეობს, ზოგადად კვარკი არის ფუნდამენტური ნაწილაკი, რომელისგანაც სამყაროა შექმნილი, ,,კვარკი ერთერთი მცირე ზომის ელემენტალური ნაწილაკია და რადგან ჩვენი ბურთიც პატარა ზომისაა გადავწყვიტეთ  სწორედ ასე დაგვერქმია მისთვის -აღნიშნა ლანამ.

ამჟამად გოგონებს ტექნოპარკის დემოდღეზე ჰქონდათ ,,კვარკი“ წარდგენილი და გრანტის აპლიკაციის შევსებასაც გეგმავენ, რათა მომავალში განავითარონ მისი პროტოტიპი.  მათ ასევე სხვადასხვა აქსელერატორისგანაც მიიღეს შეთავაზებები, მაგრამ,  სტუდენტური დატვირთვიდან გამომდინარე, საბოლოო გადაწყვეტილების მიღებისგან ჯერჯერობოთ თავს იკავებენ.

გთავაზობთ ,,კვარკის“ სადემონსტრაციო ვიდეოს:

 

 

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

 

სრულად ნახვა
გამოგონება - ინოვაციამედიცინასაქართველო

ქართველი ახალგაზრდების გამოგონება, რომელიც პაციენტებს ინსულტის შემდეგ რეაბილიტაციაში დაეხმარება

           ილიას სახელმწიფო უნივერსიტეტმა და ილიაუნის სამრეწველო ინოვაციების ლაბორატორიამ (FabLab Iliauni),  გლობალური მეწარმეობის კვირეულის ფარგლებში, 2016 წლის ნოემბერში ჩაატარა მეიქათონი – „შენი სტარტაპიდეა რეალობაში“, რომლის ფარგლებშიც გამარჯვებული პროექტი გახდა ხელთათმანი, რომელიც პაციენტს ინსულტის შემდეგ რეაბილიტაციაში ეხმარება.

          პროექტის ავტორი ორი ქართველი ახალგაზრდა, ძმები – გიორგი და დიმიტრი ცხოვრებაძეები არიან.  19 წლის დიმიტრი მასაჩუსეტსის ტექნოლოგიების ინსტიტუტის (MIT) ელექტროინჟინერიისა და კომპიუტერული მეცნიერებების ფაკულტეტის სტუდენტია, ხოლო გიორგის სულ მალე 18 წელი უსრულდება და  თავისუფალი უნივერსიტეტის კომპიუტერული მეცნიერებებისა და მათემატიკის სკოლაში (MACs) სწავლობს.

როგორც გიორგიმ ,,დოქტრინასთან“ საუბარში აღნიშნა, ხელთათმანის შექმნის იდეა სწორედ იმ პერიოდში მოუვიდა, როდესაც მეიქათონი ტარდებოდა ილიაუნიში, შემდეგ ძმებმა ერთად დაამუშავეს იდეა, რომელმაც კოპეტენტური ჟიურის მოწონებაც დაიმსახურა.

აღნიშნული ხელსაწყო შექმნილია ადამიანებისთვის, რომლებიც ინსულტის შემდეგ რეაბილიტაციას საჭიროებენ. სტატისტიკურად, წელიწადში საშუალოდ 15 მილიონ ადამიანს ემართება ინსულტი, რის შემდეგაც პაციენტი, როგორც წესი, კარგავს კიდურების მოძრაობის უნარს და საჭიროებს ხელახლა აღიდგინოს მოძრაობის უნარი, რომელიც ქვეითდება ინსულტის დროს. მოძრაობის უნარის დაბრუნებას რამდენიმე თვე სჭირდება, რაც ასევე საკმაოდ დიდ თანხებთან არის დაკავშირებული (აღემატება 10 000 აშშ დოლარს). ქართველი გამომგონებლების მიერ შექმნილი ხელთათმანის თვითღირებულება კი 150 დოლარს არ გადააჭარბებს.

