კულტურა

ხვალიდან ეროვნულ გალერეაში ტიციანის, ლეონარდო და ვინჩის, რაფაელისა და სხვა იტალიელი დიდი მხატვრების ნამუშევრები გამოიფინება. 

ეროვნულo გალერეის ინფორმაციით, გამოიფინება შემდეგი ნამუშევრები:

„ტიციანი – ფერთა ოსტატი: მადონა ყრმით“ (15.05. – 05.08.2018) – ნამუშევარი “ღვთისმშობელი ყრმით” (“მადონა ალბერტინი”) ტიციანის ფერწერის განუმეორებელი სტილისა და ტექნიკის უბადლო ნიმუშია. ნახატი დაცულია ვენეციის აკადემიის გალერეაში, სადაც ვენეციური ხელოვნების უმდიდრესი კოლექცია ინახება.

„რენესანსის დიდოსტატები. გრაფიკული ნამუშევრები“ (25.05. – 26.08.2018) – ტურინის სამეფო ბიბლიოთეკის კუთვნილი 45 გრაფიკული ნამუშევრის შესანიშნავი გამოფენა. ნამუშევრების ავტორებს შორის არიან რენესანსის ოსტატები ლეონარდო და ვინჩი, მიქელანჯელო, რაფაელი, ბოტიჩელი, ბრამანტინო, სინიორელი, ვაზარი, პინტურიკიო და სხვები.

“Evidence. A New State of Art” (25.05. – 26.08.2018) – გარუცოს ვიზუალური ხელოვნების ინსტიტუტის (IGAV) გამოფენა, რომელიც წარმოგვიდგენს თანამედროვე იტალიურ ხელოვნებას გასული საუკუნის ორმოცდაათიანი წლებიდან დღემდე და აერთიანებს სხვადასხვა თაობის იტალიელი მხატვრების განსხვავებულ ხედვებსა და განსხვავებული გამომსახველობითი ენით შექმნილ ნამუშევრებს.

„ბერნინის სკოლა და რომაული ბაროკო“ (03.09. – 29.10.2018) – გამოფენაზე წარმოდგენილი იქნება ბაროკოს უმნიშვნელოვანესი ფიგურის, ჯან ლორენცო ბერნინისა და მე-17 საუკუნის სხვა ოსტატების ნამუშევრები რომის მახლობლად მდებარე „პალაცო კიჯი ინ არიჩაში” რომაული ბაროკოს მუზეუმიდან.

გამოფენები საქართველოს დამოუკიდებელი რესპუბლიკის 100 წლის იუბილეს ეძღვნება.

ახალგაზრდა ანალიტიკოსთა და მეცნიერთა დარბაზი ,,დოქტრინა“

ქრისტი ბოტკოველი 26 წლის ახალგაზრდა ხელოვანია, რომელსაც საზოგადოებამ Nancy Woland-ის ფსევდონიმით უკვე დიდი ხანია გაიცნო. მას შემდეგ, რაც ილიას უნივერსიტეტში ბიზნესადმინისტრირების ფაკულტეტი დაამთავრა, ქრისტიმ სამხატვრო აკადემიაში გადაწყვიტა სწავლის გაგრძელება, თუმცა იქედანაც მალევე წამოვიდა და საყვარელი სფეროს შესწავლა უკვე მხოლოდ საკუთარი ძალისხმევით დაიწყო, დღეს კი მისი ნაკეთობები ყველასგან განსხვავებული, ორიგინალური სტილითა და ჯადოსნური სიუჟეტებით გვამახსოვრებს თავს.

-ნენსი, როდის გადაწყვიტე, რომ საკუთარი შემოქმედება საზოგადოებამდე მიგეტანა და ძირითადად რა მასალებზე მუშაობ?

-2012 წელი იყო, როცა მაისურებზე დავიწყე ხატვა, სწორედ ეს იყო ჩემი პირველი ნაბიჯები, ამ სფეროში, ასე გავაცანი ხალხს საკუთარი თავი და შემდეგ, ნელ-ნელა უკვე ტილოზე დახატული ნახატებიც შევაპარე. პროცესი რთული იყო, რა თქმა უნდა, მაგრამ გამიმართლა და ადამიანების სიყვარული დავიმსახურე. დღეს შეიძლება ითქვას, რომ ყველანაირ ნივთზე ვხატავ, რაზეც იხატება – ჭიქები, კედლები, ღვინის ბოთლები, ჩანთები, საფულეები, მაგიდები, და ასე შემდეგ. რა თქმა უნდა, ეს ყველაფერი საკმაოდ რთულია, რადგან ძალიან ბევრი ენერგიასა და მასალას მოითხოვს, მაგრამ მთავარია ჩემი სურვილი, რომ ხელოვნებამ ისეთივე თავისუფლება და სიამოვნება აგრძნობინოს ადამიანებს, რომელსაც მე ვგრძნობ ხატვისას.
-რა დატვირთვას ატარებს Nancy Woland-ი?
-ეს ფსევდონიმი ჯერ კიდევ სტუდენტობის პერიოდიდან შემომრჩა, როცა ყველა ფორუმსა თუ სოციალურ სივრცეში სწორედ ამ სახელით ვრეგისტრირდებოდი. „Nancy Boy“ არის ჩემი საყვარელი ჯგუფის, პლასებოს სიმღერა, ხოლო ვოლანდი ბულგაკოვის ნაწარმოების „ოსტატი და მარგარიტას“ პერსონაჟის გამო შევარჩიე და მას მერე შემრჩა ასე ფსევდონიმად.

