გამოგონება - ინოვაცია

15 მაისს დაიწყო ფუნქციონირება ინოვაციურმა ქართულმა ვებგევრდმა –,,Fulwish.com-ი“, ის საშუალებას გვაძლევს გავაჩუქოთ ნივთები, რომლებიც აღარ გვესაჭიროება და მსგავსადვე, თავადაც შევძლოთ სხვა მომხმარებლების მიერ გამოქვეყნებული ნივთებიდან სასურველის შერჩევა. პლატფორმა საკმაოდ ორიგინალურია და მომავალში კიდევ უფრო დაიხვეწება, მის შესახებ იდეის ერთ-ერთ ავტორს -გიორგი გოგუაძეს გავესაუბრეთ.

ალბათ ყველას გვაქვს ნივთები, რომლებსაც აღარ ვიყენებთ, მაგრამ გადასაყრელად გვენანება და გულმოდგინედ ვინახავთ თვალისგან დამალულ ადგილას, მაშინ როცა შესაძლოა ისინი სხვისთვის ძალიან სასურველიც კი აღმოჩნდეს.„Fulwish.com-ი” ინგლისურენოვანია და მომავალში გაცილებით უფრო მეტი ადამიანისთვის იქნება ხელმისაწვდომი.

ვებგვერდის გამოყენება ძალიან მარტივია – თქვენ უღებთ ფოტოს ნივთს, რომლის გაცემაც გსურთ და ტვირთავთ ვებგვერდზე, მსურველები კი მარტივად გიკავშირდებიან და თანხმდებით შეხვედრის დროსა და ადგილზე. ასევე, სურვილის შემთხვევაში თავადაც შეგიძლიათ სხვა მომხმარებლების მიერ გამოქვეყნებული ნივთებიდან შეარჩიოთ სასურველი, მისწეროთ მფლობელს და დაელოდოთ გამოხმაურებას.

იდეის ავტორები გიორგი გოგუაძე და გიგა მეხრიშვილი არიან, როგორც გიორგი აღნიშნავს, კარგი იდეები ყველას მოგვდის, მთავარია გაგვაჩნდეს საიმისო გამბედაობა, რომ იდეა რეალობად ვაქციოთ – ,,ბევრს არ სჯეროდა, რომ ეს პროექტი გაამართლებდა, რამდენიმე საგრანტო პროგრამაშიც მივიღეთ მონაწილეობა, თუმცა უშედეგოდ, მაგრამ ჩვენ იმდენად ბევრ დადებით რაღაცას ვხედავდით ამ საქმეში, რომ ვარჩიეთ მაინც გაგვერისკა და ჩვენი დრო, ენერგია და ფული ამ საქმისთვის მოგვეხმარა“.

საიტი, უპირველეს ყოვლისა, საშუალებას მოგცემთ გამოემშვიდობოთ წარსულსა და ისეთ ნივთებს, რომლებიც აღარ გჭირდებათ და  ტყუილად იკავებს ადგილს არა მარტო თქვენს საცხოვრებელში, არამედ თქვენს გონებაშიც კი.  ამავე დროს, სასიამოვნოა, როცა შესაძლებელია ამ მარტივი ქცევით სხვას ბედნიერება მიანიჭო, მაგრამ მხოლოდ ეს როდია, მეგობრების იდეას გაცილებით უფრო დიდი პრობლემაც დაედო საფუძვლად.

