ეკოლოგია

პოლიტიკური ლიდერები და კლიმატის საკითხში დიპლომატები, ასევე არასამთავრობო ორგანიზაციები და სპეციალისტები მადრიდში ორი კვირის განმავლობაში კლიმატის ცვლილების საკითხებზე იმსჯელებენ. კონფერენცია COP25 ჩილეში უნდა ჩატარებულიყო, მაგრამ მთავრობამ, ქვეყანაში მიმდინარე არეულობის გამო, ის გააუქმა. მასპინძლობის სურვილი კი მადრიდმა გამოთქვა. ვარაუდობენ, რომ ორი კვირის განმავლობაში კონფერენციას 29 ათასამდე დელეგატი დაესწრება. ამის შესახებ BBC წერს.

კონფერენციამდე ცოტა ხნით ადრე, გაეროს გენერალურმა მდივანმა, ანტონიო გუტერეშმა განაცხადა, რომ მსოფლიომ ბუნებასთან ომი უნდა შეწყვიტოს და კლიმატის ცვლილებასთან ბრძოლისთვის პოლიტიკური ნება გამოიჩინოს.

არასამთავრობო ორგანიზაცია Save the Children-ის განცხადებით, კლიმატური შოკების გამო აფრიკაში 33 მილიონი ადამიანი საკვების უკმარისობის მხრივ საგანგებო ზღვარზეა.

კონფერენციაზე მსოფლიოს 50-მდე პოლიტიკურ ლიდერს ელოდებიან, თუმცა მათ შორის არ იქნება აშშ-ის პრეზიდენტი დონალდ ტრამპი.

კონფერენცია 2 დეკემბერს იხსნება და 13 დეკემბრამდე გაგრძელდება.

26 ნოემბერს გაერომ გამოაქვეყნა ანგარიში, რომელშიც ნათქვამია, რომ სახელმწიფოები კლიმატის დასაცავად საკმარის ზომებს არ იღებენ. უფრო ვრცლად კლიმატის ცვლილების შესახებ შეგიძლიათ წაიკითხოთ ამ ბმულზე.

სექტემბერში, ნიუ-იორკში გაეროს ეგიდით ჩატარებულ კლიმატურ სამიტზე 66 სახელმწიფო ატმოსფეროში CO2-ის შემცირებაზე შეთანხმდა. თუმცა გაეროს ბოლო ანგარიშის თანახმად, საერთაშორისო თანამეგობრობის მიერ ყველა ნაკისრი ვალდებულების შესრულების შემთხვევაშიც კი, 2100 წლისთვის პლანეტაზე ტემპერატურა გაიზრდება.

ახალგაზრდა ანალიტიკოსთა და მეცნიერთა დარბაზი ,,დოქტრინა”

გაეროს გენერალურმა მდივანმა ანტონიო გუტერეშმა განაცხადა, რომ მსოფლიოს ქვეყნების მცდელობამ, შეეჩერებინათ კლიმატური ცვლილება, ჯერ-ჯერობით „უკიდურესად არაადეკვატურია“ და არსებობს საფრთხე, რომ გლობალურმა დათბობამ დაუბრუნებლობის წერტილს მიაღწიოს.
ამის შესახებ ანტონიო გეტერეშმა მადრიდში, ორკვირიანი საერთაშორისო კლიმატური კონფერენციის დაწყების წინ განაცხადა.
მისივე თქმით, ტემპერატურის მატებამ დრამატული შედეგები მთელს მსოფლიოს მოუტანა.
„დაუბრუნებლობის წერტილი სწრაფად გვიახლოვდება, თუმცა ამას იმიტომ არ აღვნიშნავ, რომ იმედი მოგიკლათ, არამედ იმიტომ, რომ მოსალოდნელი საფრთხის შესახებ გაცნობოთ, იმისათვის, რომ ბუნების წინააღმდეგ ბრძოლა შევაჩეროთ,“- განაცხადა გუტარეშმა.
დღეს მადრიდში საერთაშორისო კონფერენცია COP25 გაიხსნა, რომელიც 13 დეკემბრამდე გაგრძელდება. კონფერენციის ესწრებიან დელეგატები მსოფლიოს თითქმის 200 ქვეყნიდან. ისინი კლიმატის ცვლილებების შესახებ 2015 წელს პარიზში მიღებული საერთაშორისო ხელშეკრულებით გათვალისწინებულ ვალდებულებებზე იმსჯელებენ, მათ შორის, ნახშიროჟანგის შეზღუდვასა და ემისიების შემცირებაზე.
როგორც ცნობილია, პარიზის შეთანხმება კლიმატის ცვლილების შესახებ მიზნად ისახავს კლიმატის ცვლილების საფრთხეზე გლობალური რეაგირების გაძლიერებას, გლობალური საშუალო ტემპერატურის ზრდის 2 გრადუს ცელსიუსზე ნაკლებ ნიშნულამდე ჩამოწევას. ასევე კლიმატის ცვლილების უარყოფით შედეგებთან ადაპტაციის უნარის გაზრდას და კლიმატის ცვლილების მიმართ მედეგობის და სათბურის გაზების დაბალემისიიანი განვითარების უზრუნველყოფის ხელშეწყობასა და ამისთვის ფინანსური ნაკადების შესაბამისობის უზრუნველყოფას.