ხელთათმანის გამოყენება შემდეგნაირად ხდება – პაციენტი იკეთებს ხელთათმანს დაზიანებულ ხელზე და მეორე ხელით სიმულაციაში ასრულებს სახალისო დავალებებს. სენსორი აღიქვამს მოძრაობას და ცდილობს იგივე მოძრაობა გააკეთებინოს ხელთათმანსაც, შედეგად ხელთათმანი ეხმარება დაზიანებულ ხელს იგივე მოძრაობების გაკეთებაში. საბოლოო ჯამში პაციენტი ორივე  ხელს ერთნაირად ამოძრავებს, ხოლო ტვინი იწყებს კავშირების აღდგენას და მოძრაობის უნარიც უმჯობესდება.

გამარჯვებულები კომპანია ,,ბილაინმა“ უზრუნველყო 2017 წლის თებერვალში ესპანეთში გამართულ მობილური ტექნოლოგიების კონგრესზე დასწრების სრული დაფინანსებით. ,,გამარჯვების შემდეგ გავიარეთ აქსელერაცია და გავიმარჯვეთ დემო დღეზე ტექნოპარკში. თებერვლის ბოლოს კი მივემგზავრებით მობილური ტექნოლოგიების მსოფლიო კონგრესზე, სადაც წარვადგენთ ხელთათმანს და შევხვდებით პოტენციურ ინვესტორებსა და პარტნიორებს. ასევე, ახლახან დაგვასახელეს 10 საუკეთესო გუნდს შორის  ,,Jacobs International Startup Competition-ზე” და მარტის ბოლოს პროექტს წარვადგენთ გერმანიაშიც, სადაც ჩატარდება ფინალი, – აღნიშნა გიორგიმ.

ჯერჯერობით ხელთათმანის პროტოტიპი დამზადების პროცესშია, რის შემდეგაც რამდენიმე საავადმყოფოში, რომლებსაც უკვე აქვთ კონტაქტი ახალგაზრდებთან, მოხდება მათი გამოგონების უშუალოდ მკურნალობისას გამოყენება და დაკვირვება,  ,,დოქტრინა“ კი წარმატებებს უსურვებს მათ და ელის სასიამოვნო სიახლეებს მათგან!

 

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

 

 

 

 

 

სრულად ნახვა
გამოგონება - ინოვაციასაქართველო

საქართველოში 14 ახალი ფაბლაბი გაიხსნა

პროფესიულ სასწავლებელ ,,მერმისში“ სამრეწველო ინოვაციების ლაბორატორია გაიხსნა.

აღნიშნული ლაბორატორია ერთ-ერთია იმ ფაბლაბებიდან, რომლებიც საქართველოს ეკონომიკისა და მდგრადი განვითარების სამინისტროს ინოვაციებისა და ტექნოლოგიების სააგენტოს ხელშეწყობითა და განათლებისა და მეცნიერების სამინისტროს დაფინანსებით, საქართველოში არსებულ 14-მდე სახელმწიფო პროფესიულ სასწავლებელში გაიხსნა.

პროფესიული სასწავლებლების ბაზაზე შექმნილი ფაბლაბები ოფიციალურად ამოქმედდა როგორც თბილისში, ისე რეგიონებში (წალენჯიხა, მესტია, გურჯაანი, ახალციხე, ბათუმი, ქობულეთი, ქუთაისი, ფოთი, რუსთავი, ამბროლაური). აღნიშნული ლაბორატორიები  საქართველოს ფაბლაბების ქსელის წევრი გახდა.

ეკონომიკის სამინისტროს ინფორმაციით, სამრეწველო ინოვაციების ლაბორატორიების გახსნის ძირითადი მიზანი არის ის, რომ ახალგაზრდებს მიეცეს საშუალება შეძლონ საკუთარი იდეების   კონკრეტულ პროდუქტებში დაკონვერტირება, რომლებსაც შემდეგ გარკვეული კომერციული პერსპექტივა გააჩნიათ.

