კვლევები

დღეში ერთი ან მეტი ჭიქა შავი ყავის მოხმარება გულის უკმარისობის რისკს ამცირებს. ამის შესახებ CNN-ი იტყობინება.

ტელეარხის ცნობით, ასეთ დასკვნამდე ამერიკის გულის ასოციაცია 3 მასშტაბური კვლევის შედეგების შეჯამების შემდეგ მივიდა. კვლევებში სულ 21 ათასი ამერიკელი მონაწილეობდა. ერთ-ერთი კვლევა 72 წლის განმავლობაში ტარდებოდა.

მეცნიერებმა დაადგინეს, რომ ყავის მსმელებს შორის გულის უკმარისობის რისკი 5-დან 12%-მდე ნაკლებია იმ ადამიანებთან შედარებით, ვინც ყავას არ სვამს. თუ ადამიანი დღეში 2 ჭიქა ყავას მიირთმევს, ეს მაჩვენებელი 30%-ს შეადგენს.

თუმცა, აღსანიშნავია, რომ სარგებელი მხოლოდ შავ, უშაქრო ყავას მოაქვს, ყოველგვარი დანამატის გარეშე. ამასთან, გულის უკმარისობის რისკს არც უკოფეინო ყავა ამცირებს. სპეციალისტები აღნიშნავენ, რომ კვლევის შედეგები მათთვის გასაკვირი აღმოჩნდა.

ამასთან, მნიშვნელოვანია ის, თუ როგორ ამზადებთ ყავას. ფილტრიანი ყავის აპარატებისგან განსხვავებით, ფრანგული პრესი, თურქული და ხსნადი ყავის მოსამზადებელი მოწყობილობები ვერ აკავებენ შენაერთს სახელწოდებით „კაფესტოლი“, რომელსაც ქოლესტეროლის დონის გაზრდა შეუძლია.

ახალგაზრდა ანალიტიკოსთა და მეცნიერთა დარბაზი ,,დოქტრინა”

გერმანელი მეცნიერების მიერ ჩატარებული ახალი კვლევის თანახმად, კორონავირუსი პანკრეასს ესხმის თავს და მის ინსულინწარმომქმნელ უჯრედებს აინფიცირებს და აზიანებს.

მეცნიერები ვარაუდობენ, რომ კვლევის დასკვნებმა, შესაძლოა, ხელი შეუწყოს იმის ახსნას, რატომ უვითარდებათ კოვიდინფიცირებულ პაციენტებს სისხლში შაქრის პრობლემები და რატომ ფიქსირდება ვირუსის შედეგად დიაბეტის განვითარების შემთხვევები.

პანკრეასს აქვს ორი ფუნქცია: საჭმლის მონელებისათვის მნიშვნელოვანი ფერმენტების წარმოება და ინსულინისა და გლუკაგონის ჰორმონების შექმნა და გამოყოფა, რომლებიც არეგულირებენ სისხლში შაქრის დონეს. Nature Metabolism- ში გამოქვეყნებულ ნაშრომში მკვლევარები აცხადებენ, რომ ლაბორატორიული და გაკვეთის შედეგად ჩატარებული კვლევების თანახმად, ახალი კორონავირუსი აინფიცირებს პანკრეასის უჯრედებს, რომლებიც მონაწილეობენ ამ პროცესებში : ცვლის მათ ფორმას, არღვევს მათ გენებს და აფერხებს მათ ფუნქციონირებას.

ახალი მონაცემებით, “ადამიანის  კუჭქვეშა ჯირკვალი, (პანკრეასი) იდენტიფიცირებულია, როგორც SARS-CoV-2 ინფექციის სამიზნე და ნავარაუდებია, რომ ბეტაუჯრედული ინფექცია შესაძლოა ხელს უწყობდეს COVID-19-ით ინფიცირებულ პაციენტებში დაფიქსირებულ მეტაბოლური დისრეგულაციის განვითარებას.

წყარო : reuters.com

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი ,,დოქტრინა”

ამერიკული ფარმაცევტული კომპანია Novavax-ის ვაქცინამ გაერთიანებულ სამეფოში ჩატარებული კლინიკური ცდების მე-3 ფაზაში კორონავირუსის წინააღმდეგ 89.3%-იანი ეფექტურობა აჩვენა.

ქვეყანას Novavax-ის ვაქცინის 60 მილიონი დოზა აქვს შეკვეთილი, რომელსაც იქ მიმდინარე წლის მეორე ნახევარში შეიტანენ, იმ შემთხვევაში, თუკი მედიკამენტებისა და ჯანდაცვის პროდუქტების მარეგულირებელი სააგენტო მას გამოყენებისთვის დაამტკიცებს.

ვაქცინამ კორონავირუსის თავდაპირველად გავრცელებული ვარიანტის მიმართ 95.6%-იანი ეფექტურობა აჩვენა, ე.წ. „ბრიტანული ვარიანტის“ მიმართ – 85.6%-ი, მთლიანობაში კი – 89.3%-ი. რაც შეეხება ცდის სამხრეთ აფრიკულ ნაწილს, სადაც შემთხვევების უმეტესი ნაწილი ვირუსის ე.წ. „სამხრეთ აფრიკული“ ვარიანტი იყო, ვაქცინამ 60%-იანი ეფექტურობა აჩვენა.

