გამოგონება - ინოვაცია

 „Edvex-“ ქართული სტარტაპია, რომელიც ავტომობილის მფლობელებს, მანქანაზე რეკლამის განთავსების შემთხვევაში, გამომუშავების საშუალებას აძლევს, ხოლო ბიზნესის წარმომადგენლებს – სარეკლამო სივრცეს უქმნის. კომპანია „სტარტაპ საქართველოს“ ერთ–ერთი გამარჯვებულია.

„Edvex-ის” საქმიანობის სფეროს წარმოადგენს გარერეკლამა, კერძოდ, რეკლამა მანქანებზე. ეს არის ინოვაციური პლატფორმა, რომელიც ერთმანეთთან აკავშირებს მძღოლებსა და ბრენდებს. მსოფლიოში და კერძოდ, საქართველოში, გარერეკლამაზე მოთხოვნამ და ავტომობილების რაოდენობამ საგრძნობლად იმატა. ამავდროულად, რეკლამა მანქანებზე სხვა გარერეკლამის საშუალებებთან შედარებით, ყველაზე ეფექტური და თვალსაჩინოა. სწორედ ამიტომ გადაწყვიტეს „Edvex-ის” დაფუძნება.

ეს არის ორმხრივი შეთავაზება მძღოლებისთვის და ბრენდებისთვის. მათი სერვისით სარგებლობა შეუძლია ნებისმიერ კომპანიას, რომელსაც სურს გააკეთოს ეფექტური რეკლამა აბსოლუტურად ინოვაციური გზით. ასევე ნებისმიერ მძღოლს აქვს საშუალება გამოიმუშავოს დამატებითი შემოსავალი. ამისათვის საჭიროა მობილური აპლიკაციის ჩამოტვირთვა და რეგისტრაცია. ამჟამად, აპლიკაცია ანდროიდისთვისაა დამზადებული, მაგრამ უახლოეს მომავალში „iPhone“-ის მომხმარებლებისთვისაც იქნება ხელმისაწვდომი.

„Edvex-ის” მობილური აპლიკაცია მონიტორინგს გაუწევს მძღოლის გადაადგილებას და თანხას გავლილი მანძილის პროპორციულად დაურიცხავს. რაც შეეხება ბრენდებს, მათ შეეძლებათ ონლაინრეჟიმში, Live რუკაზე, თვალი ადევნონ დარეკლამებული ავტომობილების გადაადგილებას, მიიღონ დეტალური ინფორმაცია გავლილ მანძილზე და გაიგონ რამდენი ე.წ. ნახვა (სავარაუდოდ რამდენმა ადამიანმა ნახა რეკლამა) დააგროვა თითოეულმა ავტომობილმა.

მასალა მოამზადა: ლაშა ჯინჭარაძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

 Hand4Help-ი არის ქართველი ახალგაზრდების კიდევ ერთი წარმატებული პროექტი, რომელმაც შეძლო სტარტაპერი გუნდიდან ორგანიზაცია ჩამოეყალიბებინა. მათ შექმნეს ინოვაციური ხელის პროთეზი, რომელიც საკამოდ განსხვავდება უკვე არსებულისგან და რაც მთავარია, გუნდი უანგაროდ ეხმარება საზოგადოების იმ წევრებს, რომლებიც საჭიროებენ მას. ,,დოქტრინა“ გაესაუბრა გუნდის ერთ-ერთ წევრს  – გიორგი დიღმელაშვილს, რომელმაც მათი გეგმებისა და აღნიშნული პროთეზის შესახებ მოგვაწოდა ინფორმაცია.

Hand4help-ის გუნდი შედგება თავისუფალი და აგრარული უნივერსიტეტის სხვადასხვა ფაკულტეტის სტუდენტებისგან.  გიორგი დიღმელაშილი და გიორგი გაბრაშვილი აგრარული უნივერსიტეტის საინჟინრო სკოლის სტუდენტები არიან, ამავე ფაკულტეტზე სწავლობს მათი დიზაინერი, დავით კორძაია, გუნდის დანარჩენი წევრები – ვახტანგ ტაბატაძე (პროგრამისტი), დავით კვიციანი  და კობა ცერცვაძე თავისუფალი უნივერსიტეტის სკოლის სტუდენტები არიან, ლექსო ბიწაძე კი თბილისის სახელმწიფო უნივერსიტეტში სწავლობს.

