close

მედიცინა

მედიცინა

ვირუსის კიდევ ერთი ვარიანტი უჩვეულო მუტაციის უნარით – რა ვიცით ახალ “ლამბდა” შტამზე

“ამ დროისთვის საკმარისი მტკიცებულება არ არსებობს იმის დასადასტურებლად, რომ ის უფრო აგრესიულია, ვიდრე კორონავირუსის სხვა ვარიანტები, თუმცა ერთ-ერთი მიზეზი, რის გამოც “ლამბდას” საფრთხე უნდა გავითვალისწინოთ, მისი გამორჩეული თვისებაა –  ეს ვარიანტი შეიცავს სპაიკ ცილის რამდენიმე მუტაციას, რომელიც ვირუსის სწრაფად გავრცელების უნარზე გავლენას ახდენს.” – მეცნიერების ამ მოსაზრებას კიდევ ერთხელ ამოიკითხავთ Financial Times-ის მიერ გამოქვეყნებულ მასალაში. 

რა ვიცით “ლამბდა” შტამზე და რა სიმპტომები ახასიათებს მას

მართალია, მსოფლიო ჯანდაცის ორგანიზაციას ვირუსის მუტირებული ვერსია “შეშფოთების გამომწვევი შტამების” სიაში ჯერ არ შეუყვანია, თუმცა “საფრთხისშემცველად” ასახელებს და მის შესახებ აქტიურ კვლევებს იწყებს.

“ლამბდა” შტამი იგივე ლათინოამერიკული ვარიანტია, რომელიც პირველად 2020 წლის ბოლოს ჩილეში, პერუში, ეკვადორსა და არგენტინაში დაფიქსირდა. ამის შემდეგ ის მსოფლიოს 27 ქვეყანაში აღმოაჩინეს, მათ შორის დიდ ბრიტანეთში.

მკვლევრების შეშფოთებამ კი მას შემდეგ მოიმატა, რაც WHO-ს მონაცემების მიხედვით დადასტურდა, რომ პერუში ინფიცირების შემთხვევების 82 პროცენტი სწორედ ეს შტამი აღმოჩნდა. აქვე უნდა აღინიშნოს, რომ პერუ ერთ-ერთია იმ ქვეყნებს შორის, სადაც გარდაცვალების მაღალი მაჩვენებელი ფიქსირდება – ქვეყანაში დღემდე კოვიდით გარდაცვალების 192 687 შემთხვევა აღირიცხა.

მიმდინარე წლის 15 ივნისს ჯანდაცვის მსოფლიო ორგანიზაციის მიერ “ლამბდას” შტამი კლასიფიცირდა, როგორც საყურადღებო ვარიანტი და მისი სიმპტომებიც მალევე დაასახელა.

აღმოჩნდა, რომ ისინი არ განსხვავდება კორონავირუსისთვის დამახასიათებელი დომინანტი სიმპტომებისგან და ძირითადი ჩამონათვალი ასე გამოიყურება – სხეულის ტემპერატურის მატება, გართულებული ხველა, ყნოსვისა და გემოს შეგრძნების დაკარგვა.

 

მუტაციის უჩვეულო შესაძლებლობა – თავსატეხი მეცნიერებისთვის

მიუხედავად იმისა, რომ სირთულის ხარისხით “ლამბდა” შტამს ჯერჯერობით არ განიხილავენ ალფას, ბეტას, გამასა და დელტა შტამებს შორის, მას მაინც ახასიათებენ, როგორც უჩვეულო შესაძლებლობების მქონე ვარიანტს.

როგორც აღმოჩნდა, აღნიშნული შტამი შეიცავს სპაიკ ცილის რამდენიმე მუტაციას, რომელიც ვირუსის გავრცელების ხარისხზე გავლენას ახდენს.

🔴  “ლამბდას აქვს სპაიკ ცილის მუტაციის უნიკალური ნიმუში, რომელსაც ვირუსი ადამიანის უჯრედების დასაინფიცირებლად იყენებს. განსაკუთრებით საინტერესოა ერთ-ერთი მუტაცია – L452Q, რომელიც L452R-ის მსგავსია, სწორედ ამ უკანასკნელზე შეიძლება ვიფიქროთ, რომ ის ხელს უწყობს ვირუსის “დელტა” ვარიანტის მაღალ ინფექციურობას.” – ამბობენ მკვლევრები.

სანტიაგოს უნივერსიტეტის მეცნიერებმა ადგილობრივი სამედიცინო პერსონალის სისხლის ნიმუშები გამოიკვლიეს და “ლამბდას” ქცევა შეისწავლეს – აღმოჩნდა, რომ ეს შტამი უფრო ინფექციურია, ვიდრე “გამა” და “ალფა” და გაცილებით უკეთ შეუძლია, ვაქცინაციის შედეგად წარმოქმნილ ანტისხეულებს დააღწიოს თავი, შესაბამისად, პირველადი მონაცემებით, მეცნიერების დასკვნა ასეთია:

“ლამბდას ვარიანტის მწვავე პროტეინში არსებული მუტაციები ანტისხეულების განეიტრალებას და ინფექციის ზრდას იწვევს”.

