close

მსოფლიო

ეკონომიკამსოფლიოტურიზმი

დუბაიში ძვირადღირებული კურორტი შენდება

1.86K views on

 

დუბაი სასტუმრო ,,ბურჯ ალ არაბიას” მახლობლად, დაახლოებით 1.7 მილიარდი დოლარის ოდენობის ტურისტულ კურორტს ააშენებს.კურორტი ორ ხელოვნურ კუნძულზე განთავსდება, რომლებიც აფრის ფორმის მქონე, წყალში მდგარი სასტუმროს ერთ–ერთ მხარეს გაშენდება.

არაბთა გაერთიანებული საემიროების ყველაზე განვითარებულ ქალაქს შემუშავებულ აქვს გეგმა, რომლის შესაბამისადაც, 2020 წლისთვის ქალაქის სტუმართა რიცხვმა წელიწადში 20 მილიონს უნდა მიაღწიოს. საინტერესოა, რომ სწორედ 2020 წელს, დუბაი მსოფლიო გამოფენა „უორლდ ექსპო 2020“-ს უმასპინძლებს.

ტურისტული კურორტის სახელია მარსა ალ არაბი. ორივე კუნძულის ჯამური ფართობი 370 000 კვადრატულ მეტრზე (37 ჰექტარი) მეტი იქნება. ერთი კუნძული გასართობ დაწესებულებებს და საოჯახო ტურიზმს დაეთმობა, მეორეზე კი – ლუქს კლასის ვილები და ნავმისადგომები განთავსდება.

ვიზიტორების რიცხვით დუბაი მსოფლიო ლიდერია. დუბაის ტურიზმის სააგენტოს ინფორმაციით, მიმდინარე წლის პირველ კვარტალში, დუბაის უკვე 4.6 მილიონი ადამიანი სტუმრობდა. ეს კი შარშანდელი იმავე პერიოდის მაჩვენებელზე 11 პროცენტით მეტია. მარსა ალ არაბზე 140 ვილა, საზღვაო და აკვაპარკი განლაგდება.

მარსა ალ არაბის გარდა, დუბაიში არაერთი სხვა გრანდიოზული პროექტი ხორციელდება. მათ შორისაა საგამოფენო კომპლექსი „უორლდ ექსპო 2020-სთვის“, დუბაის მეტროს სისტემის განვითარება, ასევე საერთაშორისო აეროპორტი ალ მაკტუმი, რომელიც ქალაქის განაპირას შენდება და წლიურად 146 მილიონი მგზავრის მიღებაზეა გათვლილი.

დუბაის ხელოვნურ კუნძულებს შორის ყველაზე დიდია პალმ ჯუმეირა, რომელზეც რამდენიმე სასტუმრო, ვილა და აპარტამენტია განლაგებული. ქალაქის სანაპირო ზოლში სხვა კუნძულებიც შენდება, თუმცა 2009 წლის კრიზისის შემდეგ, მათი განვითარება შეჩერდა და გაბარიტებში შემცირდა. ჯერ არ დასრულებულა კუნძული პალმ ჯაბელ ალი, რომლის მშენებლობაც 2002 წელს დაიწყო. პალმ დეირას პროექტი კი გადააკეთეს და ის ამჟამად დეირა ისლანდსის სახელით არის ცნობილი.ხელოვნური კუნძულების კიდევ ერთი პროექტია ხელოვნური არქიპელაგი, რომელიც თავისი ფორმით, მსოფლიოს რუქას ჰგავს და 300 კუნძულს მოიცავს. ეს პროექტი მხოლოდ ნაწილობრივ არის დასრულებული.

 

წყარო: Harvard business review

მასალა მოამზადა: ლაშა ჯინჭარაძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

სრულად ნახვა
განათლებამსოფლიო

ევროპის ყველაზე ინოვაციური უნივერსიტეტები – „როიტერსი“ 2017 წლის რეიტინგს აქვეყნებს

1.57K views on

ევროპის ყველაზე მაღალტექნოლოგიური ჰაბები დიდ გავლენას ახდენენ ისეთი დიდი დედაქალაქებიდან, როგორიცაა – ლონდონი, ბერლინი და პარიზი. მაგრამ რამდენად საკვირველადაც უნდა ჟღერდეს, ევროპული ინოვაციების გული პატარა ქალაქში, ჰოლანდიურ ენაზე მოსაუბრე ფლანდრიელთა რეგიონში მდებარეობს.

სწორედ ეს გახლავთ სააგენტო „როიტერსის“ ყოველწლიური რეიტინგის – ევროპის ყველაზე ინოვაციური უნივერსიტეტების დასკვნა. რეიტინგი განსაზღვრავს იმ საგანმანათლებლო დაწესებულებებს, რომლებსაც ყველაზე დიდი წვლილი შეაქვთ მეცნიერების განვითარებაში, ახალი ტექნოლოგიების გამოგონებასა და გლობალური ეკონომიკის მართვაში.

