close

განათლება

AMGამოგონება - ინოვაციაანათლებაომუნიკაციააქართველოექნოლოგიები

გიორგი კონტუაძე – 28 წლის ლექტორი და ,,Giffer-ის” დამფუძნებელი

გიორგი კონტუიძე

28 წლის გიორგი კონტუაძე ციფრული მარკეტინგის სპეციალისტი და ბიზნესისა და ტექნოლოგიების უნივერსიტეტის მოწვეული ლექტორი გახლავთ, რომელიც ასევე  არის ერთ-ერთი წარმატებული ქართული ინოვატორული სტარტაპის – ,,Giffer-ის” დამფუძნებელი და სათავეში უდგას ციფრულ საკომუნიკაციო სააგენტო ,,Kraken-საც”. გავიცნოთ წარმატებული ქართველი ახალგაზრდა, რომელიც საკუთარ ისტორიას თავად გვიამბობს.

-ციფრული მარკეტინგი 21-ე საუკუნის განუყოფელ ნაწილად იქცა, თუმცა ყოველთვის უჭირთ ხოლმე მისი ზუსტი განმარტების შემოთავაზება, შენ, პირადად, როგორ აუხსნიდი მის მიზნებსა და დანიშნულებას მკითხველს?

რთულია, განსაზღვრო ის რაც დღევანდელ დღეს შეიძლება ყველაფერი იყოს, თუ გავითვალისწინებთ იმას თუ რა დოზით არის ტექნოლოგიები და ციფრული კომუნიკაცია ჩვენს ცხოვრებაში. ეს იმდენად სწრაფად განვითარებადი მიმართულებაა, რომ რთულია განისაზღვროს სად ვიქნებით ხვალ და რასთან ადაპტირება მოგვიწევს უახლოეს მომავალში, ტექნოლოგიები ხომ მუდმივად ვითარდება. ხშირად მითქვამს, რომ ხანდახან რთულია მიხვდე რომელია რეალური სამყარო, ის სადაც ვცხოვრობთ თუ მეორე, ჩვენი მოწყობილობების მიღმა არსებული, ალბათ უკვე მეორე, რადგან იქ გაცილებით მეტ დროს ვატარებთ. მეგობრები აღარ გვენატრებიან, რადგან უკვე ყოველდღიურად შეგვიძლია ვადევნოთ მათ თვალი. ეს ძალიან ვრცელი თემაა, საინტერესო და ამოუწურავი და მასზე საუბარიც ძალიან დიდხანს შეიძლება.

-საინტერესოა, როდის დაინტერესდი ციფრული მარკეტინგით და რა მიგაჩნია საქმიანობაში მთავარ ფაქტორად, რამაც შენი წარმატება განაპირობა?

– ამ მიმართულებით სტუდენტობის პერიოდში დავინტერესდი, პირველ კურსზე რომ ვიყავი, მუდმივად ვეცნობოდი მიმდინარე მოვლენებს და ვცდილობდი არასდროს ჩამოვრჩენილიყავი ციფრულ სამყაროში დანერგილ სიახლეებს. ჩემი მიზანი დღესაც უცვლელია, კომპანია რომელიც უკვე 60-ზე მეტ კომპანიას ემსახურება, სრულ სერვისს სთავაზობს ციფრული მარკეტინგის მიმართულებით. აქამდე მოსვლა კი შეუძლებელი იქნებოდა რომ არა დაუღალავი შრომა და მაქსიმალური აქცენტი მომსახურებაზე, რადგან საქართველოში კარგი და კომფორტული მომსახურების შეთავაზება არ არის მარტივი.

-სტარტაპი ,,Giffer-ი” უკვე ბევრისთვის კარგადაა ცნობილი, მოგვიყევი მისი შექმნის ისტორია და გზა, რომლის გავლაც დაგჭირდათ სანამ წარმატებას მიაღწევდით?

– მაშინ როდესაც კრაკენი მუშაობდა ერთ-ერთ პროექტზე და რიგითი შეკრება გვქონდა სადაც ვფიქრობდით სხვადასხვა იდეებზე, დაიბადა გიფერის იდეაც, რომ შეგვექმნა მოწყობილობა რომელიც იქნებოდა განსხავებული და ადამიანებისთვის დადებითი ემოციების მომგვრელი. მოგეხსენებათ ფოტოების ბეჭდვა უკვე დიდი ხანია ჩვენთან პოპულარულია ამიტომ გადავწყვიტეთ ყოფილიყო გიფი, განსხავებული, ახალი ხილი ჩვენი ხალხისთვის. საამაყოა ის ფაქტი რომ სამმა მეგობარმა, ფაქტობრივად ნულიდან, ჩვენივე ფინანსებით ავაწყეთ პირველი აპარატი, სტარტაპის წარმატება, ჩემი აზრით, დამოკიდებულია კარგ პროდუქტზე და იმ სტრატეგიაზე თუ როგორ გააკეთებ პროექტის პოზიციონირებას ბაზარზე. ჩვენს შემთხევაში, ეს იყო ,,თბილისი ოფენ ეარი”, სადაც უფასოდ დავდგით ,,გიფერი”, ამ სამი დღის შემდეგ კი – მისი ცნობადობა და პოპულარობა დღითი დღე იზრდებოდა, და იზრდება ახლაც, ,,გიფერი” უკვე 5 ქვეყანაში ოპერირებს.

