close

კვლევები

კვლევები

კვლევა : თუ ბცჟ-ზე აცრილი ხართ, კორონავირუსით დაინფიცირების 6-ჯერ ნაკლები რისკის ქვეშ ხართ

2.23K views on

ახალი კვლევის თანახმად, იმ ქვეყნებში, სადაც მოსახლეობა მასობრივადაა აცრილი ბცჟ-ზე (Bacillus Calmette-Guerin-ზე), კორონავირუსისგან გამოწვეული სიკვდილიანობის მაჩვენებელი თითქმის 6-ჯერ ნაკლებია სხვა ქვეყნებთან შედარებით.
ბცჟ ტუბერკულოზისაგან დამცავი ვაქცინაა, თუმცა ამერიკელი ექსპერტების ნაწილი ამტკიცებს, რომ აღნიშნული ვაქცინა ორგანიზმს სხვა ინფექციებისაგანაც იცავს და იმუნურ სისტემას აძლიერებს.
კვლევის ფარგლებში ჯონ ჰოპკინსის ბლუმბერგის საზოგადოებრივი სკოლის მკვლევრებმა შეადარეს 50 ქვეყნის კორონავირუსით გარდაცვალების მაჩვენებელი ყოველ ერთ მილიონ ადამიანზე, აგრეთვე გაითვალისწინეს ეკონომიკური ფაქტორები და ხანშიშესული მოსახლეობის წილი, რასაც სიკვდილიანობის მაჩვენებელზე მნიშვნელოვანი გავლენა აქვს.
“Covid-19-გან გამოწვეული სიკვდილიანობის მაჩვენებელი იმ ქვეყნებში, სადაც მოსახლეობას ბცჟ ვაქცინას იყენებენ, 5.8-ჯერ ნაკლებია,“ – აღნიშნულია კვლევის შედეგებში.
ამერიკელმა მეცნიერებმა ეს კვლევა მას შემდეგ ჩაატარეს, რაც მსოფლიოს სხვადასხვა ქვეყანაში მეცნიერთა რამდენიმე გუნდმა დაიწყო ცდების ჩატარება იმის გამოსავლენად, რამდენად იცავს კორონავირუსისგან ორგანიზმს ბცჟ-ს ვაქცინა.
ერთ-ერთი პირველები, რომლებმაც აღნიშნულ საკითხზე კვლევა დაიწყეს, ავსტრალიელი მეცნიერები იყვნენ. მელბურნის მარდოკის ბავშვთა კვლევის ინსტიტუტის მკვლევრები აცხადებენ, რომ ბცჟ-ს ვაქცინა ადამიანების ტუბერკულოზისგან დასაცავადაა განკუთვნილი, თუმცა ის ორგანიზმის იმუნურ სისტემას აძლიერებს და სხცა ინფექციებისგანაც იცავს.
აღნიშულ კვლევაში, რომლის მიზანი იმის დადგენაა, იცავს თუ არა ბცჟ-ს ვაქცინა ადამიანს COVID 19-გან, 4 000 მედიკოსი ჩაერთვება. კვლევა 6 თვის მანძილზე გაგრძელდება.

წყარო : www.telegraph.co.uk 

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
ბიოლოგიაკვლევებიმედიცინა

ქართველმა მეცნიერმა ზაალ კოკაიამ და მისმა კოლეგებმა ინსულტით დაზიანებული ვირთაგვას ტვინის აღდგენა შეძლეს

2.28K views on

მეცნიერებმა კანის უჯრედებიდან მიღებული ტვინის ქერქის ნერვული უჯრედები ვირთაგვის ინსულტით დაზიანებულ ტვინში გადანერგეს, რის შემდეგაც, მღრღნელებს მოტორული ფუნქცია ნაწილობრივ აღუდგათ და ეს უჯრედები სრულად ინტეგრირდა დაზიანებულ ნერვულ რკალში. ცნობილ ამერიკულ სამეცნიერო ჟურნალ PNAS-ში დაბეჭდილი კვლევა შვედეთში მომუშავე ქართველი მეცნიერის, ზაალ კოკაიას ლაბორატორიაშია შესრულებული.

„გადანერგვიდან 6 თვის შემდეგ ჩვენ დავინახეთ, როგორ აღადგინა ახალმა უჯრედებმა ინსულტგადატანილი ვირთაგვას ტვინის დაზიანება“, — ამბობს ზაალ კოკაია, რომელმაც კვლევა პროფესორ ოლე ლინდვოლთან და პოსტდოქტორანტ სარა პალმა-ტორტოსასთან ერთად ჩაატარა.

შვედეთის ქალაქ ლუნდში მომუშავე მკვლევართა ჯგუფმა წინა კვლევებშიც აჩვენა, რომ ადამიანის ღეროვანი და რეპროგრამებული უჯრედებიდან მიღებული ნეირონების გადანერგვა ინსულტგადატანილ ვირთაგვებში სავსებით შესაძლებელია. თუმცა, წინა კვლევებში არ იყო აღწერილი, შეეძლო თუ არა გადანერგილ უჯრედებს ინსულტიანი ვირთაგვას ტვინში ახალი კავშირების დამყარება და აქედან გამომდინარე, ნორმალური მოტორული და მგრძნობელობითი ფუნქციების აღდგენა.