სამრეწველო ინოვაციების ლაბორატორია არის  უნიკალური სივრცე, რომელიც აღჭურვილია თანამედროვე კომპიუტერებით, პროგრამირებადი დანადგარებით, როგორიც არის ლაზერული მჭრელი, 3D პრინტერი, CNC პროგრამირებადი ჩარხი და სხვა. ის მორგებულია ნებისმიერ მომხმარებელზე და ხელს უწყობს იდეების გენერირებას. ამ სივრცეებში ხდება ახალი წამოწყებების სრულყოფა და ახალგაზრდა ინოვატორების იდეების რეალიზება.

ფაბლაბების მიზანია მსოფლიოს შესთავაზოს ცოდნაზე დაფუძნებული ეკონომიკის მშენებლობის თავისი უნიკალური მოდელი. მისი განვითარება მნიშვნელოვანია ქვეყნის ეკონომიკური წინსვლისათვის, ახალი სტარტაპბიზნესების ჩამოსაყალიბებლად და სამუშაო ადგილების შესაქმნელად.

საერთო ჯამში პროფესიული სასწავლებლის სტუდენტებს საშუალება მიეცემათ სასწავლებელში მიღებული ცოდნის დახმარებით შექმნან პრაქტიკული ნამუშევრები და პროდუქტები, რომლის შემდგომ კომერციალიზაციასაც მოახდენენ.

აღნიშნული 14 სამრეწველო ინოვაციური ლაბორატორიის გახსნის შემდგომ, საქართველოში, საერთო ჯამში, 22 ამ ტიპის ლაბორატორია ფუნქციონირებს, რაც უზრუნველყოფს იმას, რომ საქართველომ, მსოფლიო ფაბლაბების რეიტინგში,  ლაბორატორიების რაოდენობის მიხედვით, მე-10 ადგილზე გადაინაცვლოს.

 

წყარო: http://economy.ge/

მასალა მოამზადა: თამარ ტაბატაძემ
ახალგაზრდა ანალიტიკოსთა და მეცნიერთა დარბაზი ,,დოქტრინა”

 

სრულად ნახვა
გამოგონება - ინოვაცია

L’Oreal-მა თმის ჭკვიანი ჯაგრისი შექმნა

სილამაზის გიგანტმა  – L’Oreal-მა თმის ჭკვიანი, სენსორებით აღჭურვილი ჯაგრისი შექმნა.

Hair Coach-ს, რომელიც 200 აშშ დოლარი ეღირება, აქვს მიკროფონი, გიროსკოპი და აქსელერომეტრი. სავარცხელი ვიბრირებს, თუ თმას ძალიან უხეშად ივარცხნით.

ჯაგრისის მიკროფონი იწერს თმის მსხვრევის ხმას. სხვა სენსორები კი ქმნიან პროფილს, თუ როგორ ზრუნავს მფლობელი თმაზე.

ჯაგრისი მონაცემებს wi-fi-ს ან Bluetooth-ის საშუალებით აპლიკაციას გადასცემს. მოწყობილობა ამ ინფორმაციას თმის ხარისხის კონტროლისთვის იყენებს.

„გაოცდებით, როცა გაიგებთ, მსოფლიოში რამდენი ქალს აქვს თმის მსხვრევის პრობლემა, ერთ-ერთ უდიდეს გამოწვევას წარმოადგენს ის, რომ დავარცხნისას დარწმუნებულები ვიყოთ იმაში, რომ უხეშად არ ვივარცხნით და თმის ბოჭკოებს არ ვაზიანებთ, რაც, თავის მხრივ, თმის დაზიანებას იწვევს“ – აცხადებს L’Oreal-ის ვიცეპრეზიდენტი – გიუვ ბოლუჩი.

კომპანიის წარმომადგენლები მიიჩნევენ, რომ მათთვის, ვისთვისაც თმის სიჯანსაღე მნიშვნელოვანია, 200 დოლარი სრულიად მისაღები ფასია.

