მედიცინა

ჯანდაცვის მსოფლიო ორგანიზაცია ქვეყნების ხელისუფლებებს მოუწოდებს, კორონავირუსისგან განკურნებულებს ე.წ. „იმუნიტეტის პასპორტები“ ან „არასარისკო კატეგორიის სერტიფიკატებს“, ვინაიდან ამან, შესაძლოა ვირუსის ფართოთ გავრცელების საფრთხე გაზარდოს.
ორგანიზაციის განცხადებით, ჯერჯერობით არ არსებობს იმის მტკიცებულება, რომ იმ ადამიანებს, რომლებიც კორონავირუსისგან განიკურნენ და ანტისხეულები გამოუმუშავდათ, ვირუსი ხელახლა აღარ შეხვდებათ.
„ჯერჯერობით არ არსებობს იმის მტკიცებულება, რომ ვირუსისგან გამოწვეული ანტისხეულები ქმნის იმუნიტეტს, რომელიც ადამიანებში ინფექციის გამეორებას აღარ იწვევს, შესაბამისად „იმუნიტეტის პასპორტების,“ – აცხადებს ჯანმო.
გარდა ამისა, ორგანიზაციის მტკიცებით, ლაბორატორიებში ანტისხეულებზე ჩატარებული ტესტებიც გადამოწმებას საჭიროებს. ამასთან, საჭიროა, SARS-CoV-2-ი (ახალი კორონავირუსის მეცნიერული სახელწოდება) და კორონავირუსის დანარჩენი ექვსი სახეობა ერთმანეთისგან განვასხვავოთ.
„ჯანმო“-მ აღნიშნული განცხადება მას შემდეგ გააკეთა, რაც ზოგიერთმა მთავრობამ დაიწყო მსჯელობა იმის შესახებ, რომ იმ პირებს, რომლებიც კორონავირუსისგან განიკურნენ, მოგზაურობის, ან სამსახურებში დაბრუნების უფლება მისცენ.

წყარო : bbc.com

ახალგაზრდა ანალიტიკოსთა და მეცნიერთა დარბაზი ,,დოქტრინა“

კომპანია Gilead Sciences-ის მიერ შექმნილ ანტი-ვირუსულ პრეპარატ „რემდესივირზე“ ჩატარებულმა კლინიკურმა ცდებმა, რომელშიც 1 000-ზე მეტი კოვიდ ინფიცირებული მონაწილეობდა, აჩვენა, რომ ის პაციენტების 31 პროცენტით უფრო სწრაფად გამოჯანმრთელებას უწობს ხელს.
„შედეგებმა აჩვენა, რომ „რემდესივირს“ მნიშვნელოვანი, დადებითი ეფექტი აქვს გამოჯანმრთელების დროის შემცირებაზე. მიუხედავად იმისა, რომ 31 პროცენტიანი მაჩვენებელი 100 პროცენტი არ არის, ეს ამტკიცებს, რომ მედიკამენტს ვირუსის ბლოკირება შეუძლია,“ – განაცხადა აშშ-ის ალერგიული და ინფექციური დაავადებების ეროვნული ინსტიტუტის დირექტორმა, ენტონი ფაუჩიმ.
აშშ-ის ალერგიული და ინფექციური დაავადებების ეროვნული ინსტიტუტის ინფორმაციით, მედიკამენტზე ჩატარებულმა ცდებმა ასევე აჩვენა, რომ ის, კორონავირუსით დაინფიცირებულ პაციენტებში სიკვდილიანობის მაჩვენებელს მნიშვნელოვნად ამცირებს.
„შედეგებმა ასევე აჩვენა, რომ იმ პაციენტებში, რომლებიც „რემდესივირს“ ღებულობდნენ, სიკვდილიანობის მაჩვენებელი 8 პროცენტი იყო, პლაცებოს ჯგუფში კი – 11.6 პროცენტი,“- აღნიშნულია აშშ-ის ალერგიული და ინფექციური დაავადებების ეროვნული ინსტიტუტის მიერ გავრცელებულ ინფორმაციაში.
თუმცა, პრეპარატზე ჩატარებული კიდევ ერთი კვლევა ნაკლებად დამაიმედებელი აღმოჩნდა. „რემდესივირი“ ჩინეთში, მძიმე მდგომარეობაში მყოფ პაციენტებში გამოიყენეს, თუმცა არცთუ ისე ეფექტური აღმოჩნდა.
ჯანდაცვის მსოფლიო ორგანიზაციის გადაუდებელი სიტუაციების პროგრამის აღმასრულებელმა დირექტორმა მაიკლ რაიანმა „რემდესივირზე“ აშშ-ში ჩატარებულ კვლევაზე კომენტირებაზე უარი განაცხადა და აღნიშნა, რომ ის ჯერჯერობით კვლევას სრულად არ გაცნობია.
ცნობისათვის, ანტი-ვირუსული პრეპარატი „რემდესივირი“ 2015 წელს ებოლას სამკურნალოდ შეიქმნა, თუმცა, ამ კუთხით, დადებითი შედეგები ვერ აჩვენა.