რეიტინგში, რომელიც 100 საგანმანათლებლო დაწესებულებას მოიცავს, პირველ ადგილს იკავებს ბელგიის KU Leuven. ეს გახლავთ თითქმის 600 წლის საგანმანათლებლო დაწესებულება, რომელიც პაპ მარტინის V- მიერ არის დაარსებული, მაგრამ დღესდღეობით ტექნოლოგიის ცოდნა თეოლოგიის ცოდნაზე მეტად აქტუალურია : KU Leuven პლანეტის ერთ-ერთ უდიდესი დამოუკიდებელი კვლევისა და განვითარების ორგანიზაციის ტიტულს ინარჩუნებს. 2015 წელს უნივერსიტეტის კვლევის ხარჯებმა 454 მილიონ ევროს გადააჭარბა და მისი პატენტის პორტფელი ამჟამად 586 აქტიურ ოჯახს მოიცავს, რომელთაგან თითოეული წარმოადგენს დაცულ გამოგონებას არაერთ ქვეყანაში.

ევროპაში მეორე ყველაზე ინოვაციური უნივერსიტეტი არის ,,Imperial College London-ი”, რომლის მეცნიერები დაკავშირებული არიან პენიცილინის აღმოჩენასთან ჰოლოგრაფიის განვითარებასა და ბოჭკოვანი ოპტიკის გამოგონებასთან. კემბრიჯის უნივერსიტეტი, რომელიც 800 წლიანი ისტორიის მანძილზე ნობელის 91 ლაურეატს ითვლის, რეიტინგში მესამე აგილს იკავებს. მეოთხე ადგილზეა მიუნხენის ტექნიკური უნივერსიტეტი, რომელმაც 1990 წლიდან 800-ზე მეტი კომპანია გააფართოვა, მათ შორის სხვადასხვა მაღალტექნოლოგიური სტარტაპი.

რეიტინგის 100 საგანმანათლებლო დაწესებულებიდან 23 გერმანიის უნივერსიტეტია. მეორე და მესამე ადგილს კი 17 -17 საგანმანათლებლო დაწესებულებით გაერთიანებული სამეფო და საფრენგეთი იკავებენ.  თუმცა სამივე ეს ქვეყანა კონტინენტის ყველაზე მჭიდროდ დასახლებულ და მდიდარ ქვეყნებადაც ითვლება.

ირლანდიის რესპუბლიკა რეიტინგში მხოლოდ სამი სკოლითაა წარმოდგენილი, თუმცა 5 მილიონზე ნაკლები მოსახლეობის ქვეყნისთვის ეს იმაზე ორჯერ კარგი შედეგია, ვიდრე ტოპ სამ ქვეყანას აქვს. ამავე ფაქტორის (ერთ სულ მოსახლეზე) გათვალისწინებით, მეორე ადგილს იკავებს დანია, შემდეგ მოდის – ბელგია, შვეიცარია და ნიდერლანდები.

იგივე შეიძლება ითქვას ეკონომიკურ ფაქტორზეც. საერთაშორისო სავალუტო ფონდის თანახმად, 2016 წელს გერმანიის მთლიანი შიდა პროდუქტი 349 ტრილიონ დოლარს აჭარბებს, რაც 11-ჯერ აღემატება ირლანდიის მაჩვენებელს – 307 მილიარდ დოლარს. რეიტინგში წარდმოდგენილი გერმანული საგანმანათლებლო დაწესებულებების რიცხვი კი ირლადიურს მხოლოდ 7-ჯერ აღემატება.

 აღსანიშნავია, რომ რუსეთი, ევროპის ყველაზე მჭიდროდ დასახლებული ქვეყანა, რომელიც ეკონომიკის სიდიდის მხრივ მეხუთე ადგილს იკავებს რეგიონში, რეიტინგში არცერთი უნივერსიტეტით არაა წარმოდგენილი. რეიტინგში არ შედის არცერთი უკრაინული და რუმინული უნივერსიტეტი.

ევროპის ყველაზე ინოვაციური უნივერისტეტების რეიტინგი „როიტერსმა“ Clarivate Analytics-თან თანამშრომლობის შედეგად  გამოავლინა. Clarivate Analytics-მა 600 გლობალური ორგანიზაციის მიერ სხვადასხვა აკადემიურ ჟურნალში გამოქვეყნებული სტატია შეისწავლა და ის საგანმანათლებლო დაწესებულებები გამოავლინა, რომლებსაც 2010-2015 წლებში მსოფლიოს ინტელექტუალური საკუთრების ორგანიზაციაში სულ მცირე 50 პატენტი ჰქონდათ წარდგენილი. შემდეგ თითოეული კანდიდატი 10 სხვადასხვა განზომილებით, აკადემიურ ნაშრომებსა და წარდგენილ პატენტებზე დარდნობით შეაფასეს.