„უამრავი მეთოდის გამოყენებით, მათ შორის ელექტრონული მიკროსკოპითა და ცოფის ვირუსზე დაფუძნებული მოლეკულური მეთოდებით, ჩვენ გადანერგილ უჯრედებს დავაკვირდით და ვაჩვენეთ, რომ ისინი დაზიანებულ ნერვულ რკალებში წარმატებით ინტეგრირდა. გარდა ამისა, ჩვენ ისიც დავინახეთ, რომ გადანერგილმა უჯერედებმა კავშირი დაამყარეს ტვინის მეორე ნახევარსფეროს ნეირონებთან, სადაც არც ერთი უჯრედი არ გადაგვინერგავს. მსგავსი მონაცემები აქამდე არავის გამოუქვეყნებია“, — ამბობს ზაალ კოკაია, რომელიც, იმის მიუხედავად, რომ თავის კოლეგებთან ერთად ტვინს რამდენიმე ათლწულია იკვლევს, შედეგებით გაოცებულია.

მკვლევრებმა ლაბორატორიაში ადამიანის კანის უჯრედები ტვინის უჯრედებად გარდაქმნეს, შემდეგ კი ვირთაგვების ტვინის ქერქში გადანერგეს. ეს კი ტვინის ის რეგიონია, რომელიც ინსულტის შემდეგ ყველაზე ხშირად ზიანდება.

„ჩვენი მიზანია გავიგოთ, როგორ გავლენას ახდენს გადანერგილი უჯრედები ტვინის მეორე ნახევარსფეროზე. ასევე გვსურს, უკეთ დავაკვირდეთ, გადანერგვა როგორ მოქმედებს კოგნიტურ ფუნქციებზე, როგორიცაა, მაგალითად, მეხსიერება. ჩვენ, რა თქმა უნდა, ყველანაირ გვერდით ეფექტსაც შევისწავლით. უჯრედების გადანერგვის კლინიკურად გამოყენების უპირველესი მოთხოვნა ეფექტიანობა და უსაფრთხოებაა“, — ამბობს ზაალ კოკაია.

ზაალ კოკაია ლუნდის ღეროვანი უჯრედების ცენტრის დირექტორია 2011 წლიდან, ასევე არის ლუნდის უნივერსიტეტის ექსპერიმენტული სამედიცინო კვლევის პროფესორი, ღეროვანი უჯრედების და აღდგენითი ნევროლოგიის ლაბორატორიის ხელმძღვანელი, ღეროვანი უჯრედების და რეგენერაციული მედიცინის „StemTherapy-ს“ სტრატეგიული კვლევითი პროგრამის კოორდინატორი.

ზაალ კოკაიას კვლევის მთავარი თემა არის ტვინის ინსულტი და იმ გზების კვლევა, რაც საშუალებას მოგვცემს გამოვიყენოთ ღეროვანი და რეპროგრამირებული უჯრედები დაზიანებული ტვინის ფუნქციის აღსადგენად. ინსულტის გადატანის შემდეგ, პაციენტების მოტორული და მგრძნობელობის აღსადგენი ერთადერთი საშუალება ჯერჯერობით მხოლოდ ვარჯიშია.

ქართველმა მეცნიერმა შვედეთის ტვინის ფონდთან მიცემულ 2017 წლის ინტერვიუში განაცხადა, რომ ის ღეროვანი და რეპროგრამირებული უჯრედების კლინიკაში გამოყენების მიმართ ოპტიმისტურად იყო განწყობილი და ამ მიდგომას დიდ მომავალს უწინასწარმეტყველებდა.

„ჩვენ ვიცით, რომ ღეროვან უჯრედებს დიდი პოტენციალი აქვთ, პირველ ყოვლისა იმიტომ, რომ შესწევთ უნარი ჩაანაცვლონ დაზიანებული უჯრედები. ამასთან, ისინი გამოიმუშავებენ სხვადასხვა ნივთიერებებს და ფაქტორებს, რომლებიც ღეროვანი უჯრედების გარემომცველ, ინსულტის შემდეგ გადარჩენილ ნერვულ უჯრედებს საშუალებას აძლევს, უკეთესად იმუშაოს და უფრო ეფექტურად წარმართოს რეგენერაცია და აღდგენითი პროცესები“, — აღნიშნავს ზაალ კოკაია.

წყარო : 1tv.ge
ავტორი – მიხეილ ჭაბუკაშვილი

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
ანალიტიკაკვლევები

ბოლო 24 საათში იტალიაში კორონავირუსისგან გამოჯანმრთელების რეკორდული მაჩვენებელი დაფიქსირდა

1.39K views on

იტალიის სამოქალაქო თავდაცვის სამსახურის მონაცემებით, ბოლო 24 საათის განმავლობაში იტალიაში კორონავირუსით 542 ადამიანი გარდაიცვალა, ინფიცირების 3 836 ახალი შემთხვევა დაფიქსირდა, ხოლო 2099 ადამიანი კი გამოჯანმრთელდა.

აღსანიშნავია, რომ 24 საათში 2099 გამოჯანმრთელებული ადამიანი რეკორდული მაჩვენებელია იტალიაში პანდემიის არსებობის განმავლობაში.

კორონავირუსის ეპიდემიის დაწყებიდან იტალიაში სულ 17 669 ადამიანი გარდაიცვალა, 95 262 ადამიანი დაინფიცირდა, ხოლო 26 491 კი გამოჯანმრთელდა.

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
კვლევებიმედიცინა

როგორ გავიძლიეროთ იმუნური სისტემა კორონავირუსის პანდემიის დროს?