მასალა მოამზადა :  თამარ ტაბატაძემ 

წყარო : vice.com , reuters.com

ახალგაზრდა ანალიტიკოსთა და მეცნიერთა დარბაზი ,,დოქტრინა“

ახალგაზრდა ანალიტიკოსთა და მეცნიერთა დარბაზი – ,,დოქტრინა”

იასამნისფერი გამონაყარი ფეხის თითებსა და ტერფებზე, რომელიც ჩუტყვავილას ან წითელას ინფექციას გავს, შესაძლოა, ახალი კორონავირუსის ერთ-ერთი სიმპტომი იყოს, – ამის შესახებ ინფორმაციას ესპანელი და იტალიელი ექიმები ავრცელებენ.
აღსანიშნავია, რომ პაციენტებს, განსაკუთრებით კი ბავშვებსა და მოზარდებს, რომლებსაც ფეხის თითებსა და ტერფებზე მუქი დაზიანებები ჰქონდათ, იტალიაში, ესპანეთსა და საფრანგეთში კორონავირუსი დაუდასტურდათ.
ერთ-ერთი პირველი პაციენტი, რომელსაც აღნიშნული სიმპტომი ჰქონდა, 13 წლის იტალიელი მოზარდი იყო, რომლის დაზიანებები თავდაპირველად ე.წ. ვიოლინო ობობის ნაკბენი ეგონათ, ბიჭს აღნიშნული სიმპტომის გაჩენიდან რამდენიმე დღეში დაეწყო ცხელება, კუნთებისა და თავის ტკივილი, ასევე ფეხზე არსებული დაზიანებების წვა და ქავილი.
აღსანიშნავია, რომ 29 მარტს, ანუ ხუთი კვირის შემდეგ იმ დღიდან, როდესაც იტალიაში კორონავირუსის პირველი შემთხვევა დადასტურდა, ტერფების მიდამოებში დაზიანებები ბავშვებში პირველად დაფიქსირდა. ამჟამად კი, ყოველი ხუთი პაციენტიდან ერთს აღნიშნული უცნაური დერმატოლოგიური მდგომარეობა აღენიშნება.
დერმატოლოგები მიიჩნევენ, რომ თუკი შემდგომი დაკვირვება და ლაბორატორიული კვლევები აჩვენებს, რომ საქმე COVID-19-ის ერთ-ერთ სიმპტომთან გვაქვს, ეს იმ ბავშვების იდენტიფიცირებაში დაგვეხმარება, რომლებსაც სხვა სიმპტომები ან საერთოდ არ აღენიშნებათ, ან სუსტად გამოხატული აქვთ, თუმცა დაავადების გადამტანებია არიან. მათი ადრეული იდენტიფიცირება ვირუსის გავრცელების თავიდან აცილების საშუალებაა.
იმავე მოსაზრებაზე არიან ესპანელი მედიკოსებიც. ესპანეთის ორთოპედების კოლეჯების გენერალური საბჭოს მტკიცებით, რომელიც 7 500 პროფესიონალს აერთიანებს, იტალიის, საფრანგეთისა და ესპანეთის შემთხვებმა აჩვენა, რო, ბავშვებსა და მოზარდებს, იშვიათ შემთხვევებში კი ზრდასრულ პაციენტებსაც, რომლებსაც COVID-19-ი დაუდასტურდათ, ფეხის თითებზე იასამნისფერი გამონაყარი გაუჩნდათ (რომელიც ვიზუალურად ძალიან ჰგავს ჩუტყვავილას, წითელას ან მოყინულს), განკურნების შემდეგ ეს გამონაყარი უკვალოდ ქრება.
მედიკოსების განმარტებით, ჯერჯერობით არ არსებობს იმის სამეცნიერო მტკიცებულება, რომ აღნიშნული გამონაყარი კორონავირუსის ერთ-ერთი სიმპტომია, თუმცა, COVID-19-ით დაინფიცირებულ უამრავ პაციენტში მისი დაფიქსირება იძლევა იმის საფუძველს, რომ ამ ფაქტს ყურადღებით მოვეპყროთ.
ცნობისათვის, COVID-19-ი, როგორც წესი დაინფიცირებულის ფილტვებს აზიანებს, რაც იწვევს ხველას, სუნთქვის პრობლემებსა და მაღალ ტემპერატურას. თუმცა, ბევრ პაციენტს აღენიშნება დეარეა, სათესლე ჯირკვლების ტკივილი და გემოსა და სუნის შეგრძნების დაკარგვა.