 

წყარო: Reuters

მასალა მოამზადა: თამარ ტაბატაძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

სრულად ნახვა
ენერგეტიკამსოფლიო

აშშ-ში ქარის ენერგიის წარმოების მოცულობა იზრდება   

1.38K views on

აშშ-ში ქარის ენერგიის წარმოების მოცულობა იზრდება.  მიმდინარე წლის პირველ კვარტალში ქვეყანაში 2,000-მეგავატიანი სიმძლავრის  ელექტროსადგურები დამონტაჟდა, რაც გასული წლის ანალოგიურ პერიოდთან შედარებით ოთხჯერ მეტია.

American Wind Energy Association-ის ინფორმაციით, ეს აშშ-ს ქარის ინდუსტრიის ყველაზე დიდი კვარტალია 2009 წლის შემდეგ.

გააქტიურდა პროექტის მშენებლობასა და განვითარებასთან დაკავშირებული საქმიანობაც.  ქარის პროექტების ფედერალურ საწარმოთა საგადასახადო კრედიტი 2020 წლამდე არ იწურება.  იმ პროექტებისთვის კი, რომელიც მშენებლობას 2017 წლიდან 2019 წლის ჩათვლით დაიწყებენ, საკრედიტო ღირებულება ყოველწლიურად 20% -ით შემცირდება.

American Wind Energy Association-ის ინფორმაციის თანახმად, მშენებლობის პროცესშია 9,025 მგვტ-ს პროექტი და დამატებით 11,952 მეგავატის პროექტი განვითარების ეტაპზეა.

პირველ კვარტალში დამონტაჟებული მეგავატების დაახლოებით მეოთხედთან დაკავშირებით კონტრაქტები ისეთ შემსყიდველებთანაა გაფორმებული, რომლებიც უტილიტარული ინდუსტრიის წამრომადგენელები არ არიან, მათ შორის არიან: აშშ არმია, Amazon.com Inc, Alphabet Inc’s Google. კონტრაქტები გააფორმეს ასევე Home Depot Inc და Intuit Inc.

ქარის ენერგიის მოცულობის მიხედვით პირველ ადგილზე დგას ტეხასის შტატი, შემდეგ მოდის – კანზასი, ნიუ მეხიკო, ჩრდილოეთ კალიფორნია და მიჩიგანი.

 

წყარო: Reuters

მასალა მოამზადა: თამარ ტაბატაძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

სრულად ნახვა
გეოგრაფიაეს საინტერესოამსოფლიო

ველურად მცხოვრები ადამიანები თანამედროვე მსოფლიოში

2.53K views on

დღემდე დედამიწის სხვადასხვა კუთხეში ვხვდებით ადამიანთა ჯგუფებს, რომლებიც ნადიროებთა და შემგროვებლობით არსებობენ, ყველაზე ცნობილი ავსტრალიის აბორიგენები ანუ ძირძველი მცხოვრებნი არიან, ისინი იქ 40 000-ზე მეტი წელია, რაც იქ ცხოვრობენ. მათ დღემდე არ იციან მიწათმოქმედება და მესაქონლეობა. არიან შემგროვებლები.

ალიასკასა და კანადის ესკიმოსები უძველესი მონადირეები არიან. არც ისე დიდი ხანია, რაც მათ ხელში აიღეს ცეცხლსასროლი იარაღი და გადასხდნენ თოვლმსვლელ მანქანებზე.

დღემდე ბევრი მკვიდრი ამერიკელისათვის ანუ ინდიელისათვის თევზაობა, ნადირობა და შემგროვებლობა არსებობის ძირითადი წყაროა.

სამხრეთი ამერიკის ზოგიერთ რაიონში ასევე ცხოვრობენ ძველესი მონადირე-შემგროვებლები.

მსოფლიოში დღეს 5 000-მდე ასეთი ჯგუფია, რომელშიც 300  მილიონი ადამიანია გაერთიანებული.

 

ახალგაზრდა ანალიტიკოსთა და მეცნიერთა დარბაზი  – ,,დოქტრინა”

სრულად ნახვა
მსოფლიოტექნოლოგიებიტრანსპორტი

ელონ მასკმა მიწისქვეშა გზების სისტემის შესახებ საკუთარი ხედვა წარადგინა

1.38K views on

ამერიკელმა მეწარმე ელონ მასკმა ლოს-ანჯელესის მიწისქვეშა გვირაბის ქსელის შესახებ საკუთარი ხედვა წარმოადგინა.

როგორც მასკმა TED-ის (ტექნოლოგია, გართობა და დიზაინი) კონფერენციაზე განაცხადა, ის ამერიკაში სრულიად ავტონომიურ მოგზაურობას მიმდინარე წლის ბოლომდე გეგმავს.

გარდა აღნიშნული საკითხისა,  მასკმა ისაუბრა იმაზე, თუ როგორ სურდა 50 წელში მზის ენერგიაზე მომუშავე სახურავის კრამიტი ყველა სახლში სტანდარტად ქცეულიყო. მან გააკეთა განმარტება იმის შესახებაც, თუ რატომ მიიჩნევს აუცილებელ საჭიროებად მარსზე რაკეტის გაგზავნას.