“ლამბდას” შტამი სწრაფად ვრცელდება – არგუმენტები რიცხვებში

გასული წლის დეკემბერში, მაშინ როდესაც ლათინოამერიკული შტამი პირველად პერუში გამოვლინდა, ის აღმოჩნდა 200 ნიმუშიდან მხოლოდ ერთში;

მიმდინარე წლის მარტში კი, ანუ დაახლოებით 3 თვეში, პერუს დედაქალაქ ლიმაში ჩატარებული კვლევის შედეგად დადგინდა, რომ “ლამბდა” შტამი შესწავლილი ნიმუშების 50 პროცენტს შეადგენდა;

ივნისის თვეში მონაცემი საგრძნობლად გაიზარდა და შესწავლილი შემთხვევების 80 პროცენტი სწორედ ამ ვარიანტს უკავშირდება.

ვირუსის “ლამბდა” ვარიანტი გავრცელებულია ჩილეშიც, სადაც ახალი შემთხვევების თითქმის მესამედი სწორედ ამ შტამს წარმოადგენს.

მონაცემების მიუხედავად, მსოფლიო ჯანდაცვის ორგანიზაციაში მიიჩნევენ, რომ ეს შტამი ნაკლებად საფრთხისშემცველია, ვიდრე დიდ ბრიტანეთში, სამხრეთ აფრიკაში, ბრაზილიასა და ინდოეთში აღმოჩენილი მუტაციები, თუმცა იმასაც ხაზგასმით აღნიშნავენ, რომ მონიტორინგი მაინც უმნიშვნელოვანესია.

ლათინური ამერიკა პანდემიისგან ყველაზე მეტად დაზარალებული რეგიონია. კონტინენტზე, რომელზეც გლობალური მოსახლეობის მხოლოდ 8 % ბინადრობს, მსოფლიოს მასშტაბით აღრიცხული კოვიდშემთხვევების 20 % მოდის.

ლათინურ ამერიკაში გენეტიკური კვლევის ობიექტების ნაკლებობა ართულებს იმის ცოდნას, თუ რამდენად მართავდა “ლამბდა” ვარიანტი რეგიონში ეპიდვითარებას და არის თუ არა მისი დამსახურება ვირუსის უკონტროლო გავრცელება.

ბოლო კვირების განმავლობაში, ინფიცირებულთა რიცხვმა საგანგაშოდ იმატა კოლუმბიაში, პარაგვაისა და ურუგვაიშიც.

 

 

4 კვირის განმავლობაში თითქმის 30 ქვეყანაში – “ლამბდა” შტამი ახლა უკვე ავსტრალიაშიც ფიქსირდება

დღეს უცხოური მედიასაშუალებები წერენ, რომ “ლამბდა” შტამი უკვე ავსტრალიაშიც აღმოაჩინეს.

“ეს შემაშფოთებელია, რადგან შესაძლოა მუტირებული ვარიანტი “დელტა” შტამზე ინფექციურიც კი იყოს. ლათინოამერიკული ვარიანტი აოცებს მსოფლიო ჯანდაცვის ორგანიზაციას, რადგან ოთხი კვირის განმავლობაში ის თითქმის 30 ქვეყანაში გავრცელდა.” – წერენ უცხოური ონლაინგამოცემები და აღნიშნავენ, რომ ავსტრალიაში ეს შტამი დაუდასტურდა მოგზაურს, რომელიც კარანტინს  აპრილში, ახალ სამხრეთ უელსის ერთ-ერთ სასტუმროში გადიოდა.

მეცნიერები აღნიშნავენ, რომ ეპიდემიის კონტროლის მცდელობა ვირუსის გავრცელების კონტროლისა და შემთხვევების შემცირების პირდაპირპროპორციულია, ამიტომ წამყვანი ლაბორატორიების კვლევებში აქტიურ ჩართვას ითხოვენ.

აქვე – NYU Grossman-ის მედიცინის სკოლის წინასწარი კვლევის მიხედვით, შესაძლოა ვაქცინებმა ამ ვარიანტის წინააღმდეგაც მაღალი  ეფექტიანობა აჩვენოს, თუმცა კვლევა ჯერ არ დასრულებულა და პანდემიური მსოფლიოც საბოლოო შედეგების გამოქვეყნებას ელის.

 

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
მედიცინა

მათთვის, ვინც ფაიზერს ელოდება — ტელენევროლოგი დავით მრელაშვილი

შეკითხვა: რომელი ვაქცინით ავიცრა – ჩინურით, თუ ფაიზერს დაველოდო. ვისაც უბრალო შეჯამება აინტერესებს მათთვის მარტივად ვიტყვი:

სინოვაკით აცრა (რაც უკვე საქართველოში შესაძლებელია) დღეს, გაცილებით (!) უკეთ დაგიცავთ სიკვდილისგან წლის ბოლომდე, ვიდრე თუნდაც ორი კვირის მერე ფაიზერით აცრა.

მათთვის, ვისთვისაც ეს დაუჯერებლად ჟღერს, ქვემოთ ავხსნი მე-8 კლასის მათემატიკის დონეზე.