იდეა გუნდის წევრებს საზოგადოების იმ წევრების პრობლემიდან გამომდინარე გაუჩნდა,  რომლებიც საჭიროებენ ხელის პროთეზს, გამომდინარე იქიდან, რომ თანამედროვე პროთეზებს ბევრი ნაკლი გააჩნიათ, ეს პიროვნებები ბევრ დაბრკოლებას აწყდებიან,  რაზეც გიორგიმ თავადვე ისაუბრა – ,,პროთეზების ფასი საშუალოდ 15 000 -100 000 $-მდე მერყეობს. ბავშვებისთვის კი ძირითადად არც მზადდება. არსებული პროთეზები, როგორც წესი, ნაკლებფუნქციური, რთულად გამოსაყენებელი მოწყობილობებია, რომლებიც სრულფასოვნად გამოყენებამდე საჭიროებენ 2-4 თვემდე ტრენინგს და ამასთანავე, საკმაოდ მძიმეა სატარებლად. მოკლედ რომ ვთქვათ, დიდი ხანია ამ სფეროში სიახლე არავის შეუტანია მაშინ, როცა პროდუქცია აშკარად საჭიროებს განახლებას“.
გუნდმა გადაწყვიტა პრობლემა 3D პრინტერის ტექნოლოგიის გამოყენებით მოეხსნა და შეექმნა ხელის მრავალფუქნციური და რაც მთავარია, დაბალდანახარჯიანი პროთეზი, რომლებიც ბავშვებისთვისაც იქნებოდა ხელმისაწვდომი. ,,ჩვენ გადავწყვიტეთ, გავცდეთ ბუნებრივი ხელის ფუნქციებს და ხელის პროთეზი გავხადოთ უფრო მაღალტექნოლოგიური, მომხმარებელი თვითონ ირჩევს რა სურს, რომ შეეძლოს მის პროთეზს, როგორ უნდა გამოიყურებოდეს იგი, შემდეგ კი,  ჩვენი ტექნიკური გუნდი უზრუნველყოფს მას. არ აქვს მნიშვნელობა სურვილს, ჩვენ შევძელით პროთეზით პიანინოზე დაკვრა, სმარტფონზე შეტყობინების აკრეფვა, პრეზენტაციის ჩატარება და ა.შ ეს ყველაფერი კი  იმისთვის, რომ როდესაც 2 ადამიანი შეხვდება ერთმანეთს საუბარი არ დაიწყოს ფრაზით თუ როგორ მოხდა ეს, და „რა სამწუხაროა“,  არამედ იმით თუ რამდენად კარგია აღნიშნული პროთეზი“ – აღნიშნა გიორგიმ.

გუნდმა პირველად ქუთაისის აკაკი წერეთლის უნივერსიტეტის მიერ ორგანიზებულ ჰაკათონში მიიღო მონაწილეობა და პირველი ადგილის მფლობელიც გახდა, მას მოჰყვა ევროპის ფონდის კონკურსი სოციალური საწარმოს დაარსების შესახებ, სადაც ასევე პირველი ადგილი მოიპოვა. ცოტა ხნის წინ კი, მათ საქართველოს ინოვაციების სააგენტოს მიერ ორგანიზებული ,,სტარტაპ საქართველოში” გაიმარჯვეს და მონაწილეობა მიიღეს კალოფორნიაში,  ,,სილიკონ ველიზე”, სადაც აღნიშნული პროექტით უცხოელი ინვესტორების წინაშეც წარსდგნენ.