899 views on

კორონავირუსის პანდემიის დროს არაერთი ჩვენგანი ფიქრობს, თუ რის გაკეთება შეიძლება ვირუსის თავიდან ასაცილებლად, შვილების, მშობლების, ოჯახის სხვა წევრების ჯანმრთელობის დასაცავად. სოციალურ ქსელებში უამრავი არასწორი ინფორმაცია ვრცელდება იმაზე, თუ რა ვჭამოთ, რა დავლიოთ და როგორ დავიცვათ თავი კორონავირუსისგან. ხშირად, დეზინფორმაცია იმდენად არასწორია, რომ მას არაერთი ადამიანის სიცოცხლეც კი შეეწირა იმის გამო, რომ ცრუ მეთოდებით თავის დაცვის ნაცვლად, მათ საკუთარი ჯანმრთელობა ფატალურად დაიზიანეს.

პირველ რიგში, ყველა კომპეტენტური წყარო გეტყვით, რომ კორონავირუსისგან თავის დასაცავად სოციალურ დისტანცირებასა და პერსონალურ ჰიგიენაზე ეფექტური მეთოდი არ არსებობს. არ არსებობს აბი, სითხე, ან მალამო, რომელიც კოვიდ-19-სგან დაგვიცავს. არ არსებობს კონკრეტული მედიკამენტი, ვიტამინი ან დიეტური დანამატი, რომელიც კორონავირუსისგან დაგვიცავს. შეერთებულ შტატებში ნებისმიერ კომპანიას, რომელიც ამას ამტკიცებს და პროდუქციას ამ ნიშნით ყიდის, ფედერალური მთავრობის სააგენტო იძიებს.

თუმცა, არის კარგი ამბავიც – თითოეულ ჩვენგანს შეუძლია საკუთარ იმუნურ სისტემას ოპტიმალურად მუშაობაში დაეხმაროს. ზოგიერთი რამ, რის გაკეთებაც დამატებითი ხარჯების გარეშე მარტივად შეიძლება, არის ხელების სწორი დაბანა, ჯანსაღი კვება, ფიზიკური აქტიურობა, სტრესის შემცირება და კარგი ძილი (მინიმუმ 8 საათი).

ექსპერტები იმუნური სისტემის დახმარებას ორი ძირითადი გზით გვირჩევენ. ერთი არის საკვები, მეორე კი სტრესის მართვა, ვარჯიში და საკამარისი ძილი. უკვე ათწლეულებია მედიკოსები აცხადებენ, რომ სტრესი და ზოგადი ნეგატიური დამოკიდებულება ყოველდღიურობისადმი, სხვადასხვა დაავადების, მათ შორის, გაციების მიმართ მიდრეკილებას ზრდის.

ამერიკის ჯანდაცვის ეროვნული ინსტიტუტის ინფორმაციით, ჯანმრთელობის შენარჩუნების მიზნით ერთ-ერთი საუკეთესო გზა ჯანსაღი კვებაა. ადამიანის იმუნური სისტემა დამოკიდებულია იმაზე, თუ რამდენად იღებს ის ყველა საჭირო მინერალს, ვიტამინის და ანტიოქსიდანტს. იმუნური სისტემის ოპტიმალური მუშაობისთვის, რაც ზოგიერთი ვირუსული ან ბაქტერიული დაავადებისგან გვიცავს ან დაავადების სიმწვავეს ამცირებს, რეკომენდებულია ხილისა და ბოსტნეულის სისტემატური მიღება.

რომელი ხილი და ბოტნეული შეიცვავს ყველაზე სასარგებლო ნივთიერებებს?

A ვიტამინი

საკვების ამ კატეგორიაში შედის სტაფილო, ტკბილი კარტოფილი, ისპანახი, ბროკოლი, ბოსტნის კომბოსტო (კეილი), მანგო, ნესვი და გოგრა. ბეტა-კაროტინს, რომელსაც ეს ხილ-ბოსტნეული დიდი რაოდენობით შეიცავს, ორგანიზმი A ვიტამინად აქცევს. A ვიტამინი კი იმიტომაა მნიშვნელოვანი იმუნური სისტემისთვის, რომ ის ანტისხეულებს ეხმარება ტოქსინების და უცხო ნაწილაკების განდევნაში.

C ვიტამინი

C ვიტამინი სისხლში ანტისხეულების დონეს ზრდის და იმუნურ სისტემას ეხმარება იმის გარკვევაში, თუ რა სახის დაცვა სჭირდება მას. ამერიკის ბიოტექნოლოგიური ინფორმაციის ეროვნული ცენტრის ინფორმაციით, 200 მილიგრამით მეტი C ვიტამინის მიღებამ შეიძლება გაციების სიმპტომებიშეგვიმსუბუქოს და შეგვიმოკლოს. ამ დამატებითი 200 მილიგრამის მიღება კი ადვილადაა შესაძლებელი ფორთოხლის, გრეიფრუტის, კივის, მარწყვის, წითელი და მწვანე ბულგარული წიწაკის, ბროკოლის, კომბოსტოსა და ყვავილოვანი კომბოსტოს მირთმევით.

