კატეგორიის გარეშე

რეზო გაბრიაძის მოთხრობების მიხედვით შექმნილი მულტფილმი „ჰარი-ჰარალე, დედაო!“, „ოსკარის“ ნომინანტებს შორის, საუკეთესო სრულმეტრაჟიანი მულტფილმების კატეგორიის ე.წ. ლონგლისტში მოხვდა. ამ სიაში ახლა 32 სრულმეტრაჟიანი მულტფილმია, „შორთლისტი“ კი 2020 წლის 13 იანვარს გამოქვეყნდება.

დიმიტრი ცინცაძის ფილმმა „შინდისი“ ვარშავის საერთაშორისო კინო ფესტივალის გრანპრი მოიგო. საქართველოს ეროვნული კინო ცენტრის ინფორმაციით , ჯილდო გადაეცა სურათის რეჟისორსაც.

ახალგაზრდა ანალიტიკოსთა და მეცნიერთა დარბაზი ,,დოქტრინა”

პროფესორი ანა დოლიძე თანამოაზრეებთან ერთად იწყებს სახალხო კამპანიას აზარტული თამაშების წინააღმდეგ – „დაიცავი შენი შვილი“.

ანა დოლიძემ დღეს ამ თემაზე ბრიფინგი გამართა და მოუწოდა საქართველოს პარლამენტს, დაიწყოს საჯარო დისკუსია აღნიშნული პრობლემის დასაძლევად.

„შევიკრიბეთ ადამიანები და ორგანიზაციები, ვისაც ძალიან გვადარდებს და ვისაც, ბევრი რამ გაუკეთებია ამ თემასთან დაკავშირებით. ვაერთიანებთ ძალას აზარტული თამაშების წინააღმდეგ საბრძოლველად და ვაცხადებთ კამპანიას. ვიცი, რომ ძალიან ბევრი ადამიანია საქართველოში, ვისაც ეს საკითხი აწუხებს და მოვუწოდებთ მათ, შემოგვიერთდნენ.

მივმართავთ, საქართველოს პარლამენტს, ჯანდაცვის კომიტეტს, განათლების კომიტეტს, სპორტისა და ახალგაზრდობის კომიტეტს, მოაწყოს საერთო სპეციალური სხდომა, მოსმენა აზარტულ თამაშებთან დაკავშირებით, სადაც გვექნება საშუალება, მოვისმინოთ ჩვენი ხელისუფლების პოზიცია, აპირებს თუ არა ის საერთოდ რაიმე ნაბიჯები გადადგას აზარტულ თამაშებთან საბრძოლველად“, – აცხადებს ანა დოლიძე.

კამპანაის შეუერთდა „ჯანმრთელობის ხელშეწყობისა და განათლების ფონდის“ წარმომადგენელი გიორგი ბახტურიძე. მისი თქმით, პრობლემის აღმოსაფხვრელად აუცილებელია, რამდენიმე ნაბიჯის გადადგმა.

„გვაქვს კონკრეტული მოთხოვნები: ეს არის რეკლამის, პოპულარიზაციის და სპონსორობის სრული აკრძალვა, ასევე ონლაინ თამაშების ჩახსნა, ასაკის გაზრდა მინიმუმ 25 წლამდე და მომდევნო ეტაპზე ამ ბიზნესის გადატანა, მაქსიმუმ ორ რეგიონში“, – აცხადებს გიორგი ბახტურიძე.

დღეისთვის კამპანიას წარმოადგენენ:

1. ანა დოლიძე;
2. „აზარტული თამაშების კვლევის და ლუდომანიის პრევენციის ცენტრი“ – გუგა ბესელია;
3. „ჯანმრთელობის ხელშეწყობისა და განათლების ფონდი“ – გიორგი ბახტურიძე;
4. „დედები აზარტული თამაშების წინააღმდეგ“ – თამარ ჯაფარიძე;
5. „ახალგაზრდები აზარტული თამაშების წინააღმდეგ“ – კოტე ერისთავი;
6. ლაშა გორგაძე;
7. თბილისის სახელმწიფო უნივერსიტეტის პროფესორი – გოგი ყიფიანი;
8. ილია ჩხეიძე.

ისინი მოუწოდებენ საზოგადოებას, გაერთიანდნენ მათ კამპანიაში.