TED-ის კურატორ კრის ანდერსონთან საუბრისას Tesla-სა და Space X-ის დამფუძნებელმა განაცხადა, რომ „სულის გამანადგურებელმა“ ტრანსპორტის მოძრაობამ მას ისეთი იდეა შთააგონა, რაც გზების განტვირთვისთვის გამოსავალს წარმოადგენს.

მასკმა ვიდეო წარმოადგინა და კონფერენციის მონაწილეებს გვირაბის სისტემის მუშაობის პრინციპი გააცნო.

მანქანები ურიკის მსგავს მოწყობილობაზე ჩერდება, მიწა იხსნება და ისინი ქვემოთ ჩადის. მანქანა პლატფორმას ტოვებს და მას სხვა მანქანა ანაცვლებს, რომელიც პირიქით, ქვემოდან ზემოთ ადის.

მასკი ამტკიცებს, რომ აშშ-ის მასშტაბით „სრულიად ავტონომიური“ მგზავრობა  წლის ბოლომდე გახდება შესაძლებელი.

იხილეთ ვიდეო: http://www.bbc.com/news/technology-39741094

 

წყარო: BBC

მასალა მოამზადა:  თამარ ტაბატაძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

სრულად ნახვა
მსოფლიოპოლიტიკა

2017 წელს აშშ-ში აღარ არის ,,სრული დემოკრატია”- დემოკრატიის ინდექსის კვლევის შედეგები

1.92K views on

ჟურნალ „ეკონომისტის“ დაზვერვის განყოფილების კვლევითი ჯგუფის 2016 წლის დემოკრატიის ინდექსის მიხედვით, აშშ, პირველად, აღარ არის ,,სრულყოფილი დემოკრატია”. იგი „არასრულად დემოკრატიულ“ სახელმწიფოდ გამოცხადდა.

რა არის დემოკრატიის ინდექსი?

დემოკრატიის ინდექსი მსოფლიოს 176 ქვეყანაში ზომავს დემოკრატიის დონეს, რომელთაგან 166 სუვერენული სახელმწიფოა, ხოლო 165- გაეროს წევრი. ამ ქვეყნების დემოკრატიულობის ხარისხი ფასდება ყოველწლიურად  5 ძირითადი კატეგორიის მიხედვით: პლურალიზმი და საარჩევნო პროცესი, სამოქალაქო თავისუფლების ხარისხი, ხელისუფლების ფუნქციონირება, პოლიტიკური მონაწილეობა და პოლიტიკური კულტურა. შესაბამისად, სახელმწიფოები 4 ტიპად კლასიფიცირდება: სრული დემოკრატიები, არასრული დემოკრატიები, ჰიბრიდული რეჟიმები და ავტორიტარული რეჟიმები.

აშშ-ის შედეგი

2015 წელს აშშ-ის დემოკრატიულობის მაჩვენებელი 10 ქულიდან 8.05 გახლდათ, 2016 წლის მონაცემებით კი 7.98, რაც არ არის საკმარისი, რომ ქვეყანა კლასიფიცირდეს, როგორც „სრულყოფილი დემოკრატია“ (ზღვარი 8-დან 10-მდეა) მსოფლიოს მოწინავე სახელმწიფო- აშშ, თავისი მაჩვენებლით მოხვდა იტალიის გვერით, რომელიც ცნობილია პოლიტიკის ფრაგმენტაციით.

„არასრულ დემოკრატიად“ მოიხსენიებენ სახელმწიფოს, რომელშიც შენარჩუნებულია თავისუფალი და გამჭვირვალე არჩევნები, თუმცა მმართველობის სისტემა არის სუსტი, პოლიტიკური კულტურა ნაკლებგანვითარებული, სამოქალაქო ჩართულობა კი დაბალ დონეზეა. მაგალითისთვის,  ამ კატეგორიაში აშშ-სთან ერთად იაპონია, საფრანგეთი, სინგაპური, სამხრეთ კორეა, ინდოეთია.

გამომწვევი მიზეზები

„ეკონომისტის“ ანგარიშის მიხედვით, აშშ-ის გაუარესებული მაჩვენებელი არ უნდა დავაბრალოთ დონალდ ტრამპის პრეზიდენტობას. „აშშ რამდენიმე წელი არასრულ დემოკრატიად გადაქცევის ზღვარზე იმყოფებოდა. 2016 წლის საპრეზიდენტო არჩევნებიც რომ არ ყოფილიყო, მაჩვენებელი მაინც დაეცემოდა“. პასუხი უნდა ვეძიოთ ხელისუფლების, პარტიებისა და არჩეული წარმომადგენლებისადმი ნდობის შემცირებაში.-ნათქვამია მოხსენებაში.

რა სიტუაციაა მსოფლიოს სხვა რეგიონებში?