D ვიტამინი

D ვიტამინის ნაკლებობამ, შესაძლოა, იმუნური სისტემა დაასუსტოს. იგივე კვლევა ამბობს, რომ D ვიტამინმა ფილტვები შესაძლოა მწვავერესპირატორული ინფექტიებისგან დაიცვას. D ვიტამინის მიღება ზოგიერთი ამ საკვებითაა შესაძლებელი: ცხიმიანი თევზი, მათ შორის, ორაგული და დაკონსერვებული სარდინი, კვერცხი, რძე და მცენარეული (სოიოს, ნუშის, ბრინჯის) „რძის“ პროდუქტები, ყველი, ტოფუ და სოკო.

ბოსტონის უნივერსიეტეტის პროფესორი და D ვიტამინის ერთ-ერთი წამყვანი მკვლევარი მსოფლიოში დოქტორი მაიკლ ჰოლიკი ამბობს, რომ D ვიტამინი იმუნურ სისტემას ეხმარება აწარმოოს ცილა, რომელიც „კლავს ინფექციურ აგენტებს, მათ შორის, ბაქტერიებს და ვირუსებს.“

თუთია

თუთია იმუნური სისტემის უჯრედებს გაზრდის და გამრავლების საშუალებას აძლევს. თუთიამ შეიძება ხელი შეუწყოს გაციების სიმპტომების შემსუბუქებას და შემოკლებას. თუთიის წყაროებში შედის: ლობიო და სხვა პარკუჭეული, ტოფუ, კაკალი, თხილი, მზესუმზირა, მოლუსკები, კიბორჩხალა, ლობსტერი, ძროხის ხორცი, ღორის ხორცი, ქათმის მუქი ხორცი და მაწონი.

სასარგებლო ცილები

იმუნური სისტემა შენობად რომ წარმოიდგინოთ, ცილები თითოეული აგურია, რომელიც მის ასაშნებლად გამოიყენება. ამიტომ, ცილების მიღება იმუნური სისტემის სიჯანსაღისთვის უკიდურესად მნიშვნელოვანია. ცილების მიღბა შესაძლებელია როგორც მცენარეული, ასევე ცხოველური წყაროებისგან. ამერიკის დაავადებათა კონტროლისა და პრევენციის ცენტრის ინფორმაციით, ცილები შეიძლება მივიღოთ შემდეგი საკვებისგან: თევზი, ქათმის ხორცი, ძროხის ხორცი, რძე, მაწონი, კვერცხი, ხაჭო და არაცხოველური წარმოშობის წყაროებიდან, როგორიცაა კაკალი, თხილი, მიწისთხილი, ნუში, მზესუმზირა, გოგრის თესლი და ლობიო.

მომნელებელი სისტემა და ბაქტერიული ბალანსი

ჯონს ჰოპკინსის უნივერისტეტის კვლევის თანახმად, მომნელებელი სისტემის ჯანსაღი მოქმედება იმუნურ სისტემასთან პირდაპირ კავშირშია. უფრო მეტიც, „თქვენი იმუნური სისტემის უდიდესი ნაწილი თქვენ მომნელებელ სისტემაში მდებარეობს,“ აცხადებს დენ პიტერსონი, ჯონს ჰოპკინსის უნივერსიტეტის სამედიცინო სკოლის პროფესორი. სწორი კვება, ვარჯიში და ხშირად ხსნადი და უხსნადი ბოჭკოვანი ქსოვილის შემცველი საკვების მიღება ნაწლავების და ზოგადად, მომნელებელი სისტემის სიჯანსაღისთვის ძალიან მნიშვნელოვანია. მეიოს კლინიკის ინფორმაციით, სასარგებლო უხსნადი ბოჭკოების შემცველი საკვები არის: ჟოლო, მსხალი, ვაშლი (კანით), მარწყვი, ფორთოხალი, მუხუდო, ბროკოლი, უმი ყვავილოვანი კომბოსტო, უმი სტაფილო, ლობიო, სხვადასხვა მარცვლეული და გერკულესი.

და ბოლოს… დალიეთ წყალი

ნებისმერი დროს, იქნება ეს პანდემიის პერიოდი, გრიპის სეზონი, თუ უბრალოდ წელიწადის ნებისმიერი დღე, მედიკოსები გვეუბნებიან, რომ სითხის ნაკლებობას ბევრი სხვადასხვა სისტემის დაზიანება შეუძლია. ამიტომ, ექიმების რეკომენდაციაა, ყოველდღიურად, თავიდან აიცილოთ ორგანიზმის გაუწყლოვნება. ამერიკის დაავადებათა კონტროლის და პრევენციის ცენტრის (CDC) ინფორმაციით, საკმარისი სითხის მისაღებად, შეგიძლიათ მიირთვათ ზოგიერთი ხილი, ბოსტნეული, სუპი ან უბრალოდ დალიოთ წყალი. ზოგად რეკომენდაციზე დაყრდნობით, ქალებისთვის წყლის მიღების ოპტიმალური ოდენობა დღეში 2.7 ლიტრია, კაცებისთვის კი – 3.7 ლიტრი. მედიკოსები ასევე გვაფრთხილებენ, რომ გაზიანი გამაგრილებელი სასმელები, ყავა, შავი ჩაი და კოფეინის შემცველი სხვა სასმელები შარდმდენებია და ორგანიზმის გაწყლოვანების ნაცვლად, მის სითხისგან დაცლას უწყობნენ ხელს.

