ასტრონომია - კოსმოსი

პენტაგონში აცხადებენ, რომ ამოუცნობი მფრინავი ობიექტების ფოტოები და ვიდეოები, რომლებიც აშშ-ის საზღვაო ძალებმა გადაიღო, ავთენტურია.

მიუხედავად იმისა, რომ საზოგადოებაში მსგავს იდუმალ სანახაობებს, ზოგადად მოიხსენიებენ, როგორიც უცხოპლანეტელებს (ამოუცნობ მფრინავ ობიექტებს), თავდაცვის წრეებში უფრო თანამედროვე ტერმინია „დაუდგენელი საჰაერო ფენომენი“ (UAP) – და ეს არის ის, რასაც სადაზვერვო სამსახურები სერიოზულად აღიქვამენ.

რაც შეეხება ახლად დაფიქსირებულ ამოუცნობ ობიექტებს, ერთ-ერთი მათგანი პირამიდის ფორმისაა, მასთან ერთად კი კიდევ სამი ობიექტი მოძრაობს.

ობიექტები USS Russell-ის გემის ეკიპაჟმა 2019 წლის ზაფხულში სან-დიეგოს სანაპიროდან გადაიღო. ისინი ხომალდის მაღლა დაახლოებით 210 მეტრის სიმაღლეზე მდებარეობდნენ.

ობიექტების ამსახველი ფოტო და ვიდეომასალა ამერიკელმა კინორეჟისორმა, ჯერემი კორბელმა და რეპორტიორმა ჯორჯ კნაპმა მოიპოვეს.

„შემიძლია დავადასტურო, რომ მითითებული ფოტოები და ვიდეო კადრები გადაღებულია საზღვაო ძალების პერსონალის მიერ,“- განაცხადა პენტაგონის პრესსპიკერმა სიუზან გოფმა.

მისი თქმით, დაუდგენელი საჰაერო ფენომენის სამუშაო ჯგუფმა, რომლის მიზანი მსგავსი შემთხვევების გამოკვლევა და ნებისმიერი პოტენციური საფრთხის დროულად გამოვლენაა, ისინი მიმდინარე გამოკვლევებში შეიტანა.

წყარო : sciencealert.com

მასალა მოამზადა : თამარ ტაბატაძემ

ახალგაზრდა ანალიტიკოსთა და მეცნიერთა დარბაზი ,,დოქტრინა

არაბთა გაერთიანებული საამიროები აშშ-ში, „ნასას კანდიდატ ასტრონავტთა კლასში“ ტრენინგის გასავლელად პირველ ქალს აგზავნის.

27 წლის ნორა ალ-მატროოში მანქანათმშენებლობის კურსდამთავრებულია, რომელიც ამჟამად აბუ დაბის ნავთობის სამშენებლო კომპანიაში მუშაობს.

დუბაის მუჰამედ ბინ რაშიდის სახელობის კოსმოსური ცენტრის  (MBRSC) ინფორმაციით, ნორა ალ-მატროოში ერთ-ერთი იყო 4 300 აპლიკანტს შორის, რომელთა  სამეცნიერო შესაძლებლობები, განათლება და პრაქტიკული გამოცდილება, ასევე ფიზიკური, ფსიქოლოგიური და სამედიცინო მდგომარეობა შეაფასეს.

ნორა ალ-მატროოშთან ერთად აშშ-ში არაბთა გაერთიანებული საამიროებიდან კიდევ ერთი პირი მოჰამედ ალ-მოლა გაემგზავრება.

არაბთა გაერთიანებულმა საამიროებმა ეროვნული კოსმოსური პროგრამა 2017 წელს აამოქმედა. ქვეყანა კოსმოსურ პროგრამას საკუთარი სამეცნიერო და ტექნოლოგიური შესაძლებლობების განვითარებისა და ნავთობზე დამოკიდებულების შემცირებისთვის იყენებს.

მიმდინარე წლის თებერვალში არაბთა გაერთიანებული საამიროების ზონდმა პლანეტა მარსის ორბიტას მიაღწია. ქვეყანა 2024 წლისთვის მთვარემავალის გაშვებას გეგმავს.