ანგარიშის მიხედვით, ნდობის ფაქტორი მნიშვნელოვან როლს თამაშობს სხვა განვითარებულ ქვეყნებშიც. ტექნოკრატიულობის გაზრდილი როლი, საზოგადოების თავშეკავება პოლიტიკურ პროცესებში ჩართულობაში და სამოქალაქო თავისუფლებების შეზღუდვის  გაზრდილი პრაქტიკა ზემოთ აღნიშნული პრობლემის მთავარი სიმპტომებია. 167 ქვეყნიდან, ნახევარზე მეტ შემთხვევაში, შეინიშნება დემოკრატიულობის ხარისხის შემცირება 2006-2016 წლებში.

ავტორიტარულ რეჟიმებად დასახელდა ჩრდილოეთ კორეა, სირია, ჩადი და ცენტრალური აფრიკის რესპუბლიკა.

„სრულად დემოკრატიებს“ შორის პირველ ადგილს ნორვეგია იკავებს. შემდეგ მოდის ისლანდია, შვედეთი, ახალი ზელანდია, დანია, კანადა და ირლანდია. რაც შეეხება ბრიტანეთს, 2016 წელს ბრექსიტის რეფერენდუმით გამოწვეული მღელვარების ფონზე, იგი მე-16 ადგილზე გავიდა.

საქართველოს დემოკრატიულობის ხარისხი

კვლევის მიხედვით, საქართველოს დემოკრატიულობის დონე 2006-2016 წლებში 4.9-დან 5,9-მდე გაიზარდა და ქვეყანა 78-ე ადგილზე გავიდა. ამ მაჩვენებლით ის ჰიბრიდულ რეჟიმად კლასიფიცირდება, რაც ნიშნავს, რომ საარჩევნო სისტემა არ არის გამართული, პრობლემებია ხელისუფლების მუშაობასთან და სახელმწიფოში დემოკრატიისა და ავტოკრატიის ელემენტებია გაერთიანებული.

 

წყარო: The Economist

მასალა მოამზადა: ცირა შვანგირაძე

ახალგაზრდა ანალიტიკოსთა და მეცნიერთა დარბაზი – ,,დოქტრინა”

სრულად ნახვა
კვლევებიმედიცინამსოფლიო

დნეპროპეტროვსკის სასკოლო ექსპერიმენტმა ბავშვები ფასთფუდს გადაააჩვია

2.53K views on

იმისთვის, რომ  ბავშვებს, ერთხელ და სამუდამოდ, უარი ეთქვათ არაჯანსაღი კვებისთვის,  უკრაინელმა მასწავლებლებმა  ექსპერიმენტი ჩაატარეს – ცხოველებს აჭამეს ჩიფსები,  ,,სუხარი“ (გახუხული პური) და ფრი.

ამ  ექსპერიმენტის გადაწყვეტილება ქიმიის მასწავლებელმა – ტატიანა დეინეგამ  –  მიიღო, როდესაც გამოკვლევების შემდეგ ყოველ მესამე ბავშვში  კუჭ-ნაწლავის დაავადებები გამოვლინდა. ბავშვები ვერაფრით დაარწმუნა, რომ ფასთფუდის საკვები არ ეჭამათ, ამის შემდეგ, მიიღო გადაწყვეტილება, შეესყიდა ლაბოარატორიული ცხოველები და ექსპერიმენტები ჩაეტარებინა.  მე-10 ა კლასში გაჩნდა უჩვეულო ცხოველთა კუთხე.

ტატიანა დეინეგა: ,,როდესაც თვითონ ჩაატარეს ცდები, მე ვნახე  შედეგი და დავრწმუნდი, რომ ახლა არა მარტო თვითონ, არამედ მათი შვილებიც კი არასდროს არ მოიხმარენ ფასთფუდის საკვებს.“

მათ თეთრი ლაბორატორიის  მღრღნელები აგრარულ უნიევრსიტეტში იყიდეს და 4 ჯგუფად დაყვეს. პირველ ნაწილს აჭმევდნენ ჩიფსებს, მეორეს – ,,სუხარს“, მესამეს – ბოსტნეულს საკვები დანამატებით.  ამ ექსპერიმენტში უფროსკლასელი სერგეი თვითონ მონაწილეობდა და კვებით რაციონს ადგენდა.  მის რაციონში, ექსპერიმენტის მეტი სიცხადისთვის, იყო საკუთარ ბოსტანში მოყვანილი სტაფილო და ხორბალი.

სერგეის ვირთხები ახლაც თამაშობენ და ჯანმრთელად არიან, ხოლო დანარჩენ მღრღნელებს რაც დაემართათ, სკოლის მოსწავლეები დღესაც საშინლად იგონებენ. ექსპერიმენტულმა ცხოველებმა მხოლოდ 20-დღიან მიმართულ არასწორ კვებას გაუძლეს.