როდესაც გჯერა იდეის, გარისკვას არ უნდა მოერიდო, როდესაც საწყის ეტაპზე ხარ, გაქვს ექსპერიმენტების შესაძლებლობა, გაქვს უფლება დაუშვა შეცდომები, რადგან სტარტაპი ხარ. მერე ამას არავინ გაპატიებს.

დღევანდელ დღეს უკვე ძალიან ბევრი პროექტი არსებობს რომელიც სტარტაპებს ეხმარება განვითარებაში და ეს მისასალმებელია, ჩვენ ყველაფერი ჩვენით გვქონდა მოძიებული, არ ყოფილა არანაირი ფინანსური ან მსგავსი ხელშეწყობა, მიუხედავად იმისა რომ ყველგან გვახსენებდნენ და გვპატიჟებდნენ როგორც ერთ-ერთ ყველაზე წარმატებულ სტარტაპს.

-რა მომსახურება გვთავაზობს თვითონ ,,Kraken-ი”? ასევე, საინტერესოა რატომ გადაწყვიტეთ სწორედ ასე დაგერქმიათ სახელი მისთვის?

-,,კრაკენი” საკომუნიკაციო სააგენტოა, რომელიც კომპანიებს ციფრული მარკეტინგის მიმართულებით აუთსორსულ მომსახურებას სთავაზობს. კრაკენი მითიური არსებაა, რომელსაც გაჭირვების დროს უხმობენ ხოლმე, ასე ვართ ჩვენც, კომპანიებს ვშველით, საცეცებით უამრავ საქმეს ვასრულებთ და თან ყოველთვის აქვთ ჩვენი იმედი. კომპანია მეხუთე წელია აქტიურად მოღვაწეობს საქართველოს ბაზარზე და საკმაოდ წარმატებულადაც, ის რომ უკვე 60 კომპანიაზე მეტი სარგებლობს ჩვენი მომსახურებით,  ნამდვილად ნიშნავს იმას, რომ გვენდობიან და ჩვენი ხარისიხი მათთვის მისაღებია, ჩვენ კი მუდმივად ვიზრდებით.

-პარალელურად ლექტორის საქმიანობასაც ითავსებ, როგორია ახალგაზრდა ასაკში ამ სტატუსის მორგება?

-22 წლის ვიყავი როცა ილიას უნივერსიტეტში მოწვეულ ლექტორად დავიწყე მუშაობა, ცოტა არ იყოს ამ დროს რთულია რადგან ასაკოობრივი განსხვავება არ არის, სტუდენტები თანატოლად აღგიქვამენ, თუმცა ჩემს ლექციებზე ყოველთვის კარგი დასწრება და დისციპლინა იყო, სტუდენტებთან დღემდე მეგობრული ურთიერთობა მაქვს, არასდროს არ მინდოდა სტანდარტული ლექტორი ვყოფილიყავი, ამიტომ სულ ვცდილობდი ლექციები სახალისო და მეგობრული მქონოდა.

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
ანათლებააქართველოიმია

90 წლის მეცნიერი და ქიმიის პედაგოგი 65 წლის სტაჟით

ვენერა ბებო

მე-11 კლასში ვიყავი, ვენერა ბებოსთან რომ მიმიყვანეს, ქიმიასთან დიდად ვერ ვმეგობრობდი და – იქნებ რამე ,,გეშველოსო”. მეგონა, ტიპური ქიმიკოსი დამხვდებოდა, მხოლოდ რეაქციები და ნივთიერებები რომ აინტერესებს – შევცდი. ვენერა მასწავლებელმა ქიმია შემაყვარა – ისე, რომ რეაქციების ამოხსნა ჩემი ჰობიც კი გახდა, მაგრამ ჩვენ, ქიმიის გარდა, ვსაუბრობდით ლიტერატურაზე, მედიცინაზე, მაძლევდა საუკეთესო რჩევებს და, თქვენ წარმოიდგინეთ, 4 საათი ისე გადიოდა, ვერც ვხვდებოდით. ვენერა ბებო მაშინ 84 წლის იყო, ახლა კი – მალე 91-ის გახდება.

რომ ვუთხარი, თქვენთან ინტერვიუ უნდა ჩავწერო-მეთქი, ,,აღშფოთდა”- მე რა ჩასაწერი ვარო. არადა, ნამდვილად სჭირდებათ ახალგაზრდებს ისეთი მოტივატორი, რომელიც 90 წლის ასაკშიც კი მზადაა, საკუთარი ცოდნა უანგაროდ გასცეს, მუდმივად ისწავლოს რაღაც ახალი და განვითარდეს.

-მოკლედ რომ გვიამბოთ თქვენ შესახებ.

-ვარ ვენერა ლაზარაშვილი-ნათიძე, 1927 წელს დავიბადე ბორჯომში. ბაღში, სკოლაში – ხშირად მაქებდნენ, 4 წლიდან  გამოვდიოდი სცენაზე. არასდროს არ მიყვარდა თავის გამოჩენა, მაგრამ ხშირად ხდებოდა, რომ მამჩნევდნენ, სკოლაში კლასკომის თავმჯდომარე, უნივერსიტეტში ჯგუფხელიც ვიყავი. სკოლაში ფრიადებზე ვსწავლობდი. მახსოვს, მასწავლებელმა ერთი სუსტი მოწაფეც კი მომაბარა, რომ მემეცადინებინა.