წყარო : amerikiskhma.com

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
კვლევებიმედიცინამსოფლიო

10 ყველაზე დიდი ეპიდემია და პანდემია ისტორიაში

1.43K views on

კაცობრიობის ისტორიაში ხშირად გვხვდება ფრაგმენტულად ეპიზოდები, რომელთა გახსენება დღესაც უსიამოვნო შეგრძნებებს იწვევს და შავი ლაქების სახითაა დალექილი მეხსიერებაში. 
მანამ დავიწყებდეთ განვმარტოთ ძირითადი ტერმინები. მაგალითად რა განსხვავებაა ეპიდემიასა და პანდემიას შორის. 

– ეპიდემია (ბერძნ. epidemos ხალხში გავრცელებული) – რომელიმე ინფექციური დაავადების სწრაფი და ფართო გავრცელება, რომლის გავრცელების არეალიც ძირითადად კონკრეტული ქვეყნით ან რეგიონითაა შემოფარგლული

– პანდემიას რაც შეეხება, იგი არ არის შემოფარგლული დროითა და სივრცით, ეს გახლავთ დაავადების უკონტროლო გავრცელება, ხშირად რამოდენიმე კონტინენტზეც კი
თვალი გადავავლოთ ისტორიას და გავიხსენოთ ყველაზე დიდი ეპიდემიები. აქვე გეტყვით, რომ თანამედროვე მედიცინის წყალობით უმეტესი მათგანი დღეს მკურნალობას ექვემდებარება ან სრულიად ამოძირკვულია.

10. სიფილისი / ათაშანგი _ ინფექციური დაავადებაა, რომელიც აზიანებს კანს, ლორწოვან გარსებს, შინაგან ორგანოებს, ნერვულ სისტემას.
ათაშანგის გამომწვევია მიკროორგანიზმი მკრთალი ტრეპონემა, რომელიც ქსოვილებში იჭრება, მრავლდება და მთელ ორგანიზმში ვრცელდება. სიფილისით ინფიცირება ძირითადად სქესობრივი კონტაქტის შედეგად ხდება, თუმცა მისი გადაცემა შესაძლებელია საყოფაცხოვრებო გზით და გამონაყართან ახლომდებარე ქსოვილებთან ფიზიკური კონტაქტითაც. ორსულობში ან მშობიარობის დროს შესაძლებელი ინფექციის ნაყოფზე გადაცემა. დღეს უკვე მისი განკურნება შესაძლებელია, პირველი რიგირს პრეპარატს ანტიბიოტიკი Penicillin G წარმოადგენს.
ჯამში 500.000 ზე მეტი სასიკვდილო შემთხვევა

9. ჰონგ-კონგის გრიპი _ შემთხვევამ თავი 1968 წელს იჩინა დიდი აფეთქების სახით. უდიდესმა გრიპის ეპიდემიან 1968-1970 წლებში 1 მილიონამდე ადამიანის სიცოცხლე შეიწირა. ალტერნატიული წყაროებზე დაყრდნობით ეს ციფრი 2 მილიონამდეც აღწევდა. ვირუსმა მალევე დატოვა ჰონგ-კონგის საზღვრები. მაგ. გერმანიაში აღნიშნულმა პათოგენმა 30 000 ადამიანის სიცოცხლე შეიწირა. პანდემიის გამომწვევი გახლდათ ინფლუენცა A/H3N2 უფრო კონკრეტულად ვარიანტი A/Hong Kong/1/1968 H3N2.

8. ქოლერა _ ბაქტერიული დაავადება, რომელიც უმეტესად დაბინძურებული წყლით ვრცელდება. ქოლერას ინფექციას იწვევს ბექტერია ვიბრო ქოლერა. დაავადების ეფექტები კი მისი ძლიერი ტოქსინითაა გამოწვეული, რომელსაც ბაქტერია წვრილ ნაწლავში გამოყოფს. ახასიათებს ძლიერი ღებინება და ფაღარათი. პირველმა პანდემიამ იფეთქა 1817 – 1824 წლებში.
1855 წელს კი ბრიტანელმა ქირურგმა სახელად John Snow დაადგინა ლონდონის პანდემიის წყარო, ეს გახლდათ დაბინძურებული სასმელი წყალი. ის არ გახლდათ სტარკის ბასტარდი, თუმცა ანესთეზიოლოგიის რკინის ტახტი სწორედ მას ეკუთვნის. გამოიყენა რა პირველმა ეთერი და ქლოროფორმი, რის გამოც დამსახურებულად ითვლება ანესთეზიის პირველ სპეციალისტად.
1892 წლის ქოლერის ეპიდემია კი, რომელმაც ბევრი ადამიანის სიცოცხლე შეიწირა ჰამბურგში, ითვლება ერთ-ერთ უკანასკნელ ქოლერის ეპიდემიად ევროპის კონტინენტზე.
პათოგენის იდენტიფიცირება 1883 წელს შეძლო რობერტ კოხმა, რომლის სახელობის ინსტიტუტიც დღეს აქტიურადაა ჩართული კორონა ვირუსის ელიმინაციისა და პრევენციის პროგრამებში.
ჯამში 1 000 000 ზე მეტი სასიკვდილო შემთხვევა

7. აზიური გრიპი გახლდათ ესპანურის გრიპის შემდგომ ყველაზე დიდი ინფლუენცა-პანდემიის გამომწვევი მეოცე საუკუნეში. გამომწვევი გახლდათ Influenzavirus A/Singapore/1/57 (H2N2). აზიური გრიპის აფეთქება მოხდა 1957 წელს, თავდაპირველ ლოკაციას კი დიდი ალბათობით ჩინეთი წარმოადგენდა. 1957-1958 წელს 2 მილიონამდე ადამიანის სიცოცხლე შეიწირა და 1968 წლამდე იწვევდა ყოველწლიური ინფლუენცა-ტალღებს.
ჯამში 2 000 000 მდე საისკვდილო შემთხვევა