ტატიანა გაგადაიკი,  მე-10 ა კლასის მოსწავლე: ,,ჩვენ ვხედავდით, რომ ვირთხებს, რომლებიც იკვებებოდნენ ჩიფსებით, ფაქტობრივად, გასცვივდათ ბეწვი  და  თვალდახუჭულები იყვნენ. ისინი ძალიან გვეცოდებოდნენ და ექსპერიმენტის შეჩერება გადავწყვიტეთ. ამის შემდეგ, სუპერმარკეტებში ამ განყოფილებას უკვე  გვერდს ვუვლი.“

ექსპერიმენტს ყურადღებით აკვირდებობდნენ აგრარული უნივერსიტეტის თანამშრომლები, ყველა გადახრა ქცევაშიც და ცხოველის ჯანმრთელობის მდგომარეობაში, ფიქსირდებოდა ჟურნალში. ცხოველებს ფოტოებს უღებდნენ. მოგვიანებით,  ლაბორატორიაში დადასტურდა, რომ მღრღნელებს, რომლებიც ჩიფსებით, ,,სუხარებითა“ და არომატიზირებული საკვებით იკვებებოდნენ, დარღვევები ჰქონდათ საჭმლის მომნელებელ სისტემაში, მხედველობა გაუუარესდათ და დაეწყოთ ღვიძლის დაშლა.

მედიამ ქიმიის მასწავლებელი ცხოველებისადმი სასტიკ მოპყრობაში დაადანაშაულა.

იანა პონომარევა: მე-10  ა კლასის მოსწავლე:  ,,რა თქმა უნდა, მე მეცოდებიან ეს მღრღნელები, მაგრამ ამავე პროდუქტებით  ადამიანები იკვებებიან. ცხოველებს თუ არ მიცემთ ამ მავნე საკვებს, ისინი ბედნიერები, აქტიურები არიან,  ე.ი.  – მათ ეს დანამატები არ სჭირდებათ.“

ახლა უვკე მოსწავლეები გეგმავენ, რომ ფასთფუდის მავლებლობაზე ფილმი გადაიღონ.

ამ ჯანმრთელი კვების გაკვეთილებით უკვე დაინტერესდნენ უკრაინელი მეცნიერები.  საკვები ტექნოლოგიების ინსტიტუტში დარწმუნებულები არიან, რომ ბავშვები შეიძლება აიძულო უარი თქვან მავნე კვებაზე, თუ ისინი ნახავენ ვიდეოს, სადაც ასახულია დნეპროპეტროვსკის სკოლის ექსპერიმენტი. აქამდე სხვა მეთოდები ასეთი ეფექტური არ ყოფილა.

 

წყარო:  http://www.1tv.ru/news/social/169705

მასალა მოამზადა: ნატალია ჯალაღონიამ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

სრულად ნახვა
ბიზნესიმსოფლიო

ინფორმაცია შვეიცარიაში ,,მაკდონალდსის” ყველა რესტორნის დახურვის შესახებ მცდარია

1.57K views on

18 ივნისს, გამოცემა „ბანკები და ფინანსების” ვებგვერდზე გამოქვეყნდა ინფორმაცია, თითქოს  შვეიცარიაში მაკდონალდსის ქსელის ყველა რესტორანი დაიხურა მას შემდეგ, რაც „ევროკომისარმა სოფლის მეურნეობის საკითხებში დაჩან ჩოლოშმა ევროპის ბევრი ქვეყნიდან მიიღო 120-ზე მეტი განცხადება, საკანონმდებლო დონეზე აკრძალონ ფასტფუდები”. პუბლიკაციაში საუბარია ასევე იტალიაში, ესპანეთსა და გერმანიაში უკანასკნელ პერიოდში ამ მხრივ არსებულ პრობლემებზე. გამოცემა შვეიცარიაში ,,მაკდონალდსის” რესტორნების ქსელის დახურვის პირველწყაროდ უთითებს ,,The Georgian Time-ს”, თუმცა ბმულზე გადასვლისას სტატია სათაურით – ,,შვეიცარიაში ,,მაკდონალდსის” ქსელის უკლებლივ ყველა რესტორანი დახურეს” – აღარ იხსნება.

გავრცელებული ინფორმაცია სიცრუეა, რასაც შემდეგი გარემოებები ცხადყოფს:

  • ,,მაკდონალდსის” ქსელი შვეიცარიაში დღემდე ფუნქციონირებს, რასაც აღნიშნული ქსელის ვებგვერდიც მოწმობს.
  • შვეიცარია ევროკავშირის წევრი ქვეყანა არაა. ამბის მიხედვით, ქვეყანაში მას შემდეგ აიკრძალა სწრაფი კვების ობიექტები, რაც ევროკომისარმა სოფლის მეურნეობის საკითხებში 120-ზე მეტი განცხადება მიიღო. არაწევრი ქვეყნების ტერიტორიაზე ევროკავშირის იურისდიქცია არ ვრცელდება.
  • სტატიაში მითითებული ევროკომისარი სოფლის მეურნეობის საკითხებში – დაჩიან ჩოლოში – აღნიშნულ პოსტს 2014 წლიდან აღარ იკავებს. ამჟამად სოფლის მეურნეობის საკითხებს ევროკომისარი – ფილ ჰოგანი – კურირებს.  დაჩიან ჩოლოში კი აღნიშნულ თანამდებობას. 2010-2014 წლებში იკავებდა.