ეს იშვიათად ხდებოდა, მაგრამ უნივერსიტეტში პროტექციის გარეშე შევძელი, რომ დაუსწრებელიდან დასწრებულ სწავლებაზე გადავეყვანე. სასწავლებელში წლების განმავლობაში იყო ჩემი სურათი ფრიადოსნების დაფაზე გამოკრული.  პასუხისმგებლობის დიდი გრძნობა მქონდა. ტყუილი არასდროს არ შემეძლო და ვცდილობდი, ჩემი ყველა საქმე პატიოსნად შემესრულებინა.

-ქიმიისადმი ინტერესი როდის გაგიჩნდათ?

-თავდაპირველად, ვაბარებდი სამედიცინოზე, ომი იყო… პირველ წელს ვერ წამოვედი ბორჯომიდან, რადგან მამა ომში დაიჭრა.  1945-ში მოვემზადე და წამოვედი თბილისში. ქართულში 4-იანი მივიღე. მაშინ შენით კი არ უნდა მოგეფიქრებინა ტექსტი, არსებული ტექსტები უნდა დაგეზეპირებინა.მე დაზეპირება არასდროს არ მიყვარდა.  ჩემ წინ ვინც იჯდა, იმას თემა ვუკარნახე – 5-იანი აიღო და ფაკულტეტზეც მოხვდა. მათემატიკასა და რუსულში კი მქონდა 5-ები, მაგრამ ამ ოთხიანის გამო, ვერ მოვხვდი. შემდეგ 1-თვიანი მოსამზადებელი კურსები გავიარე, რათა სამედიცინოზე ჩამებარებინა პედიატრიის გახრით. მომდევნო ცდაზე ყველა საგანი ჩავაბარე, ქიმია მართლა კარგად დავწერე, იმდენად კარგად, რომ კომისიის თავმჯდომარეც შემოიყვანეს. მიუხედავად ამისა, 4 ქულა დამიწერეს. თავმჯდომარეს ვთხოვე, შემამოწმეთ-მეთქი, მითხრა – გეყოფაო. არ მეყო. იმავე ქულების მქონეები კი მოხვდნენ, როგორც შემდეგ განმიმარტეს – ისინი გვჭირდებოდა და იმიტომ მოხვდნენო.  შემდეგ, ბედია ალბათ ყველაფერი – ინდუსტრიალური ინსტუტიტის (ე.წ. გეპეი) სილიკატურ ფაკულტეტზე ჩავაბარე. იქაც ბევრი წვალება მომიწია, რთული იყო პროტექციის გარეშე. ასე მოვხვდი ამ სფეროში.

-როგორ გაგრძელდა თქვენი საქმიანობა უნივერსიტეტის შემდეგ?

-უნივერსიტეტის შემდეგ კათედრაზე დავიწყე მუშაობა. სტუდენტებთან ვმუშაობდი ლაბორატორიაში – ცდებს ვატარებდი. ერთი წლის შემდეგ, ჩემმა ერთ-ერთმა თანამშრომელმა შემომთავაზა მისაღები გამოცდებისთვის მემეცადინებინა ერთ-ერთი მოსწავლე. თავიდან უარზე ვიყავი, მითხრა – შეძლებო. მოვამზადე, ალღო ავუღე.  

45 სამეცნიერო შრომა მაქვს. რაც შეეხება აღმოჩენებს – მივიღე რკინის ნაერთი, რომელიც მაგნიტით მიიზიდება. ნაშრომმა დიდი მოწონება დაიმსახურა – უცხოეთიდანაც კი მოვიდა წერილი, მთელი ნაშრომი გადმოგვიგზავნეთო.  კათედრიდან 7 წელიწადში წამოვედი, მივხვდი, რომ იქ მომავალი არ მელოდა. პროტექციის გარეშე წინ წასვლა რთული იყო. შემდეგ – მეცნიერებათა აკადემიის ანალიზური ქიმიის ლაბორატორიაში გადმოვედი.

-თითქმის 65  წელი ასწავლიდით – სულ რამდენი მოსწავლე გყავდათ?

– რვეულები მქონდა, სადაც ვიწერდი ყველა მოსწავლის საკონტაქტოს. რამდენიმე ასეული მოწაფე მეყოლება მომზადებული, ძალიან ბევრი, ზუსტად ვერც ვიტყვი რაოდენობას. ვამზადებდი მოსწავლეებსაც და სტუდენტებსაც. ძალიან ბევრი მათგანი დღემდე მახსოვს (რვეულებსა და სიას მაჩვენებს).

-რას ნიშნავს ქიმია თქვენთვის?

-ქიმია ისეთი მეცნიერებაა, რომლის ცოდნაც აუცილებელია. ჩვენ გარშემო რაცაა, ყველაფერი ქიმია. სიყვარულიც კი ქიმიაა – მიმზიდველობა! რატომ უერთდება ერთი ელემენტი მეორეს? იმიტომ რომ ერთი გასცემს ელექტრონს და მეორე იძენს. თუ მის მიერ გაცემული ელექტრონის შეძენა არ შეუძლია, არანაირი რეაქცია არ მოხდება. რა საინტერესოა, არა?! – ელემენტები,  რომლებიც მხოლოდ გასცემენ, მაგალითად, მეტალები, ერთმანეთს არ უერთდებიან.

