მეცნიერები – წყლის სათანადო რაოდენობით მიღება ადამიანის ფიზიკურ ჯანმრთელობაზე მნიშვნელოვან გავლენას ახდენს  

შეერთებული შტატების ჯანდაცვის ეროვნული ინსტიტუტის კვლევის თანახმად, საკმარისი წყლის მიღება დაკავშირებულია ქრონიკული დაავადებების განვითარების, ნაადრევი სიკვდილის ან ბიოლოგიური დაბერების მნიშვნელოვნად დაბალ რისკთან.
„კვლევის შედეგები იძლევა იმის ვარაუდის საფუძველს, რომ სათანადო ჰიდრატაციამ შეიძლება შეანელოს დაბერება და გაახანგრძლივოს  სიცოცხლე”, – განაცხადა კვლევის ერთ-ერთმა ავტორმა, გულ-სისხლძარღვთა რეგენერაციული მედიცინის ლაბორატორიის მკვლევარმა ნატალია დმიტრიევამ.
კვლევაში აღნიშნულია, რომ იმის ცოდნა, თუ რა პრევენციულმა ზომებმა შეიძლება შეანელოს დაბერების პროცესი, პრევენციული მედიცინის მთავარი გამოწვევა.
„ეს იმიტომ ხდება, რომ ასაკზე დამოკიდებული ქრონიკული დაავადებების ეპიდემია გაჩნდება, რადგან მსოფლიოს მოსახლეობა სწრაფად ბერდება და ჯანსაღი სიცოცხლის ხანგრძლივობის გაზრდა ხელს შეუწყობს ცხოვრების ხარისხის გაუმჯობესებას და ჯანდაცვის ხარჯების შემცირებას უფრო მეტად, ვიდრე მხოლოდ დაავადებების მკურნალობას შეუძლია”, – აცხადებენ კვლევის ავტორები.
ავტორები მანამდე თაგვებზე ჩატარებული მსგავსი კვლევების საფუძველზე ფიქრობდნენ, რომ ოპტიმალურმა ჰიდრატაციამ, შესაძლოა, დაბერების პროცესი შეაჩეროს. აღნიშნულ კვლევებში წყლის მთელი სიცოცხლის მანძილზე შეზღუდვამ თაგვებში ყოველ ლიტრზე შრატში ნატრიუმი 5 მილიმოლით გაზარდა და მათი სიცოცხლის ხანგრძლივობა 6 თვით შეამცირა, რაც ადამიანის სიცოცხლის დაახლოებით 15 წლის ეკვივალენტია. ახალი კვლევის მიხედვით, ნატრიუმი შეიძლება გაიზომოს სისხლის შრატში და იზრდება, როცა ნაკლებ სითხეს ვსვამთ.
კვლევის ავტორთა ინფორმაციით, წყლის ყოველდღიური მოხმარებასთან დაკავშირებულ რეკომენდაციებს მსოფლიოში ადამიანთა დაახლოებით ნახევარი არ აკმაყოფილებს.
“გლობალურ დონეზე, ამან შეიძლება დიდი გავლენა მოახდინოს. სხეულში წყლის შემცველობის დაქვეითება არის ყველაზე გავრცელებული ფაქტორი, რომელიც ზრდის შრატში ნატრიუმს. ამის გამო, კვლევის შედეგები იძლევა იმის ვარაუდის საფუძველს, რომ სათანადო ჰიდრატაციამ შეიძლება ადამიანის დაბერების პროცესი შეანელოს და თავიდან ააცილოს ქრონიკული დაავადება”, – აღნიშნულია კვლევაში.
ჩვენს შრატში ნატრიუმის დონეებზე გავლენას ახდენს როგორც წყლის, ასევე სხვა სითხის, ხილისა და ბოსტნეულის მაღალი შემცველობის მქონე სითხის მიღებაც.
კვლევა სამეცნიერო ჟურნალ  eBioMedicine-ში გამოქვეყნდა.

წყარო : CNN

გაზიარება:

0