მედიცინა

მსოფლიო ჯანდაცვის ორგანიზაცია (WHO) აცხადებს, რომ AstraZeneca-ს ვაქცინით გამოწვეული თრომბოემბოლიის რისკების ზრდის საკითხის შესწავლას ევროპის წამლის სააგენტოსთან თანამშრომლობით აგრძელებენ.

როგორც WHO აღნიშნავს, ამ ეტაპზე არსებული შეფასებებით, არ დასტურდება, რომ თრომბოემბოლიური მოვლენები AstraZenca-ს კორონავირუსის საწინააღმდეგო ვაქცინამ გამოიწვია.

„მიუხედავად აღნიშნული ინფორმაციისა, ევროპის წამლის სააგენტოსთან ერთად ვაგრძელებთ აღნიშნული საკითხის დეტალურ შესწავლას და როგორც კი მოკვლევა დამთავრდება, საზოგადოებას შედეგებს აუცილებლად გავაცნობთ“, – აღნიშნულია WHO-ს განცხადებაში.

მსოფლიო ჯანდაცვის ორგანიზაცია ასევე აცხადებს, რომ AstraZeneca-ს დადებითი მხარე უფრო მეტი აქვს, ვიდრე – უარყოფითი.

„WHO-ს პოზიცია ამჟამად ასეთია – AstraZeneca-ს ვაქცინის დადებითი მხარე ბევრად აღემატება იმ საფრთხეს, რაც მის გამოყენებას შეიძლება მოჰყვეს და ბევრად უფრო ნაკლები გვერდითი მოვლენა აქვს, ვიდრე თავად კორონავირუსს“, აღნიშნულია WHO-ს განცხადებაში.

ახალგაზრდა ანალიტიკოსთა და მეცნიერთა დარბაზი ,,დოქტრინა“

ამერიკულმა კომპანია Moderna-მ თავისი ვაქცინის კლინიკური გამოცდა ბავშვებზე დაიწყო. ამის შესახებ CNN იუწყება.

კვლევაში მონაწილეობას მიიღებს აშშ-სა და კანადაში 7 ათასი ჯანმრთელი ბავშვი, რომელთა ასაკიც 6 თვიდან 12 წლამდეა.

ბავშვებს ვაქცინის ორ დოზას 28-დღიანი შუალედით გაუკეთებენ. შემდეგ კი მათი ჯანმრთელობის მდგომარეობას სპეციალისტები 12 თვის განმავლობაში დააკვირდებიან.

მედიის ცნობით, Moderna პირველი კომპანიია, რომელიც თავის ვაქცინას მცირეწლოვნებზე გამოცდის. მანამდე ვაქცინა 12-17 წლის მოზარდებზე გამოსცადეს. ხოლო Pfizer/BioNTech-ის ვაქცინის ტესტირება 12-15 წლის მოზარდებზე განხორციელდა. ამ კვლევის შედეგები, ამ დრომდე საჯარო არ არის.

ახალგაზრდა ანალიტიკოსთა და მეცნიერთა დარბაზი ,,დოქტრინა“

პოპულარული ბრიტანული გამოცემა The Guardian-ი, იმ ქვეყნების ჩამონათვალს აქვეყნებს, რომლებმაც AstraZeneca-ს კორონავირუსის საწინააღმდეგო ვაქცინის გამოყენება შეაჩერა. მათ შორისაა ავსტრია, ესტონეთი, ლიეტუვა, ლუქსემბურგი და ლატვია. ამასთან, ცოტა ხნის წინ Deutsche Welle-მ დაწერა, რომ ამავე კომპანიის კოვიდ-ვაქცინის გამოყენება 14 დღით დანიამაც შეაჩერა. შემდეგ კი ამ ქვეყნების ჯგუფს ნორვეგია და ისლანდიაც შეუერთდა.

როგორც ცნობილია, ავსტრიის წამლის ეროვნულმა მარეგულირებელმა AstraZeneca-ს ვაქცინის გამოყენება მას შემდეგ შეაჩერა, რაც ოთხ ადამიანს ვაქცინის მიღების შემდეგ სისხლის შედედების საშიში მდგომარეობა დაუდგინდა.