-რას გვეტყვით დღევანდელ სწავლების მეთოდებზე?

-ქიმია სკოლებში არ ისწავლება. ჩემს დროს პატარა წიგნები იყო, მაგრამ ძალიან ღირებული და ისეთი, ცოდნის შეძენას რომ შეძლებდი.  ახლა უზარმაზარი წიგნებია – ძალიან პრიმიტიული და სისულელეებით გაჯერებული. ეს იმის ბრალია, რომ სკოლა გონებასუსტი ადამიანების სასწავლო ადგილად გადაიქცა.   საგანმანათლებლო სისტემა ძალიან სუსტია.

მე შევიმუშავე აბიტურიენტთათვის ქიმიის სწავლების უნიკალური მეთოდი – თავდაპირველად, მათ ატომის ელექტრონულ აღნაგობას ვუხსნი (რეზერფორდის მეთოდი), შემდეგ – ნაერთთა კლასებს. ეს იმას ნიშნავს, რომ ქიმიაში ,,წერა-კითხვას” ვასწავლი. მხოლოდ ამის მერე ვიწყებ პროგრამით მუშაობს. მიდა ვთქვა. რომ, ამ მეთოდის წყალობით, აბიტურიენტები 10 დღეში მიმეცადინებია (ბუნებრივია, ამაში არ შედის ამოცანების ნაწილი).

-მომავალ თაობას რას ურჩევთ?

-ბევრი იკითხონ და ისწავლონ. ჩემი პირვლი წიგნი იყო  რომანი ,,როგორ იწრთობოდა ფოლადი”. როცა მამაჩემმა მოიტანა სახლში, მალავდა, ეს პატარებისთვის არ არისო და მე ჩუმად წავიკითხე. წიგნი გონებას ავითარებს.

-როგორც ვიცი, არასდროს არ ჩერდებით, მუდმივად სწავლობთ, რაღაც ახალს ქმნით…

-უკვე 2 წელია სხვადასხვა ჟურნალიდან ვიწერ რჩევებს – მედიცინაზე, ჯანსაღ ცხოვრების წესზე და ა.შ. – უკვე 600-გვერდიანი წიგნაკი შევკარი. ძალიან ბევრი დეტალია ისეთი, რაც უნდა გავითვალისწინოთ, არის პროდუქტები, რომელთა ერთად მიღებაც არ შეიძლება და ა.შ. ვცდილობ, ვიკითხო – წიგნები, გაზეთები, ჟურნალები. ..

-დაახლოებით, ორი წელია, რაც აქტიურად აღარ მასწავლებლობთ – თუ გაქვთ კვლავ საქმიანობის გაგრძელების სურვილი?

-როგორ არ მინდა?! ძალიან მენატრება სწავლება. მესიზმრება ხოლმე, როგორ ვამეცადინებ. ბოლო ორი წელია, ნაკლებად ვახერხებ მოსწავლეების აყვანას, თუმცა –  სანამ შემიძლია, მინდა და მზად ვარ, ჩემი ცოდნა გავცე.

პ.ს. ესეც ვენერა ბებოს საკონტაქტო: 2 325 222

 

 

მასალა მოამზად:  ნატალია ჯალაღონიამ

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
ანათლებააქართველო

თსუ-ს მაუწყებლობის დაწყება სურს

თსუ

თბილისის სახელმწიფო უნივერსიტეტს საუნივერსიტეტო ტელევიზიის შექმნა სურს და ამ უფლების მოსაპოვებლად მაუწყებლობის შესახებ კანონში ცვლილებას ითხოვს. 

On.ge-ს ცნობით, შესაბამისი ინიციატივა საქართველოს პარლამენტში უკვე დარეგისტრირდა და განსახილველად დარგობრივი ეკონომიკის კომიტეტს გადაეგზავნა.

თსუ-ის მიერ წარდგენილ საკანონდებლო ინიციატივაში ნათქვამია, რომ საუნივერსიტეტო ტელევიზია რამდენიმე მიმართულებით იმუშავებს:

პოპულარიზაციას გაუწევს უნივერსიტეტს საქართველოში და მის ფარგლებს გარეთ;
საზოგადოებას გააცნობს იმ სამეცნიერო მიღწევებს, რომელსაც თსუ-ის მეცნიერები და მკვლევარები ახორციელებენ;

პოპულარულ ენაზე გააცნობს საზოგადოებას გამოყენებით სამეცნიერო პროექტებს, წარმატებულ და ახალგაზრდა მეცნიერთა საგრანტო აქტივობებს;

შეძლებს უნივერსიტეტის პროფესორთა ექსპერტული ხედვების პოპულარიზაციას, უნივერსიტეტისა და სახელისუფლებო შტოების დაახლოებას;

მოხდება პროფესორების საჯარო ლექციების ტრანსლირება;

მეტი ინფორმაცია უცხოური უნივერსიტეტების საქმიანობაზე.

ინიციატივის ავტორების თქმით, ტელევიზია დაეყრდნობა ჟურნალისტიკისა და მასობრივი მიმართულებისა თუ მედიისა და ტელეხელოვნების კოლეჯის სტუდენტების მიერ მომზადებულ მასალებს და ხელს შეუწყობს სხვა ფაკულტეტების სტუდენტების ჩართულობას.