ეს დასკვნა ეფუძნება გარკვეულ ფაქტებს და ეს ფაქტები არის დღესდღეობით არსებული სამედიცინო ლიტერატურიდან ერთ-ერთი ყველაზე სარწმუნო და ავტორიტეტული წყაროებიდან, როგორებიცაა ჯანმრთელობის მსოფლიო ორგანიზაცია, New England Journal of Medicine.

ეს ფაქტები და დაშვებებია შემდეგი:

  • ფაიზერი უფრო ეფექტური ვაქცინაა და უკეთ (უფრო მეტ პროცენტში) იცავს ხალხს კორონავირუსის ინფექციისგანაც და მისგან სიკვდილისგან, ვიდრე ჩინური ვაქცინა. ეს ნამდვილად ასეა, ვერცერთი ჭკუათმყოფელი ვერ იტყვის, რომ ჩინური უფრო ეფექტურიაო, არსებული ინფორმაციის საფუძველზე. სწორედ ამ სიმართლეს შეჰყავს შეცდომაში ძალიან ბევრი, განსაკუთრებით ისინი, ვინც ფაიზერს “ელოდებიან”.
  • უახლესი კვლევის საფუძველზე, ერთი და იმავე ქვეყანაში და პოპულაციაში და იმავე დროის პერიოდში (რაც ძალიან მნიშვნელოვანია სწორი ინტერპრეტაციისთვის) შედარდა ფაიზერის და სინოვაკის (ჩინური) ვაქცინების ეფექტურობა. როგორც მოსალოდნელი იყო, ფაიზერი უფრო ეფექტური იყო ვიდრე სინოვაკი.
  • მაგრამ როგორც ამერიკელები ამბობენ — “ეშმაკი დეტალებშია დამალული”. ეს განსხვავება ამ ორ ვაქცინას შორის ძირითადად იყო მსუბუქი ფორმების ხარჯზე. რაც ყველაზე მთავარი და მნიშვნელოვანია — სიკვდილისგან და კრიტიკული ფორმებისგან დაცვაში განსხვავება გაცილებით მცირე, დაახლოებით, 5 პროცენტი იყო: 91% დაცვა ფაიზერისგან და 86% სინოვაკისგან. ეს უკანასკნელი კვლევა ჩილეში ჩატარდა, სადაც ბრაზილიური შტამია დომინანტური, თუმცა, მანამდე არსებული კვლევებშიც (სხვა შტამებზე) მსგავსი პროპორციებია — ფაიზერი ლიდერობს მნიშვნელოვნად სიმპტომურ ინფექციების პრევენციაში, თუმცა მძიმე ფორმებსა და სიკვდილიანობაზე სინოვაკი (და სხვა ვაქცინებიც) საკმაოდ უახლოვდება მას. აქედან გამომდინარე ნამდვილად ლოგიკურია რომ დელტა შტამზეც მსგავსი პროპორციები იყოს დაცული (ამ არგუმენტში გვეხმარება დღევანდელი დიდი ბრიტანეთის სიტუაცია, სადაც თითქმის 100% დელტა შტამია და მიუხედავად ამისა — ასტრაზენეკას მიერ სიკვდილიანობის 90%-ით შემცირებას ვხვედბით).
  • ვაქცინის “ეფექტურობაზე” რომ საუბრობენ, სტანდარტულად იგულისხმება სიმპტომური ინფექციისგან პროცენტული დაცვა (რომლის დიდი პროცენტიც მსუბუქი ფორმაა). ამას გარკვეულწილად შეცდომაში შეჰყავს ხალხი, რადგან მგონი ყველა ადამიანისთვის ის უფრო მნიშვნელოვანია, ვაქცინა სიკვდილისგან დაიცავს თუ არა, ვიდრე ის, რომ მსუბუქი სურდოს მსგავსი ინფექცია ექნება თუ არ ექნება.
  • ვაქცინისგან სრული დაცვა (ზემოთ მოყვანილი პროცენტები) საერთაშორისოდ მიღებულია, რომ ყალიბდება მეორე დოზიდან 2 კვირის შემდეგ.

ახლა კი მათემატიკაზე გადავიდეთ:

პირობითად ავიღოთ, რომ ვაქცინის გარეშე (დაუცველი) გარდაცვლილი ადამიანების რიცხვი *ყოველთვიურად* 100%-ია (ან 100, მარტივი გამოთვლისთვის). ეს ნიშნავს, რომ ფაიზერით ორჯერ აცრილ პოპულაციაში ეს იქნება 9 ადამიანი (91%-ში იცავს სიკვდილისგან, 100-91 = 9). სინოვაკის შემთხვევაში ეს იქნება 14 (100-86 = 14)
ეს ნიშნავს რომ ახლა (ივლისის შუაში) რომ აიცრას ადამიანი და შემდეგ მეორე დოზა აგვისტოს 15-ში, 1 სექტემბრისთვის უკვე სრული დაცვა ექნება. ანუ სექტემბერი, ოქტომბერი, ნოემბერი დეკემბერი – თითოეულ თვეში სიკვდილიანობა იქნება 14. სულ 14+14+14+14= 56 (ნაცვლად აუცრელების 400-სა იგივე პერიოდში).