 

მასალა მოამზადა:  ციცი კიკვაძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

სრულად ნახვა
განათლებამსოფლიოტექნოლოგიები

კენია: „მოსაწყენი სახელმძღვანელოების ნაცვლად ანიმაციებს, კომპიუტერულ თამაშებს, ვიდეოებსა და ვიქტორინებს ვიყენებთ”

2.25K views on

 

კენიის ზოგიერთ რაიონში განათლება ძალიან დაბალ დონეზეა, ამიტომ ნაირობის ერთ–ერთი რაიონის მასწავლებლებმა გადაწყვიტეს, მოსწავლეები პერსონალური კომპიუტერებით დაეინტერესებინათ.

ერთ-ერთი კვლევის მიხედვით, კენიელი მოსწავლეების უმრავლესობა სწავლას 14 წლის ასაკში ანებებს თავს. ახალი პროექტის ავტორს, პროგრამისტ ნივი მუქერჯის კი მიაჩნია, რომ სასწავლო პროცესი უფრო სახალისო და მიმზიდველი უნდა გახდეს – ეს ბავშვებისთვის განათლების მიღების სტიმულად იქცევა. „მოსაწყენი სახელმძღვანელოების ნაცვლად ანიმაციებს, კომპიუტერულ თამაშებს, ვიდეოებსა და ვიქტორინებს ვიყენებთ, რათა სასწავლო პროცესი ინტერაქტიული გავხადოთ”, – ამბობს ნივი მუქერჯი.

პროექტი პირველად კავანგვარში ჩაეშვა – ნაირობის ყველაზე ღარიბ შემოგარენში, სადაც ფართოდ იყო გავრცელებული ნარკომანია, პროსტიტუცია და სხვადასხვაგვარი კრიმინალი. ახლა კომპიუტერი მოსწავლეთა დიდ ინტერესს იწვევს. ცამეტი წლის მარსელინო კეიანდა ამბობს, რომ პირველი ემზადება გამოცდებისთვის და კომპიუტერით სწავლა ძალიან ეხალისება: „უამრავი წიგნის თრევა მიწევდა. ახლა მხოლოდ პლანშეტი მაქვს. თუ მასწავლებელი გვერდით არ მყავს, რომ რაიმე ვკითხო, პასუხს კომპიუტერი მცემს”.

კენიის განათლების სისტემა არასრულყოფილია. ქვეყანა ათეულობით ათასი მასწავლებლის დეფიციტს განიცდის, კლასები გადატვირთულია, მოსწავლეებს სწავლა უჭირთ. პროექტის ავტორებს იმედი აქვთ, რომ კომპიუტერები მოზარდებს მობილიზების სტიმულს მისცემს. პროექტმა სტარტი ახლახან აიღო, მაგრამ უკვე წარმატებულის შთაბეჭდილებას ტოვებს – ბავშვები უკეთესადაც სწავლობენ და აღარც გაკვეთილებზე იგვიანებენ. „პლანშეტმა ჩვენი მოსწავლეები სკოლაში დააბრუნა. ისინი აღარც გაკვეთილებს აცდენენ და კარგ ნიშნებსაც იღებენ. ახალი ტექნოლოგიები მათ სამყაროს შეცნობაში ეხმარება”, – ამბობს მასწავლებელი ფილსონ მადეგვა.

ნივი მუქერჯი მიიჩნევს, რომ პროგრამული უზრუნველყოფა მხოლოდ სკოლის პროგრამის ათვისებას არ უწყობს ხელს – ის მოსწავლეებს გარემოზე ზრუნვასაც ასწავლის, სოციალურ სამართლიანობასა და ადამიანის უფლებებზეც მოუთხრობს: „ვცდილობთ, ჩვენი შვილები 21-ე საუკუნის ეკონომიკის განვითარებაში ჩავრთოთ, ლიდერებად და აქტიურ მოქალაქეებად აღვზარდოთ. ვიმედოვნებ, მომავალში პროექტი მთელ აფრიკაში და მსოფლიოს სხვა ქვეყნებში გავრცელდება”.

 

წყარო: Harvard Business Review

მასალა მოამზადა: ლაშა ჯინჭარაძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

სრულად ნახვა
მსოფლიოპოლიტიკა

დონალდ ტრამპის პრეზიდენტობის 100 დღის შეჯამება

1.85K views on

 29 აპრილს აშშ-ის პრეზიდენტის, დონალდ ტრამპის, პრეზიდენტად დანიშვნიდან 100 დღე შესრულდა. ზოგადად, აშშ-ის პოლიტიკურ კულტურაში ეს პერიოდი აღიქმება, როგორც საპრეზიდენტო ძალაუფლების ფლობის ვადის ერთ-ერთი მნიშვნელოვანი ნაწილი, რადგან ახალი პრეზიდენტები არიან უფრო მეტად პოპულარულები მოქალაქეებში. ამავე დროს, ცდილობენ აქტიური კამპანიის ჩატარებას, რათა მომავალი საპრეზიდენტო ვადის, 4 წლის, სამოქმედო გეგმა გააცნონ საზოგადოებას და მხარდაჭერა მოიპოვონ.