Hand4help-ს სოციალური მისია აკისრია, სწორედ ამიტომ, გუნდმა საქართველოში დაარსა,,Hand4help Community“, ეს არის საზოგადოება რომელიც მიზნად ისახავს გააერთიანოს ადამიანები, ვისაც უშუალოდ სჭირდებათ დახმარება და ვისაც სურს, რომ დაეხმაროს სხვას, იქნება ეს უბრალოდ იდეებით, დიზაინით, პროდუქციის შექმნაში მონაწილეობის მიღებითა თუ მათ შესახებ ინფორმაციის გავრცელებით.

ორგანიზაცია იურიდიულად უკვე დარეგისტრირდა, თუმცა მათი საქმიანობა მოგებაზე გათვლილი არ არის, რადგან მოგებული დაფინანსებები და ინვესტიციები მთლიანად კოპანიის ამ ფორმით ჩამოყალიბებას მოხმარდა. ამჟამად კომპანია აწარმოების  ორ მოდელს, ერთი მათგანი არის სრულიად მაღალი ფუნქციებით აღჭურვილი პროთეზი,  რომლის გატანაც მსოფლიო ბაზარზე უკვე იგეგმება, მისი ღირებულება კი 1500$-ს შეადგენს, მეორე მოდელით ადამიანს მხოლოდ უბრალოდ ნივთების გადაადგილება შეუძლია, ამ პროთეზს გუნდი უკვე დიდი ხანია უანგაროდ გადასცემს მსურველებს, რომლებსაც მათთან დაკავშირება საიტის – Hand4help.com-ის მეშვეობით შეუძლიათ.

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

Garage48 თბილისშია – 48 საათიანი მხიარულება ამბიციური და ინოვაციური იდეების განხორციელებისთვის 21 აპრილს, 17:30 საათზე, სასტუმრო ,,რუმსში” სტარტს აიღებს და ,,Impact Hub Tbilisi-ში” გაგრძელდება 48-საათიანი ჰაკათონი, სადაც პროგრამისტები, დიზაინერები, მარკეტერები, მეწარმეები და პროექტმენეჯერები განავითარებენ კრეატიულ იდეებს და შექმნიან სამუშაო პროტოტიპებს.

ჰაკათონში მონაწილეობის მისაღებად უკვე დარეგისტრირდა 100-მდე მონაწილე, რომლებიც ორი დღის განმავლობაში ინტენსიურად იმუშავებენ როგორც ქართველ, ისე უცხოელ მენტორებთან ერთად. პროექტ ,,Garage48-ის” ადგილობრივი პარტნიორები არიან ,,Impact Hub Tbilisi”,,, თიბისი ბანკი” და ,,საქართველოს ინოვაციების და ტექნოლოგიების სააგენტო”. სამი გამარჯვებული გუნდი საჩუქრად მიიღებს ,,იმფაქთ ჰაბის” ერთთვიან ულიმიტო წევრობას და პრიზებს თიბისი ბანკისგან.

,,Garage48″ ღონისძიებების სერიაა, რომელიც 2010 წლის აპრილში ესტონეთში დაიწყო და მას შემდეგ სხვადასხვა ქვეყნაში ტარდება. წლების განმავლობაში, პროექტის ფარგლებში არაერთი საინტერესო იდეა განხორციელდა და შეიქმნა რამდენიმე წარმატებული სტარტაპი. პროექტის მიზანია მეწარმეობისა და სტარტაპკულტურის ხელშეწყობა, ასევე, ადამიანებისთვის იმის სწავლება, თუ როგორ შეიძლება მოკლე ვადებში იდეა პროტოტიპად აქციონ.