ესტონეთმა, ლიეტუვამ, ლუქსემბურგმა და ლატვიამ AstraZeneca-ს ვაქცინის ჯგუფის გამოყენება შეაჩერა, რათა ევროპის წამლის სააგენტოსთვის გამოძიების ჩასატარებლად დრო მიეცათ.

ევროპის წამლის სააგენტოს განმარტებით, ვაქცინის იმ ჯგუფის გაკეთება, რომელიც ავსტრიაში გამოიყენეს, 49 წლის მედდის გარდაცვალების მიზეზი არ გამხდარა. ის გარდაიცვალა მრავლობითი თრომბოზით, სისხლძარღვებში სისხლის კოლტების წარმოქმნით, ვაქცინის მიღებიდან ათი დღის შემდეგ.

მეორე პაციენტს ფილტვების სისხლძარღვების ემბოლიის დიაგნოზი დაუსვეს, რომელის გამოჯანმრთელება მიმდინარეობს. სისხლის შედედება კიდევ იმ ორ პაციენტს გამოუვლინდა, რომლებმაც ვაქცინის დოზა იმავე ჯგუფიდან მიიღეს.

ევროპის წამლის სააგენტოს განცხადებით, ამჟამად არ არსებობს მტკიცებულება, რომ ვაქცინამ გართულებები გამოიწვია. ამასთან, თრომბოზი არ შედის ვაქცინის გვერდითი ეფექტების ჩამონათვალში.

ევროპის წამლის სააგენტოს განცხადებით, ვაქცინის ეს ჯგუფი (ABV5300) ერთ მილიონ დოზას მოიცავს და ევროკავშირის 17 სახელმწიფოს გადაეცა.

ახალგაზრდა ანალიტიკოსთა და მეცნიერთა დარბაზი ,,დოქტრინა”

ამერიკელი მეცნიერების მიერ ჩატარებული ახალი კვლევის თანახმად, Pfizer –BioNTech-ისა და  Moderna-ს ვაქცინებით წარმოქმნილი „კოვიდ 19“-ის ანტისხეულები დედის რძეში გადადის, თუმცა, ჯერჯერობით უცნობია, რამდენხანს რჩება ანტისხეულები იქ.

ექვსმა ქალმა, რომლებსაც ახალშობილები ძუძუთ კვებაზე ჰყავდათ და რომლებიც Pfizer/BioNTech-ის ან Moderna-ს ვაქცინის ორივე დოზის გაკეთებას აპირებდნენ, მეცნიერებს ვაქცინაციამდე და ვაქცინაციის შემდეგ თავიანთი რძის ნიმუშები გადასცეს. ბოლო ნიმუში ვაქცინის მეორე დოზის გაკეთებიდან ორ კვირაში აიღეს. არცერთი აღნიშნული ქალი კორონავირუსით არ დაინფიცირებულა, ვაქცინის პირველი დოზის გაკეთებიდან ერთ კვირაში ყველა მათგანის რძეში ანტისხეულები აღმოჩნდა. მოგვიანებით ანტისხეულების დონე შემცირდა, მეორე დოზის გაკეთების შემდეგ კი მკვეთრად გაიზარდა.

აღმოჩნდა, რომ ორივე ვაქცინა თანაბრად ეფექტური იყო ანტისხეულების წარმოქმნის კუთხით.

კვლევის ავტორების განმარტებით, დედის რძეში ანტისხეულების საპასუხო რეაქციის ხანგრძლივობის, ისევე როგორც ახალშობილთა იმუნიტეტის სიძლიერისა და ხანგრძლივობის დასადგენად დამატებითი კვლევის ჩატარებაა საჭირო.

აღსანიშნავია, რომ კვლევა ონლაინ საიტ medRxiv-ზე გამოქვეყნდა და მისი განხილვა ან სამედიცინო ჟურნალში დაბეჭდვა ჯერჯერობით არ განხორციელებულა.

წყარო : reuters.com

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი ,,დოქტრინა”