ახალგაზრდა ანალიტიკოსთა და მეცნიერთა დარბაზი ,,დოქტრინა”

ჯანო ძირკვაძე 21 წლისაა. მას უიშვიათესი გენეტიკური დაავადება – ვოლფრამის სინდრომი აქვს. გარკვეულ ასაკში ამ სინდრომის მქონე პაციენტებს უვითარდებათ უშაქრო დიაბეტი, მხედველობის დაქვეითება, ნეიროსენსორული სიყრუე და სხვ.

ჯანო ექვსი წლიდან ქმნიდა მაკეტებს. უკვე სამი წელია მხედველობის სერიოზული პრობლემები შეექმნა და მხოლოდ სინათლის შუქს ხედავს. ამის მიუხედავად მაკეტების შექმნა არ შეუწყვეტია. თითოეულ დეტალს, მონაკვეთს ხელით შეიგრძნობს, ზომავს და ასე ქმნის საოცარ ნამუშევრებს.

– დავიბადე ასპინძის რაიონში, სოფელ რუსთავში. ამჟამად ქალაქ რუსთავში ვცხოვრობ მამიდასთან. 21 წლის ვარ. ახლახან დავამთავრე საქართველოს ბიზნეს–აკადემია, სადაც შევისწავლე საოფისე საქმეები. ექვსი წლის ვიყავი, როცა მაკეტების კეთება დავიწყე. სწორედ ამ ასაკში გამიჩნდა შაქრიანი დიაბეტი. შვიდი წლის შემდეგ ამას უშაქრო დიაბეტიც დაემატა. უკვე 15 წელია, რაც ორივე სახის დიაბეტი მაქვს. მხედველობაზე თავიდანვე მქონდა პრობლემა, ბოლო 3-4 წელია პრობლემები გართულდა და ახლა მხოლოდ სინათლის შუქს ვხედავ.

– ამის მიუხედავად აგრძელებთ მაკეტების შექმნას. არ გიჭირთ?

– არა. მაკეტები თაბახის და მუყაოს ქაღალდით იქმნება. ხელით ვიღებ ზომებს, ხელით შევიგრძნობ ფორმებს. მილიმეტრებში ვაკეთებ ყველა ნამუშევარს. ერთი სანტიმეტრიც რომ შემეშალოს, ნამუშევარი ფორმას კარგავს და ის ელფერი აღარ აქვს. შეცდომა მაშინვე შესამჩნევი ხდება. ამიტომ ყველაფერი მილიმეტრებში უნდა გამოვიანგარიშო. შემდეგ ყველა დეტალს ვაკეთებ ხელის შეგრძნებით.

– ფერებს როგორ არჩევთ?

– ფერების ყუთები მაქვს დანიშნული. ხელის შეხებით ვხვდები, რომელ ქილაში რა ფერია. ვიღებ და შემდეგ სურვილისებრ ვანაწილებ ნამუშევარზე.

– გახსოვთ თქვენი პირველი ნამუშევარი?

– ჩემი პირველი ნამუშევარი იყო სამების ტაძარი. დღესაც ვინახავ ამ ნამუშევარს. მის შესაქმნელად გამოვიყენე მუყაოს ქაღალდი, ქვიშა, გირჩი. ძალიან მომეწონა და იმ დღის შემდეგ აღარ გავჩერებულვარ. თავისუფალ დროს ყოველთვის მაკეტების შექმნას ვუთმობ.

– პროფესიონალურ დონეზეც შეისწავლეთ თუ თვითნასწავლი ხართ?

– არსად არ მივლია, ყველაფერი ჩემით ვისწავლე. ვცდილობ დროდადრო შედეგი გავაუმჯობესო.

– არასოდეს გიფიქრიათ, რომ ეს ყველაფერი შემოსავლის წყაროდ გექციათ?

– არასდროს მიცდია გაყიდვა. იმდენად დიდ შრომას ვდებ, იმხელა ენერგია სჭირდება, რომ მენანება გაყიდვა. მგონია, რომ ვერც ერთ მათგანს ვერ შეველევი, ყველა ნამუშევარი ერთნაირად მიყვარს.

– გამოფენებში იღებთ მონაწილეობას?

– დიაბეტის ცენტრში და საქართველოს ბიზნესის აკადემიაში მქონდა გამოფენა. ჯერჯერობით მხოლოდ ეს ორი გამოფენა მქონდა.

– ვოლფრამის სინდრომი გაქვთ, რაც იშვიათი დაავადება. როგორ უმკლავდებით და ძირითადად რა პრობლემებს აწყდებით ხოლმე საზოგადოებაში?