დღის წესრიგი: პარასკევი (@Rooms Hotel) 17:30 – რეგისტრაცია, ნეთვორქინგი, ყავა 18:00 – მისასალმებელი სიტყვა 18:15 – იდეების წარდგენა (90 წამი თითო იდეა) 20:00 – შესვენება 20:15 – იდეების წარდგენა (გაგრძელება) 20:45 – გუნდების შექმნა, ყველა ირჩევს სასურველ იდეას 21:00 – გუნდების მუშაობა იწყება! შაბათი (@Impact Hub Tbilisi) 09:00 – ყავა და მსუბუქი საუზმე 10:00 – ჩექფოინთი #1 11:00 – მენტორების შემოვლა 13:00 – ლანჩი 14:00 – “როგორ ვესაუბროთ ინვესტორებს” – Yrjö Ojasaar, მეწარმე Startup Wise Guys 15:00 – მუშაობა გრძელდება 18:00 – ჩექფოინთი #2 & რეპეტიცია 19:00 – ვახშამი 20:00 – მუშაობა გრძელდება კვირა (@Impact Hub Tbilisi) 09:00 – ყავა და მსუბუქი საუზმე 10:00 – ჩექფოინთი #3 11:00 – Pitch drill სესია #1 13:00 – ლანჩი 14:00 – Pitch drill სესია #2 17:00 – ყავის შესვენება 17:30 – დასკვნითი ღონისძიება & LIVE სტრიმი 20:00 – ჟიურის მსჯელობა 20:30 – გამარჯვებულების გამოვლენა

კონტაქტი: ქეთევან ებანოიძე ტელ: 577425611 ელ.ფოსტა:ketevan.ebanoidze@impacthub.net მისამართი: ნინოშვილის №8, თბილისი

ახალგაზრდა ანალიტიკოსთა და მეცნიერთა დარბაზი – ,,დოქტრინა”

 8 აპრილს ,,ტექნოპარკში” ჩატარდა ,,Microsoft-ის” მიერ ორგანიზებული ImagineCup-ის დემოდღე, რომელშიც მონაწილეობა ხუთმა სტარტაპერმა გუნდმა მიიღო. ერთ–ერთი მათგანია – ,,Holo“, რომელიც სრულიად ინოვაციურ პროდუქტს ქმნის სერვისების რეკლამირებისთვის. ,,დოქტრინა“ გაესაუბრა იდეის ერთ-ერთ ავტორს – სანდრო ჯავახიშვილს, რომელმაც დაწვრილებით ისაუბრა სტარტაპის შესახებ.

გუნდი სამი წევრისგან შედგება, 19 წლის სანდრო ჯავახიშვილი და  20 წლის ნიკა ბერეკაშვილი სკოლის პერიოდიდან მეგობრობენ, გუნდის შედარებით ახალი წევრი კი  – 19 წლის შოთა ბაწაშვილია, რომელიც საქართველოს უნივერსიტეტის ბიზნესადმინისტრირების ფაკულტეტზე სწავლობს. სანდრო თავისუფალ დროს ელექტრონული მუსიკის შექმნით არის დაკავებული, ნიკა კი გრაფიკული დიზაინერია. მიუხედავად ასაკისა, შოთას დიდი გამოცდილება აქვს გაყიდვების მიმართულებით, რაც აუცილებელი აღმოჩნდა გუნდისთვისაც.

სტარტაპის შექმნის იდეა დაახლოებით ერთი წლის წინ სანდროსა და ნიკას გაუჩნდათ,  ,,შექმნის დღიდან, ფაქტობრივად, ყოველ დღე „ჰოლოზე“ ვმუშაობთ, რადგან დარწმუნებულები ვართ, რომ წარმატებული პროექტი იქნება. მუშაობის განმავლობაში არაერთი ექსპერიმენტი ჩავატარეთ ბიზნესმოდელიც არაერთხელ შევცვალეთ, საბოლოოდ კი,  გადავწყვიტეთ ჰოლოგრამა სარეკლამო ბაზარზე დაგვენერგა და ბოლო რამდენიმე თვეც ამას დავუთმეთ,“ – აღნიშნა სანდრომ.