გლობალურად, რომ შევხედოთ მსოფლიოში, 7 მილიარდი ადამიანი ცხოვრობს და ეს რაოდენობა კატასტროფულად იზრდება. შესაბამისად, ამდენი წარმოება და ჭარბი მოხმარება, ძალიან დიდ ზიანს აყენებს ჩვენს პლანეტას. ,,ვცდებით თუ გვგონია, რომ თუ, მაგალითად, ამაზონის ტყე იჩეხება, ეს ჩვენთვის ზიანის მომტანი არ არის, ვცდებით, რადგან დედამიწაზე ყველაფერი ურთიეთდაკავშირებულია და ჟანგბადის 20% სწორედ ტროპიკული ტყეებიდან მოდის. ჩვენ მიერ გადაგდებული ნაგვით კი ოკეანეები იწამლება. პროდუქციის ჭარბად მოხმარების შედეგად ათასობით ტონა ქიმიკატი ჩაედინება მდინარეებში. ვფიქრობ, რომ ჩვენი, როგორც კაცობრიობის, ვალია უფრო გააზრებულად ვიცხოვროთ. უფრო გააზრებულად ცხოვრება კი,  ნიშნავს რესურსების ეფექტურად გამოყენებასა და უაზრო მომხმარებლობის სინდრომისგან თავის დაღწევას. ამასთან ერთად, ეს მოტივაციას გვაძლევს დავფიქრდეთ, როცა რამეს ვყიდულობთ, მართლა გვჭირდება ეს ნივთი თუ ლამაზი რეკლამით ვართ გაბრუებული ან უბრალოდ მოგვწონს,“ -აღნიშნავს გიორგი.

აღსანიშნავია, რომ საიტს უცხოერი ანალოგი არ აქვს, მეგობრებმა მოიძიეს ინფორმაცია მსგავსი პლატფორმების შესახებ, რომლებიც რამდენამდე მიახლოებული არიან ,,Fulwish.com-თან“, თუმცა საბოლოო ჯამში ვერცერთმა მათგანმა ვერ დააკმაყოფილა მათი მოთხოვნები, მათ სურდათ, რომ ვებგვერდი მაქსიმალურად მარტივი და გასაგები ყოფილიყო, ზედმეტი ინფორმაციისა და ვიზუალური დატვირთვის გარეშე, რასაც მიაღწიეს კიდევაც. სამომავლოდ პლატფორმა კიდევ უფრო დაიხვეწება და მეგობრებს იმედი აქვთ, რომ რაც შეიძლება მეტი ადამიანი შემოუერთდება მათ სახალისო და ძალიან პრაქტიკულ ინიციატივას.

მასალა მოამზადა:  თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

ინოვაციებისა და ტექნოლოგიების სააგენტოს, განათლებისა და მეცნიერების სამინისტროსა და ორგანიზაცია ,,EuHack-ის” ორგანიზებით აპრილში ,,პროფესიული განათლების ჰაკათონი“ ჩატარადა, რომელშიც ორი მეგობრის საინტერესო და სახალისო პროექტმა ,,ჭკვიანმა დაფამ“ გაიმარჯვა. პროექტის შესახებ იდეის ერთ–ერთი ავტორს – არჩილ გობეჯიშვილს გავესაუბრეთ.

,,ჭკვიანი დაფის“ იდეა არჩილ გობეჯიშვილსა და დავით კუჭუხიძეს ეკუთვნით. არჩილი 25 წლისაა და ამჟამად საფეხბურთო კლუბ ,,სიმბას“ მწვრთნელი და მენეჯერია, მან გასულ წელს ჩააბარა კოლეჯში ,,სპექტრი“, რათა მისთვის კიდევ ერთი საინტერესო სფერო – ხის დამუშავება შეესწავლა, ნახევარ წელიწადში კი უკვე შეძლო ნამუშევრები საქართველოს ეროვნულ ბიბლიოთეკაში,  ფართო საზოგადოებისთვის წარედგინა. კოლეჯმა, როგორც თავად აღნიშნა, დიდი პროფესიული განათლებასთან ერთად საკმაოდ საინტერესო ნაცნობობაც შესძინა, დავით კუჭუხიძემაც სწორედ ერთ-ერთი გადაცემიდან გაიცნო და დაუკავშირდა მას.  დავითი 35 წლისაა და პროფესიით 3Dსპეციალისტია, ასევე აქვს პატარა ლაბორატორია – ,,Artisan-ი”, სადაც ხის ულამაზეს ნივთებს – სათამაშოებს, სანათებსა და სუვენირებს ქმნის.