– ვოლფრამის სინდრომი იშვიათი გენეტიკური დაავადებაა. დღეს საქართველოში დაახლოებით 19 ადამიანი ვართ ამ სინდრომით დაავადებული. ჯანმრთელობის პრობლემებზე აღარ ვისაუბრებ, იმ პრობლემაზე მოგიყვებით, რასაც დღეს ცხოვრებაში ვაწყდები. დაახლოებით ოთხი წელია ვცდილობ ეროვნული გამოცდების ჩაბარებას. ყოველ წელს თითო ქულა მაკლდება. გაუმართავი ხმოვანი პროგრამაა, რის გამოც ყოველ ჯერზე მაკლდება ქულა. წელსაც ვცადე ჩაბარება, მაგრამ წელსაც დამაკლდა. სულ ვთხოვ სამინისტროს, ვწერ განცხადებებს, რომ დამეხმარონ, მაგრამ არანაირი ხელშეწყობა და დახმარება არ ყოფილა. არადა ძალიან მინდა სწავლა.

– დასაქმებული თუ ხართ?

– სამწუხაროდ, არა. დიდი ხანია სამსახურს ვეძებ. საქართველოს ბიზნეს–აკადემიაში, რომელიც რამდენიმე კვირის წინ დავამთავრე, მპირდებიან დასაქმებას და უახლოეს დღეებში ველოდები ზარს. იმედია, ყველაფერი კარგად დამთავრდება.

– სამომავლოდ რა გეგმები გაქვთ?

– ჩემ სამომავლო გეგმებში პირველ რიგში სწავლა შედის. როგორც გითხარით, ძალიან მინდა უმაღლესში ჩაბარება. ასევე აქტიურად გავაგრძელებ მაკეტების შემქმნას და ვეცდები უფრო და უფრო დავხვეწო ნამუშევრები.

წყარო : sputnik

ახალგაზრდა ანალიტიკოსთა და მეცნიერთა დარბაზი ,,დოქტრინა”

ქართველი მოდელი, ლიკა რიგვავა მექსიკური ელის ოქტომბრის ნომრის ედითორიალში მოხვდა, რომლისთვისაც მან გუჩის კრუიზ 2020 კოლექციის სამოსი მოირგო. ლიკა გუჩის 2020 წლის კრუიზ ჩვენებაშიც მონაწილეობდა, ხოლო ამ სეზონზე იგი კვლავ ვიხილეთ გუჩის პოდიუმზე მილანის მოდის კვირეულის ფარგლებში. ლიკას პარიზში სააგენტო “კარინ მოდელს”, მილანში – “NOLOGO Mgmt”, ხოლო საქართველოში “ლუქმოდელსი” წარადგენს.

ფოტოგრაფი: Izack Morales
სტილისტი: Raúl Alvarez
მაკიაჟის არტისტები: Claire Urquhart, Elaine Lynskey
თმის სტილისტი: Michael Thomas Lollo

ლიკა რიგვავა გუჩის 2020 წლის გაზაფხული/ზახფული ჩვენებაზე

ზოგი ადამიანისთვის ფრენა სასიამოვნო და საყვარელი პროცესია, ზოგიერთისთვის კი ის სტრესისა და შფოთვის წყაროა. კარგი ამბავი ისაა, რომ შიშების უმეტესობის განეიტრალება მარტივად შეიძლება. ამისთვის ისიც საკმარისია, რომ აქ ჩამოთვლილ ფაქტებს გაეცნოთ.

1. ფრენა მასობრივი გადაადგილების ყველაზე უსაფრთხო საშუალებაა

შეიძლება თქვენთვის ერთხელ მაინც უთქვამთ, რომ ბევრად მეტი შანსია, ავტოსაგზაო შემთხვევაში დაიღუპოთ, ვიდრე ფრენისას. ეს სიმართლეა. ჰარვარდის უნივერსიტეტის რისკების კომუნიკაციის ინსტრუქტორის, დეივიდ როპეიკის თქმით, ავტოსაგზაო შემთხვევაში თქვენი დაღუპვის შანსი დაახლოებით 5 000-ში 1-ია. ავიაკატასტროფაში დაღუპვის შანსი კი 11 მილიონში ერთი.

ავიაკატასტროფებზე მეტად სადარდებელი ჭექა-ქუხილია. თქვენი ცხოვრების განმავლობაში შანსი, რომ მეხი დაგეცეთ, დაახლოებით 13 000-ში ერთია.

