თეონა კბილაშვილის გზა ამერიკული მოდის სამყაროში კიდევ ერთი მაგალითია, იმისა თუ როგორ შეუძლია საკუთარი საქმისადმი სიყვარულს ერთი შეხედვით დაუჯერებელ წარმატებას მიგაღწევინოს. ძლიერი, გულწრფელი და შთამაგონებელი ამბავი ახალგაზრდა ქართველ გოგონაზე, რომელიც ბავშვობაში, ოჯახის ემიგრაციის შემდეგ, სრულიად ახალ რეალობაში აღმოჩნდა და უცხო კულტურაში საკუთარი თავი თავიდან აღმოაჩინა. მოდის სფეროში შემთხვევით მოხვედრილი, შრომითა და რწმენით გახდა წარმატებული პროფესიონალი, რომელიც დღეს საქართველოს სახელს აშშ-ს გარდა, მსოფლიოს კიდევ არაერთ ქვეყანაში ასახელებს.
– თეონა, სანამ უშუალოდ თქვენს წარმატებულ კარიერაზე გადავალთ, მოგვიყევით, როგორ დაიწყო თქვენი პროფესიული გზა მოდის ინდუსტრიაში?
– ჩემი გზა მოდის სამყაროში არც დაგეგმილი იყო და არც მარტივი. აშშ-ში უნივერსიტეტში სწავლის დაწყების შემდეგ, მივიღე პირველი ფოტოსესიის შეთავაზება და ეს იყო ის მომენტი, რომელმაც ჩემი გული დაიპყრო. თავიდან უბრალოდ მაინტერესებდა, მაგრამ რაც უფრო მეტს ვაკეთებდი ამ სფეროში, მით უფრო ვხვდებოდი, რომ აქ იყო ჩემი ადგილი. ყველაფერს ნულიდან ვიწყებდი და ყველაფერი, რაც დღეს მაქვს, შრომით, მოთმინებითა თუ დაუღალავი სიყვარულით მოვიპოვე. ჩემი შემდეგი მიზანი ნიუ-იორკის მოდის კვირეულზე მოხვედრა გახდა და ამისთვის უამრავი სირთულე გავიარე. იყო ბევრი არა, ბევრი გაუგებრობა, მაგრამ არ დავნებდი, რადგან გულით ვიცოდი რომ ეს ჩემი გზა იყო. დღეს ვდგავარ იმ ადგილას, სადაც საკუთარი ძალით, გულწრფელი სიყვარულით და თავდადებით მოვედი, რითიც ყველაზე მეტად ამით ვამაყობ.
–მოგვიყევით, იმ კულტურული თუ სოციალური თავისებურებების შესახებ, რომლებთან ადაპტაციაც ჯერ კიდევ სკოლის მოსწავლეს მოგიწიათ.
-აშშ-ში ბავშვობის ასაკში ოჯახთან ერთად გრინ ქარდის მოგების შემდეგ ჩამოსვლა ჩემთვის ერთდროულად დიდი სიხარულიც იყო და გამოწვევაც. სრულიად ახალ გარემოში მოვხვდი.. სხვა ენა, სხვა კულტურა, სხვა წესები და ურთიერთობები. სკოლის დაწყების პირველივე დღეებიდან ბევრი სირთულე შემხვდა, ხშირად ჩემს სახელსაც ვერ წარმოთქვამდნენ სწორად, ვერ ვსაუბრობდი თავისუფლად, და ჩემს გრძნობებს ვერავის ვუზიარებდი. ეს ყველაფერი ჩემთვის ძალიან დამაბნეველი და ემოციური იყო, მაგრამ ამ სირთულეებმა მასწავლა, როგორ ვყოფილიყავი ძლიერი, დამოუკიდებელი და ამაყი საკუთარი თავით. ნელ-ნელა ვისწავლე ენა, დავუმეგობრდი ახალ გარემოს, და რაც მთავარია, ვიპოვე საკუთარი თავი. კულტურული განსხვავებებიც იგრძნობოდა განსაკუთრებით ადამიანებთან ურთიერთობაში და საკუთარ თავზე საუბრის თავისუფლებაში. ამერიკულმა სკოლამ მასწავლა, რომ განსხვავებულობა უნიკალურია და ხმამაღლა საუბარი საკუთარი სურვილებისა და მიზნების შესახებ სიძლიერეს უსვამს ხაზს.
– როგორ შეაფასებთ ამერიკულ მოდის ინდუსტრიაში მოხვედრის პროცესს? რა განასხვავებს ქართულ და ამერიკულ მოდის სამყაროს?