L’Oreal Hair Coach-ის შექმნაზე ბოლო 18 თვის მანძილზე პარტნიორ კომპანია “Kerastase and Withings -თან” ერთად მუშაობდა.  ჯაგრისი ერთჯერადი გამოყენების ბატარიაზე მუშაობს და დასატენი პორტი არ აქვს. მოწყობილობა წყალგამძლეა, თუმცა სრულიად წყალგაუმტარი არაა. Hair Coach ბაზარზე წლის ბოლოს გამოვა.

წყარო: BBC

მასალა მოამზადა: თამარ ტაბატაძემ
ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
გამოგონება - ინოვაციამედიცინა

მეცნიერებმა მედიკამენტების მწარმოებელი ხელოვნური ფოთოლი შექმნეს

ჰოლანდიელმა მეცნიერებმა ხელოვნური ფოთოლი შექმნეს, რომელსაც მედიკამენტების მწარმოებელი მინი ქარხნის ფუნქციის შესრულება შეუძლია. ეს გახლავთ უდიდესი წინ გადადგმული ნაბიჯი იმისაკენ, რომ მედიკამენტების წარმოება შესაძლებელი გახდეს ყველგან, სადაც მზის სინათლეა.

აღნიშნული გამოგონება აძლიერებს მცენარეთა უნარს, ფოტოსინთეზის საშუალებით იკვებონ. როგორც წესი, მზის სხივი ძალიან ცოტა ენერგიას გამოყოფს იმისათვის, რომ ქიიური რეაქცია საჭირო საწვავით მოამარაგოს.

ფოთლით ინსპირირებული მიკროქარხანა ძალიან თხელი არხების მქონე ლუმინისცირებული მზის კონცენტრატორების გამოყენებით მზის გამოსხივებას მიიღებს და მოლეკულებს მზის სინათლეზე გამოფენს.

„თეორიულად, ამ მოწყობილობის გამოყენება მზის ენერგიით მედიკამენტების შემადგენლობის მისაღებად ნებისმიერ ადგილასაა შესაძლებელი,“ – განაცხადა ეინდჰოვენის ტექნოლოგიის უნივერსიტეტის მეცნიერმა ტიმოთი ნოელმა.

მეცნიერები აცხადებენ, რომ აღნიშნული ტექნოლოგიის განვითარებით ერთ დღეს შესაძლებელი გახდება, მედიკამენტების ჯუნგლებში ან თუნდაც მარსზე  წარმოება.

მოწყობილობა, რომელიც სილიკონის რეზინისგან მზადდება, შესაძლოა მაშინაც კი ფუნქციონირებდეს, როცა დიფუზიური სინათლე არაა, რაც იმას ნიშნავს, რომ ის იმუშავებს მოღრუბლული ცის ქვეშაც. თუმცა, იმისათვის, რომ პროდუქტი კომერციული ღირებული გახდეს, დაახლოებით 5-10 წელია საჭირო.

ტიმოთი ნოელისა და მისი კოლეგების მიერ ჩატარებული კვლევის შედეგები ჟურნალ Angewandte Chemie-ში გამოქვეყნდა.

 

წყარო: Reuters

მასალა მოამზადა: თამარ ტაბატაძემ
ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
გამოგონება - ინოვაციამანქანათმშენებლობა

აშშ-ის ტრანსპორტის დეპარტამენტი ავტომწარმოებლებს მოსაუბრე ავტომობილების შექმნისკენ მოუწოდებს

აშშ-ის  ტრანსპორტის დეპარტამენტი აცხადებს, რომ საჭიროა ისეთი ავტომობილების შექმნა, რომლებსაც უსადენო ტექნოლოგიის საშუალებით ერთმანეთთან „საუბარი“ შეეძლებათ.

რეგულატორები, რომლებიც მიიჩნევენ, რომ ამ გზით ავარიების თავიდან აცილება გახდება შესაძლებელი, აცხადებენ, რომ ავტომწარმოებლებს ასეთი ავტომობილების შესაქმნელად სულ მცირე ოთხი წელი უნდა მისცენ.