გუნდი გეგმავს ქართულ ბაზარზე ახალი ტიპის აუთდორ სარეკლამო სისტემის დანერგვას, რომელიც სხვადასხვა კომპანიას ჰოლოგრამების (სივრცითი გამოსახულება) მეშვეობით საშუალებას მისცემს პროდუქტისა და სერვისების უფრო ეფექტური გზით რეკლამირება მოახდინონ ანუ ,,ჰოლო“ არის კომპანია, რომელიც,  მოწყობილობის შექმნის გზით, ნებისმიერ გრაფიკულ ვიზუალს სივრცულ გამოსახულებად გარდაქმნის. იხ.ვიდეო:

გუნდმა უკვე არაერთ ღონისძიებაში მიიღო მონაწილოება, მათ შორისაა ბიზნესფორუმი, მეცნიერების და ინოვაციების თბილისის ფესტივალი, განათლების საერთაშორისო გამოფენა და სხვა, მათ  მოახერხეს რამდენიმე ადგილობრივი ინვესტორის დაინტერესებაც და ამ ეტაპზე მიმდინარეობს რამდენიმე მოლაპარაკება მათთან. თუმცა, სანამ აქამდე მივიდოდნენ გუნდის წევრებს მრავალი დაბრკოლების გადალახვა მოუწიათ, რაზეც სანდრომ გულღიად ისაუბრა ,,ყველაზე დიდი პრობლემა რასაც ამ ერთი წლის განმავლობაში გადავაწყდით უნდობლობა იყო; ყოფილა შემთხვევები, როდესაც სწორედ ასაკიდან გამომდინარე გამოუცხადებიათ ჩვენთვის უნდობლობა. იყო მომენტებიც, როცა ტრადიციულ ქართულ დამოკიდებულებასაც ვაწყდებოდით – სიახლის, რისკის შიშს და ა.შ. ქართული სტარტაპგარემო თავისუფლად აძლევს ნებისმიერ სტარტაპერს იმის შესაძლებლობას, რომ იდეა განახორციელოს, თუკი ავტორს იდეის სჯერა და დათმობას არ აპირებს”.

ამ ეტაპზე გუნდი აქტიურად თანამშრომლობს ილიას სახელმწიფო უნივერსიტეტთან, კონკრეტულად ისინი არიან პრეაქსელერატორ ,,Zoomout”-ის წევრები და მათი მენტორების დახმარებით აგრძელებენ საქმიანობას. სამომავლოდ  გეგმებს კი რაც შეეხება, მათ დიდი სურვილი აქვთ ჰოლოგრამები არა მარტო ქართულ სარეკლამო სივრცეში დანერგონ, არამედ განავითარონ ტექნოლოგია და  სხვა სფეროებშიც შეიტანონ ის, რისი შესაძლებლობაც ნამდვილად არის. ,,ამ ეტაპზე ჰოლოგრამა ტრენდული სფეროა მსოფლიოსთვის და ახლა ვითარდება. შესაბამისი ძალისხმევით გვინდა ამ განვითარებაში ჩვენი წვლილის შეტანაც და დარწმუნებულები ვართ, რომ წარმატებას მივაღწევთ,“- აღნიშნა სანდრომ დასასრულს.

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

ილიას სახელმწიფო უნივერსიტეტში 11-12 მარტს ჩატარდა ,,Weekend Accelerator-ი“, სადაც ახალგაზრდებმა შეზღუდულ დროში მოახდინეს ინოვაციური ბიზნეს იდეების გენერირება და პრეზენტაცია. პროექტის გამარჯვებული გუნდი გახდა, Signoutსტარტაპი, რომელიც ქმნის ინოვაციურ დასაქმების პლატფორმას. ,,დოქტრინა“ გაესაუბრა იდეის ერთ-ერთ ავტორს – დავით  რუტკაუსკასს, რომელმაც ისაუბრა მათი წამოწყებისა და სამომავლო გეგმების შესახებ.