2. თვითმფრინავები ექსპლუატაციაში ჩაშვებამდე ინტენსიურ ტესტირებას გადიან

სანამ თვითმფრინავი ავიაკომპანიას გადაეცემა, ის ხანგრძლივ ტესტირებას გადის, რომელიც რამდენიმე სხვადასხვა ეტაპადაა დაყოფილი.

ტესტირებისას მოწმდება თუ რამდენად დრეკადია თვითმფრინავის ფრთები. გამოცდისას ზოგჯერ ფრთებს 90-გრადუსიანი კუთხითაც ღუნავენ. ფრთების ამჟამად მოღუნვისთვის იმაზე ბევრად მეტი ენერგიაა საჭირო, ვიდრე ნებისმიერ თვითმფრინავს ფრენისას ოდესმე განუცდია. ცდებისას ასევე მოწმდება რამდენად უძლებს ძრავი მასში რაიმე ფრინველის მოხვედრას. ასევე მოწმდება მუხრუჭები და ყველა ის სისტემა, რომელიც თვითმფრინავის გამართულად მუშაობისთვისაა საჭირო.

3. თვითმფრინავებს ერთი ძრავით ფრენა შეუძლიათ, დაჯდომა კი ორივე ძრავის გარეშეც შესაძლებელია

ყველა კომერციული თვითმფრინავი გარკვეულ სტანდარტებს უნდა აკმაყოფილებდეს, ერთ-ერთი ასეთი სტანდარტი კი ერთი ძრავით ფრენაა. თუმცა რა ხდება იმ შემთხვევაში, თუ მწყობრიდან ორივე ძრავი გამოვა?

თვითმფრინავებს სიმაღლიდან კონტროლირებული დაშვება ორივე ძრავის მწყობრიდან გამოსვლის შემთხვევაშიც შეუძლია. რა თქმა უნდა, მანძილი, რომლის დაფარვაც თვითმფრინავს ძრავების გარეშე შეუძლია, მის სიმაღლესა და სიჩქარეზეა დამოკიდებული. თუმცა ეს მანძილი თითქმის ყოველთვის საკმარისია იმისთვის, რომ თვითმფრინავი ახლომდებარე აეროპორტში დაეშვას.

4. ტურბულენტობა საშიში არ არის

ტურბულენტობა არა უსაფრთხოების, არამედ კომფორტის საკითხია. ის უსიამოვნოა, თუმცა ის თვითმფრინავს საფრთხეს ვერ უქმნის, რადგან თვითმფრინავის დიზაინი და სტრუქტურა ამისთვის წინასწარაა გათვლილი.

აღსანიშნავია, რომ ტურბულენტობის შესახებ პილოტებმა წინასწარ თითქმის ყოველთვის იციან. განსაკუთრებით ექსტრემალური შემთხვევების დროს კი მათ ყოველთვის შეუძლიათ, რომ ტურბულენტურ ზონას გვერდი აუარონ.

5. ამინდი დაბრკოლებას არ წარმოადგენს

ყველა თანამედროვე თვითმფრინავს წვიმაში, ქარში და ჭექა-ქუხილშიც კი, ფრენა უსაფრთხოდ შეუძლია. პრობლემას არც ნისლი წარმოადგენს, თვითმფრინავს ავტომატური სისტემების წყალობით აეროპორტში დაჯდომა მაშინაც კი შეუძლია, როდესაც ხილვადობა ნულია.

ახალგაზრდა ანალიტიკოსთა და მეცნიერთა დარბაზი – ,,დოქტრინა”

ებრაელმა მეცნიერებმა 70,000 წლის წინ გარდაცვლილი დენისოვანი გოგონას ძვალში აღმოჩენილი დნმ-ის საშუალებით პრეისტორიული ადამიანის რეკონსტრუქცია განახორციელეს.

გოგონა დიდი ხნის წინ გადაშენებული დენისოვანების წარმომადგენელი იყო, რომლებიც ნეანდერტალებისა და თანამედროვე ადამიანის უძველესი ნათესავები არიან.

„ეს არის პირველი შემთხვევა, როცა დეტალური ანატომიური რეკონსტრუქცია განვახორციელეთ და ვნახეთ, როგორ გამოიყურებოდნენ ეს ადამიანები,“ – განაცხადა გენეტიკის პროფესორმა ლირან კარმელმა.