იმისთვის, რომ უნივერსიტეტს ტელევიზიის შექმნის უფლება ჰქონდეს საჭიროა ცვლილება განხორციელდეს მაუწყებლობის შესახებ კანონსა და ლიცენზირებისა და ნებართვების შესახებ კანონში.

ინიციატივის მიხედვით, ტელევიზიას რამდენიმე მიზანი ექნება, მათ შორის საკაბელო, ონლაინ, YouTube და მობილური აპლიკაციების საშუალებით “უნივერსიტეტის წიაღში დაგროვებული ცოდნის საზოგადოებაში გატანა, რომელიც მრავალფეროვან თემატურ სპექტრს მოიცავს”.

ასევე ინიციატივის მიზანია ხელი შეუწყოს ჟურნალისტიკის მიმართულების სტუდენტებისა და კოლეჯის სტუდენტების გადამზადებასა და პრაქტიკული უნარების განვითარებას.

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
ანათლებავლევები

პრაქტიკის კვლევის მნიშვნელობა თანამედროვე საგანმანათლებლო სფეროში

193712-636247489020697370-16×9

პრაქტიკის კვლევის მეთოდი ერთ-ერთია გამოყენებით კვლევებს შორის, რაც უკვე არსებული თეორიებისა თუ მექანიზმების პრაქტიკაში დანერგვასა და გამოყენებას მოიცავს, უშუალოდ განათლების სფეროში ეს გულისხმობს პროფესიულ სიტუაციებზე დაკვირვებას, რათა ამის მეშვეობით მოხდეს სიტუაციური ანალიზი და სწორი გადაწყვეტილებების მიღება არსებული ვითარების გასაუმჯობესებლად.

პრაქტიკის კვლევის ტერმინი კურტ ლევინმა (1890-1947 წწ.) დაამკვიდრა და დღეს სწორედ ის მიიჩნევა ამ მეთოდის ფუძემდებლად.  უშუალოდ პროცესი კი, საკმაოდ მრავალშრიანი და საინტერესოა, ვინაიდან მისი მეშვეობით შესაძლებელი ხდება ლოკალური ცვლილებების გატარება.

ლევინის  მიერ 1946 წელს გამოქვეყნებული ნაშრომი  – Action Research and Minority Problems, მიუხედავად იმისა, რომ ძირითადად ამერიკის საზოგადოებაში კვებითი ჩვევების ცვლილებასა და ეთნიკური უმცირესობებსადმი მათი დამოკიდებულების უკეთესობისკენ ცვლას ეხებოდა, საბოლოო ჯამში, პრაქტიკული კვლევას პედაგოგიურ სფეროში დამკვიდრების წინაპირობაც გახდა.

განათლების სფეროში, პრაქტიკის კვლევის განხორციელება შეუძლია მასწავლებელს ან მასწავლებლების ჯგუფს, რომლებიც უმეტეს შემთხვევაში სხვა დაინტერესებულ პირებთან თანამშრომლობენ, ამ შემთხვევაში იგულისხმება  – სფეროს  მკვლევარები. მსგავსი კვლევის ჩატარება შესაძლებელია ყველა იმ გარემოში, სადაც ადამიანები და მათთან დაკავშირებული ამოცანები თუ პრობლემები ფიგურირებს, რომელთა შორისაც გარკვეული მახასიათებლების ცვლას  სასურველი, დადებითი შედეგის მოტანა შეუძლია.

ორმოცდაათიან წლებში პრაქტიკა, რითიც ლევინი მოვლენებს აკვირდებოდა, დაუახლოვდა საგანმანათლებლო სფეროს, თუმცა ამ შემთხვევაში პიონერებად დიდ ბრიტანეთში მოღვაწე მეცნიერები ელიოტი და ედელმანიც გვევლინებიან, რომლებმაც პრაქტიკის კვლევა ფორდის სწავლების პროგრამაში ჩართეს, რომელიც 1973-1976 წლებში მიმდინარეობდა. აღნიშნული პროექტის მიხედვით, მასწავლებელი ერთგვარად დანახული იყო როგორც მკვლევარი, რომელიც მუდმივი დაკვირვების პროცესშია და ცდილობს დასკვნების საფუძველზე პრაქტიკა გააუმჯობესოს, რაც დღევანდელი გადმოსახედიდანაც ნათლად უჩვენებს პრაქტიკის კვლევის არსს, რომელშიც თვითონ პროცესებში ჩართული პიროვნებები ყველაზე უკეთ ახდენენ პრობლემების იდენტიფიცირებასა და მათი აღმოფხვრისთვის საჭირო ღონისძიებების ჩატარებას.

თუკი პრაქტიკული კვლევა და ზოგადად მეცნიერებები ევროპისა თუ ამერიკის ქვეყნებში მეოცე საუკუნიდან განხილვის საგანი იყო და მასში ცნობილი ამერიკელი ბიზნესთეორეტიკოსის – კრის არგირით დაწყებული უამრავი ადამიანი იყო ჩართული, საქართველოში ეს ტენდენცია სულ რამდენიმე წელია არსებობს. 2015 წელს საქართველოს მთავრობის დადგენილებით დამტკიცდა მასწავლებლის საქმიანობის დაწყების, პროფესიული განვითარებისა და კარიერული წინსვლის სქემა, რომლის მიხედვითაც, დაწყებითი განათლების მასწავლებლის მომზადების ინტეგრირებული საბაკალავრო-სამაგისტრო აკადემიური პროგრამა, მიმდევრობითი და პარალელური პროგრამები სტუდენტებს ავალდებულებს სასკოლო პრაქტიკის მოდულის გავლას, რომელიც თავის მხრივ, მოიცავს პრაქტიკის კვლევის კომპონენტსაც, შესაბამისად, განსაკუთრებულ მნიშვნელობა შეიძინა პრაქტიკის კვლევის პრინციპების, დანიშნულებისა და შეზღუდვების საფუძვლიანად გაზიარებამაც, რაც ბოლო დროს, კიდევ უფრო აქტუალურია.