პროექტ ,,SignOut-ის” იდეის ავტორები გახლავთ დავით რუტკაუსკასი და ნინი ზენაიშვილი, ორივე მათგანი ილიას სახელმწიფო უნივერსიტეტის მეოთხე კურსის სტუდენტია. ნინი ამჟამად მუშაობს პროექტზე ,,Sadari”, რომელიც გახლავთ საძიებო-სანავიგაციო მობილური აპლიკაცია და პარალელურად Anti Gaming Studio-შიც ახორციელებს კომპიუტერულ თამაშს. მათი  გუნდი Signout-ის სახელით უკვე რამდნეიმე მეიქათონსა და სტარტაპკვირეულზე გამოვიდა, ამჟამად კი, მუშაობს საკმაოდ თემატურ და აქტუალურ პრობლემაზე, რომელიც სტუდენტების დასაქმებას ეხება და არა მარტო სტუდენტების.

პროექტი ,,SingOut-ი” ერთ-ერთი მეიქათონის დროს ჩამოყალიბდა  და მასზე მუშაობა ჯერაც არ დამთავრებულა და ჩამოყალიბების ეტაპზეა.  როგორც უკვე აღვნიშნეთ, პროექტი განსაკუთრებით სტუდენტების დასაქმებას ეხება, რაზეც დავითმა ,,დოქტრინასთან“ ინტერვიუშიც ისაუბრა ,,უპირველეს ყოვლისა, პროექტი აერთიანებს სამ სხვადასხვა იდეას, რომლებიც ჩვენი, როგორც სტუდენტების, ყოველდღიური პრობლემებიდან წამოვიდა. მთავარი პრობლება არის ზუსტად ის, რომ სტუდენტები ხშირად ვერ ახერხებენ სამუშაო და სასწავლო დროის ერთმანეთთან შეთავსებას, რის გამოც უწევთ ან ლექციების გაცდენა, ან სამუშაოზე უარის თქმა, ამიტომაც გვინდა შევქმნათ პლატფორმა, სადაც განთავსდება განცხადებები დროებითი სამუშაოების შესახებ, ეს იქნება პლატფორმა, მსგავსი ფრილანსერისა სადაც  მსურველს შესაძლებლობა ექნება იხილოს ყველა სახის რეალური ვაკანსია, რომელიც შესაძლოა ეხებოდეს სულაც ძაღლის გასეირნებას ან ნებისმიერი სახის დახმარებას, რომლისთვისაც  დამქირავებლები მზად არიან თანხა გადაიხადონ“.

როგორც ჩანს, პლატფორმას საქართველოში ჯერჯერობით ანალოგი არ ჰყავს და შესაბამისად, საკმაოდ აქტუალურიცაა, ჩვენი რეალობიდან გამომდინარე, დროთა განმავლობაში შეიქმნება ლოგოც და მომხმარებელს უკვე შეეძლება პლატფორმით სარგებლობა. ამის შემდეგ კი, გუნდი კიდევ უფრო მეტი იდეით აპირებს კარიერული მოღვაწობის გაგრძელებას.

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

,,დოქტრინა“ ქართველი ახალგაზრდების კიდევ ერთ წამოწყებაზე გთავაზობთ ინფორმაციას, ეს არის ორი გოგონას მიერ შექმნილი სამოსისა და ჩანთების ხაზი, რომელიც მომხმარებელს სრულიად განსხვავებული მასალის გამოყენებით შექმნილ პროდუქტს სთავაზობს. წამოწყება სულ რამდენიმე თვეა რაც არსებობს, თუმცა უკვე საკმაოდ პოპულარულია და ნელ-ნელა იმკვიდრებს თავს  ,,J&Sister-ის” სახელით.

,,J&Sister-ის” ხაზი დებს – ჯული და ელენე ცერცვაძეებს, ეკუთვნის. ელენე 22-ის, ხოლო  ჯული – 25  წლისაა, ორივე მათგანი საქართველოს ტექნიკური უნივერსიტეტის საინჟინრო ფაკულტეტის სტუდენტია და დიზაინერულ საქმიანობასთან ერთად, პარალელურად, საკუთარი პროფესიითაც მუშაობს.