კლინიკურ ცდებში 18-დან-84 წლამდე 15 000-ზე მეტი ადამიანი მონაწილეობდა, მათი 27%-ი 65 წელს გადაცილებული იყო.

გაერთიანებულ სამეფოში, გადაუდებელი გამოყენებისთვის, დღემდე სამი ვაქცინაა დამტკიცებული : Oxford University-სა და AstraZeneca-ს ერთობლივად შექმნილა ვაქცინა, Pfizer-BioNTech-ის ვაქცინა დაკომპანია Moderna-ს ვაქცინა.

წყარო : BBC

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი ,,დოქტრინა”

ნორვეგიაში ვარაუდობენ, რომ კორონავირუსის საწინააღმდეგო ვაქცინაცია მძიმე დაავადების მქონე ძალიან ხანდაზმული ადამიანებისთვის, შესაძლოა, სარისკო იყოს.

გამოცემა Bloomberg-ის ინფორმაციით, ნორვეგიის საზოგადოებრივი ჯანდაცვის ინსტიტუტმა შესაბამისი განცხადება მას შემდეგ გააკეთა, რაც ვაქცინის პირველი დოზის მიღებიდან მცირე დროის გასვლის შემდეგ 23 ადამიანი გარდაიცვალა.

ნორვეგიის მედიკამენტების სააგენტოს ინფორმაციით, გარდაცვლილი ადამიანებიდან ჯერჯერობით 13-ის გვამის გაკვეთა განხორციელდა და მიღებული შედეგების თანახმად, ვაქცინაციისგან გამოწვეულმა გვერდითმა ეფექტებმა, სავარაუდოდ, სუსტი ჯანმრთელობისა მქონე ხანდაზმულ ადამიანებში მწვავე რეაქციები გამოიწვია.

„სუსტი ჯანმრთელობის მქონე ხანდაზმულ ადამიანებში, ვაქცინის შედარებით მსუბუქმა გვერდითმა ეფექტებმაც კი, როგორიცაა შეიძლება სერიოზული შედეგები გამოიწვიოს. იმ ადამიანებისთვის, რომლებსაც სიცოცხლის მცირე დრო აქვთ დარჩენილი, ვაქცინის სარგებელი შეიძლება უმნიშვნელო ან არარელევანტური იყოს,“-აცხადებენ ნორვეგიის საზოგადოებრივი ჯანმრთელობის ინსტიტუტში, თუმცა, მათივე განმარტებით, რეკომენდაცია არ ნიშნავს, რომ ახალგაზრდა, ჯანმრთელმა ადამიანებმა ვაქცინაციას თავი უნდა აარიდონ.

ნორვეგიაში კორონავირუსის საწინააღმდეგო ვაქცინაცია უმეტესად BioNTec/Pfizer-ის ვაქცინის გამოყენებით ხორციელდება, თუმცა უკვე მოქალაქეებს მიმდინარე თვის დასაწყისში დამტკიცებული  Moderna-ს ვაქცინითაც ცრიან. ამ დრომდე დაახლოებით 33 000 ადამიანია აცრილი. ნორვეგიამ ვაქცინაციის პროგრამა მაღალი რისკის მქონე პაციენტების აცრით დაიწყო.

აღსანიშნავია, რომ ჯერჯერობით საბოლოო დასკვნები არ არსებობს და კომპანიები BioNTec-ი და Pfizer-ი ნორვეგიის მარეგულირებელ ორგანოსთან ერთად გარდაცვალების შემთხვევების კვლევას განაგრძობენ. „ნორვეგიის მედიკამენტების სააგენტომ დაადგინა, რომ ვაქცონაციის ფარგლებში ჯერჯერობით დაფიქსირებული ინციდენტები საგანგაშო არ არის და მოლოდინებს შეესაბამება,“- აცხადებენ კომპანია Pfizer-ში.

ქვეყანა, სადაც უმეტესად BioNTec/Pfizer-ის ვაქცინის ყველაზე მეტი, 12 მილიონზე მეტი, დოზაა გამოყენებული, შეერთებული შტატებია, სადაც  ვაქცინისადმი ალერგიული რეაქციები იშვიათია. Bloomberg-ი აშშ-ის დაავადებათა კონტროლისა და პრევენციის ცენტრზე დაყრდნობით წერს, რომ აშშ-ში, 14-დან 23 დეკემბრამდე, ვაქცინის პირველი დოზა 1,9 მილიონ ადამიანს გაუკეთდა, მწვავე ალერგიული რეაქცია მათგან 21-ს გამოუვლინდა, რაც, საშუალოდ,  ყოველ ერთ მილიონ ადამიანზე 11,1 შემთხვევას ნიშნავს.