ორ კვირას რომ “დაველოდოთ” და მერე ფაიზერით ავიცრათ (დაუჯერებლად კარგ შემთხვევაში, თუ ფაიზერი იქნება იმ დროს) სურათი ასეთია: სექტემბრის პირველი ორი კვირა ჯერ კიდევ დაუცველია პაციენტი. ანუ, თუ მთელ სექტემბერში აუცრელი 100 პაციენტი კვდებოდა, პირველ ნახევარში მოკვდება 50, მეორე ნახევარში 4.5 (ცხრის ნახევარი), ნუ დავამრგვალოთ ფაიზერის სასარგებლოდ 4. ოქტომბერ, ნოემბერ, დეკემბერში 9-ები. ანუ სულ ჯამში: 50 + 4 + 9 + 9 + 9 = 81.

შედეგი ასეთია:
***თქვენ დღეს რომ აიცრათ ჩინურით 45%-ით მეტად ხართ დაცული წლის ბოლომდე კორონათი სიკვდილისგან*** ((81 – 56 ) / 56 *100= 45%).
რა თქმა უნდა, ეს გამარტივებული გამოთვლაა, რომ პოსტი წაკითხვადი იყოს და მრავალი წვრილმანი ფაქტორის დამატება შეიძლება (მაგალითად ნაწილობრივი დაცვა პირველი დოზისგან, ორივე ვაქცინის შემთხვევაში). თუმცა, რომც გავითვალისწინოთ ის წვრილმანები — ამხელა 45%-ს დიდად ვერ შეცვლის. იმაზე აღარ მაქვს ლაპარაკი, რომ ორ კვირაზე მეტი ხანი ვინც ელოდება ფაიზერს, ეს ციფრი გაცილებით იზრდება (ერთ თვეში უკვე 100%-ზე მეტია).

მე აქ რომელიმე ვაქცინას კი არ ვუწევ აგიტაციას — უბრალოდ ის ერთი შეხედვით “უხილავი” ციფრები გამომყავს სააშკარაოზე, მათთვის, ვინც დაბნეულია და ვისაც, ჯერჯერობით, არ უნდა ღმერთთან (ან უარეს შემთხვევაში ეშმაკთან) შეხვედრის კორონა-ლატარია მოიგოს, რასაც ყოველთვიურად 600 ადამიანი იგებს საქართველოში.

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
მედიცინასამართალი

ინგლისში საქალწულე აპკის აღდგენის პროცედურა აიკრძალება

გაერთიანებული სამეფოს პარლამენტის წევრმა, რიჩარდ ჰოლდენმა კანონპროექტი წარმოადგინა, რომლის თანახმადაც ინგლისსა და უელსში საქალწულე აპკის შემოწმება და აღდგენა შეიძლება აიკრძალოს. კანონის ძალაში შესვლის შემდეგ ამ პროცედურების შემსრულებელი ექიმები და მეანები შეიძლება დააპატიმრონ.

ზოგი შიშობს, რომ ოპერაციების აკრძალვა არალეგალურად ჩატარებას შეუწყობს ხელს. სამედიცინო ექსპერტები ამბობენ, რომ ჰიმენოპლასტიკა, ანუ ვაგინის შესასვლელთან მდებარე მემბრანული შრის აღდგენა ძალადობრივი და არასამეცნიერო პრაქტიკაა.

ადამიანის უფლებები

ჰოლდენმა მას შემდეგ გადაწყვიტა ზომების მიღება, რაც BBC-ის გამოძიებით გაირკვა, რომ ბრიტანული სამედიცინო კლინიკები აპკის შემოწმებას მომხმარებლებს £150-300-ად სთავაზობდნენ.

მსოფლიო ჯანდაცვის ორგანიზაციასა (WHO) და გაერთიანებულ ერებზე დაყრდნობით, ქალწულობის ტესტი ადამიანის უფლებების შემლახველია. WHO-ს განცხადებით, პროცედურა, რომელიც მინიმუმ 20 ქვეყანაში ტარდება, დისკრიმინაციულის გარდა, უსარგებლოცაა, რადგან აპკი შესაძლოა მრავალი მიზეზით გაიხეს, იქნება ეს ტამპონების გამოყენება თუ ვარჯიში.

აიშას ისტორია

აიშას (სახელი პირობითია) ორი წლის წინ, ნიშნობამდე ცოტა ხნით ადრე, ოჯახმა აიძულა ქალწულობის აპკის შემოწმება. მშობლები მას პაკისტანში საკუთარ ბიძაშვილს ურიგებდნენ.

“შემოწმება ვერ გავიარე”, — ამბობს გოგონა.

ტესტის “არადამაკმაყოფილებელი” შედეგის გამო აიშა ძმებისა და მამის მხრიდან ფიზიკური ძალადობის მსხვერპლი გახდა. მათი თქმით, აიშამ მათ “სირცხვილი” აწვნია, ოჯახის “ღირსების” აღსადგენად, მათი აზრით, ჰიმენოპლასტიკა იყო საჭირო. აიშამ პროცედურაზე უარი თქვა და სახლიდან გაიქცა.