პრაქტიკულ კვლევაში ორი ერთმანეთთან მჭიდროდ დაკავშირებული მიდგომა არსებობს –  კლინიკური მიდგომა (შეინი, 1987) და კოლექტიური პრაქტიკული კვლევა (უაიტი, 1989). პირველ შემთხვევაში, შეინისავე აღწერით, კლინიკური მიდგომა პროფესიული დახმარების ფუნქციას გულისხმობს და მკლევარსა და სისტემას შორის არსებულ კავშირს თერაპიულ მოდელს ადარებს, რომელშიც მკვლევარი სვამს დიაგნოზს და ცდილობს სისტემას, როგორც პაციენტს ისე უმკურნალოს, ეს არის გარკვეული ნიშნების მატარებელი მოდელი, რომელშიც ადვილად დასადგენია პირიი, რომელსაც უკავშირდება პრობლემები, მსგავსი ადამიანის ქმედება ნებაყოფლობითია, ახასიათებს ნეიტრალობა ღირებულებითი გამოსახულების მიმართ, ხოლო მიზანი კი საერთოა და მიმართულია გამოჯანმრთელებისკენ, იგულისხმება – უკეთესობისკენ.

რაც შეეხება უაიტს, ის პრაქტიკული კვლევას განმარტავდა, როგორც პროცესს, რომლის დროსაც ორგანიზაციის ან ჯგუფის ზოგიერთ წევრს, პროფესიონალ მკვლევართან ერთად, კვლევის პროცესში მონაწილეობას ასწავლიან და ის მთლიანი პროცესის მანძილზე ჩართულია ყველა მოქმედებაში.

აღსანიშნავია, რომ კვლევის უშუალო მონაწილეები საგანმანათლებლო საქმიანობაში ჩართული პირები არიან, იქნებიან ისინი მასწავლებლები, დირექტორები, ლექტორები თუ სხვები, შესაბამისად, სავარაუდოა რომ მათ მიერვე საკუთარი დაკვირვებოთ მიღებული დასკვნები კიდევ უფრო გამოადგებათ პროფესიულ საქმიანობაში,  თუმცა ამავდროულად, ესვე შეიძლება გახდეს დამაბრკოლებელი ფაქტორი, რადგან დასკვნები შესაძლოა ე.წ. თანამონაწილეებთან სუბიექტური, პირადი ურთიერთობებიდან გამომდინარე გამომუშავდეს. ამასთანავე, კლევის მკვლევარებს აუცილებლად სჭირდებათ ინტერაქცია სხვა, მათგან დამოუკიდებელ პირებთან, რომლებსაც უშუალოდ ეხებათ საკითხი, რაც საჭიროებს მათ მზაობასა და თანხმობას თანამშრომლობაზე.

დაბოლოს, დასკვნის სახით ყველაზე შესაფერისი იქნება თუ ლევინის ციტატას მოვიყვანთ – „კვლევა, რომელიც ქმნის მხოლოდ წიგნებს, არაა საკმარისი“,  რაც ნათლად უსვამს ხაზს, რომ პრაქტიკის კვლევა მუდმივი აღმოჩენის პროცესია, რომელიც დასკვნით არ მთავრდება მხოლოდ და ახალი ინიციატივებიც მუდმივი გადახედვის პროცესშია, რაც პრობლემების უფრო სიღრმისეული გადაჭრის წინაპირობაა.

მასალა მოამზადეს: თამარ დევდარიანმა და ლედი კიწმარიშვილმა

სრულად ნახვა
ანათლებაათემატიკასოფლიოაქართველო

ქართველმა მოსწავლეებმა მათემატიკის საერთაშორისო ოლიმპიადაზე მედლები მოიპოვეს

ჯილდო მათემატიკა

რუმინეთში მათემატიკაში მოსწავლეთა შორის 59-ე საერთაშორისო ოლიმპიადა დასრულდა. ოლიმპიადაზე სულ 107 ქვეყნის მოსწავლეები მონაწილეობდნენ.

შეჯიბრების მონაწილეებს სულ ექვსი ამოცანა უნდა ამოეხსნათ, ამოცანათა სირთულის გამო წელს მხოლოდ ორმა მოსწავლემ – ჯეიმს ლინმა აშშ-დან და აგნიჯო ბანერჯიმ დიდი ბრიტანეთიდან შეძლეს ექვსივე ამოცანის სრულყოფილად ამოხსნა. გუნდურ ჩათვლაში პირველი ადგილი აშშ-ის მოსწავლეებმა დაიკავეს.

საქართველო ოლიმპადაზე ექვსი კომაროველი მოსწავლით იყო წარდგენილი.