ერთ სულ მოსახლეზე აცრილი მოქალაქეების მიხედვით კი მსოფლიოში პირველ ადგილზე ისრაელია. ქვეყანაში, სადაც, დაახლოებით, 9 მილიონი ადამიანი ცხოვრობს, მოსახლეობის თითქმის მეოთხედმა Pfizer-BioNTech-ის ვაქცინის პირველი დოზა უკვე მიიღო და პირველადმა შედეგები აჩვენა, რომ ისრაელში, ადამიანთა იმ ჯგუფში, რომლებსაც ვაქცინაცია ჩაუტარდა, პირველი დოზის მიღებიდან ორი კვირის შემდეგ, COVID-19-ის დაინფიცირების მაჩვენებელმა კლება დაიწყო.

ისრაელის ჯანდაცვის უმსხვილესი პროვაიდერის, Clalit Health Services-ის მონაცემებით, ვაქცინის პირველი დოზის მიღებიდან 14 დღის შემდეგ, 60 წელს გადაცილებულ 200 000-კაციან ჯგუფში ინფექციის მაჩვენებელი 33 პროცენტით დაეცა მეორე, არავაქცინირებულ 200 000-კაციან ჯგუფთან შედარებით.

წყარო : bloomberg.com , wsj.com

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი ,,დოქტრინა”

ადამიანებს, რომლებსაც კოვიდ 19-ი გადატანილი აქვთ, ვირუსის მიმართ იმუნიტეტი, დიდი ალბათობით, სულ მცირე 5 თვის განმავლობაში აქვთ, თუმცა არსებობს იმის მტკიცებულება, რომ მათ ვირუსის ტარება და გავრცელება მაინც შეუძლიათ, – ამის შესახებ ბრიტანელი მეცნიერების მიერ ჩატარებულ კვლევაში – SIREN-შია აღნიშნული.

კვლევის წინასწარი შედეგების თანახმად, იმ ადამიანების რეინფიცირების შანსი, რომლებსაც კოვიდ 19-ის ანტისხეულები აქვთ, იშვიათია. კერძოდ, კვლევაში ჩართული 6 614 კოვიდგადატანილი პირიდან ხელმეორედ მხოლოდ 44 დაინფიცირდა, თუმცა ფაქტია, რომ 100 %-ით დაცული არავინაა და შესაბამისად, გარკვეული პერიოდის გასვლის შემდეგ, დაინფიცირების რისკი არსებობს.

კვლევის ავტორები ირწმუნებიან, რომ იმ ადამიანების ყელსა და ცხვირში, რომლებსაც ე.წ. ბუნებრივი იმუნიტეტი აქვთ, ანუ რომლებმაც ინფექცია უკვე გადაიტანეს, შესაძლოა კვლავ მოხვდეს ვირუსი და ადამიანებმა უნებლიედ გაავრცელონ ის.

ედინბურგის უნივერსიტეტის იმუნოლოგიისა და ინფექციური დაავადებების პროფესორმა  ელინორ რაილიმ კვლევაზე კომენტირებისას განაცხადა, რომ ეს მონაცემები კიდევ ერთხელ ამყარებს გზავნილს : ნებისმიერი ადამიანი სხვების დაინფიცირების პოტენციური წყაროა და ამიტომ, შესაბამისად უნდა იმოქმედოს.

წყარო :  reuters.com

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი ,,დოქტრინა”

მსოფლიოს სხვადასხვა ქვეყანაში ისტორიაში ყველაზე დიდი ვაქცინაციის კამპანია დაიწყო. „ბლუმბერგის“ ინფორმაციით, ბოლო მონაცემებით, 41 ქვეყანაში კორონავირუსის საწინააღმდეგო ვაქცინების 24 მილიონზე მეტი დოზა უკვე გამოიყენებს.

„ბლუმბერგის“ ცნობით, აშშ-ში, სადაც ვაქცინაციის პროგრამა 14 დეკემბერს დაიწყო,  ყველაზე მეტი, 7.7 ადამიანია აცრილი, ყოველ 100 სულ მოქალაქეზე აცრილთა რაოდენობით კი მსოფლიოში პირველ ადგილს ისრაელი იკავებს, მეორეზეა- არაბთა გაერთიანებული სამეფო, მესამეზე – ბაჰრეინი, მეოთხეზე კი – შეერთებული შტატები.

მსოფლიოს აღნიშნულ ქვეყნებში ვაქცინაცია, ჯერჯერობით, ამერიკული კომპანია Pfizer-ისა და გერმანული BioNTech-ის მიერ ერთობლივად შექმნილი, ამერიკული კომპანია Moderna– ს, ბრიტანული კომპანია AstraZeneca-სა და ოქსფორდის უნივერსიტეტის ერთობლივი ვაქცინით, ჩინური Sinopharm-ისა და რუსული „გამალეიას ინსტიტუტის“ ვაქცინებით ხორციელდება.

ბოლო მონაცემებით, მსოფლიოში, პანდემიის დაწყების დროიდან, კოვიდ 19-ით ინფიცირების 90 მილიონზე მეტი შემთხვევაა გამოვლენილი, აქედან გამოჯანმრთელებულია 64 მილიონზე მეტი და დაღუპულია 1.9 მილიონი ადამიანი.

წყარო : bloomberg.com

ახალგაზრდა ანალიტიკოსთა და მეცნიერთა დარბაზი ,,დოქტრინა”