ეს საინტერესოა

Google-მა უკვე დაიწყო დრონების დატესტვა, როგორც მიწოდების სერვისის ნაწილის. ახლა კი, მოწყობილობას ხანძარსაწინააღმდეგო ტექნოლოგიადაც განიხილავs

ცნობილია, რომ The Google Research Climate and Energy Group-მა ცოტა ხნის წინ ფედერალურ საავიაციო ადმინისტრაციას (FAA) კერძო საკუთრებაში დრონის შემოწმების ნებართვა სთხოვა. კერძოდ, კომპანიას სურს, Homeland Surveillance & Electronics (HSE)-ის მიერ შექმნილი დრონი გამოსცადოს, რომელიც პირველადი ხედვის ტექნოლოგიით ხანძარსაწინააღმდეგო და მონიტორინგის ოპერაციების შესამოწმებლად იქნება განკუთვნილი.

ამ ეტაპზე Google-ის გეგმასთან დაკავშირებით საკმაოდ მწირი ინფორმაცია გვაქვს და არ ვიცით მისი სპეციფიკური დეტალების შესახებ. თუმცა იმის გათვალისწინებით, რომ HSE-ის ზოგიერთი მოწყობილობა უკვე გამოიყენება ნათესების მოსარწყავად, ადვილი წარმოსადგენია, მართლაც ვიხილოთ “ხანძრის წინააღმდეგ მებრძოლი” დრონები.

მსოფლიოში სახანძრო განყოფილებებში უკვე იყენებენ დრონებს, მაგრამ უმეტეს შემთხვევაში მათი ფუნქცია მხოლოდ მონაცემების რეალურ დროში მიწოდებას მოიცავს, რათა მეხანძრეებმა ხანძრის ჩაქრობა უსაფრთხოდ და მაქსიმალურად ეფექტურად შეძლონ. თუმცა ტექნოლოგიების განვითარებასთან ერთად სულ უფრო მეტად ვხვდებით “წყლის შესასხურებელ” დრონებსაც.

ახალგაზრდა ანალიტიკოსთა და მეცნიერთა დარბაზი ,,დოქტრინა”

სამხრეთ-დასავლეთ ჩინეთის პროვინციაში, ჩანგშუის საერთაშორისო აეროპორტში ბარგის ზედმეტი გადასახადისგან თავის არიდების მიზნით ოთხმა მგზავრმა 30 კილოგრამი ფორთოხალი შეჭამა ფრენამდე, რასაც დაახლოებით 20-30 წუთი დასჭირდა.

მივლინებაში მყოფი 4 მეგობარი აეროპორტში ფორთოხლების ყუთით მივიდა, რაშიც 50 იუანი გადაიხადეს, ფორთოხლის ჭამა კი მას შემდეგ გადაწყვიტეს, რაც აეროპორტის თანამშრომლებმა აცნობეს, რომ ბარგისთვის დამატებით 300 იუანი(47 დოლარი) უნდა გადაეხადათ, რაც 6-ჯერ მეტი იყო, ვიდრე 30 კილოგრამი ფორთოხლის ღირებულება. მეგობრებს შესაბამისი თანხა არ აღმოაჩნდათ, ამიტომ ნახევარ საათზე ნაკლებ დროში ციტრუსის შეჭმა  გადაწვიტეს. ფორთოხლის მთელი ყუთის დასრულების შემდეგ მეგობრებს პირის ღრუში წყლულები გაუჩნდათ.

რასაკვირველია, პირველი შემთხვევა არ არის, როდესაც ვინმეს ბარგის გადასახადის თავიდან აცილების მიზნით მსგავსი უცნაური საქციელი ჩაედინოს. მაგალითად, 2018 წელს მხატვარმა, სახელად რაიან უილიამსს 8 შარვალი და 10 პერანგი ეცვა ფრენის განმავლობაში, როდესაც ის ისლანდიიდან ბრიტანეთში მიფრინავდა.

მასალა მოამზადა: ნინი ხეცურიანმა

ახალგაზრდა ანალიტიკოსთა და მეცნიერთა დარბაზი ,,დოქტრინა”

საშინელი ტრაგედია მოხდა 21 იანვარს იტალიის ქალაქ პალერმოში (სიცილია) – 10 წლის გოგონა დაიღუპა, რომელმაც სცადა, სახიფათო „გამოწვევა“ (Challenge) გაემეორებინა მოზარდებში პოპულარული სოციალური ქსელიდან – Tik-Tok-იდან.