წყარო : reuters.com

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი ,,დოქტრინა

SpaceX-მა საერთაშორისო კოსმოსურ სადგურზე ასტრონავტების ეკიპაჟი მეორეული, უკვე გამოყენებული რაკეტითა და კაფსულით გაგზავნა. Crew-2-ის მისიაში ევროპელი ასტრონავტიც მონაწილეობდა. რაკეტა ფლორიდაში მდებარე კენედის კოსმოსური ცენტრიდან აფრინდა.

Endeavour კვლავ ცაში აიჭრა – სამი სხვადასხვა ქვეყნის ოთხი ასტრონავტი Crew-2-ის მისიით საერთაშორისო კოსმოსური სადგურის გზას დაადგნენ – ხმამაღალი შეძახილებისა და აპლოდისმენტების ფონზე გამოაცხადა წამყვანმა.

რაკეტა Falcon 9 წარმატებით აფრინდა, რამდენიმე წუთის შემდეგ კი მას პირველი საფეხურის ბუსტერი გამოეყო და ტივტივაზე დაჯდა, რომელსაც Of Course I Still Love You ჰქვია. ეს ილონ მასკის კომპანიის მეოთხმოცე წარმატებული დაჯდომა იყო.

რაკეტის მეორე საფეხურზე მიმაგრებული Crew Dragon, რომელშიც ასტრონავტები არიან მოთავსებულები, რამდენიმე წუთის შემდეგ გავიდა ორბიტაზე და ამ წუთას მისი მთავარი მისია საერთაშორისო კოსმოსურ სადგურთან შეპირაპირებაა. კაფსულა ამას დაახლოებით 23,5 საათში შეძლებს.

Crew-ის გუნდი საერთაშორისო კოსმოსურ სადგურზე 6 თვეს დაჰყოფს. ამ პერიოდის განმავლობაში, მათ დაახლოებით 100 ექსპერიმენტი უნდა ჩაატარონ. ერთ-ერთ ასეთ კვლევას „ქსოვილის ჩიპები“ ეწოდება, რომლის მიზანია სხვადასხვა ტიპის უჯრედებისგან ადამიანის ორგანოების პატარა მოდელების შექმნა და ისეთი საკითხების შესწავლა, როგორებიცაა იმუნური სისტემის დაბერების პროცესი, თირკმლის ფუნქცია და კუნთების დაქვეითება.

ახალგაზრდა ანალიტიკოსთა და მეცნიერთა დარბაზი ,,დოქტრინა

NASA-მ ოფიციალურად გამოაცხადა, რომ მათი ასტრონავტების მთვარეზე გასაყვან რაკეტას კომპანია SpaceX ააგებს.

2020 წელს, NASA-მ სამ კერძო კომპანიას შესთავაზა კონტრაქტი. ეს კომპანიები SpaceX, Dynetics და Blue Origin (რომლის დამფუძნებელი Amazon-ის მფლობელი ჯეფ ბეზოსია) იყო. მათი მოვალეობა ინოვაციური დაშვების სისტემის შექმნა იყო, რომელსაც პროგრამა Artemis-ის ფარგლებში NASA გამოიყენებდა და ასტრონავტებს მთვარის ზედაპირზე უსაფრთხოდ დააფრენდა.

ამ კვირას, 16 აპრილს, NASA-მ ოფიციალურად გამოაცხადა, რომ SpaceX-ის რაკეტა Starship-მა დანარჩენ ორ კონკურენტს აჯობა, რის შემდეგაც კომპანიამ NASA-სთან 2,9 მილიარდ დოლარიანი კონტრაქტი გააფორმა.

გადავწყვიტეთ, რომ ჩვენი ინტეგრირებული „ადამიანების დაშვების სისტემა“ (HLS) SpaceX-ს უნდა შეექმნა. გვჯერა, რომ NASA-სთან პარტნიორობით SpaceX-ს მისია Artemis-ის მისიის სრულყოფაში დაგვეხმარება… და მოვემზადებით უფრო დიდი ნახტომისთვის – მარსზე დაჯდომისთვის. – ლისა უოტსონ-მორგანი, HLS-ის პროგრამის მენეჯერი

პროგრამა Artemis-ის ფარგლებში, NASA ისტორიაში პირველად ქალსა და ფერადკანიან ადამიანს გაამგზავრებს მთვარეზე. ეს კი 1972 წლის შემდეგ ადამიანების პირველი ვიზიტი იქნება მთვარეზე.