იმის შეფასება, თუ როგორი იყო პრეზიდენტის მოქმედებები ამ პერიოდის განმავლობაში, საკმაოდ რთულ ამოცანას წარმოადგენს. თუმცა, პრეზიდენტმა დონალდ ტრამპმა ეს ამოცანა გაამარტივა. ჯერ კიდევ არჩევნებში გამარჯვებამდე მან გაასაჯაროვა „100 დღიანი სამოქმედო გეგმა“, რათა „ამერიკა გახდეს კვლავ დიდებული“. ეს გეგმა შეიცავდა ისეთი გადაწყვეტილებების მიღებას, როგორიცაა მექსიკის საზღვართან კედლის აშენების დაწყება, არალეგალური იმირაციის აღკვეთა „ტერორიზმისკენ მიდრეკილი“ ქვეყნებიდან, ჩინეთის, როგორც „სავალუტო მანიპულატორის“ ქმედებების პრევენცია და სხვა.

თუმცა, სხვადასხვა შეფასებით, პროგრესი ძალიან ნელი და ნაკლებშესამჩნევია, მიუხედავად იმისა, რომ  პრეზიდენტმა ტრამპმა უკვე გამოსცა 30 აღმასრულებელი ორდერი, რაც 10-ჯერ აღემატება ყოფილი პრეზიდენტის, ბარაკ ობამას მაჩვენებელს (იმავე დროის ინტერვალში). ამ 30 ორდერიდან, რეალური ქმედებები არ დაწყებულა 12 მათგანის განხორციელებისათვის. დონალდ ტრამპის მთავარი დაპირება ჯანდაცვის სფეროს რეფორმისა და იმიგრაციული ბანის შემოღების შესახებ, დიდ წინააღმდეგობას წააწყდა კონგრესისა და სასამართლო შტოსგან.

არასამთავრობო ორგანიზაციის – „პარტნიორობა საჯარო სერვისისთვის“-  მიხედვით, პრეზიდენტმა 100 დღის განმავლობაში აღმასრულებელი შტოს იმ პოზიციებზე, რომელიც სენატის თანხმობას მოითხოვს, მხოლოდ 58 ოფიციალური პირი წარადგინა, ბარაკ ობამამ კი 190. სახელმწიფო დეპარტამენტები ცარიელია, ისევე, როგორც აშშ-ის ეკონომიკურ მრჩეველთა საბჭო.

მიუხედავად იმისა, რომ ზემოთ აღნიშნულს შესაძლოა იმედგაცრუებული დაეტოვებინა აშშ-ის პირველი პირი, გამოკვლევებმა აჩვენა, რომ ამ ფაქტებს დიდი გავლენა არ მოუხდენია მის მხარდამჭერებზე. 22 აპრილს ,,YouGov-მა“ ჩაატარა გამოკითხვა 1500 ამერიკელთან. მთავარი კითხვა იყო, ამართლებს თუ არა პრეზიდენტი დონალდ ტრამპი მათ მოლოდინებს. გამოკითხულთა 30%, რომლებიც თავს დემოკრატად ან რესპუბლიკელებად მიიჩნევს, აღნიშნავენ, რომ ბატონმა ტრამპმა გაამართლა მათი მოლოდინები. დანარჩენებისგან კი,  დემოკრატების 41 % ფიქრობს, რომ დონალდ ტრამპის პრეზიდენტობა იყო „უფრო უარესი“, ვიდრე მოელოდნენ, რესპუბლიკელების 28 % კი პირიქით, მიიჩნევს, რომ პრეზიდენტი იყო „უფრო უკეთესი“, ვიდრე მოელოდნენ.  შინაარსობრივად იგივე სიტუაციაა პარტიული ლოიალურობის მხრივაც. 88% რესპუბლიკელებისა ამართლებს ტრამპის პრეზიდენტობას, როცა დემოკრატების 82%, არა.

უნდა აღინიშნოს, რომ ბარაკ ობამას დროს საზოგადოებრივი აზრის მსგავსი პოლარიზაცია არ შეიმჩნეოდა. დონალდ ტრამპი საარჩევნო პერიოდშიც ახერხებდა პოლარიზებული გარემოს შექმნას, რაც, როგორც ჩანს, ოფისში ყოფნისასაც გრძელდება.

ზემოთ აღნიშნული გამოიხატება დონალდ ტრამპის რეიტინგშიც, რომელიც, როგორც ირკვევა, ერთ-ერთი ყველაზე დაბალია ცივი ომის შემდგომი პრეზიდენტების რეიტინგთან შედარებით.

 

წყარო: The Economist

მასალა მოამზადა:  ცირა შვანგირაძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

სრულად ნახვა
1 … 83 84 85 86 87 … 89
Page 85 of 89