კოლეჯში სწავლის ბოლო პერიოდში არჩილმა გადაწყვიტა საქართველოს ინოვაციებისა და ტექნოლოგიების სააგენტოს მიერ ორგანიზებულ პირველ პოფესიულ ჰაკათონში დავითთან ერთად მიეღო მონაწილეობა. ჰაკათონის პირველ ტურში გუნდმა ჟიურის დავითის მიერ შექმნილი 3Dგამოსახულებით გააცნო ,,ჭკვიანი დაფის“ იდეა და ფინალურ ეტაპზეც დამსახურებულად გადავიდა. შემდეგ, ილიაუნის ფაბლაბის დახმარებით, 24 დღის განმავლობაში შექმნეს პირველი პროტოტიპი, რომელმაც ხალხის დიდი მოწონება დაიმსახურა და პირველი ადგილის მფლობელიც გახდა.

,,ჭკვიანი დაფა“ არის ერთგვარი სახალისო დაფა, რომელზეც პაზლის პრინციპით ეწყობა ხის სხვადასხვა ნატურალური ჯიშისგან დამზადებული საქართველოს გაერთიანებული რუკა, რუკა ჯამში 68 დეტალისგან შედგება და თითოეულ დეტალს აქვს საქართველოს კონკრეტული რაიონის  ფორმა. ხოლო, რელიეფური ფორმები მაქსიმალურად მიმსგავსებულია საქართველოს ფიზიკურ ლანდშაფტს. 68-ვე დეტალში ჩამონტაჟებულია მინიატურული მაგნიტი რაც საშუალებას გვაძლევს რუკა ავაწყოთ, როგორც ჰორიზონტალურ, ასევე ვერტიკალურ მდგომარეობაში.

დაფის შექმნის იდეა კი მეგობრებს ჩვენივე რეალობაში არსებული პრობლემიდან  გამომდინარე გაუჩნდათ, არჩილმა აღნიშნა – ,,მიუხედავად იმისა, რომ საქართველო ძალიან პატარა ქვეყანაა, სამწუხაროდ ბევრი ქართველი ყველა მხარეში არ არის ნამყოფი და საუბედუროდ ბევრმა ქართველმა საქართველოს კუთხეების ადგილმდებარეობაც არ იცის! რა თქმა უნდა, ყველას აქვს შესაძლებლობა დაინტერესების შემთხვევაში მოიძიოს და მიიღოს საჭირო ინფორმაცია, თუმცა, ჩვენი მხიარული დაფა პროცესს ბევრად უფრო მიმზიდველსა და ეფექტურს ხდის“.

მხიარულ დაფას გააჩნია სპეციალურ მობილური ვებგვერდის დემოვერსია, რომელშიც მოთავსებულია ინფორმაცია საქართველოს რეგიონებზე, მათი ისტორია, გეოგრაფია, ფლორა და ფაუნა, სოფლის მეურნეობა,  ტურისტული მარშრუტები, კულტურული მემკვიდრეობა, არქეოლოგიური ძეგლები და ა.შ. ვებგვერდის მობილური ვერსია ბლუთუზის საშუალებით უკავშირდება დაფაზე დამონტაჟებულ დინამიკს, რომელიც ხმოვან რეჟიმში გვაწვდის ჩვენ მიერ მოთხოვნილ ინფორმაციას.

ამ ეტაპზე პროტოტიპის დასახვეწად და საჭირო დანადგარების შესაძენად გუნდი დამატებითი გრანტებისა და დაფინანსების მოპოვებას ცდილობს, ამის შემდეგ კი, უკვე შესაძლებელი გახდება დაფის რეალიზება და ბაზარზე გატანა. აღსანიშნავია, რომ მეგობრები სამი ტიპის დაფის წარმოებას აპირებენ – შედარებით დაბალფასიანი დაფა განკუთვნილი იქნება ოჯახებისთვის, საშუალო ფასიანი და ძვირფასი კი სასწავლო დაწესებულებებისა თუ ტურისტული ცენტრებისთვის.