საქველმოქმედო ორგანიზაცია თავისუფლების დამფუძნებელი ანიტა პრემი, რომელიც “ამ გულისამრევი პროცედურის” გაუქმებას ითხოვს, აცხადებს, რომ სამხრეთაზიური წარმომავლობის ქალები და გოგონები სულ უფრო და უფრო ხშირად ხდებიან ამ ძალადობრივი პრაქტიკის მსხვერპლები.

“ჩვენ შევამჩნიეთ, რომ სიძეთა ოჯახები არა მხოლოდ საპატარძლოს სურათსა და საგანმანათლებლო მიღწევებს, არამედ ქალწულობის დამადასტურებელ საბუთსაც ითხოვენ”, — თქვა მან.

პროფესორი კოლინ მელვილი, რომელიც სამედიცინო საბჭოს წევრია და სამედიცინო პერსონალის გადაცდომებს სწავლობს, ამბობს, რომ ექიმებმა ეს პროცედურა მხოლოდ მაშინ უნდა ჩაატარონ, როცა კლინიკურად საჭიროა და პაციენტის თანხმობაც არსებობს: “ჩვენ ძალიან შევშფოთდებით, თუ გავიგებთ, რომ რომელიმე ექიმმა ქალწულობის შემოწმების / აღდგენის ოპერაცია პაციენტის სურვილის საწინააღმდეგოდ ჩაატარა. ამ შემთხვევაში აუცილებელი იქნება ზომების მიღება”

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
მედიცინაფიზიკა

კვანტური ფიზიკის გამოყენებით, მეცნიერებმა კიბოს უჯრედების დნმ გაანადგურეს

კვანტური ფიზიკის გამოყენებით, მეცნიერებმა კიბოს უჯრედების დნმ დააზიანეს და მოკლეს. კვანტური ფიზიკა და კიბო შეიძლება ერთან უცნაურად ჟღერდეს, მაგრამ იქნებ კვანტური ფიზიკა კიბოს განკურნების გზის პოვნაში დაგვეხმაროს.
მკვლევრები აცხადებენ, რომ თუკი კიბოს უჯრედების დნმ-ს დასხივებული იოდის მატარებელი ნანონაწილების მიერ გამოყოფილი ელექტრონების ზემოქმედების ქვეშ მოვათავსებთ, ისინი მოკვდებიან. აღნიშნულს ადასტურებს კვლევა, რომელზეც იმუშავეს კიოტოს უნივერსიტეტის მეცნიერებმა.
როდესაც იქს-სხივები მოლეკულებზე ზემოქმედებენ, ხშირად წარმოიქმნება თავისუფალი რადიკალები, რომლებიც კიბოს უჯრედების დნმ-ს აზიანებს და კლავს. თუმცა, თავისუფალი რადიკალები შეიცავს ჟანგბადს და თუ სამიზნე რეგიონში არ არის საკმარისი ჟანგბადი, მაშინ რადიკალები ვერ წარმოიშობიან. ეს კი რაღაც ხარვეზებზე მიგვანიშნებს. მეცნიერები კი ახლა ცდილობენ ჟანგბადის საჭიროება გამორიცხონ. ერთ-ერთი გამოსავალი გადოლინიუმია. გადოლინიუმით დატვირთული ნანონაწილაკები ელექტრონებს გამოყოფს და კიბოს უჯრედების დნმ-ს კლავს. თუმცა, ეს ელემენტი ძალიან იშვიათია და მეცნიერები ფიქრობენ მის იოდინით ჩანაცვლებას.
ტექნოლოგიის ეფექტურობა ცხოველებზე ექსპერიმენტით ჯერ არ დადასტურებულა, თუმცა, მალე იგეგმება და წარმატების პოტენციალიც დიდია.

წყარო:iflscience.com
მასალა მოამზადა: ნინი ხეცურიანმა

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
მედიცინასაქართველო

იმ ექიმებს, ვისაც აცრა არ სურს, აეკრძალოთ მუშაობა ან გავიდნენ უხელფასო შვებულებაში – ზაალ კოკაია

ჩემი აზრით, ექიმებისთვის კოვიდ-აცრა უნდა იყოს სავალდებულო, – ამის შესახებ ლუნდის უნივერსიტეტის ექსპერიმენტული სამედიცინო კვლევის პროფესორი, ღეროვანი უჯრედების და აღდგენითი ნევროლოგიის ლაბორატორიის ხელმძღვანელი, ივ. ჯავახიშვილის თბილისის სახელმწიფო უნივერსიტეტის მოწვეული პროფესორი ზაალ კოკაია წერს.

მისი თქმით, ვისაც არ სურს ვაქცინაცია, მათ უნდა აეკრძალოს უშუალოდ პაციენტთან მუშაობა, ანდა გავიდნენ უხელფასო შვებულებაში, მანამ სანამ პანდემია არ დასრულდება.