6. ჰემორაგიული ცხელება – ეს გახლავთ ცხელებით მიმდინარე მძიმე ინფექციური დაავადება, რომლის გამომწვევიც ყველა კონტინენტზე იყო, გარდა ანტარქტიდისა. ძირითადად გვხვდება აფრიკის, სამხრეთ ამერიკისა და სამხრეთ-აღმოსავლეთ აზიის ქვეყნებში.
ჯამში 3 000 000 ზე მეტი სასიკვდილო შემთხვევა

5. ყვავილი – Orthopoxvirus Variola. განსაკუთრებით ინტენსიურად გავრცელებული იყო ევროპაში XVIII საუკუნეში. ბოლო ყველაზე დიდი ეპიდემია 1870/71 წლებში, გერმანია საფრანგეთის ომის დროს გავრცელდა. აღნიშნულ პათოგენს უკავშირდება პირველი ვაქცინის შექმნის ისტორიაც.
ჯამში 10 000 000 ზე მეტი სასიკვდილო შემთხვევა

4. მალარია და მისი გადამტანი ცნობილი კოღო ანოფელესი სიის მე-4 საფეხურს იკავებენ. სიმპტომები მხოლოდ მაღალი სიცხით, კანკალით, კრუნჩხვებითა და კუჭ-მაწლავის ტრაქტის ჩივილებით არ შემოიფარგლება. განსაკუთრებული რისკის ქვეშ არიან ბავშვები, რომლებშიც ინფიცირებას ადვილად მივყავართ კომატოზურ მდგომარეობამდე. მალარიის წინააღმდეგ აქტიურად იქნა გატარებული სხვადასხვა ზომები, რის შედეგადაც ბავშვთა სიკვდილიანობა 2005 წლის შემდგომ ფაქტობრივად განახევრდა.
ჯამში 10 000 000 ზე მეტი სასიკვდილო შემთხვევა

3. შავი ჭირი. გამომწვევი – Bakterium Yersinia pestis.
მას ძირითადად ჰქონდა ბუბონური ფორმა, რომელიც XIV საუკუნეში მოდებული იყო აზიას, ევროპას (1346—1353), ჩრდილოეთ აფრიკასა და კუნძულ გრენლანდიას. ცნობილია აგრეთვე სახელწოდებით „მეორე პანდემია“. როგორც ჩანს, გავრცელდა ბუნებრივი კერიდან გობის უდაბნოს ტერიტორიაზე ევრაზიაში კლიმატის მკვეთრი ცვლილების შედეგად, რაც გამოწვეული იყო მცირე გამყინვარების პერიოდით. თავიდან მოიცვა ჩინეთი და ინდოეთი, შემდეგ კი მონღოლთა ჯარებსა და სავაჭრო ქარავნებთან ერთად შეიჭრა ევროპაში. ეს საშინელი დაავადება ევროპას სწრაფად მოედო და დიდი განგაშის მიზეზი გახდა. მისთვის დამახასიათებელი სიმპტომები იყო: თავის ტკივილი, ოფლიანობა, კანკალი, ძლიერი ციებ-ცხელება. მაგრამ მთავარი დამახასიათებელი ნიშანი, რომლითაც შავი ჭირით დაავადებულები გამოირჩეოდნენ სხვა ავადმყოფებისაგან, იყო ჩირქიანი წყლულები, ე.წ. „ბუბონები“. კაცობრიობის ისტორიას შავი ჭირის არაერთი პანდემია ახსოვს.
ჯამში 25 000 000 ზე მეტი სასიკვდილო შემთხვევა

2. აივ ინფექცია და მისი ტერმინალური სტადია შიდსი. საზოგადოება დღეს უკვე საკმაოდ კარგად არის ინფორმირებული აღნიშნული დაავადების შესახებ. არსებობს სხვადასხვა ვერსია მისი წარმოშობისა და გავრცელების შესახები. ერთ-ერთი ვერსიის თანახმად იგი ცხოველიდან გადავიდა ადამიანზე, კონკრეტულად კი მაიმუნებისაგან. გასული საუკუნის მიწურულს დიდი აურზაური გამოიწვია აივ ინფექციის გამოაშკარავებამ, მით უფრო რაც ცნობილი გახდა, რომ მისი გავრცელების ყველაზე ფართო საშუალება სქესობრივი კავშირი არის. დღეს დღეისობით ბაზარზე ფართოდაა გავრცელებული სხვადასხვა ანტივირუსული პრეპარატები, რომელთა რეგულარული მიღების შემთხვევაშიც აივ ინფიცირებული პირები ჩვეულებრივ აგრძელებენ ცხოვრებას, ყოველგვარი სერიოზული შეზღუდვების გარეშე. თუმცაღა ისიც უნდა ითქვას, რომ აღნიშნული პრეპარატები საკმაოდ ძვირია და განვითარებად ქვეყნებში ნამდვილად ხელმიუწვდომი ყველასათვის.
ჯამში 39 000 000 ზე მეტი სასიკვდილო შემთხვევა

1. და ბოლოს სიის პირველი ნომერი – ესპანური გრიპი. ეს გახლდათ მეოცე საუკუნის დასაწყისის უდიდესი პანდემია გამოწვეული ინფლუენცა ვირუსით (Subtyp A/H1N1). გაზეთები წერდნენ თუ როგორ ეცემოდნენ ინფიცირებულნი ქუჩაში და იღუპებოდნენ ადგილზე.
ჯამში 50 000 000 ზე მეტი სასიკვდილო შემთხვევა

ი. ტერსენიდისი
ექიმი / ფსიქიატრი

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
კვლევები

🇬🇪 საქართველოში კორონავირუსისგან 45 პაციენტი გამოჯანმრთელდა

1.09K views on

საქართველოში კორონავირუსისგან 45 პაციენტი გამოჯანმრთელდა.