ახალგაზრდა ანალიტიკოსთა და მეცნიერთა დარბაზი ,,დოქტრინა

ბოლო 17 წლის განმავლობაში, ასტეროიდი 99942 აპოფიზი მუდმივად გვახსენებდა ფაქტს, რომ კოსმოსში ქაოტურად არსებული გიგანტური ქვები დედამიწას, შესაძლოა, ნებისმიერ დროს შეეჯახოს და აქამდე არნახულად დიდი კრიზისიც გამოიწვიოს. მიუხედავად იმისა, რომ დედამიწასთან ახლოს მყოფი ობიექტები კოსმოსში უხვადაა, ახალ კვლევებზე დაყრდნობით, შეგვიძლია ვთქვათ, რომ ასტეროიდი აპოფიზი მათ შორის არაა. მომდევნო 100 წელიწადი მაინც.

მეცნიერებმა დაკვირვებები მარტის დასაწყისში ჩაატარეს, როდესაც გიგანტური ასტეროიდი დედამიწის გრავიტაციამ შეაქანა. ამ პროცესმა მკვლევრებს 2068 წელს მოსალოდნელი ასტეროიდისა და დედამიწის შეჯახების რისკების უკეთ შესწავლის საშუალება მისცა. ამერიკისა და ევროპის კოსმოსურმა სააგენტოებმა (NASA და ESA) ეს სახიფათო ქვა რისკ-ჯგუფიდან ოფიციალურად ამოიღეს.

ასტეროიდი აპოფიზის დიამეტრი დაახლოებით 340 მეტრია. როდესაც ასტრონომებმა ის პირველად აღმოაჩინეს, მალევე დაადგინეს, რომ ის დედამიწასთან რამდენჯერმე მოუახლოვდებოდა, კერძოდ, 2029, 2036 და 2068 წლებში. ასტეროიდი 2029 წლის 13 აპრილს დაახლოებით 35 000 კილომეტრის დაშორებით ჩაუფრენს დედამიწას. იმის გამო, რომ ჩვენი პლანეტის გრავიტაცია დიდ გავლენას ახდენს მის მოძრაობაზე, მკვლევრები შეჯახებას 2068 წლისთვის არ გამორიცხავდნენ.

2068 წლის შეჯახება გამოირიცხა და ჩვენი გამოთვლები მომდევნო 100 წელი არანაირი შეჯახების რისკს არ პროგნოზირებს, – ამბობს ნასას დედამიწასთან ახლოს მყოფი ობიექტების ცენტრის მკვლევარი დევიდ ფარნოკია.

აპოფიზის რადიო და ოპტიკური დაკვირვებებმა მეცნიერებს ამ სახიფათო ობიექტის შესახებ უფრო მეტი ინფორმაცია მიაწოდა. 6 მარტს გიგანტურმა ქვამ დედამიწას 16,9 მილიონი კილომეტრის დაშორებით ჩაუფრინა (რაც საკმაოდ უსაფრთხო დისტანციაა). ამ დროს მეცნიერებმა მოახერხეს და უკიდურესად მაღალი გარჩევადობის მასალა მოიპოვეს – 38,75 მეტრი თითო პიქსელზე. 2029 წელს კი იმდენად ახლოს ჩაიფრენს, რომ ასტეროიდი შეუიარაღებელი თვალითაც კი გამოჩნდება.

ახალგაზრდა ანალიტიკოსთა და მეცნიერთა დარბაზი ,,დოქტრინა

სპეციალისტებმა კოსმოსიდან დაბრუნებული ღვინის შესწავლის წინასწარი შედეგები გაასაჯაროვეს. ამის შესახებ Forbes-ი წერს.