“გამონაკლისი უნდა იყოს მხოლოდ ვაქცინის შემადგენლობის რომელიმე კომპონენტზე, ანდა წინა აცრაზე ანაფილაქსიური შოკის (და არა ზოგადად ალერგიულობა), ასევე ორსულობა და სხვა მეცნიერულად ან კლინიკურად დასაბუთებული და საერთაშორისოდ აღიარებული გამონაკლისები. ექიმის მიერ აცრაზე უარის თქმა არის საკუთარი პროფესიის, პაციენტის და მთლიანად საზოგადოების მიმართ უპასუხისმგებლობა და ანტივაქსერიზმის წახალისება. ეს არის პაციენტისთვის სიცოცხლის საფრთხის შექმნა, რომელიც წინააღმდეგობაშია ყველა ეთიკურ და მორალურ სტანდარტებთან. მესმის, რომ არჩევანის უფლება არის ადამიანის ერთ-ერთი მნიშვნელოვანი უფლება, მაგრამ უმთავრესი უფლება სიცოცხლის უფლებაა და ამ უფლებისთვის საფრთხის შექმნა არის უფრო მეტი ბოროტება, ვიდრე არჩევანის უფლების შეზღუდვა… სამყარო არის ომის მდგომარეობაში და ექიმები არიან ამ ომში მოწინავე ხაზზე მდგარი მეომრები… ამიტომაც, როგორც ომის დროს იზღუდება გარკვეული უფლებები, ამ დროსაც უნდა მოხდეს კომპრომისები. ქვეყნებმა დაიწყეს ამის გააზრება და იმედია, საქართველოშიც, სადაც ვაქცინაციის დონე კატასტროფულად დაბალია, მალე მივხვდებით, რომ ეს არის პანდემიის დამარცხების არასაკმარისი, მაგრამ აუცილებელი ზომა”, – წერს ზაალ კოკაია სოციალურ ქსელში.

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
მედიცინასაქართველო

WHO საქართველოს წამლის ფასის რეგულირებისკენ მოუწოდებს

ჯანდაცვის მსოფლიო ორგანიზაცია (WHO) საქართველოს მთავრობას მედიკამენტების ფასების რეგულირებისკენ მოუწოდებს. ამის შესახებ ნათქვამია WHO-ს მიერ გამოქვეყნებულ კვლევაში, სადაც მედიკამენტებზე ხელმისაწვდომობის საკითხს ერთ-ერთი მნიშვნელოვანი ადგილი უჭირავს.

„ჯანდაცვის სერვისების ფასების სუსტი რეგულირება და პროვაიდერის შესაძლებლობა პაციენტებს ზედმეტი თანხა დააკისროს, ხელს უწყობს ჯიბიდან მაღალ გადახდებს და ოჯახების გაღატაკებას.

არაფორმალური გადასახადების აღმოფხვრის მიმართულებით მნიშვნელოვანი პროგრესის მიუხედავად, საქართველოში პროვაიდერებს შეუძლიათ დაადგინონ საკუთარი ფასები და პაციენტებს მოსთხოვონ გადაიხადონ განსხვავება ფასსა და საყოველთაო ჯანდაცვის პროგრამით დადგენილ ტარიფს შორის“, – ნათქვამია WHO-ს ქართული ოფისის კვლევაში.

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
კვლევებიმედიცინა

ბრიტანელი ექიმები ორსულ ქალებს კორონავირუსზე აცრას ურჩევენ

ბრიტანელი ექიმები ორსულ ქალებს კორონავირუსზე აცრას ურჩევენ. აღნიშნულ ინფორმაციას „ბი ბი სი“ „ბრიტანეთის მეან-გინეკოლოგთა სამეფო კოლეჯის” გამოქვეყნებულ განცხადებაზე დაყრდნობით ავრცელებს, რომელშიც ნათქვამია, რომ ბრიტანელი გინეკოლოგები და მეანები შეშფოთებული არიან იმ საფრთხეებით, რასაც კორონავირუსი და განსაკუთრებით მისი ახალი შტამები უქმნიან ორსულ ქალს და ნაყოფს.

როგორც ცნობილია, ორსულ ქალებს სხვებთან შედარებით გაცილებით დიდი შანსი აქვთ კოვიდის მძიმე ფორმა განუვითარდეთ, სწორედ ამიტომ ექსპერტები მათ მოუწოდებენ აიცრან და დაიცვან საკუთარი თავი, შვილი და ოჯახი.

კოვიდვაქცინების უსაფრთხოება და ეფექტურობა ორსულებში დადასტურებულია, მიუხედავად ამისა, კვლევები უჩვენებს, რომ ბრიტანეთში ორსული ქალების 58%-მა აცრაზე უარი თქვა.

„ბრიტანეთის მეან-გინეკოლოგთა სამეფო კოლეჯის” პრეზიდენტის, დოქტორ ედუარდ მორისის თქმით იმ დედებს, რომლებიც მშობიარობისას კოვიდით არიან ინფიცირებული, დიდი შანსია დასჭირდეთ გადაუდებელი საკეისრო კვეთა ან რეანიმაცია. ასეთ ქალებში საკმაოდ მაღალია მკვდრადშობადობის  მაჩვენებელიც. გართულებების რისკი განსაკუთრებით მაღალია მაშინ, თუ ორსული მესამე ტრიმესტრში ინფიცირდება.

„ამიტომ ორსულებმა აუცილებლად უნდა მიიღონ უსაფრთხოების ყველა ზომა და აიცრან პირველი შესაძლებლობისთანავე“- აღნიშნავს მორისი.