წყარო : sciencealert.com

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი ,,დოქტრინა”

ინდოეთის დედაქალაქში ჰაერის დაბინძურებასთან ბრძოლის ფარგლებში ავტომობილების რაციონულად გამოყენების სისტემა ამოქმედდა. ამის შესახებ ინფორმაციას BBC ავრცელებს.

ოფიციალური პირების განცხადებით, 4-დან 15 ნოემბრამდე ლუწი ნომრების მქონე მანქანები ლუწ რიცხვებშ, ხოლო კენტი ნომრების მქონე ავტომობილი კენტ რიცხვებში იმოძრავებენ. ეს სისტემა ინდოეთში 2016 და 2017 წელს წარადგინეს, თუმცა უცნობია რამდენად შეიძლება გამოსადეგი და ეფექტური იყოს ჰაერის დაბინძურების წინააღმდეგ ბრძოლის ფარგლებში.

დელიში ჰაერში უმცირესი ზომის მყარი შეწონილი ნაწილაკის PM2,5-ის კონცენტრაცია რეკომენდებულზე მაღალ ნიშნულზეა.

კვირას, დელიში ჰაერის ხარისხი “საშიშ” კატეგორიას გაუტოლდა, რის გამოც სკოლები დაიკეტა, გადაიდო 30-ზე მეტი ავიაფრენა, სამშენებლო სამუშაოები კი შეჩერდა, რადგან ქალაქი სმოგში გაეხვა – შავი სქელი ნისლი, რომელიც წარმოიქმნება ბოლისა და ჭვარტლისაგან დიდ ქალაქებსა და სამრეწველო ცენტრებში. დელის ოფიციალურმა უწყებებმა ჯანდაცვის კუთხით საგანგებო მდგომარეობა გამოაცხადა.

ერთ-ერთი კვლევის მიხედვით, მსოფლიოს 15 ყველაზე დაბინძურებული ქალაქიდან 14 ინდოეთში მდებარეობს. სმოგთან დაკავშირებული დაავადებები ქვეყანაში ყოველწლიურად მილიონი ადამიანის ნაადრევი სიკვდილის მიზეზი ხდება.

ახალგაზრდა ანალიტიკოსთა და მეცნიერთა დარბაზი – ,,დოქტრინა”

სარესტორნო გლობალური ქსელი „მაკდონალდსი” და ბურგერების რესტორანი „ბურგერ კინგი“ პლასტმასის საბავშვო სათამაშოების  გამოყენებაზე უარის თქმას აპირებენ.

კომპანიების განცხადებით, ისინი ამ გზით პლასტმასის მავნე ზემოქმედებისგან გარემოს დაცვას შეეცდებიან.

„ბურგერ კინგის“ წარმომადგენლების ინფორმაციით, ბავშვთა მენიუდან პლასტმასის სათამაშოების ამოღება პირველ ეტაპზე დიდ ბრიტანეთში არსებულ ბურგერის რესტორნებში განხორციელდება, რითაც, კომპანიის შეფასებით, ამ გზით ისინი ყოველ წელს 320 ტონა პლასტმასის ნარჩენებს ააცილებენ გარემოს.

„ბურგერ კინგი“ აცხადებს, რომ პლასტმასის სათამაშების გამოყენების შეწყვეტას ქსელი მსოფლიოს  ყველა რესტორანში 2025 წლისთვის გეგმავს.

„მაკდონალდსის“ მომხმარებელს კი მომავალი თვიდან „ჰეფი მილზის“  სათამაშოების  ხილში, მომავალი წლიდან კი – წიგნში გადაცვლის საშუალება ექნებათ.