მათგან საუკეთესომ, საბა ლეფსვერიძემ – 29 ქულით ვერცხლის მედალი დაიმსახურა, ნიკა ბირკაძემ (24 ქულა), დიმა კორკოტაშვილმა (23 ქულა), სანდრო ხოხიასვილმა (22 ქულა), თემო თოლორაიამ და ლუკა მუშკუდიანმა კი ბრინჯაოს მედლები მოიპოვეს.

გუნდურ ჩათვლაში საქართველოს მოსწავლეთა ნაკრებმა 133 ქულა დაგროვა და 27-ე ადგილი დაიკავა.

წყარო:  imedinews

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
ანათლებააქართველო

რელიგიის სწავლება, სავარაუდოდ, 2018-2019 წლის მეორე სემესტრიდან დაიწყება

C307C6E2-FFF6-4E06-9D2D-928706A3B62A

პარლამენტის განათლებისა და მეცნიერების კომიტეტის თავმჯდომარემ, მარიამ ჯაშის განცხადებით, სკოლებში რელიგიის ისტორიის სწავლება, სავარაუდოდ, 2018-2019 წლის მეორე სემესტრიდან, ან მომავალი სასწავლო წლიდან დაიწყება. 

მისი განცხადებით, ეს იქნება ისტორიის სწავლება, თეოლოგიის ძირითადი პრინციპები.

“შემიძლია დაგიდასტუროთ, რომ რელიგიის სწავლებასთან დაკავშირებით ინტენსიური კონსულტაციები მიმდინარეობს სამინისტროს ბაზაზე შექმნილი საბჭოს წევრებთან ერთად. მე ვფიქრობ, სექტემბრისთვის არარეალისტური იქნება იმაზე ფიქრი, რომ ახალი სახელმძღვანელო იქნას შემუშავებული, თუმცა ალბათ,  რომელიც არა ინდოქტრინაციაზე იქნება ორიენტირებული, არამედ ცოდნის მიღების შესაძლებლობას მისცემს მოსწავლეებს. ეს იქნება ისტორიის სწავლება, თეოლოგიის ძირითადი პრინციპები, რათა ის შეცდომები, რომელიც ხდება ჩვენს გარშემო, აღარ მოხდეს. რელიგიის სახელით წარმოშობილი კონფლიქტები არის მიუღებელი და ჯანსაღად უნდა ხდებოდეს სიტუაციის შეფასება“, – განაცხადა მარიამ ჯაშმა.

მისივე თქმით, მთავარია მოხდეს შინაარსზე შეთანხმება, რომ მოსწავლეებმა სრულფასოვანი ინფორმაცია მიიღონ.

სკოლებში რელიგიის სწავლებას ეთანხმება სრულიად საქართველოს შეიხი, მუსლიმთა სამმართველო მოსამზადებელ სამუშაოებში აქტიურად ჩართვას გეგმავს. მათი თქმით, მთავარია, საგანი ობიექტურად ასწავლონ და ახალგაზრდებს საშუალება ჰქონდეთ ყველა ძირითადი რელიგიის შესახებ ინფორმაცია მოისმინონ.

25 იანვარს საპატრიარქოს ახალგაზრდულ ცენტრში, სკოლებში რელიგიის სწავლებასთან დაკავშირებით, სამუშაო შეხვედრა შედგა, რომელსაც საპატრიარქოს, სხვადასხვა კონფესიების და საკანონმდებლო ორგანოს წარმომადგენლები ესწრებოდნენ.

 

წყარო: ipn

ახალგაზრდა ანალიტიკოსთა და მეცნიერთა დარბაზი ,,დოქტრინა” 

სრულად ნახვა
ამოგონება - ინოვაციაანათლებაედიცინააქართველოექნოლოგიები

19 წლის სტუდენტი – პირველი ქართული ხელოვნური ინტელექტის შემქმნელი მედიცინაში

გეგა თათულიშვილი

გეგა თათულიშვილი, რომელიც პირველი ქართული ხელოვნური ინტელექტის შემქმნელია მედიცინაში, ბიზნესისა და ტექნოლოგიების უნივერსიტეტის (BTU) ბიზნესის ადმინისტრირება/ფინანსების ფაკულტეტის სტუდენტია და მიუხედავად იმისა, რომ ჯერ მხოლოდ 19 წლის არის, უკვე მოახერხა საზოგადოებისთვის ინოვაციური პროექტით გაეცნო თავი. DigitalMed-ის განვითარებასა და სამომავლო გეგმებზე ის თავად გვიამბობს.

-გეგა, უპირველეს ყოვლისა, გვიამბე რა მახასიათებლები აქვს, ზოგადად, ხელოვნურ ინტელექტს?

-ხელოვნური ინტელექტი – ეს არის კომპიუტერული მეცნიერების დარგი, რომლის მიზანია შექმნას პროგრამა, რომელიც ზუსტად ისეთივე ინტელექტუალურ ფუნქციას შეასრულებს და ისე იაზროვნებს, როგორც ადამიანი. მას უნდა შეეძლოს პრობლემის საკუთარი ძალისხმევით გადაჭრა, ადამიანისგან დამოუკიდებლად და წინასწარი სწავლების გარეშე. რაც მთავარია, საჭიროა, ჰქონდეს თვითგანვითარების უნარიც.  

– რას მოიცავს შენ მიერ შექმნილი DigitalMed-ი და რამ განაპირობა შენი ინტერესი სამედიცინო სფეროსადმი?