– რადგან საქართველოდან პატარა ასაკში წავედი, ქართულ მოდის ინდუსტრიასთან პროფესიული შეხება არ მქონია, ამიტომ პირდაპირი შედარება რთულია. თუმცა, ამერიკული მოდის ინდუსტრიაში მოხვედრა ძალიან კონკურენტულია, აქ წარმატებისთვის მხოლოდ გარეგნობა არ კმარა. საჭიროა გამორჩეული ხასიათი, შრომა და პროფესიონალიზმი. აშშ-ში სისტემა გაძლევს შესაძლებლობას თუ მზად ხარ, თუ ცდილობ, კარი ღიაა. მთავარია, მოემზადო და დაანახო შენი უნარები.
–გასულ წელს, პირველი ქართველი იყავით, რომელმაც Miss New York USA 2024-ში მიიღო მონაწილეობა, რამდენად რთული აღმოჩნდა მსგავსი დონის კონკურსში მონაწილეობა და რა იყო თქვენი ყველაზე დიდი მოტივატორი?
-მონაწილეობა Miss New York USA 2024-ში ჩემთვის უმნიშვნელოვანესი ეტაპი იყო როგორც პირველი ქართველისთვის, ეს სცენა დიდი პასუხისმგებლობაც იყო და დიდი ემოციური დატვირთვაც ჰქონდა. ეს გზა არ დაწყებულა ერთი დღით ადრე — წლების შრომის, მოლოდინის და საკუთარი თავის რწმენის შედეგად გადავედი შემდეგ ეტაპზე, დიდ სცენაზე სადაც უკვე გაცილებით მეტი იყო სათქმელი, ვიდრე უბრალოდ გამოსვლა. ჩემთვის ყველაზე დიდი მოტივაცია იყო, რომ უბრალოდ ვყოფილიყავი მე, გავცნობოდი ხალხს ჩემი მიზნებით და მომეყოლა ჩემი ისტორია. იმ ადამიანებისთვის მინდოდა მეჩვენებინა, ვინც წლების განმავლობაში მიყურებდა, რომ ყველაფერი შესაძლებელია. სცენაზე ყოფნა ჩემთვის იყო შესაძლებლობა, გავმხდარიყავი მაგალითი და იმედი მიმეცა მათთვის, ვინც ფიქრობს, რომ შანსები მხოლოდ სხვებს აქვთ. ყველაფერი შესაძლებელია, თუ არ ნებდები და ბოლომდე გჯერა შენი მიზნის.
– გარდა Miss New York USA-სა, საქართველოს სახელი სხვა არაერთ კონკურსსა თუ პროექტში გააჟღერეთ, მოგვიყევით თქვენი წარმატების ისტორიებზე.
– 2023 წელს დუბაიში გავხდი ტოპ მოდელის პირველი ჯილდოს მფლობელი, სადაც ასევე გადმომეცა დუბაის მოდის ამბასადორის სტატუსი. ამის შემდეგ მიწვეული ვიყავი იაპონიაში, ტოკიოში, სადაც მოდის ამბასადორის სტატუსით წარმომადგინეს. მონაწილეობა მივიღე მნიშვნელოვან ღონისძიებებში, გამოვავლინეთ შემდეგი გვირგვინის მფლობელი ტოკიოში და ჩავატარე მოდის მასტერკლასები იაპონელ ახალგაზრდა მოდელებთან. ასევე მიწვეული ვიყავი დომინიკის რესპუბლიკასა და პუერტო რიკოში, სადაც მივიღე მონაწილეობა სარეკლამო კამპანიებში, ჩემ შესახებ არაერთი ინტერვიუ გამოქვეყნდა ადგილობრივ გაზეთებშიც. დღეს კი ჩემთვის ერთ-ერთი ყველაზე ამაღელვებელი ეტაპია: ვატარებ ცენტრალური ნიუ-იორკის გვირგვინს და ვემზადები ამერიკის ტიტულისთვის ბრძოლისთვის – როგორც პირველი ქართველი ამერიკელი წარმომადგენელი. ეს პასუხისმგებლობა ჩემთვის მხოლოდ კარიერული არაა, ეს არის შესაძლებლობა, საქართველოს სახელი კიდევ უფრო შორს გავიტანო. ეს გზა სავსეა დაუღალავი შრომით, თუმცა თითოეულ ნაბიჯში, სადაც ჩემი ფესვები ჩანს, განსაკუთრებულ სიამაყეს და მოტივაციას ვგრძნობ.
– ადამიანი მსოფლიო მოდის ინდუსტრიაში, რომელიც განსაკუთრებულ შთაგაგონებთ არის…
– უდაოდ ნაომი კემპბელი, ის იყო ერთ-ერთი პირველი მოდელი, ვინც დაამსხვრია სილამაზის დამკვიდრებული სტანდარტები და გზა გაუხსნა ახალ თაობას. თავისი გამორჩეული სიძლიერით, ელეგანტურობითა და მუდმივი პროფესიონალიზმით მან არა მხოლოდ კარიერა ააწყო, არამედ ინდუსტრიაც შეცვალა. ნაომის გავლენა მოდის სამყაროზე სცილდება გლამურს, ის არის ნამდვილი მაგალითი იმისა, თუ როგორ შეიძლება დაუღალავი შრომით, თავდაჯერებით და ინდივიდუალიზმით იქცე ლიდერად, რომელიც სხვებსაც შთააგონებს. მისი გზა ჩემთვის არის შეხსენება, რომ მოდელობა მხოლოდ გარეგნობაზე კი არა, ხასიათსა და გავლენაზეა.