გამოცემის ინფორმაციით, საუბარი 2000 წლის მოსავლის 12 ბოთლ ფრანგულ ღვინოზეა, რომელიც 2019 წელს საერთაშორისო კოსმოსურ სადგურზე SpaceX-ის რაკეტით მოხვდა. ბოთლები სადგურზე 438 დღისა და 19 საათის განმავლობაში ინახებოდა, 2021 წლის 14 იანვარს კი ღვინო დედამიწაზე SpaceX Dragon-ის კაფსულით დააბრუნეს, რის შემდეგაც მისი დეგუსტაცია გაიმართა. სპეციალისტებმა სასმელი იგივე წლის მოსავლის ღვინოს შეადარეს, რომელიც დედამიწაზე ინახებოდა.

ახლა მეცნიერები სწავლობენ, რა გავლენა მოახდინა კოსმოსში გატარებულმა დრომ ღვინოზე. მათ უკვე დაადგინეს, რომ ღვინომ ფერი შეიცვალა – უფრო ბაცი გახდა. მათი თქმით, შეიცვალა ღვინის გემოც.

„ორივე არაჩვეულებრივია, მაგრამ დედამიწაზე დარჩენილი ღვინის ბუკეტი ბოლომდე არ არის გახსნილი. კოსმოსში ნამყოფ ღვინოში მეტი ყვავილოვანი ნოტია“, – ამბობს ღვინის კრიტიკოსი ჯეინ ენსონი.

კვლევის მეორე ეტაპზე სასმელში მომხდარ ცვლილებებს ლაბორატორიაში, მოლეკულურ დონეზე შეისწავლიან.

ახალგაზრდა ანალიტიკოსთა და მეცნიერთა დარბაზი ,,დოქტრინა

იაპონურმა კომპანია Astroscale-მა დედამიწის ორბიტის კოსმოსური ნაგვისგან გასაწმენდად ახალი სისტემა შეიმუშავა, რომელსაც მალე გამოცდის. ამის შესახებ CNN-ი იტყობინება.

ტელეარხის ცნობით, დღეს ბაიკონურის კოსმოდრომიდან აფრინდა რაკეტა, რომელზეც კომპანიის მოწყობილობაა მოთავსებული. 175-კილოგრამიან აპარატზე 17-კილოგრამიანი თანამგზავრია მიმაგრებული, რომლის ზედაპირზეც მაგნიტის ფილაა განთავსებული. კოსმოსში მოხვედრის შემდეგ, თანამგზავრი აპარატს გამოეყოფა, ის კი მაგნიტის მეშვეობით თანამგზავრის დედამიწის ორბიტიდან მოხსნას შეეცდება და პლანეტის მიმართულებით მისცემს ბიძგს. ამ პროცესის შედეგად თანამგზავრი დედამიწის ატმოსფეროში დაიწვება.

ტესტირება შემოდგომაზე დასრულდება და თუ პროექტი წარმატებული აღმოჩნდა, მომავალში ყველა თანამგზავრი მაგნიტის ფილით იქნება აღჭურვილი და მწყობრიდან გამოსვლის შემდეგ, მათი უტილიზაცია მარტივი იქნება.

ბოლო მონაცემებით, დედამიწის ორბიტაზე კოსმოსური ნაგვის წონა 9 ათას ტონას აჭარბებს. ეს „ნაგვის ღრუბელი“ ძველი თანამგზავრებისა და რაკეტების ნაწილებისგან შედგება. ნაგავი საფრთხეს უქმნის საერთაშორისო კოსმოსურ სადგურს და დედამიწაზე სხვადასხვა ტექნოლოგიის ფუნქციონირებას.

ახალგაზრდა ანალიტიკოსთა და მეცნიერთა დარბაზი ,,დოქტრინა“

ამერიკის შეერთებულ შტატებში მდებარე არიზონა უნივერსიტეტის მეცნიერებს, დედამიწაზე არსებული სიცოცხლის გადასარჩენად, მთვარეზე მიწისქვეშა ბუნკერის მოწყობა სურთ. მათი თქმით, ეს იქნება ე.წ „სიცოცხლის საცავი“, რომელშიც დედამიწაზე არსებული ცხოველების, ფრინველების, წყლის ბინადრებისა და მცენარეების გენეტიკური მასალა შეინახება იმ შემთხვევისთვის, თუ ჩვენს პლანეტაზე ხელოვნური ან ბუნებრივი კატასტროფა მოხდება.

ახალგაზრდა ანალიტიკოსთა და მეცნიერთა დარბაზი ,,დოქტრინა“