ტექნოლოგიები

„Startup Beats-ი“ საქართველოს ეკონომიკისა და მდგრადი განვითარების სამინისტროს სსიპ ინოვაციების და ტექნოლოგიების სააგენტოს ახალი პროექტია. აღნიშნულის შესახებ „დოქტრინა“ პროექტის მენეჯერს, მარიამ შარანგიას, გაესაუბრა.

-უპირველეს ყოვლისა, მკითხველს მოუყევით -„Startup Beats-ის“ შესახებ. ვინ ახორციელებს პროექტს და რა არის მიზანი?

-„Startup Beats“ ქართულად ნიშნავს სტარტაპების გულისცემას, დინამიკას, სწორედ ამ დინამიკისა და ქართული სტარტაპსაზოგადოების შექმნა და განვითარებაა ჩვენი მთავარი მიზანი. შესაბამისად, მნიშვნელოვანია, რომ აღნიშნული პროექტის ფარგლებში დამყარდეს საქმიანი ურთიერთობა სტარტაპებს შორის. „სტარტაპ ბითსის“ ფარგლებში ხორციელდება რეგულარული შეხვედრები, სადაც სხვადასხვა სფეროში მოღვაწე წარმატებულo ადამიანები (მათ შორის, წარმატებული სტარტაპერები) გამოცდილებას უზიარებენ დამსწრე საზოგადოებას.

-უკვე რამდენიმე თვეა პროექტი მიმდინარეობს და ამ პერიოდში არაერთი შეხვედრა გაიმართა. გვესაუბრეთ აღნიშნულის შესახებ. კონკრეტულად ვინ იყვნენ მოწვეულები.

-პროექტი მარტის თვეში დაიწყო და მას შემდეგ აქტიურად მიმდინარეობს. გაიმართა საინტერესო შეხვედრები წარმატებულ სტარტაპერებთან სხვადასხვა ინდუსტრიიდან, როგორებიც არიან: ბაჩო ხაჩიძე („თრიფექსის“ თანადამფუძნებელი), შოთა გიორგობიანი („ოპტიო ეიაის“ დამფუძნებელი), ვახო ვახტანგიშვილი („ლივინგსტონის“ დამფუძნებელი), გუკა თავბერიძე („სავსეს“ დამფუძნებელი), გიორგი არისონი („Shift.com- ის“ დამფუძნებელი).

ამ პროექტის ფარგლებში მოვიწვიეთ წარმატებული ადამიანები, მათ შორის ისინიც, რომელთა წარმატება გასცდა საქართველოს საზღვრებს (მაგ: გუკა თავბერიძე – „სავსეს“ დამფუძნებელი ბრიტანეთში მოღვაწეობს, გიორგი არისონი – „shift.com“-ის დამფუძნებელი – აშშ-ში).

ღონისძიება იწყება მოკლე პრეზენტაციით, სტარტაპერები თავიანთი სტარტაპისა და საკუთარი თავის შესახებ ყვებიან, შემდეგ ღონისძიება გადადის კითხვა-პასუხის რეჟიმში, სტარტაპერებს ეძლევათ აზრისა გამოთქმისა და კითხვის დასმის საშუალება.

აღსანიშნავია, რომ „სტარტაპ ბითსის“ ფარგლებში მოხდა სასიამოვნო ფაქტი, გიორგი არისონი აპირებს, რომ ტექნოპარკში განთავსებულ ერთ-ერთ სტარტაპში ინვესტიციია ჩადოს. „სტარტაპ ბითსი“ აძლევს სტარტაპებს ერთმანეთის გაცნობის, სპიკერთან დაახლოების საშუალებას, რაც მათთვის დამატებითი კონტაქტების (პოტენციური პარტნიორების, ინვესტორების) მოძიების საშუალებაც არის.

საზოგადოებისგან დაინტერესება როგორია? რამდენად აქტიურად ესწრებიან მსგავსი ტიპის შეხვედრებს?

-საზოგადოების ჩართულობა საკმაოდ მაღალია, დაახლოებით 100-200 დამსწრე ჰყავს ,,სტარტაპ ბითსის” ღონისძიებებს და ისინი აქტიურად არიან ჩართული მათ მსვლელობაში.

-სამომავლო გეგმებზე გვესაუბრეთ. რა სიახლეები იქნება აღნიშნული პროექტის ფარგლებში.

-„სტარტაპ ბითსი“ გრძელვადიანი პროდუქტია, იგეგმება პროექტის უფრო ინტენსიურ რეჟიმში გადაყვანა. ვაპირებთ, თბილისის ყველა უნივერსიტეტში ჩავატაროთ სხადასხვა ღონისძიება. გაფართოვდება ,,სტარტაპ ბითსის” ფორმატი.

-პროექტი მხოლოდ შეხვედრებს მოიცავს თუ სხვა მიმართულებითაც გეგმავთ განვითარებას?

-ამ ეტაპზე, პროექტი მხოლოდ შეხვედრებს მოიცავს. მომავალში იგეგმება, რომ „სტარტაპ ბითსმა“ მიიღოს სხვა ფორმატიც ვორქშოპების, ტრენინგების, დისკუსიების სახით, რაც დამატებით ხელს შეუწყობს ქართული სტარტაპების ზრდასა და განვითარებას. დაგვეხმარება, რომ უკეთ გავიგოთ სტარტაპების საჭიროებები და დავგეგმოთ შესაბამისი აქტივობები.