საგზაო უსაფრთხოების ეროვნული ადმინისტრაციის (NHTSA) შეფასებით, მოსაუბრე მანქანები იმ ავტო საგზაო შემთხვევების რიცხვს, სადაც ალკოჰოლი მთავარი ფაქტორი არაა, 80 პროცენტით შეამცირებს, განსაკუთრებით გზაჯვარედინებითა და სავალი ნაწილის ზოლების შეცვლით განპირობებულ ავტოსაგზაო შემთხვევებს.

გასულ წელს აშშ-ში ავტომობილების 6,3 მილიონი ავარია მოხდა. NHTSA ოქტომბერში განაცხადა, რომ 2016 წლის პირველ  ნახევარში საგზაო შემთხვევების შედეგად დაღუპულთა რიცხვი 10 პროცენტით გაიზარდა.

მოსაუბრე მანქანები, მოკლე დიაპაზონის კომუნიკაციების გამოყენებით, მონაცემებს ადგილმდებარეობის, მიმართულების და სიჩქარის შესახებ სამასი მეტრის რადიუსში მდებარე ავტომობილებს გადასცემენ. ამ მონაცემების განახლება წუთში დაახლოებით 10-ჯერ ხდება.

საავტომობილო მწარმოებლების ალიანსი, რომელიც General Motors Co (GM.N), Toyota Motor Corp (7203.T), Volkswagen AG (VOWG_p.DE) და სხვა ავტომწარმოებლებს აერთიანებს, აცხადებს, რომ სისტემის დატესტვა უკვე მიმდინარეობს.

გაეროს ინფორმაციით, მსოფლიოს გზებზე ყოველწლიურად 1,3 მილიონი ადამიანი იღუპება და ეს რიცხვი მზარდია. 2010 წელს გაერო-მ გამოაცხადა საგზაო უსაფრთხოების მოქმედების დეკადა 2011-2020 წლებისათვის და მოუწოდა ქვეყნებს ამ პერიოდის განმავლობაში გაანახევრონ საგზაო შემთხვევებით გამოწვეული სიკვდილიანობა, შეიმუშავონ მოქმედების გეგმა და გაატარონ პრევენციული ზომები, რათა 2020 წლისათვის გზებზე სიკვდილიანობა 50%-ით შემცირდეს.

წყარო: Reuters

მასალა მოამზადა: თამარ ტაბატაძემ
ახალგაზრდა ანალიტიკოსთა და მეცნიერთა დარბაზი ,,დოქტრინა”

 

სრულად ნახვა
გამოგონება - ინოვაციასაქართველო

,,ვეფხისტყაოსანი“, როგორც სამაგიდო თამაში

ახლახან  ,,ბიბლუს გალერეაში” შედგა ვეფხისტყაოსნის სამაგიდო თამაშის პრეზენტაცია. ,,დოქტრინა“ გაესაუბრა თამაშის იდეის ავტორს, ახალგაზრდა კინომცოდნესა და ფილოლოგს, ლევან გელაშვილს, რომელმაც დაწვრილებით ისაუბრა აღნიშნული თამაშის იდეასა და სპეციფიკაზე.

 

– უპირველეს ყოვლისა,  საინტერესოა,  როგორ გაჩნდა ვეფხისტყაოსნის სამაგიდო თამაშის შექმნის იდეა და ქართულ რეალობაში არსებობდა თუ არა რაიმე წინაპირობა იმისთვის, რომ ეს პროექტი განხორციელებულიყო?