–გაგვიზიარეთ ერთი პროფესიული ხრიკი, რომლის წყალობითაც თავს უფრო თავდაჯერებულად და ამაყად გრძნობთ უცხო ადამიანების გარემოცვაში თუ კამერების წინ.
-ერთი ხრიკი, რაც მეხმარება კამერის წინ პოზიორობაში ან ახალ ადამიანებთან ურთიერთობაში, არის ის, რომ ჩუმად ვეუბნები ჩემს თავს: “ეს ჩემი მომენტია. ” ეს მარტივი ფრაზა მაძლევს სიმშვიდეს და მახსენებს, რამდენად მომწონს ადამიანებთან კონტაქტი მათი ინდივიდუალობის გაცნობა, ღრმა საუბრები და საერთო ინტერესების აღმოჩენა. განსაკუთრებით ამ სფეროში, სადაც ბევრ უნიკალურ და შთამაგონებელ ადამიანს ვხვდები, ეს პროცესი ჩემთვის არა მხოლოდ პროფესიულია, არამედ გულწრფელად სასიამოვნოც.
–როგორც ვიცით, მოდელობის გარდა, ცოდნას სამედიცინო მიმართულებით ეუფლებით, როგორერწყმის ერთმანეთს თქვენს ცხოვრებაში ეს ორი რადიკალურად განსხვავებული სფერო?
-მართალია, მოდელობა და მედიცინა ორი სრულიად განსხვავებული სფეროა, მაგრამ ჩემთვის ისინი საინტერესო ბალანსს ქმნიან. მოდელობა მაძლევს თვითგამოხატვის თავისუფლებას და შემოქმედებით ენერგიას, ხოლო სამედიცინო განათლება სიღრმისეულ ცოდნას, დისციპლინასა და პასუხისმგებლობის განცდას. ამ ეტაპზე სწავლის პროცესში ვარ და ჯერ კონკრეტული მიმართულება არჩეული არ მაქვს, თუმცა უკვე ვგრძნობ, როგორ ავსებს ეს გამოცდილება ჩემს პიროვნებას და როგორ მაძლევს შესაძლებლობას, ვიყო მრავალმხრივი და ღირებულებებზე ორიენტირებული. საერთო კი ის არის, რომ ორივე სფერო თავის მხრივ საჭიროებს ადამიანებთან ემპათიურ ურთიერთობას, კომუნიკაციას და ზრუნვას.
–როგორ ხედავთ თქვენი მომავალი მოდის ინდუსტრიაში? რა გეგმები გაქვთ კარიერის განვითარების თვალსაზრისით?
– ჩემი მიზანია არა მხოლოდ საკუთარი კარიერა განვავითარო საერთაშორისო ასპარეზზე, არამედ საქართველოც დავაბრუნო დიდ მოდის სცენაზე. მინდა ჩემი წარმატება გახდეს გზა სხვა ახალგაზრდებისთვის, განსაკუთრებით საქართველოდან, ვინც ამ სფეროზე ოცნებობს. ვგეგმავ, გავაგრძელო მუშაობა საერთაშორისო პროექტებზე, ამასთანავე მსურს პლატფორმების შექმნა, სადაც ქართულ სახელს, ტალანტს და სილამაზეს მსოფლიომ კიდევ უფრო მეტად გაიცნობს.
–და ბოლოს, რა რჩევას მისცემდით ქართველახალგაზრდებს, რომლებიც მოდელობას ან სხვაშემოქმედებითი საქმიანობის დაწყებას საზღვარგარეთ გეგმავენ?
– ქართველ ახალგაზრდებს რომლებიც შემოქმედებით გზას ირჩევენ, მინდა ვუთხრა: პირველ რიგში, დაიჯერეთ საკუთარი თავის. ეს გზა სირთულეებით არის სავსე, მაგრამ როდესაც მართლა გიყვარს საქმე, შრომობ გულით და რჩები საკუთარ თავთან ერთგული შედეგიც აუცილებლად მოდის. არ შეეცადოთ ვინმეს დაემსგავსოთ, იყავით საკუთარი თავის საუკეთესო ვერსია. განსხვავებულობა თქვენი ძალაა, და როცა ამას გააცნობიერებთ ნაბიჯებსაც მეტი სიმამაცით გადადგამთ.
ანალიტიკოსთა და მეცნიერთა დარბაზი – ,,დოქტრინა”
0