წყარო : metro.co.uk
მასალა მოამზადა : თამარ ტაბატაძემ
ახალგაზრდა ანალიტიკოსთა და მეცნიერთა დარბაზი – ,,დოქტრინა”

გაერთიანებული სამეფო ხვალიდან კორონავირუსის ვაქცინის ადამიანებზე დატესტვას იწყებს, – ამის შესახებ ქვეყნის ჯანდაცვის მინისტრმა მეთ ჰენკოკმა განაცხადა.
„კორონავირუსის დამარცხების საუკეთესი გზა ვაქცინაზე გადის. გაერთიანებული სამეფო კორონავირუსთან გლობალური ბრძოლის წინა ხაზზე იმყოფება. ჩვენ გაცილებით მეტი ფული ჩავდეთ ვაქცინის შექმნაში, ვიდრე სხვა ქვეყნებმა და შედეგიც სახეზე გვაქვს – ქვეყანა ორ ვაქცინაზე მუშაობს,“- განაცხადა მეთ ჰენკოკმა.
ხვალ იწყება ცდები ვაქცინაზე, რომელიც ოქსფორდის უნივერსიტეტის მეცნიერებმა შექმნეს. დიდი ბრიტანეთის ჯანდაცვის მინისტრის განცხადებით, სახელმწიფო აღნიშნული კვლევის დასაფინანსებლად 20 მილიონ ფუნტს (25 მილიონი აშშ დოლარი) გამოყოფს, კიდევ ერთ კვლევას კი, რომელსაც ლონდონის საიმპერატორო კოლეჯი კორონავირუსის საწინააღმდეგო ვაქცინის შესაქმნელად აწარმოებს, მთავრობა 20,5 მილიონი ფუნტით დააფინანსებს.
მეთ ჰენკოკის განმარტებით, ვაქცინის პოვნის პროცესი ცდის და შეცდომების მეთოდზეა დაფუძნებული. მან ბრიტანელ მეცნიერებს მხარდაჭერა და ყველა საჭირო რესურსით უზრუნველყოფა აღუთქვა. მისივე თქმით, ის, რომ გახდე მსოფლიოში პირველი ქვეყანა, რომელმაც ამ ვირუსის საწინააღმდეგო ვაქცინა შექმნა იმდენად დიდი მიღწევაა, რომ მზადაა, ამისთვის ყველაფერი გაიღოს.
როგორც აღვნიშნეთ, ქვეყანაში კიდევ ერთ ვაქცინაზე ლონდონის საიმპერატორო კოლეჯის მეცნერები მუშაობენ. ისინი მიმდინარე წლის ივნისში ვაქცინის ადამიანებზე დატესტვას აპირებენ და მოხალისეებს ცდებში მონაწილეობისთვუს იწვევენ.
მეცნიერთა აღნიშნული გუნდი ვაქცინა ცხოველებზე გამოცდას თებერვლიდან ახორციელებს და ამტკიცებს, რომ მიღებული შედეგი დადებითია.
„ვეძებთ მოხალისეებს, რომლებიც ჩვენს მიერ ივნისში დაგეგმილ ცდებში მონაწილეობას მიიღებენ. ჩვენი მიზანია, დავადგინოთ, რა დოზები მოგვცემს საუკეთესო იმუნურ პასუხს. ნებისმიერი კლინიკური ცდა რისკის ელემენტს შეიცავს, თუმცა, შევეცდებით, ეს რისკი მინიმუმამდე დავიყვანოთ,“- აცხადებენ ლონდონის საიმპერატორო კოლეჯის მეცნიერები.
ცნობისათვის, ბოლო მონაცემებით, მსოფლიოში კორონავირუსის 2 575 875 შემთხვევაა დადასტურებული, დაღუპულია 178 669 და გამოჯანმრთელებულია 704 142 ადამიანი.

წყარო : bloomberg.com
bbc.com
worldometers.info

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი ,,დოქტრინა”