-ნენსი, გარდა იმისა, რომ ხატავ გრაფიკულ დიზაინერადაც მუშაობ, რამდენად რთულია ამ ყველაფრის ერთმანეთთან შეთავსება?
-ამჟამად წამოვედი რამდენიმე სამსახურიდან და მხოლოდ Freelance გრაფიკულ დიზაინერად დავრჩი, რადგან რაღაც მომენტებში ვხვდები, რომ ბოლომდე არ არის ეს ჩემი საქმე და გაწერილი გრაფიკით მუშაობაც ძალიან მაბნევს, ამიტომ გადავწყვიტე დამოუკიდებლად ავიღო შეკვეთები და სახლში კომფორტულად მივუჯდე ხოლმე დიზაინს, თან მხოლოდ ისეთ შეკვეთებზე ვიმუშავო, რომელიც მომწონს და არა საქმე მავალდებულებს. ყველაფრის ერთად შეთავსება, რა თქმა უნდა რთულია, მაგრამ მიყვარს როცა რაღაცას ვაკეთებ და დროს ტყუილად არ ვხარჯავ, მით უმეტეს თუ ამ პროცესში ვვითარდები კიდევაც.

-როგორ ხდება ნამუშებრების რეალიზება და როგორია სამომავლო გეგმები?
-ჩემი ნახატების შეძენა, ჯერჯერობით, მხოლოდ სოციალური ქსელითაა შესაძლებელი, თუმცა უახლოეს მომავალში მაღაზიაც იქნება. ახლა საკმაოდ რთული და დატვითული პერიოდი მაქვს, რადგან გამოფენისთვის ვემზადები, რომელიც თვის ბოლოსთვის მქონდა დაგეგმილი, თუმცა, სამწუხაროდ, ვერ ვასწრებ, მჯერა, რომ აპრილის შუა რიცხვებამდე მაინც შევაკოწიწებ ყველაფერს და მოვაწყობ ისევ გამოფენას. სიმართლე გითხრათ, არ მიყვარს შორსჭვრეტა და გეგმების დაწყობა, რადგან როგორც წესი ყოველთვის ყველანაირი გეგმა მენგრევა თავზე. ამიტომ, შეძლებისდაგვარად, ყველაფერს სპონტანურად ვაკეთებ და ხშირ შემთხვევაში ეს უფრო ამართლებს. სწორედ ასე სპონტანურად გადავწყვიტე ახლა ჩემი რიგით მეორე გამოფნის მოწყობაც და დიდი იმედი მაქვს, უახლოეს მომავალშივე გავართმევ თავს.

მასალა მოამზადა: თამარ დევდარიანმა
ახალგაზრდა ანალიტიკოსთა და მეცნიერთა დარბაზი ,,დოქტრინა”

21 მარტს დაუნის სინდრომის მსოფლიო დღე აღინიშნება. საქართველოს დაუნის სინდრომის ასოციაციის ორგანიზებით, ეს დღე მრავალფეროვანი ღონისძიებებით აღინიშნება.

19 მარტს, 19:00 საათზე, საქართველოს კულტურისა და სპორტის სამინისტროს მხარდაჭერით,  ნოდარ დუმბაძის სახელობის მოზარდ მაყურებელთა თეატრის დიდ დარბაზში (ქ. თბილისი, აღმაშენებლის გამზ. N99) პერფორმანსი „47=46“  მოეწყობა, რომელშიც თეატრის მსახიობებთან ერთად მონაწილეობენ ინტეგრირებული დასის „აზდაკის ბაღის“ მსახიობები. წარმოდგენის შინაარსი, მთლიანად, თანასწორობის იდეაზეა აგებული.

პერფორმანსს, საქართველოს კულტურისა და სპორტის მინისტრი მიხეილ გიორგაძე დაესწრება.

21 მარტს, სასტუმრო „რუმსში”  (ქ.თბილისი, მერაბ კოსტავას 14), 11:00 საათიდან 14:00 სათამდე კონფერენცია „რას ვმატებ ჩემს სამსახურს“ (What I bring to the worckplace) ჩატარდება, რომელიც ეძღვნება შეზღუდული შესაძლებლობის მქონე პირთა დასაქმებაში არსებულ გამოწვევებს საქართველოში.

კონფერენცია იმართება თბილისის მუნიციპალიტეტის მერიის მხარდაჭერით, დაუნის სინდრომის მქონე პირთა უფლებების რეალიზების მხარდაჭერის მიზნით.

ახალგაზრდა ანალიტიკოსთა და მეცნიერთა დარბაზი ,,დოქტრინა“