სამომავლოდ მეგობრები მხიარული დაფისვე პრინციპით აპირებენ მსოფლიოს კონტინენტების რუკების შექმნას და ასევე, დაფის მეშვეობით ეცდებიან იგავების და ზღაპრების პერსონაჟებიც გააცოცხლონ, არჩილმა აღნიშნა, რომ ,,დაფა ხმოვან რეჟიმში მოყვება პროფესიონალი მსახიობების მიერ გახმოვანებულ ზღაპარს და ბავშვებს საშუალება ექნებათ  საკუთარი ხელით ათამაშონ ნატურალური და ეკოლოგიურად სუფთა ხის მასალისგან დამზადებული ზღაპრის პერსონაჟები. ამასთანავე, სპეციალურად დაფისთვის დაიწერება ახალი ზღაპრები და შეიქმნება ახალი პერსონაჟები“

მასალა მოამზადა:  თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

პროფესიული განათლებისადმი დამოკიდებულება ბოლო დროს რადიკალურად შეიცვალა. აღნიშნული სექტორის განვითარებისთვის განათლების სამინისტრომ არაერთი პროექტი განახორციელა, ერთ-ერთია „პროფესიული განათლების ჰაკათონი“, რომელშიც მონაწილეობდნენ პროფესიული სასწავლებლის სტუდენტები, მათ ინოვაციური და მაღალტექნოლოგიური პროდუქტები წარმოადგინეს. პროექტის ფარგლებში სტუდენტები იყენებდნენ სამრეწველო ინოვაციების ლაბორატორიაში არსებულ დანადგარებს (ლაზერული მჭრელი, 3D პრინტერი, პროგრამირებადი ჩარხი და ა.შ.). პროექტს ერთობლივად ახორციელებდნენ საქართველოს ინოვაციებისა და ტექნოლოგიების სააგენტო, განათლებისა და მეცნიერების სამინისტრო, აგრეთვე, ორგანიზაცია „EUHack-ი”.

აგრარული მიმართულებით პირველი ადგილი დაიკავა კოლეჯ „ბლექსის“ გუნდმა „Healthy“, რომლის წევრები არიან მცენარეთა დაცვის ტექნიკოსის სპეციალობის სტუდენტები: მარიამ ცეცხლაძე, რუსუდან მელაძე, თინა სალუქვაძე და როლანდ ღოღობერიძე, ხოლო მათი მენტორია – ვლადა ხიმენკო.

გუნდმა წარმოადგინა პროექტი „ეკო-სამზარეულო“, რომელიც საზოგადოებას შესაძლებლობას მისცემს, დათესოს და სახლში მოიყვანოს სხვადასხვა პროდუქტი.  რაც ყველაზე მნიშვნელოვანია, მოსავალი იქნება შხამ-ქიმიკატებისგან სუფთა.

„მინისათბური სამზარეულოსთვის, ვფიქრობთ, ინოვაციური და ძალიან საჭიროა. ჩვენ ვიყენებთ ადგილობრივ მცენარეებსა და თესლებს, რითიც ვინარჩუნებთ თესლების გენოფონდს. მოგეხსენებათ, დღევანდელ პირობებში განსაკუთრებულად ფასობს ჯანსაღი, არაგენმოდიფიცირებული და ეკოლოგიურად სუფთა პროდუქტი.  ჩვენ საზოგადოებას შევთავაზებთ ლამაზ ფორმატში დამზადებულ კონსტრუქციას (ვგეგმავთ, კონსტრუქციები გავაფორმოთ ქართული ტრადიციული ორნამენტებით, ამით ჩვენ ვიტყვით, რომ ეს პროდუქტი დამზადებულია საქართველოში) თავისი განათებით, ინსტრუქციით, თესლებითა და მორწყვის სისტემით. ფასი კომპლექტაციისა და ზომების მიხედვით 35-300 ლარამდე განისაზღვრება. მორწყვა შესაძლებელი იქნება დისტანციურადაც, ამისთვის კი გამოვიყენებთ GSM მოდულს“ – აღნიშნავს გუნდის მენტორი – ვლადა ხიმენკო.