ამ ეტაპზე ქვეყანაში, კორონავირუსის დადასტურებული შემთხვევა გვაქვს –  195-ი. 

მათ შორის გარდაცვლილია  3

კარანტინის რეჟიმში  იმყოფება  4708

სტაციონარში მეთვალყურეობის ქვეშ კი  370 ადამიანია. 

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
ანალიტიკაკვლევები

მსოფლიოს ხუთეულში მყოფ, ევროპის 4 ქვეყანაში COVID-19-ის ყოველდღიურმა მაჩვენებელმა იკლო

928 views on

ევროპის 4 ქვეყანაში, რომლებიც COVID-19-ის გავრცელების მასშტაბით მსოფლიოს სახელმწიფოთა პირველ ხუთეულში არიან, ბოლო ორ-სამ დღეში შედარებით იკლო კორონავირუსით დაავადების და გარდაცვალების ყოველდღიურმა მაჩვენებელმა. ამას ცხადყოფს ჰოპკინსის უნივერსიტეტის და მოხალისეთა საერთაშორისო ჯგუფის Worldometer-ის მონაცემები.

ესპანეთში, რომელიც აშშ-ის შემდეგ მეორე ადგილზეა, 3 აპრილს დადასტურებული შემთხვევების რიცხვი 7100-ს აჭარბებდა, ხოლო 5 აპრილს – 5400-ს.

იტალიაში, რომელიც მსოფლიოში მესამე, ევროპაში კი, მეორე ადგილზეა, 4 აპრილს 4 800-ზე მეტი ახალი შემთხვევა დადასტურდა, 5 აპრილს კი – 4300-ზე მეტი.

გავრცელების მასშტაბით იტალიას მოსდევს გერმანია, სადაც 3 აპრილს იყო 6300-ზე მეტი ახალი შემთხვევა, ხოლო 5 აპრილს – 4000-ზე მეტი.

ბოლო სამ დღეში ყველაზე საგრძნობი კლებაა მსოფლიოში მეხუთე ადგილზე მყოფ საფრანგეთში, სადაც 3 აპრილს ახალი შემთხვევების რიცხვი 23 ათასს აჭარბებდა, ხოლო 5 აპრილს 2 800-ზე მეტი იყო.

ამავე პერიოდში ოთხივე ქვეყანაში შედარებით იკლო გარდაცვალების ყოველდღიურმა მაჩვენებელმაც.

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
კვლევები

“იმედისმომცემი რიცხვები” ავსტრიიდან

700 views on

ავსტრიაში კვირას კორონავირუსისგან გამოჯანმრთელებული პაციენტების რაოდენობა ინფექციის ახალი შემთხვევებს გადააჭარბა.

კვირას დილით ახალი შემთხვევების რაოდენობა 270-ით გაიზარდა წინა დღესთან შედარებით, თუმცა გამოჯანმრთელებული ადამიანების სტატისტიკა 491-ით მეტი იყო შაბათთან შედარებით. ინფორმაციას გარდიანი ავრცელევს ავსტრიის ჯანდაცვის სამინისტროზე დაყრდნობით.

“ეს იმედის მომცემი რიცხვებია, მაგრამ ახალა… უნდა დავრჩეთ მობილიზებულები და არ დავნებდეთ. არა – კერძო სააღდგომო დღესასწაულებსა და არდადეგებს”, – განაცხადა ავსტრიის ჯანდაცვის მინისტრმა.

ავსტრიაში კორონავირუსის პანდემიით 204 ადამიანი დაიღუპა, ინფიცირებულია 12 ათასზე მეტი ადამიანი.

კანცლერმა სებასტიან კურცმა მოსახლეობას მიმართა, რომ თუ სააღდგომო კვირა დისციპლინირებულად და წესების დაცვით ჩაივლის, “თანდათანობით და ფრთხილად”, ნორმალური ცხოვრება დაბრუნდება ქვეყანაში.

წყარო : netgazeti.ge

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
ეკოლოგიაკვლევები

ტყის ხანძრის გამო ჩერნობილთან რადიაციის დონემ იმატა

896 views on

ჩერნობილის ზონაში ტყის ხანძრის გამო ატომური ელექტროსადგურის მახლობლად რადიაციის დონემ იმატა. ამის შესახებ Deutsche Welle უკრაინის ეკოლოგიური ინსპექციის ხელმძღვაენლზე, ეგორ ფირსოვზე დაყრდნობით წერს.

„ცუდი ამბებია – ხანძრის ცენტრში რადიაცია ნორმაზე მაღალია“, – დაწერა ფირსოვმაFacebook-ზე.

მის მიერ გამოქვეყნებულ ვიდეოზე კი ჩანს, რომ გეიგერის მრიცხველზე დაფიქსირებული მაჩვენებელი ნორმაზე 16-ჯერ მაღალია.