10 წლის ანტონელა სიკომერომ (Antonella Sicomero) გადაწყვიტა, ეპასუხა მესენჯერში გამოწვევისთვის და ზუსტად გაიმეორა მისი ინსტრუქცია, რომლის მთავარი „მიმზიდველობა“ მოზარდებისთვის, როგორც ჩანს, ჟანგბადის ნაკლებობის გამო თვალებში დროებითი დაბნელება იყო. გოგონა „გამოწვევის“ ინსტუქციას მიჰყვა და კისერზე თასმა შემოიჭირა, თუმცა მისგან გათავისუფლება ვეღარ შეძლო და გონება დაკარგა. ამის შესახებ სააგენტო „Ansа“ წერს.

ეს მოკლეხნიანი ექსპერიმენტი საკმარისი აღმოჩნდა იმისთვის, რომ საბრალო მოზარდის გულს ფეთქვა შეეწყვიტა. მშობლები, რომლებმაც სხეულის დაცემის ხმა გაიგონეს, ოთახში შეცვივდნენ და ბავშვი საავადმყოფოში გააქანეს. ექიმებმა რეანიმაციული ღონისძიებების შედეგად გულის ამუშავება შეძლეს, თუმცა ტვინის უჯრედები უკვე მკვდარი იყო და გოგონას გადარჩენა ვერ მოხერხდა. მწუხარებისგან განადგურებულმა მშობლებმა გადაწყვიტეს, ბავშვის ორგანოები დონორობის მიზნით შეეწირათ სხვა მოზარდების გადასარჩენად.

მომხდართან დაკავშირებით გამოძიება თვითმკვლელობამდე მიყვანის მუხლით აღიძრა. პოლიციამ მოზარდის მობილური ტელეფონის კონფისკაცია მოახდინა, რათა  გამომძიებლებმა გაარკვიონ, ვინ ურჩია ბავშვს საკუთარი თავისთვის მსგავსი სახიფათო გამოცდა მოეწყო.

გამოძიების პირვანდელი რეკონსტრუქციის თანახმად, პატარა გოგონამ მიიღო გამოწვევა, რომელსაც აპლიკაციაში ეწოდება «hanging challenge» და თითქოს წინააღმდეგობის უნარის დასადგენ ტესტს წარმოადგენს. ეს გამოცდა კი მდგომარეობს იმაში, რომ კისერზე თასმა უნდა შემოიჭირო და რაც შეიძლება დიდხანს გაძლო უჰაეროდ.

იტალიის მომხმარებელთა პირადი მონაცემების დაცვის ორგანომ (Garante privacy) 10 წლის გოგონას გარდაცვალების შემდეგ, 22 იანვარს განცხადება გაავრცელა და 13 წლამდე მომხმარებელთა გამოსავლენად და მათი დაბლოკვისთვის ტიკ-ტოკს ვადა 15 თებერვლამდე მისცა.

განცხადების თანახმად, აპლიკაციის ხელმძღვანელობამ უკვე დადო პირობა, რომ 13 წლამდე მოზარდებს ტიკ-ტოკით სარგებლობის უფლება არ ექნებათ, თუმცა კონტროლი საკმარისად მკაცრი არ არის და მოზარდები მაინც ახერხებენ აპლიკაციაში შესვლას. იტალიელი მარეგულირებლები მოუწოდებენ სოციალურ ქსელს, დაბლოკოს მომხმარებლები, რომელთა ზუსტი ასაკის დადგენა ვერ ხერხდება.

ეს პირველი შემთხვევა არ არის იტალიაში, როდესაც ბავშვების მიერ სოციალური ქსელების უკონტროლო მოხმარება ტრაგედიით მთავრდება. 2020 წლის 11 სექტემბერს ნეაპოლში 11 წლის ბიჭი დაიღუპა, რომელმაც  Tik-Tok-ის ნაცნობის მიერ შეთავაზებული „საინტერესო თამაშის“ ინსტრუქცია შეასრულა.

ახალგაზრდა ანალიტიკოსთა და მეცნიერთა დარბაზი ,,დოქტრინა”

ჩინეთში მაღალი რისკ-ჯგუფის პაციენტებს კორონავირუსზე  უკანა ტანიდან, სპეციალური ჩხირის გამოყენებით დატესტავენ. ამის შესახებ ინფორმაციას ბრიტანული The Guardian ავრცელებს.

ვიდრე ჩინეთი ამ მეთოდის გამოყენებას დაიწყებდა, ჩვეულებრივ, მოქალაქეებს ცხვირისა და პირის ღრუდან აღებული ნაცხის გამოკვლევის საშუალებით ტესტავდნენ.

ჩინეთში ტესტირების ახალი მეთოდის დანერგვის მიზეზად უკანა ტანში ვირუსის უფრო ხანგრძლივად გაჩერება სახელდება. პროცედურას კი სულ 10 წამი დასჭირდება.