აღსანიშნავია, რომ მომხმარებელი მორწყვის სისტემის ჩართვას მობილურში ჩატვირთული სპეციალური აპლიკაციის საშუალებით შეძლებს. საწყის ეტაპზე გუნდი გეგმავს შემდეგი მცენარეების კულტივირებას: ქინძი, მაკიდო, კამა, პიტნა და მარწყვი.

„მე, როგორც აგრარული მიმართულების სტუდენტს, ყოველთვის მქონდა პრეტენზია ჯანსაღ და ეკოლოგიურად სუფთა პროდუქტზე.  მათ, ვისაც არ აქვთ მიწის ნაკვეთი და, შესაბამისად, ვერ იღებს ნატურალურ პროდუქტს, ჩვენ ვაძლევთ საშუალებას, მოუარონ მინისათბურს,“ – აღნიშნავს მარიამ ცეცხლაძე.

სტუდენტებს სურთ, რომ ახლო მომავალში გახდნენ ინოვაციებისა და ტექნოლოგიების სააგენტოს პროგრამის მონაწილეები, რათა პროექტის გასავითარებლად დაფინანსება მოიპოვონ.

მასალა მოამზადა:  ნინი მშვენიერიძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

სტარტაპი ,,Begels-ი“ ორ ქართველ ახალგაზრდა გოგონას ეკუთვნის, რომლებმაც საქართველოს ინოვაციებისა და ტექნოლოგიების სააგენტოს დახმარებით შეძლეს იდეის რეალურად განვითარება და ამჟამად მყიდველისთვის უკვე ხელმისაწვდომია მათი უნიკალური, ხის მასალით დამზადებული ჩანთები. წამოწყების შესახებ ერთ-ერთ დამაარსებელს, ნათია მგელაძეს გავესაუბრეთ.

,,Begels-ის“ იდეის ავტორები ნათია მგელაძე და ქეთი უბილავა არიან, გოგონებს უნივერსიტეტის ბოლო კურსზე გაუჩნდათ სურვილი მონაწილეობა მიეღოთ საქართველოს ინოვაციებისა და ტექნოლოგიების სააგენტოს პროექტში – ,,დაიწყე ბიზნესი ფაბლაბთან ერთად“, რომელშიც მათი რამდენიმე მეგობარიც მონაწილეობდა, ,,სიმართლე გითხრათ, ვერასდროს წაროომედგინა, თუ ოდესმე მექნებოდა შესაძლებლობა საკუთარი ბიზნესის ქონისა, თუმცა, დღეს თამამად ვიტყვი, რომ ეს ჩემი ყველაზე საყვარელი საქმიანობაა“ – აღნიშნავს ნათია.

ჩანთების შექმნის იდეა 2015 წელს გაჩნდა და ახალგაზრდები მასზე 3-4 თვის განმავლობაში ფიქრობდნენ, გამომდინარე იმ ფაქტიდან, რომ ფაბლაბში დანადგარები ძირითადად ხეზე და ორგანულ მინაზე მუშაობენ, მათ გადაწყვიტეს ჩანთები სწორედ ხისგან შეექმნათ. თავდაპირველი იდეით ჩანთები მთლიანად ხის უნდა ყოფილიყო, მაგრამ შემდეგ გოგონებმა გადაწყვიტეს, რომ ტყავისა და ხის სინთეზი ბევრად უფრო ორიგინალური და ლამაზი გამოვიდოდა. ამგვარი ტიპის ჩანთები დღეს რამდენიმე ცნობილ დიზაინერის ნამუშევრებშიც გვხვდება, გოგონებმა კი ის ქართულ ბაზარს მოარგეს. ამასთანავე, ჩანთებს უკეთდება კლიენტისთვის სასურველი გრავირებაც, რაც კიდევ უფრო  გამოარჩევს მათ.