როგორც თავად ამბობენ, გოგონები ჩანთების, ტანსაცმლის და აქსესუარების დიზაინს  ჯერ კიდევ სკოლის ასაკიდან ქმნიდნენ. მოგვიანებით კი, მას შემდეგ, რაც ელენემ ლაზერულ მჭრელთან მუშაობა და სხვადასხვა მასალის დამუშავება ისწავლა, თანდათან გაჩნდა სახლის დეკორის იდეაც, რომელიც ძირითადად ბავშვებისთვის განკუთვნილი პროდუქტის შექმნას გულისხმობდა, იქნებოდა ეს ხის თაროები, გასართობი დაფები თუ სხვა. დაახლოებით სამი თვის წინ კი, გოგონებს გაუჩნდათ იდეა, რომ ის მასალა, რომელსაც ელენე იყენებდა, აქსესუარების და დეტალების სახით გამოეყენებინათ ჩანთებსა და ტანისამოსშიც.

იდეის გაჩენის შემდეგ, სატესტოდ შეიკერა ზურგჩანთა, რომელსაც გოგონებმა სამკუთხედის ფორმის გამჭირვალე ორგანული მინა ჩააკერეს. როგორც ,,დოქტრინასთან“ საუბარში მათ აღნიშნეს, ორგანული მინა საკმაოდ მოსახერხებელია და ჩვეულებრივი მინის მსგავსად არ არის ადვილად მსხვრევადი, ვინაიდან მის შემადგენლობაში შედის პლასტმასი და როგორც პრაქტიკიდან ჩანს საკმაოდ კომფორტულიცაა ყოველდღიური გამოყენებისთვისაც. რაც მთავარია, ორგანული მინა, ისევე როგორც ხის დეტალები, განსხვავებულს ხდის აქსესუარებს და მოლოდინისამებრ, გამჭვირვალე დეტალმა თავისებური ეფექტი მოახდინა. საბოლოოდ კი,  ჩანთას დიდი გამოხმაურება მოჰყვა საზოგადოების მხრიდან და პირველივე დღეს გაიყიდა, რამაც გოგონებს სტიმული მისცა, რომ ამ ყველაფრისთვის ბიზნესის სახე მიეცათ და უფრო აქტიურად დაეწყოთ ახალ ჩანთებზე მუშაობა.

იმის გათვალისწინებით, რომ ჯერ მხოლოდ 2 თვეა, რაც ახალგაზრდებმა საქმიანობა დაიწყეს, არ ჰქონიათ სერიოზული წარდგენა საზოგადოების წინაშე, თუნდაც სტარტაპის სახით. თუმცა, რამდენჯერმე მიიღეს მონაწილეობა საქველოქმედო „ბაზრობებზე“. ამრიგად, როგორც თავად აღნიშნავენ, გზა იდეიდან პროდუქტამდე არ ყოფილა რთული და გრძელი, რადგან  ყველანაირი რესურსი გააჩნდათ საკუთარი მიზნების განსახორციელებლად და დიდი მონდომებით ძალიან მალე შეძლეს სახასიათო პროდუქტის შექმნაც.

სამომავლო გეგმებს რაც შეეხება, ახალგაზრდა დიზაინერებს  საკმაოდ ბევრი იდეა აქვთ ჩანთების, აქსესუარების და სახლის დეკორის მიმართულებით. მაგალითად გეგმავენ, რომ პროდუქციას შემატონ მამაკაცის ზურგჩანთები და ხელჩანთები, ოღონდ ამჯერად უკვე ხის დეტალებით.

ელენეს და ჯულის ჯერჯერობით მაღაზია და სახელოსნო არ აქვთ და პროდუქციას სოციალური ქსელის მეშვეობით ყიდიან, თუმცა, უახლოეს მომავალში გეგმავენ სახელოსნოს გახსნას, სადაც მომხმარებელი პროდუქციის დათვალიერებასა და შეძენასაც შეძლებს. აღსანიშნავია ისიც, რომ  ,,J&Sister-ის” პროდუქცია შეკვეთებზეც მუშაობს და ყველა მსურველს აქვს საშუალება ატაროს საკუთარი დიზაინით შექმნილი აქსესუარი თუ სამოსი.

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”