“უკანა ტანიდან დატესტვა ვირუსის გამოვლენის რიცხვს გაზრდის, რადგან ვირუსის ნაწილაკები უკანა ტანში უფრო დიდ ხანს რჩება, ვიდრე რესპირატორულ ტრაქტში”, – ამბობს ჩინელი ექიმი, ლი ტონგზენგი

ბეიჯინგში ახალი მეთოდით გასულ კვირას უკვე გატესტეს 1000–მდე სკოლის მოსწავლე და მასწავლებელი.

ახალგაზრდა ანალიტიკოსთა და მეცნიერთა დარბაზი ,,დოქტრინა”

აშშ-ში, კოლორადოს შტატში მცხოვრებმა სელეტა ნოტნაგელმა თავისი საყვარელი ქათმის გულის ავადმყოფობისგან სამკურნალოდ 10 ათასი დოლარი დახარჯა. ამის შესახებ Yahoo იტყობინება.

გამოცემის ინფორმაციით, ქათამი სახელად ბლიუ ქალის სახლში ცხოვრობს და ნოტნაგელის საწოლთან სძინავს. პატრონი მას თავის „მონათესავე სულს“ უწოდებს. გასული წლის მარტში ბლიუ ცუდად გახდა, ვეტერინარმა კი დაადგინა, რომ მას გულის სისხლძარღვებთან დაკავშირებული პრობლემები აქვს.

ამ დეფექტის გამოსწორება ჩვეულებრივი პროცედურაა ძაღლებისა და კატებისთვის, მაგრამ ფრინველისთვის ის აქამდე არ ჩაუტარებიათ. სარისკო ოპერაცია 4 ათასი დოლარი ღირდა, მკურნალობის საერთო ხარჯმა კი 10 ათასი შეადგინა.

„ეს დიდი თანხა, დაზღვევა მხოლოდ 2,5 ათასს ფარავს. მაგრამ თქვენი შვილებისთვის ან თქვენი ძაღლისთვის ამას ხომ გააკეთებდით. მაგრამ როცა ვამბობ, რომ თანხა ქათმის სამკურნალოდ დავხარჯე ხალხი ამბობს: „ამდენი ქათამზე დახარჯე? შეგეძლო უბრალოდ ქვაბში ჩაგედო“,- ამბობს ნოტნაგელი.

ახლა ბლიუ თავს კარგად გრძნობს.

ახალგაზრდა ანალიტიკოსთა და მეცნიერთა დარბაზი ,,დოქტრინა”

გერმანიის ქალაქ ულმში უსახლკარო ადამიანებისთვის საცხოვრებელი კაფსულები დამონტაჟდა, რათა ზამთრის ცივი თვეების უსაფრთხოდ გატარება შეძლონ.

8 იანვარს, ინოვაციური კაფსულები მთელი ქალაქის მასშტაბით, ისეთ ადგილებზე დაიდგა, რომლებსაც უსახლკარო ადამიანები ხშირად სტუმრობენ. ფოლადისა და ხისგან დამზადებული საცხოვრისები თბოიზოლირებული და წყალგამძლეა, მათ მზის ენერგოპანელები და კომუნიკაციის სისტემაც დაემატა, მაქსიმალური კომფორტისთვის.

როდესაც საცხოვრისი დაკავებულია, საქველმოქმედო ორგანიზაციას სიგნალი ეგზავნება, რათა გამოყენების შემდეგ მოხალისეებმა მისი დალაგება შეძლონ. საქველმოქმედო ორგანიზაცია უსახლკარო ადამიანებთან დაკავშირებასაც ცდილობს, რათა საჭიროების შემთხვევაში, დახმარება აღმოუჩინოს.

კაფსულები პირველად ორი წლის წინ გამოჩნდა, მას შემდეგ მნიშვნელოვნად დაიხვეწა, ცივ კლიმატს მოერგო, ორი ადამიანის დატევა შეუძლია, რომელთაც ქარი და სიცივე არ შეაწუხებთ. კაფსულის დახვეწა გაგრძელდება, შემუშავდება ენერგო-დაზოგვის ხერხები და მეტად მოერგება ბენეფიციართა საჭიროებებს.

პროექტის ორგანიზატორები ინოვაციის ევროპის მასშტაბით გავრცელებას იმედოვნებენ. 2017 წლის მონაცემებით, გერმანიის უსახლკაროთა პოპულაცია 650 ათასი ადამიანისგან შედგება.

ახალგაზრდა ანალიტიკოსთა და მეცნიერთა დარბაზი ,,დოქტრინა”