საინტერესოა  თვითონ სახელწოდების ისტორიაც,  ნათიას თქმით, ,,Begels-ი“ თავისი ჟღერადობით ბადებს ,,Bag and Girls-ის“  ასოციაციას, შესაბამისად სახელის იდეაც სწორედ აქედან, სპონტანურად გაჩნდა და ორივეს ძალიან მოეწონა. რაც შეეხება ნაწარმის რეალიზებას, გოგონები  სოციალური ქსელის მეშვეობით ახერხებენ საკუთარი ნაწარმის ხალხისთვის მიწოდებას, პერიოდულად მართავენ გამოფენებსაც, თუმცა, ჯერჯერობით მაღაზიის გახსნა არ იგეგმება.

რაც შეეხება სამომავლო გეგმებს, ნათია ამის შესახებაც გვესაუბრა – ,,სტარტაპი არაფერია განვითარების გარეშე. აუცილებელია, რომ მუდმივად იზრუნო და სიახლე შესთავაზო მომხმარებელს. წინააღმდეგ შემთხვევაში, სტაბილურობას შედეგი არ მოაქვს, ან თუ მოაქვს, საკმაოდ მოკლევადიანი. ჩვენ რამდენიმე თვის წინ გავაჟღერეთ სანათიანი ჩანთის იდეა, რომლის საბოლოო დამუშავებული სახე უკვე ზაფხულში გვექნება“.

მასალა მოამზადა:  თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

 ერთ-ერთი წარმატებული სტარტაპი – ,,Vrex Immersive-ი“  – ქართველი ახალგაზრდების წამოწყებაა, ეს ტურიზმის სფეროში კიდევ ერთი წინ გადადგმული ნაბიჯია და ნებისმიერ მსურველს შესაძლებლობას აძლევს ვირტუალური რეალობის მეშვეობით დაგეგმოს მოგზაურობა. სტარტაპის შესახებ მისი ერთ-ერთი ფუძემდებელი – ნიკოლოზ გოგოჭური გაგვესაუბრა.

„Vrex Immersive-ს“ ოთხი დამფუძნებელი ჰყავს – ნიკოლოზ გოგოჭური, ლევან დანელია, ნიკა როსტომაშვილი და ლადო ლებანიძე, რომლებსაც სტარტაპში გაერთიანების იდეა 2014 წელს გაუჩნდათ, თუმცა, იქამდეც რამდენიმე წარმატებულ პროექტშიც მიიღეს ერთად მონაწილეობა. მათი ამჟამინდელი გუნდი ექვსი წევრისგან შედგება, მაგრამ ძირითად ბირთვს სხვადასხვა პროექტზე, საჭიროების და მიხედვით, ახალი წევრები ემატება.

თავიდანვე, მეგობრების იდეა მდგომარეობდა ზოგადად, ბიზნესის სხვადასხვა მიმართულებისთვის ვირტუალური რეალობის შექმნაში, ,,ვირტუალური რეალობა, როგორც წესი,  აღქმულია ხოლმე, როგორც გართობის საშუალება (თამაშები, კლიპები, გასართობი აპლიკაციები). ჩვენი ხედვით კი, მისი მეშვეობით  ბიზნესის გაძლიერებაა შესაძლებელი. ამიტომაც, დავიწყეთ განათლების, არქიტექტურის, რეკლამის, კულტურული მემკვიდრეობისა და სხვა სფეროებისთვის ვირტუალური რეალობა შეგვექმნა, შეკვეთებს კი, ძირითადად უცხოეთიდან ვიღებდით და ამგვარად ვაგროვებდით ცოდნას,“ – აღნიშნავს ნიკოლოზი.

