მედიცინა

არგენტინაში ქალმა აივ/ვირუსი სამედიცინო ჩარევების გარეშე დაამარცხა. ამის შესახებ BBC წერს.

გამოცემის ინფორმაციით, საუბარია 30 წლის ქალზე, რომელიც ქალაქ ესპერანსაში ცხოვრობს. მისმა ორგანიზმმა ვირუსი ბუნებრივად, ექიმების დახმარების გარეშე დაძლია.

ქალს დიაგნოზი 2013 წელს დაუსვეს. 8 წლის განმავლობაში ის ვირუსის საწინააღმდეგო მედიკამენტებს მხოლოდ ორსულობის დროს იღებდა, რადგან ანალიზების პასუხების მიუხედავად, ვირუსი მის ორგანიზმში იყო, მაგრამ სიმპტომები არ ვლინდებოდა. 2020 წლის მარტში მან ჯანმრთელი ქალიშვილი გააჩინა.

აივ-ინფიცირებულებს, რომლებსაც ორგანიზმის თავისებურებებიდან გამომდინარე ხანგრძლივი პერიოდის განმავლობაში მედიკამენტების გარეშე შეუძლიათ ცხოვრება „ელიტურ კონტროლიორებს“ ეძახიან. მათი რაოდენობა საკმაოდ მცირეა – ინფიცირებულთა საერთო რიცხვის 0,1-2,5%.

მეცნიერების ვარაუდით, მათი T-ლიმფოციტების პასუხი უფრო ძლიერია, რის გამოც ინფიცირებული უჯრედები უფრო სწრაფად ნადგურდება. სპეციალისტები გეგმავენ სხვა აივ-ინფიცირებულების იმუნურ სისტემას ვირუსთან ამ მეთოდით ბრძოლა „ასწავლონ“.

აქამდე ვირუსის ბუნებრივად დამარცხების მხოლოდ ერთი მსგავსი შემთხვევა იყო დაფიქსირებული – 67 წლის ქალი სან-ფრანცისკოდან ვირუსით 30 წლის განმავლობაში ცხოვრობდა და განიკურნა. აივ-ის დამარცხების ერთადერთ გზად ძვლის ტვინის გადანერგვა ითვლებოდა.

ახალგაზრდა ანალიტიკოსთა და მეცნიერთა დარბაზი “დოქტრინა”

გაერთიანებულ სამეფოში კორონავირუსის სამკურნალოდ ორალური
მედიკამენტი „მოლნუპირავირი" დაამტკიცეს.
კლინიკურმა კვლევებმა აჩვენა, რომ პრეპარატმა, რომელიც, თავდაპირველად,
გრიპის სამკურნალოდ შეიქმნა, კოვიდპაციენტებში ჰოსპიტალიზაციის ან
სიკვდილის რისკი დაახლოებით ორჯერ შეამცირა.
„მოლნუპირავირი“ აშშ-ის მედიკამენტების მწარმოებელმა კომპანია Merck-მა და
მისმა პარტნიორმა Ridgeback Biotherapeutics-მა შექმნეს. კომპანიების
ინფორმაციით, კვლევის ადრეულმა შედეგებმა აჩვენა, რომ იმ პაციენტებში,
რომლებმაც მათი ანტივირუსული პრეპარატი „მოლნუპირავირი" სიმპტომების
გამოვლენიდან ხუთი დღის განმავლობაში მიიღეს, ჰოსპიტალიზაციისა და
სიკვდილის დაახლოებით ორჯერ მცირე მაჩვენებელი დაფიქსირდა იმათთან
შედარებით, რომლებმაც პლაცებო მიიღეს.
კვლევაში 775 ზრდასრული კოვიდინფიცირებული იყო ჩართული. თითოეულ
მათგანს დაავადების მძიმე ფორმის განვითარების მინიმუმ ერთი რისკფაქტორი
ჰქონდა : იყო 60 წელს გადაცილებული, ან ჰქონდა დიაბეტი, აწუხებდა გულის
დაავადება ან სიმსუქნე.
კომპანია Merck-ში აცხადებენ, რომ 2021 წლის ბოლომდე მედიკამენტი 10
მილიონი კურსისთვის საკმარის რაოდენობას აწარმოებენ.
აღსანიშნავია, რომ კომპანიასთან აშშ-ის მთავრობამ კონტრაქტი გააფორმა,
რომელიც „მოლნუპირავირის" 1.7 კურსისთვის საჭირო რაოდენობის მიწოდებას
ითვალისწინებს. კონტრაქტის თანახმად, თითო კურსის ფასი 700 აშშ დოლარია.

წყარო  : BBC , Reuters

მასალა მოამზადა : თამარ ტაბატაძემ

ახალგაზრდა ანალიტიკოსთა და მეცნიერთა დარბაზი “დოქტრინა”

ამერიკის შეერთებულ შტატებში დაიბადა 21 კვირის, ყველაზე დღენაკლული ბავშვი, რომელიც გადარჩა. გასულ წელს ალაბამას შტატში დაბადებული კურტის მინსი სულ რაღაც 420 გრამს იწონიდა. 16 თვის შემდეგ ბიჭი კარგად გრძნობს თავს და გინესის მსოფლიო რეკორდსმენიც გახლავთ.

ორსულობის სრული ხანგრძლივობა 40 კვირაა, კურტისი კი 19 კვირით ადრე დაიბადა. სამწუხაროდ, მისი ტყუპისცალი დაბადებიდან რამდენიმე დღეში დაიღუპა.