-იდეა გამიჩნდა თვითონ პოემიდან გამომდინარე, მთელი ქართული ლიტერატურა და კულტურა ,,ვეფხისტყაოსნის“ გარშემო ტრიალებს.  ,,ვეფხისტყაოსანი’’ ყველა ეპოქაში აქტუალური იყო. პოემის ზეპირად ცოდნის და კითხვის ტრადიცია, გაგრძელებათა გაგრძელებები, რომელიც ცალკე აღებული, პოემას ბევრად აღემატება. ,,ვეფხისტაოსანი“ იყო ჰიპერტექსტი ე. წ. სუპერ გუგლი, რომელშიც საუკუნეების განმავლობაში ადამიანები პასუხებს მათთვის საჭირო კითხვებზე პოულობდნენ; როგორ უნდა მეგობრობა, სიყვარული, რა არის ერთგულება. არ არსებობს საკითხი, რომელიც პოემაში არ იყოს მოცემული. პოემა არა მხოლოდ ლიტერატურულ, არამედ საზოგადოებრივ ცხოვრებაშიც აყალიბებდა გემოვნებას, მსოფლმხედველობას და რთულ ვითარებაში ზოგჯერ კომუნიკაციისა და მიმოწერის ყველაზე საიმედო საშუალებაც იყო. ომის დროს, ცენზურის პირობებში, მიმოწერისას  დახმარებისთვის წერილის დასაშიფრად ხშირად პოემის ტექსტს მიმართავდნენ.

საქართველოში პირველი ასეთი ლიტერატურული თამაში ილია ჭავჭავძის დროს დაიბეჭდა. ეს იყო აფორიზმების ლოტო. საბჭოთა პერიოდშიც არაერთხელ განხორციელდა ამ ლოტოს გამოცემა.  XX საუკუნეში, დროთა ფორმაციის შედეგად, საჭირო გახდა პოემის ხალხთან ურთიერთობის ახალი ინტერაქციული ფორმა. ,,ვეფხისტყაოსნის“ ლოტო სწორედ ასეთი მოვლენა იყო.

მიუხედავად მრავალსაუკუნოვანი პოპულარობისა, დღეს თანამედროვე სამყაროში მაინც საჭიროა ,,ვეფხისტყაოსნის’’ პოპულარიზაცია და თანამედროვე ინტერაქციულ გარემოში დაბრუნება. სამაგიდო თამაშები ტექსტის სიღრმისეულად გაგებისა და გათავისების  ძალიან კარგი საშუალებაა მთელს მსოფლიოში. ლიტერატურული სამაგიდო თამაში უნიკალურ შესაძლებლობებს იძლევა, რადგან უშუალოდ რუსთველისეულ სიტყვიერ სამყაროში ამოგზაურებს მოთამაშეს და მისი ბუნებრივი ნაწილი ხდება. ტექსტის შეცნობისათვის აუცილებელია, მკითხველის იდენტიფიკაცია მის რომელიმე გმირთან ან მთლიანად ამბავთან. ამ მხრივ დაფის თამაშებს დიდი შესაძლებლობები გააჩნია. გრაფიკულ-გამომსახველობითი და ტექსტური მხარე ახალი სინთეზური ვარიაციებით არის წარმოდგენილი. თამაშობ, ესე იგი მონაწილეობ ამბავში – მოგზაურობ ხელშესახებ სიტყვიერ გარემოში და აფორზმებით იხსნება იმ სამყაროს  კარი, რომელშიც  ორგანულ ნაწილად  იგრძნობ თავს.

-წამოწყებამ ძალიან მოკლე დროში შეძლო, რომ მრავალ ადამიანს მისდამი ინტერესი გამოეჩინა,  რას იტყვით  უშუალოდ თქვენი მიზნის შესახებ და ვისი ხელშეწყობით მოხერხდა ამ იდეის განხორციელება?

– იდეა შვიდი წლის წინ პროექტის სახით ჩამოვაყალიბე და რამდენიმე გამომცემლობას შევთავაზე, თუმცა თანამშრომლობა არ შედგა, მოგვიანებით ბავშვთა და ახალგაზრდობის განვითარების ფონდში კონკურსზე შევიტანე. კონკურსში გამაჯვების შემდეგ გამოცემა კი სწორედ ამ ფონდის ფინანსური მხარდაჭერით განხორციელდა.

-ძირითადად რომელი ასაკობრივი კატეგორიისათვის არის თამაში განკუთვნილი და როგორია წესები მოთამაშეებისთვის?