რეკონსტრუქციის შედეგად მეცნიერებმა „მიიღეს“ დენისოვანი, რომელიც ერთი შეხედვით თანამედროვე ადამიანს ძალიან ჰგავს, თუმცა ახლოდან დაკვირვების შემდეგ მათ შორის აშკარა განსხვავებებს აღმოაჩენთ.

რეკონსტრუქტირებული ჰუმანოიდი ირიბი შუბლით, გრძელი სახითა და დიდი მენჯის ძვლით ნეანდერტალებს ჰგავს, თუმცა დენისოვანები ფართო თავის ქალითა და დიდი დენტალური თაღით გამოირჩევიან. დნმ-დან მიღებული მონაცემების თანახმად, დენისოვანებს მუქი კანი, თვალები და თმა ჰქონდათ.

დაახლოებით 70,000 წლის წინ გარდაცვლილი გოგონას სამი კბილი, ძვალი და ქვედა ყბა ციმბირში მდებარე ერთ-ერთ გამოქვაბულში 2008 წელს აღმოაჩინეს.

წყარო : Reuters

მასალა მოამზადა :თამარ ტაბატაძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

ვროპის ბაზარზე წითელი ბანანი გამოჩნდა.  პროდუქტს ეკვადორში, კომპანია „Freskita Bananas“ აწარმოებს.

წითელი ბანანი ტროპიკული ხილის ოჯახს მიეკუთვნება, თუმცა ტრადიციული ბანანისგან მკვეთრად განსხვავდება. კერძოდ, ეს არის ფერი, პატარა ზომა, უფრო ტკბილი გემო, ბევრად მეტი A ვიტამინის შემცველობა.  ბანანის ეს სახეობა ეკვადორში საკმაოდ შეზღუდული რაოდენობითაა, ამიტომ მისი მთლიანი მოცულობა ექსპორტზე გადის.

„Freskita Bananas“–კომპანიამ იცის, თუ რა მოთხოვნები და საჭიროებებია ბაზარზე ამიტომ ცდილობენ, რომ რაც შეიძლება ფართო ასორტიმენტი შესთავაზონ მომხმარებელს. მართალია, ბანანის დიდი მოცულობა არ იწარმოება, მაგრამ მათთვის მთავარი ხარისხია. ყოველი ახალი პროდუქტის უკან დგას გუნდი, რომელიც იღებს პასუხისმგებლობას მის ხარისხსა და მიწოდების უზრუნველყოფაზე.

წყარო : Inc.com

მასალა მოამზადა : ლაშა ჯინჭარაძემ 

ახალგაზრდა ანალიტიკოსთა და მეცნიერთა დარბაზი – ,,დოქტრინა”

“შინდისის გმირების” პრო­ექ­ტის ავ­ტო­რი და ფილმის პრო­დი­უ­სე­რი ედმონდ აბაშიძე-მინაშვილი გია ყანჩელის გარდაცვალებას ეხმიანება და მასთან შეხვედრას იხსენებს.

როგორც რეჟისორი წერს, მან ლეგენდარულ კომპოზიტორს “შინდისის გმირების” მუსიკალური გაფორმება სთხოვა, რაც გია ყანჩელმა სრულიად უანგრაროდ გააკეთა.

“როდესაც ბატონ გია ყანჩელს სრულმეტრაჟიანი დოკუმენტური ფილმის “შინდისის გმირების” მუსიკალურად გაფორმება ვთხოვე, მიპასუხა, – მაჩვენე ფილმის შავი მონტაჟი, თუ ჩემი თავი დავინახე, აბსოლუტურად უანგაროდ ვიმუშავებ და თუ ვერ დავინახე საკუთარი თავი, მილიონი რომ გადამიხადო, ვერ გავაკეთებო!

მეორე დღესვე დავუტოვე ფილმი. იმავე ღამეს, გვიან მირეკავს. მცირე პაუზის შემდეგ, მხოლოდ ერთ წინადადებას მეუბნება: ხვალ დილით, 11 საათზე გელოდები, ჩემთან სახლში.

მეორე დღესვე დავიწყეთ მუშაობა. “შინდისის გმირების” პირველ ნაწილს, ლეგენდარული გია ყანჩელის მუსიკა ამდიდრებს!

მაესტრო, დიდი მადლობა ყველაფრისთვის, მშვიდად განისვენეთ!” – წერს რეჟისორი.

ახალგაზრდა ანალიტიკოსთა და მეცნიერთა დარბაზი – ,,დოქტრინა”