სტარტაპმა 2016 წელს გაიარა აქსელერაცია მსოფლიოში ერთ-ერთ ყველაზე პრესტიჟულ სტარტაპაქსელერატორში – ,,Startupbootcamp-ში“, რომელიც სამთვიანი სასწავლო პროგრამაა სტამბოლში და მასში მსოფლიოს მასშტაბით 850-ზე მეტი სტარტაპი იღებდა მონაწილეობას,  ,,Vrex Immersive-ი“ ათ საუკეთესო სტარტაპს შორის მოხვდა. მათ ასევე გაიმარჯვეს ,,სტარტაპ საქართველოს“ შესარჩევ ეტაპზეც და გაიარეს აქსელერაცია ამერიკელ მენტორებთან ,,Silicon Valley-დან“.

თანამედროვე სამყაროში ვირტუალური რეალობა ტრენდული გახდა და მსგავს ექსპერიმენტებს ბევრი სტარტაპი თუ კორპორაცია აკეთებს, მაგრამ ქართველების ეს ექსპერიმენტი, როგორც ნიკოლოზი აღნიშნავს, განსხვავდება მათგან საკუთარი მიზნებიდან გამომდინარე – ,,არსებობს პროდუქტები, რომლებიც კონცეპტუალურად ახლოსაა ჩვენთან, თუმცა ჩვენ უნიკალურები ვართ განსხვავებული ბიზნესმოდელით, პლატფორმის ფუნქციებითა და იმით, რომ მაქსიმალურად ფოკუსირებულები ვართ ტურიზმისა და მოგზაურობის ინდუსტრიაზე, ვაძლიერებთ მას ვირტუალური რეალობით“.

აღნიშნული პლატფორმის მეშვეობით ნებისმიერ ადამიანს შეუძლია, ვირტუალური რეალობით იმოგზაუროს სხვადასხვა ტურისტული მარშრუტით, შეისწავლოს ისინი, დაგეგმოს მოგზაურობა და შეუკვეთოს ტური პირდაპირ აპლიკაციიდან. ასევე, ტურისტულ ოპერატორებს, სააგენტოებს, სამთავრობო სტრუქტურებსა და სასტუმროებს/კურორტების ადმინისტრაციებს შეუძლიათ, ამ პლატფორმის მეშვეობით  საკუთარი სამოგზაურო პროდუქტები გახადონ უფრო პოპულარული.

ვიდეოში იხილეთ ხალხის რეაქცია ,,Vrex Immersive-ის“ აპლიკაციაზე:

ამჟამად, გუნდი აქტიურად თანამშრომლობს ტურიზმის ბაზართან, როგორც საქართველოში, ასევე უცხოეთში. საერთაშორისო ტურისტული სააგენტოები უკვე იყენებენ მათ აპლიკაციებს მარკეტინგული მიზნებისთვის. აღსანიშნავია, რომ გუნდი თანამშრომლობს სხვადასხვა სამთავრობო სტრუქტურასთანაც და ეწევა საქართველოს პოპულარიზაციას საერთაშორისო ტურისტულ გამოფენებზე.

პლატფორმის გასამრავალფეროვნებად სამომავლოდ იგეგმება  გადაღებები – საქართველოში, თურქეთში, საფრანგეთში, ამასთანავე სულ მალე ,,Vrex Immersive-ი“ ხელმისაწვდომი იქნება Androidტიპის სმარტფონებზე, აპლიკაცია ამჟამად უკვე დახურული ბეტა ტესტირების ეტაპზეა და მზადდება ფართო ბაზარზე გასასვლელად.

Android-ის მომხმარებლების შემდეგ, 2017 წლის ბოლომდე, პლატფორმა ,,Apple-ის” მოწყობილობების მომხმარებლებისთვისაც გახდება ხელმისაწვდომი.

მასალა მოამზადა:  თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”