„ბრიტანეთის მეან-გინეკოლოგთა სამეფო კოლეჯის” პრეზიდენტი ამბობს იმასაც, რომ მთავრობას ამ კუთხით სათანადო მუშაობა არ გაუწევია და მოსახლეობის ინფორმირებაზე არ უზრუნია. შედეგად, მოსახლეობის დიდ ნაწილს აქვს შიში ვაქცინის მიმართ მაშინ, როდესაც მის გამოუყენებლობას შესაძლოა სავალალო შედეგები მოჰყვეს. მორისის აზრით, სწორედ ასეთი დამოუკიდებლობის გამო ორსულები აღმოჩნდნენ ერთადერთი მოწყვლადი ჯგუფი, რომელიც ვაქცინაციის პრიორიტეტში არ მოიაზრება.

„ბრიტანეთის ვაქცინაციის და იმუნიზაციის ცენტრის“ რეკომენდაციით, ბრიტანელ ორსულებს შეუძლიათ აიცრან „ფაიზერის“ ან „მოდერნას“ ვაქცინით, თუმცა მოსახლეობაში ეჭვები და შიშები ჯერ კიდევ მრავლადაა.

ცოტა ხნის წინ აშშ-ში დასრულებულმა კვლევამ, რომელშიც 90 000-ზე მეტი ორსული მონაწილეობდა დაადგინა, რომ კოვიდსაწინააღმდეგო ვაქცინა არ წარმოადგენს არანაირ საფრთხეს მუცლის მოშლის თვალსაზრისით და არც ნაყოფს გადაეცემა დედისგან.

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
მედიცინა

რა სიმპტომები ახასიათებს „ინდურ“ შტამს – თენგიზ ცერცვაძე

დღეს საქართველოში დომინანტი ჯერ კიდევ რჩება ე.წ. ბრიტანული შტამი „ალფა“, მაგრამ თანდათან სულ უფრო ვრცელდება ინდური, ანუ „დელტას“ შტამი, – ამის შესახებ ინფექციური საავადმყოფოს დირექტორმა, თენგიზ ცერცვაძემ ჟურნალისტებს განუცხადა.

მისი თქმით, „ინდური“ შტამი გაცილებით უფრო მეტად აზიანებს ბავშვებს, მათ შორის მცირეწლოვან ბავშვებს.

„ინდური“ შტამის გავრცელება დაახლოებით 25 %-ია და მატულობს. ასეთი სცენარი იყო ყველა იმ ქვეყანაში, სადაც ბოლოს „ინდური“ შტამი გახდა დომინანტი. დიდი ალბათობით, ჩვენ ამაზე გავლენას ვერ მოვახდენთ, დადგება რაღაც მომენტი, როცა საქართველოში ძირითადად „ინდური შტამი“ იქნება გავრცელებული. ის ბევრი რამით განსხვავდება სხვა შტამებისგან, 50 პროცენტით უფრო მეტად გადამდებია, ვიდრე „ბრიტანული“ შტამი, რომელიც თავის მხრივ, 50 %-ით მეტად გადამდები იყო, ვიდრე სტანდარტული „ჩინური“ შტამი. გარდა ამისა, მისი კლინიკური სურათი განსხვავდება. მას ნაკლებად ახასიათებს ხველა, ყნოსვისა და გემოვნების დაკარგვა, სამაგიეროდ, გაცილებით უფრო ხშირად ახასიათებს ყელის ტკივილი, სურდო, თავის ტკივილი და ცხელება. გარდა ამისა, ის გაცილებით უფრო მეტად აზიანებს ბავშვებს, მათ შორის მცირეწლოვან ბავშვებს, ვიდრე ამას სხვა შტამები აკეთებდა. ამას განსაკუთრებულ ყურადღებას აქცევს ჯანდაცვის სექტორი და ყურადღება უნდა მიაქციონ მშობლებმაც, მოსახლეობამ. „ინდური“ შტამი იძლევა გაცილებით უფრო მძიმე მიმდინარეობას დაავადების, უფრო მძიმე გამოსვლებით, მხედველობაში მაქვს გარდაცვალების შემთხვევები და დაახლოებით ორჯერ უფრო გაზრდილი ჰოსპიტალიზაცია. ყველაფერი ეს ძალიან სერიოზული გამოწვევის წინაშე აყენებს სახელმწიფოს და პირველ რიგში, ჯანდაცვის სექტორს“,- განაცხადა ცერცვაძემ.

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
ბიზნესიმედიცინასაქართველო

ჯანმო: საჭიროა საქართველომ წამლის ფასები დაარეგულიროს

ჯანმრთელობის მსოფლიო ორგანიზაციის (WHO) ევროპის რეგიონული ოფისი საქართველოში ჯანდაცვის სერვისებისა და მედიკამენტების ხელმისაწვდომობის შესახებ ანგარიშს აქვეყნებს და საქართველოს მთავრობას მოუწოდებს, ქვეყანაში ჯანდაცვასთან დაკავშირებული ფინანსური სიდუხჭირის შესამცირებლად, ჯანდაცვაში სახელმწიფო დაფინანსების გაზრდა და მედიკამენტების ფასები დაარეგულიროს.