-თამაში ნებისმიერი ასაკის ადამიანს შეუძლია ითამაშოს, ვისაც უყვარს ,,ვეფხისტყაოსანი“ და სამაგიდო თამაშები.  ვეფხისტყაოსნის სამაგიდო თამაში რამდენიმე სკოლაში წარვადგინეთ. ბავშვებმა ხალისით ითამაშეს, რადგან თამაში სწავლის დამატებითი საშუალებაა, მისი მეშვეობით სწავლა დამღლელი საზეპიროებისგან თავისუფლდება და სახალისო შემეცნებითი პროცესი ხდება.  პოემაში მონაწილეობს 30 აფორიზმი, მათი ცოდნა საშუალებას აძლევს მოთამაშეს წინ გაიჭრას და გაიმარჯვოს. სამაგიდო თამაში მარათონული პრინციპზეა დამყარებული. იმარჯვებს ის, ვინც გადალახავს დაბრკოლებებს და პირველი მივა ფინიშთან. თუ მოთამაშეს სურს სხვა აფორიზმები გამოიყენოს, გამოცემას  მოყვება სარეზერვო აფორიზმები და გამოსაჭრელი ბარათები. ნებისმიერ მოთამაშეს შეუძლია მისთვის საინტერესო აფორიზმები ან ტაეპები დაამატოს თამაშს ბარათების სახით და გაამრავალფეროვნოს ის.

-ხომ არ იგეგმება თამაშის ელექტრონული ვერსიის შექმნაც?

-ელექტრონული ვერსიის შექმნის საწინააღდეგო არაფერი მაქვს, მაგრამ უნდა ითქვას რომ სამაგიდო თამაშები ელექტრონული კომპიუტერული თამშებისგან ერთ-ერთი მთავარი თვისებით განსხვავდება:  ეს არის მისი სოციალური თვისება. სამაგიდო თამაშს თამაშობ, ესე იგი მეგობრობ, რადგან გიწევს ურთიერთობა სხვა ადამიანებთან, ეჯიბრები მათ, მოიგებ ან წააგებ, უშუალო კომუნიკაციაში ხარ მათთან. მოზარდს უყალიბდება კოგნიტური უნარები და გადაწყვეტილების მიღებისთვის აუცილებელი დამოუკიდებელი თვისებები. კომპიუტერული თამაშები ამ მხრივ ასოციალური მოვლენაა, ეკრანთან მარტო დარჩენილი მონაწილეობ მულტიმედიურ მოვლენებში. არ გიწევს ურთიერთობა დანარჩენ ადამიანებთან. ამ მხრივ ის სრულიად ასოციალურია, თუნდაც ქსელში თამაშობდე სხვა ადამიანებთან ეს ურთიერთობა არის ვირტუალური.

-სად შეუძლიათ დაინტერესებულ პირებს, რომ შეიძინონ სამაგიდო თამაში?

-,,ვეფხისტყაოსნის“ სამაგიდო თამაში უკვე იყიდება თბილისსა და რეგიონებში არსებულ წიგნის მაღაზიებში.

დაბოლოს, ხომ არ უნდა ველოდოთ ამავე ტიპის თამაშების სერიის გამოშვებას,  როგორია თქვენი ამჟამინდელი სამომავლო გეგმები?

-სამომავლო გეგმები ,,ვეფხისტყაოსნის“ სამაგიდო თამაშის პოპულარიზაციასთან არის დაკავშირებული, რაც სხვადასხვა ტიპი კულტურულ აქტივობას მოიცავს, რომლებშიც ვგულისხმობ სხვადასხვა მიზნობრივ სივრცეებში თამაშის წარდგინებას.

მასალა მოამზადა: თამარ  დევდარიანმა
ახალგაზრდა ანალიტიკოსთა და მეცნიერთა დარბაზი ,,დოქტრინა”

 

 

 

 

 

 

 

სრულად ნახვა
1 32 33 34 35
Page 34 of 35