მიუხედავდ იმისა, რომ ბავშვის გადარჩენის შანსი მცირე იყო, ინტენსიური თერაპიისა და საავადმყოფოში გატარებული 275 დღის შემდეგ კურტისი სახლში გაწერეს. გინესის რეკორდმენს დამატებითი ჟანგბადი და ხელოვნური კვებისათვის განკუთვნილი ზონდი ჯერ ისევ სჭირდება.

მასალა მოამზადა: ნინი ხეცურიანმა

სინგაპურის მთავრობა კორონავირუსის უფასო მკურნალობას აჩერებს იმ ადამიანებისთვის, რომლებიც ვაქცინაციაზე უარს ამბობენ. ამის შესახებ სინგაპურის ჯანდაცვის სამინისტროში განაცხადეს.

„ამჟამად, არავაქცინირებული პირები იმ პირების დიდ უმრავლესობას შეადგენენ, ვისაც ინტენსიური თერაპიის განყოფილებებში მკურნალობა ესაჭიროება. ისინი არაპროპორციულად უწყობენ ხელს ჩვენი ჯანდაცვის რესურსების დატვირთვას. ამრიგად, 2021 წლის 8 დეკემბრიდან კოვიდპაციენტებს, რომლებიც ვაქცინაციაზე უარს ამბობენ, მკურნალობის გასდასახადს დავაკისრებთ. აღნიშნული ზომა ყველა არავაქცინირებულ კოვიდპაციენტზე გავრცელდება, რომლებსაც საავადმყოფოებში 2021 წლის 8 დეკემბრიდან მიიღებენ“, – განაცხადეს სინგაპურის ჯანდაცვის სამინისტროში.

აღნიშნული ზომა არ გავრცელდება იმ პირებზე, ვისაც ვაქცინის მიღება სამედიცინო მიზეზების გამო არ შეუძლია.

ბრაზილიაში მდებარე ალბერტ სეიბინის სახელობის საავადმყოფოში მომუშავე მედიკოსები გამოცემაში Journal of Pediatric Case Reports გამოქვეყნებულ ნაშრომში უიშვიათეს სამედიცინო შემთხვევაზე წერენ. ისინი იტყობინებიან ახალშობილი ბიჭის შესახებ, რომელიც 12 სანტიმეტრი სიგრძის მქონე კუდით დაიბადა.

ჩვილი, რომელიც ოფიციალურ ანგარიშში ანონიმადაა მოხსენიებული, ნაადრევად გაჩნდა, თუმცა ამას ჯანმრთელობის მდგომარეობის გართულებები არ მოჰყოლია. მას მხოლოდ სხეულის სიყვითლე აღენიშნებოდა. როგორც კვლევის ავტორები აცხადებენ, ბავშვს მარცხენა პარავერტებრალურ-ლუმბოსკალურ რეგიონში (დუნდულის ზემოთ) გრძელი “ფიბროზული ქორდა”, იგივე კუდი ჰქონდა, რომელიც დაახლოებით 4 სანტიმეტრი დიამეტრის მომრგვალო წანაზარდით ბოლოვდებოდა.

ექიმებმა ბიჭი სპეციალური ულტრაბგერითი აპარატითაც გამოიკვლიეს, რათა სხვა სისტემური ცვლილებები გამოევლინათ, მაგრამ მის ორგანიზმში ასეთი დარღვევა არ აღმოუჩენიათ. აღსანიშნავია, რომ სამეცნიერო ლიტერატურაში კუდიანი ადამიანის დაბადების სულ 40 ფაქტია აღწერილი, ანუ ეს საკმაოდ იშვიათი მოვლენაა.

ამგვარ წანაზარდებს მედიკოსები “ნამდვილ” და “ფსევდო” კუდებად ყოფენ. ეს უკანასკნელი მოიაზრებს სხეულზე არსებულ შვერილს, რომელიც ცხიმოვან-ხრტილოვანი ქსოვილებისა და ძვლოვანი სტრუქტურებისგან შედგება. პირველი მათგანი კი ემბრიონული კუდია, რომელიც, როგორც წესი, 4 კვირის ნაყოფს უვითარდება, რის შემდეგაც, 6-დან 12 კვირამდე პერიოდში, მას ლეიკოციტები შლიან.

გამონაკლის შემთხვევებში, სისხლის თეთრი უჯრედები ემბრიონულ კუდს ვერ ანადგურებენ, ამიტომ ის ჩანასახს ბოლომდე უნარჩუნდება. უფრო მეტიც, კუნთების მეშვეობით, შესაძლებელია მისი ამოძრავება და მომრგვალებაც, როგორც ამას ზოგიერთი ცხოველი აკეთებს.

სწორედ ამის მაგალითია ზემოხსენებული ჩვილი, რომელსაც ქირურგებმა წანაზარდი წარმატებით მოაშორეს.

ოპერაციის ჩატარებამდე მათ დეტალურად გამოიკვლიეს ხერხემლის არეში რაიმე ფარული შეუხორცებელი ადგილი ხომ არ იყო, რათა ქირურგიულ ჩარევას ნევროლოგიური ცვლილებები არ გამოეწვია. მსგავსი რამ არ დაფიქსირებულა და პროცედურამ უსაფრთხოდ ჩაიარა.

ისინი კუდის შენარჩუნების კონკრეტულ მიზეზს არ ასახელებენ, თუმცა ამბობენ, რომ ორსულობის დროს დედა დღეში 10 ღერ სიგარეტს ეწეოდა და საშარდე მილის ინფექციის გამო პირველი თაობის ცეფალოსპორინს იღებდა.

ახალგაზრდა ანალიტიკოსთა და მეცნიერთა დარბაზი “დოქტრინა”