ჯანმრთელობის მსოფლიო ორგანიზაციის უახლესი ანალიზის თანახმად, ევროპის სხვა ქვეყნებთან შედარებით, საქართველოში მაღალია გაღარიბების და ჯანდაცვაზე გაწეული კატასტროფული დანახარჯების შემთხვევები. ანგარიშში აღნიშნულია, რომ ეს ძირითადად გამოწვეულია სახელმწიფოს მიერ “ამბულატორიული მედიკამენტების შეზღუდული დაფარვით, მომხმარებლის გადახდების კომპლექსური სისტემით (თანამონაწილეობა), თანაგადახდაზე ყოველწლიური ლიმიტის, ან ნაკლებად შეძლებული, ან ქრონიკული დაავადებების მქონე ადამიანებისთვის შეღავათების გარეშე, ასევე სტაციონარული და გადაუდებელი დახმარების პრიორიტეტით პირველად ჯანდაცვასთან მიმართებაში”.

ჯანმრთელობის მსოფლიო ორგანიზაციის (WHO) ევროპის რეგიონული ოფისის ანგარიშის თანახმად, საქართველოში სახელმწიფოს მიერ დაფინანსებული ჯანდაცვის სერვისებით სარგებლობის მიუხედავად,  ჯიბიდან გაწეული ხარჯები კვლავ ტვირთად აწვება იმ ადამიანებს, ვისაც სამედიცინო დახმარება სჭირდება.

ჯიბიდან გადახდების წილი საქართველოში აღემატება ჯანმოს ევროპული რეგიონის ქვეყნების საშუალო მაჩვენებელს. ფინანსური შეჭირვების ეს მაჩვენებელი ერთ-ერთი უმაღლესია ჯანმოს ევროპის რეგიონის მასშტაბით.

ანგარიშში წერია, რომ ფინანსური სიდუხჭირის მთავარი მიზეზი ამბულატორიული მედიკამენტებია (69%), რაც განპირობებულია საყოველთაო ჯანდაცვის პროგრამის შეზღუდული მოცვითა და მედიკამენტების მაღალი ფასებით.

ჯანმრთელობაზე ჯიბიდან კატასტროფული დანახარჯები უკიდურესად აწვება უღარიბეს ოჯახებს.

2018 წელს მედიკამენტების წილმა უღატაკეს ოჯახებში ჯიბიდან გადახდების 90% შეადგინა, ყველაზე შეძლებულ ოჯახებში კი – 24%.

“2013 წელს საყოველთაო ჯანდაცვის პროგრამის დანერგვის შედეგად გაიზარდა სახელმწიფოს მიერ დაფინანსებული მოცული მოსახლეობის წილი და შემცირდა ხელმისაწვდომობის ფინანსური ბარიერები. თუმცა, საქართველოში ჯანდაცვაზე საჯარო დანახარჯები (2,9%) ჯანმოს ევროპის რეგიონის ქვეყნებთან შედარებით (4,9%) დაბალია”, – წერია ანგარიშში.

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
კვლევებიმედიცინამსოფლიო

კვლევა – „ასტრაზენეკასა“ და „ფაიზერის“ ვაქცინების კომბინაცია კორონავირუსის მიმართ უკეთეს იმუნიტეტს წარმოქმნის

“ასტრაზენეკას“ ვაქცინის პირველი დოზის მიღებიდან 4 კვირის შემდეგ მეორე დოზის „ფაიზერ/ბიონტექის“ ვაქცინით აცრა უკეთეს იმუნურ პასუხს წარმოქმნის ვიდრე ორივე დოზის „ასტრაზენეკას“ ვაქცინით იმუნიზაციის შემთხვევაში წარმოიქმნება.

„ოქსფორდის უნივერსიტეტის“ მიერ ჩატარებულმა კვლევამ, რომელშიც 800-ზე მეტი ადამიანი მონაწილეობდა, აჩვენა, რომ „ასტრაზენეკასა“ და „ფაიზერის“ დოზების შერევა კორონავირუსის საწინააღმდეგო ანტისხეულების უფრო მეტ კონცენტრაციას წარმოქმნის. კერძოდ, „ასტრაზენეკას“ ვაქცინის შემდეგ „ფაიზერის“ გაკეთება  ანტისხეულების დაახლოებით ორჯერ უფრო მაღალ დონეს ქმნის, ვიდრე ორი დოზა „ფაიზერის“ მიღება. აღსანიშნავია, რომ ჯერ „ფაიზერის“ და შემდეგ „ასტრაზენეკას“ გაკეთება ასეთი ეფექტური არ აღმოჩნდა.

მეცნიერები აცხადებენ, რომ აღნიშნული საკითხი შემდგომ კვლევას საჭიროებს. მათი განმარტებით, დასკვნებმა, შესაძლოა, ხელი შეუწყონ ვაქცინების უფრო მოქნილ გამოყენებას, მაგრამ ჩატარებული კვლევა საკმარისი არ არის იმისთვის, რომ ვაქცინაციის კლინიკურად დამტკიცებული გრაფიკიდან გადახვევის რეკომენდაცია გაიცეს.

წყარო : Reuters

მასალა მოამზადა : თამარ ტაბატაძემ

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
1 37 38 39 40 41 90
Page 39 of 90