ტყის ხანძარი ჩერნობილთან 4 აპრილს დაიწყო. ბოლო მონაცემებით, ცეცხლი 100 ჰექტარის ფართობზეა გავრცელებული.

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
კვლევებიმედიცინა

„რემდესივირზე“ კლინიკური ცდები იწყება, რამდენად ეფექტური და უსაფრთხოა პრეპარატი COVID-19-ის სამკურნალოდ ?

1.04K views on

ანტივირუსულ პრეპარატ „რემდესივირზე“ ჩატარებულმა პირველადმა ექპსერიმენტმა აჩვენა, რომ იმ პაციენტებში, რომლებსაც კორონავირუსის მძიმე ფორმა აქვთ, პრეპარატი პირველი დოზის მიღებიდან 24 საათში იწყებს მოქმედებას.
მეცნიერების ნაწილი მიიჩნევს, რომ ამერიკული ფარმაცევტული კომპანია „გილეად საიენსის“ მიერ შექმნილი „რემდესივირი“ ვირუსს ბლოკავს და ორგანიზმში რეპროდუქტირების საშუალებას არ აძლევს.
მედიკოსები პრეპარატზე კლინიკურ ცდებს უახლოეს მომავალში დაიწყებენ და მასში 1 000 პაციენტი იქნება ჩართული და მათი შედეგები აპრილის ბოლოსთვის გახდება ცნობილი.
აღსანიშნავია, რომ აღნიშნული მედიკამენტით მკურნალობის შედეგად რამდენიმე პაციენტი გამოჯანმრთელდა, მათ შორის 55 წლის ქრის კეინი ვაშინგტონიდან, რომელიც ჟანგბადზე იყო მიერთებული და რომლის მდგომარეობა „რემდესივირის“ მიღებიდან მეორე დღესვე გაუმჯობესდა, მოგვიანებით კი სრულად გამოჯანმრთელდა და ამჟამად საკუთარ სახლში იმყოფება.
ცხოველებზე ჩატარებულმა კვლევამ აჩვენა, რომ „რემდესივირის“ საშუალებით შესაძლებელია კორონავირუსის კიდევ ერთი ტიპის – MERS-ის- განურნება. პრეპარატის გამოყენებას შეეცადნენ ებოლას სამკურნალოდაც, თუმცა „რემდესივირმა“ მნიშვნელოვანი შედეგი არ აჩვენა.
რაც შეეხება COVID-19-ის სამკურნალოდ მის გამოყენებას, პრეპარტით პირველად აშშ-ში, ვაშინგტონში, 35 წლის პაციენტს უმკურნალეს. ეს იყო პირველი ადამიანი აშშ-ში, რომელიც სამშობლოში ჩინეთის ქალაქ უხანიდან დაბრუნდა და რომელსაც კორონავირუსის დიაგნოზი დაუსვეს.
საავადმყოფოში მიყვანიდან ერთი კვირის განმავლობაში პაციენტის მდგომარეობა გაუარესდა. ექიმებმა მეშვიდე დღეს „რემდესივირის“ გამოყენების გადაწყვეტილება მიიღეს, მიუხედავად იმისა, რომ პრეპარატი ოფიციალურად დამტკიცებული არაა. პაციენტის მდგომარეობა მეორე დღიდან გაუმჯობესდა.
აღნიშნული პირველი შემთხვევა ჟურნალ New England Journal of Medicine-ში დეტალურადაა აღწერილი.
თუმცა არსებობს კითხვები პრეპარატის სწრაფ მოქმედებასთან დაკავშირებით, კერძოდ, აღნიშნულ შემთხვევებში გაუმჯობესება „რემდესივირმა“ გამოიწვია, თუ პაციენტების მდგომარეობის გაუმჯობესება მედიკამენტის გარეშეც დაიწყებოდა.
კომპანია „გილეადმა“ განცხადება გაავრცელა სადაც აღნიშნულია, რომ „რემდესივირი“ ანტივირუსული პრეპარატია, რომლის კვლევა ჯერ კიდევ მიმდინარეობს და რომ მის შესახებ ჯერჯერობით შეზღუდული მონაცემები არსებობს. „ის მსოფლიოს არცერთ ქვეყანაში არაა დამტკიცებული და ჯერჯერობით არ არსებობს დადასატურებული ინფორმაცია მისი უსაფრთხოებისა და გვერდითი მოვლენების შესახებ,“- ნათქვამია „გილეად საიენსის“ განცხადებაში.
აღსანიშნავია, რომ კომპანიის მხარდაჭერით მსოფლიოს მასშტაბით ხუთი კლინიკური ცდა ჩატარდება, რომლის მიზანი იმის დადგენაა, რამდენად უსაფრთხო და ეფეტურია „რემდესივირის“ გამოყენება COVID-19-ის სამკურნალოდ.
სხვა პოტენციური სამკურნალო საშუალებები, რომლის გამოკვლევაც მიმდინარეობს, მალარიის სამკურნალო პრეპარატი „ქლოროქინი“ და ადამიანის იმუნოდეფიციტური ვირუსის სამკურნალო პრეპარატების – ლოპინავირისა და რიტონავირის – კომბინაციაა, თუმცა, ამ უკანასკნელზე ჩატარებულმა პირველადმა კვლევამ ვირუსის მკურნალობამ სასარგებლო შედეგი არ აჩვენა.

წყარო : nbcnews.com

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
1 … 64 65 66 67 68 … 100
Page 66 of 100