„სტარტაპ ბითსი“ საინტერესოა არა მხოლოდ იმიტომ, რომ მოუსმინონ გამოცდილ და საინტერესო სპიკერებს და მიიღონ მათთვის საინტერესო ინფორმაცია, არამედ იმიტომ, რომ გაიცნონ ინოვატორი და შემოქმედებითი ახალგაზრდები და გახდნენ ქართული სტარტაპსაზოგადოების სრულყოფილი ნაწილი.

მასალა მოამზადა:  ნინი მშვენიერიძემ

ახალგაზრდა ანალიტიკოსთა და მეცნიერთა დარბაზი ,,დოქტრინა”

,,ღია ბარათების კლუბი“  – ასე ჰქვია ახალ წამოწყებას საქართველოში, რომელიც საკმაოდ ინოვაციურ იდეასა და ქველმოქმედებას აერთიანებს.  დეტალური ინფორმაციისათვის ,,დოქტრინა“ მის დამაარსებელს – მადონა სელიმაშვილს დაუკავშირდა.

– უპირველეს ყოვლისა, პროექტის ავტორების შესახებ გვიამბეთ.

-,,ღია ბარათების კლუბი“ მე შევქმენი ჩემს გოგონებთან ერთად. დაახლოებით ორი წლის წინ ჩამოვაყალიბე საქველმოქმედო ორგანიზაცია „თბილი სახლი ახალგაზრდებისთვის“. ჩემი ორგანიზაცია ეხმარება სოციალურად დაუცველ სტუდენტებს საცხოვრებლითა და სტიპენდიით. გადავწყვიტეთ, საკუთარი ბიზნესიც დაგვეწყო.

-რატომ, რის საფუძველზე და როდის წარმოიშვა იდეა, დაგეწყოთ ხელნაკეთი მისალოცი ბარათების დამზადება და ბაზარზე გამოატანა?

-,,ღია ბარათების კლუბის“ დაარსების იდეა წამოვიდა ჩემი ამერიკაში ვიზიტის შემდეგ, იქ დავესწარი ბარათების კლუბის სამუშაო პროცესს, საოცარი განცდა იყო რამდენიმე ადამიანისგან შემდგარ გუნდს არაჩვეულებრივ იდეები ქაღალდებზე  როგორ გადაჰქონდა და უამრავ ადამიანს ანიჭებდა ბედნიერებას.

ჩვენი ბარათები გამოირჩევა ორიგინალურობითა და კრიატიულობით. თითოეულ მათგანს აქვს თავისი ამბავი. ხანდახან მხოლოდ ბარათია საკმარისი საუკეთესო საჩუქრის გასაკეთებლად. გვინდოდა,  ჩვენი პროდუქცია უფრო მეტ ხალხს ენახა და ჩვენც დამატებითი შემოსავალი გვქონოდა.

– ეს ბაზარი საკმაოდ გააქტიურებულია ბოლო პერიოდში. რა განგასხვავებთ სხვა კომპანიებისგან?

-ჩვენს კლუბში მუშაობა სიამოვნებაა. სიყვარულით ამზადებ თითოეულ ბარათს. ყველაფერი ხელნაკეთია და ორიგინალური. შესრულების ხარისხი მეტად დახვეწილი. ამასთანავე, სტუდენტების მიერაა შექმნილი, რაც მათთვის შემოსავალია.

-როგორია ამ ბარათების დამზადების პროცესი და რას სთავაზობთ მომხმარებლებს?

-ბარათების დასამზადებლად გვაქვს უამრავი სხვადასხვა მასალა, ქაღალდის საჭრელები, სხვადასხვა ფერისა და დიზაინის შტამპები, უამრავი ფერადი ქაღალდი, რაც, ძირითადად, შემოწირულობებია ჩვენი მეგობარი კლუბის წევრებისგან. კლუბის თითოეული წევრი ქმნის ბარათს თავისი დიზაინით და მერე უხსნის სხვებს, როგორ დაამზადა ესა თუ ის ბარათი.

-რამდენად დიდია მოთხოვნა თქვენი პროდუქციის მიმართ?

-გვაქვს გვერდი, სადაც მომხმარებელი თვითონ გვიკავშირდება და გვიკვეთავს სხვადასხვა შინაარსისა და დიზაინის ბარათს. ასევე, ვყიდით სხვადასხვა მაღაზიასა და ფლი მარკეტებზე.

-თქვენი სამომავლო გეგმების შესახებ გვიამბეთ – აპირებთ თუ არა გაფართოებასა და სხვა ბაზრებით დაინტერესებას?

-მომავალში ვაპირებთ გავაფართოვოთ ჩვენი ბარათების წარმოება. ასევე, შევიტანოთ ეროვნული ელემენტები. ვაპირებთ, მოვძებნოთ კომპანია, რომელიც დაგვეხმარება ქართულწარწერებიანი შტამპების დამზადებაში. ეს ტურისტებისთვის და სტუმრებისთვის უფრო საინტერესო იქნება. იქნებ, მომავალში ჩვენი საკუთარი მაღაზიაც კი გავხსნათ, სადაც სხვადასხვა ნაკეთობასაც გავყიდით.

მასალა მოამზადა:  ნატალია ჯალაღონიამ

ახალგაზრდა ანალიტიკოსთა და მეცნიერთა დარბაზი – ,,დოქტრინა“