18 წლის ნიკი ბრეგვაძე გლობალური ინოვაციების კონკურსის GIST-Net-ის ნახევარფინალისტია და ამჟამად გამარჯვებისთვის იბრძვის, რადგან კონკურსში 80-ზე მეტი ქვეყანა მონაწილეობს, 10 ფინალისტი კი ხმათა უმრავლესობით გამოვლინდება. ნიკი თავად გვიამბობს კონკურსისა და საკუთარი სტარტაპისა შესახებ, რომელშიც მისი წარმატება თითოეული ჩვენგანის აქტიურ მხარდაჭერაზეა დამოკიდებული.
-ნიკი, კონკრეტულად რაში მდგომარეობს შენი სტარტაპიდეა, რომელმაც ეს წარმატება მოგიტანა?
-ჩემი სტარტაპი ქმნის ინოვაციურ ვებპლატფორმას, რომელიც მაისის თვიდან ამუშავდება და დაბალკლასელ სკოლის მოსწავლეებს ელექტრონული განათლების ძალიან კარგ და სასარგებლო სერვისებს შესთავაზებს. აღნიშნული პროექტის შესახებ „მისო კრისტალისგან“ შევიტყვე, ცოტა სასაცილოა, მაგრამ GIST-ის ვებგვერდზე დარეგისტრირებისას ჯერ კიდევ 17 წლის ვიყავი და რადგანაც რეგისტრაციისთვის სრულწლოვანება იყო საჭირო, საიტის სარეგისტრაციო ფორმაში მომიწია დაბადების წლის HTML list-ის კოდის ხელით შესწორება, ვიდეოში კი, მოკლედ აღვწერე ჩემი სტარტაპი, რომელმაც ეს ეტაპი წარმატებით გადალახა.
-რამდენადაც ვიცი, აქამდეც აქტურად მუშაობდი გარკვეულ პროექტებზე, გვიამბე საკუთარი გამოცდილების შესახებ.
-მიუხედავად იმისა, რომ მე-12 კლასში ვარ, ჩემი საქმიანობა მოიცავს ტექნოლოგიურ და საფინანსო საკითხებს, რომელშიც უკვე საკმაოდ დიდი ცოდნა და გამოცდილება მაქვს დაგროვებული. თვითნასწავლი ვარ პროგრამირებაში, ბიზნესსა (ბუღალტერიაში, რისკების მართვაში და ა.შ) თუ ისეთ მეცნიერებებში, როგორიცაა, მაგალითად – ფსიქოლოგია და კომპიუტერული მეცნიერება.
2016 წლის გაზაფხულიდან 4-6 თვე ვმუშაობდი პროექტზე, რომლითაც „FinTech-სტარტაპის“ შექმნის მცდელობა მქონდა, თუმცა ეს პროექტი მზად არ აღმოჩნდა დაფინანსების ეტაპების წარმატებით გასავლელად, მსგავსი, ოღონდ უფრო პატარა წამოწყებები 2015 და 2014 წლებშიც მქონდა, თუმცა ბოლო პროექტი ყველაზე წარმატებული აღმოჩნდა.
-კონკურსი ჯერჯერობით აქტიურ რეჟიმშია, გვიამბე სამომავლო პერსპექტივებისა და შენი პირადი გეგმების შესახებ.
-პირადად ჩემს სამომავლო გეგმებს რაც შეეხება, სექტემბრიდან სწავლის გაგრძელებას ამერიკის შეერთებულ შტატებში, კომპიუტერული მეცნიერების მიმართულებით ვაპირებ, აპლიკაციები ნიუ-იორკისა და პენსილვანიის 10 უნივერსიტეტში მაქვს გაგზავნილი. მინდა აღვნიშნო, რომ ჩემი სტარტაპი იდეის ეტაპში აღარ იმყოფება და უკვე სერიოზულ განვითარების ნაბიჯებს დგამს. კონკურსის გამარჯვებით საშუალება მომეცემა დამატებითი ფინანსური სახსრები მოვიპოვო სტამბულში, ფართო აუდიტორიის წინაშე ჩემი სტარტაპის წარსადგენად, ამისათვის კი საჭიროა რაც შეიძლება მეტი მხარდამჭერი, რომელიც კონკურსის ოფიციალურ საიტზე 24-საათში ერთხელ მომცემს ხმას, ხმის მიცემა 22 თებერვლამდე გაგრძელდება.
მასალა მოამზადა: თამარ დევდარიანმა
ახალგაზრდა ანალიტიკოსთა და მეცნიერთა დარბაზი ,,დოქტრინა“
0