აღსანიშნავია, რომ მსოფლიოში ყოველ წელს „მაკდონადლის“ 1,2 მილიარდი სათამაშო იყიდება. სარესტორნო ქსელის წარმომადგენლები აცხადებენ, რომ მათ პლასტმასის სათამაშოების ჩანაცვლება სურთ, თუმცა „ჰეფი მილი“ მომხმარებლებში ძალიან პოპულარული პროდუქტია და მასთან დაკავშირებულ ნებისმიერ ცვლილებას სიფრთხილით უნდა მოეკიდონ.

„მაკდონალდსი“ ასევე აცხადებს, რომ 2025 წლისთვის რესტორნებში მხოლოდ განახლებადი და გადამამუშავებადი მასალები იქნება გამოყენებული.

მასალა მოამზადა :თამარ ტაბატაძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

ამაზონის ტყეში მოჭრილი ხეებისგან შემდგარი ტერიტორიის ფართობმა 2019 წლის იანვრიდან აგვისტომდე 6.4 ათასი კვადრატული კილომეტრი შეადგინა, რაც 2018 წლის მაჩვენებელზე (3367 კვადრატული კილომეტრი) თითქმის 92%-ით მეტია. ამის შესახებ ინფორმაციას Deutsche Welle-ს რუსული გამოცემა კოსმოსური კვლევის ეროვნული ინსტიტუტის (INPE) მონაცემებზე დაყრდნობით წერს. INPE-მ მონაცემები თანამგზავრ Deter-ის მეშვეობით მიიღო.

ამ ინფორმაციის თანახმად, მხოლოდ აგვისტოში ამაზონის ტყეში 1700 კვადრატული კილომეტრის ფართობზე განადგურდა ტყე, რაც 2018 წლის აგვისტოში დაფიქსირებულ მაჩვენებელზე სამჯერ მეტია. ექსპერტები ვარაუდობენ, რომ სრული 2019 წლის განმავლობაში ამაზონის ტყის ფართობი ჯამში 10 ათას კვადრატული კილომეტრით შემცირდება. 

„დედამიწის ფილტვებად“ წოდებულ ამაზონის ტყეში ბოლო ათწლეულების განმავლობაში ყველაზე ძლიერი ხანძარი 6 აგვისტოს გაჩნდა. 26 აგვისტოს „დიდი შვიდეულის“ წევრებმა ხანძარის ჩასაქრობად 22 მილიონი დოლარი გამოყვეს. 

ახალგაზრდა ანალიტიკოსთა და მეცნიერთა დარბაზი – ,,დოქტრინა”

გერმანიაში, ბერლინის ზოოპარკში ტყუპი პანდა გაჩნდა. აღნიშნულ ფაქტს მთელი გერმანია ზეიმობს, ვინაიდან ეს გადაშენების პირას მყოფი ცხოველის დაბადების პირველი შემთხვევაა ბერლინში. პანდები ერთი საათის შუალედით დაიბადნენ.

„რა ფანტასტიური სიახლეა. მთელი გერმანია ხარობს ამ დაბადებით,“ განაცხადა ბერლინის მერმა მიხაელ მიულერმა.

აღსანიშნავია, რომ ტყუპების დედა მენგ მენგი და მამა ჯიო ქინგი (სახელების ქართული მნიშვნელობა „ტკბილი სიზმარი“ და „ძვირფასია“) გერმანიამ შესაბამისი ხელშეკრულების საფუძველზე ჩინეთიდან ითხოვა, თუმცა მათი არც ახლანდელი და არც მომავალი ნაშიერის დატოვების უფლება ქვეყანას არ აქვს და ისინი 2-4 წელიწადში ჩინეთში უნდა დააბრუნოს.

მენგ მენგი და მამა ჯიო ქინგი ბერლინის ზოოპარკში 2017 წელს გერმანიის კანცლერ ანგელა მერკელის მიერ ჩინეთთან მიღწეული 15 წლიანი „პანდას სესხის ხელშეკრულების“ ფარგლებში ჩამოიყვანეს.

ახლადდაბადებულების ნახვის შესაძლებლობა ზოოპარკის დამთვალიერებლებს ამ ეტაპზე არ აქვთ.

წყარო : www.dw.com

მასალა მოამზადა: თამარ ტაბატაძემ

ახალგაზრდა ანალიტიკოსთა და მეცნიერთა დარბაზი ,,დოქტრინა“