-DigitalMed-ი არის პირველი ქართული ხელოვნური ინტელექტი მედიცინაში, რომელიც უნიკალური ალგორითმებითაა შექმნილი და შესაძლებლობას იძლევა, დასვას პირველადი დიაგნოზი და გაუწიოს პაციენტს ექიმთან ვიზიტის კონსულტაცია. ასევე, მისი გამოყენება შესაძლებელია საგანმანათლებლო დანიშნულებითაც, რადგან ის აერთიანებს სამედიცინო სფეროში დაგროვილ ძალიან დიდ ცოდნას.

ინტერესი მედიცინისადმი ადრეულ ასაკში გამიჩნდა. ყოველთვის ვიყავი დაინტერესებული უახლესი კვლევებით, ვცდილობდი წამეკითხა და მესწავლა, რაც შეიძლება ბევრი და მოხარული ვარ, რომ დღეს ეს ცოდნა პრაქტიკულადაც შემიძლია გამოვიყენო.

-როგორი იყო გზა იდეიდან დღევანდელ დღემდე და რა გამოხმაურება მოჰყვა პროექტს საზოგადოების მხრიდან?

-DigitalMed-ის იდეის განხორციელების სურვილი დიდი ხანია მაქვს, მაგრამ მის სრულყოფაში მოსაყვანად დამჭირდა დაახლოებით ოთხთვიანი მუშაობა. DigitalMed-ის მიმართ დიდია დაინტერესება საზოგადოების მხრიდან. მივიღე მონაწილეობა ,,თიბისი” ბანკის პროგრამაში – „სტარტაპერი“, სადაც გავიმარჯვე და გავემგზავრები გერმანიაში, სტარტაპკონფერენციაზე.

-როგორ შეუძლია დაინტერესებულ პირს პროდუქტით სარგებლობა და როგორია სამომავლო გეგმები?

-DigitalMed-ი იქნება ყველასთვის ხელმისაწვდომი. მისი გამოყენება მარტივია და, ვფიქრობ, ნებისმიერი ასაკის შეძლებს ადამიანი მასთან ურთიერთობას. პროდუქტი ქართულ ენაზე ესაუბრება მომხმარებელს და შესაძლებლობას იძლევა გადაამუშაოს და გაანალიზოს მისგან მიღებული ინფორმაცია. DigatalMed-ი დაფუძნებულია ხელოვნურ ნეირონულ ქსელზე და იყენებს ნეიროლინგვისტურ პროგრამირებას, რისი მეშვეობითაც ესმის და აანალიზებს თუ რას ეუბნება მომხმარებელი. (დამეთანხმებით, რომ სხვა ენებთან შედარებით, ქართულს რთული გრამატიკა აქვს, თუმცა გაძლიერებული სწავლების მეშვეობით მივაღწიე, რომ ინტელექტი აანალიზებს ქართულ ენას.)

რაც შეეხება სამომავლო გეგმებს, მისი განვითარება და დახვეწა მუდმივად გაგრძელდება და ამ მეგამონაცემთა დამუშავება მოხდება ბიზნესისა და ტექნოლოგიების უნივერსიტეტის ბაზაზე.

 

მასალა მოამზადა:  თამარ დევდარიანმა

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
ამოგონება - ინოვაციაანათლებააქართველოექნოლოგიები

დამხმარე ტექნოლოგია ბავშვის აღსაზრდელად – ქართველი სტუდენტების გამოგონება

ანა ლომაშვილი

ბავშვის აღზრდისა და მისი განვითარების ხელშეწყობა ყველა მშობლის უპირველესი საზრუნავია. ეს საკმაოდ რთული და საპასუხისმგებლო პროცესია, რომელიც ბევრ ფაქტორს აერთიანებს და, შესაბამისად – საკმაოდ ბევრ უნარ-ჩვევაზეა დამოკიდებული, რომელიც უნდა გამოამჟღავნოს აღმზრდელებმა.

ერთი შეხედვით ამ საკმაოდ ჩახლართულ და რთულ პროცესში ნაკლებად მოიძებნება ტექნოლოგიის ადგილი, თუმცა 21-ე საუკუნე რის 21-ე საუკუნეა, თუ პროგრესის ნიშნები არ შეიტანა თვით ამ საქმეშიც კი.

ქართველი მეცნიერი გოგონა თავისი გამოგონებით მშობლებს უადვილებს აღმზრდელობით პროცესს და საგანმანათლებლო მნიშვნელობის მქონე პროექტებზე მუშაობს.

ანა ლომაშვილი 21 წლისაა, ის სან დიეგოს სახელმწიფო უნივერსიტეტში სწავლობს ელექტროინჟინერიის ფაკულტეტზე.

სამეცნიერო საქმიანობაში უკვე წლებია აქტიურადაა ჩართული და თანაგუნდელებთან ერთად სხვადასხვა ინოვაციური პროექტით დიდ დაინტერესებასაც იწვევს ფართო ასპარეზზე.

თავის გამოგონებებსა და საერთაშორისო წარმატებებზე ,,დოქტრინას” ქართველი სტუდენტი თავად ესაუბრა:

-როდის დაინტერესდი სამეცნიერო საქმიანობით და როგორი იყო პირველი ნაბიჯები ამ კუთხით?

პირველივე კურსიდან ჩავერთვე ისეთ კონკურსებში, რომლებიც ორიენტირებული იყო რაც შეიძლება მცირე დროში ინოვაციური პროდუქტის შექმნაზე.

სწორედ ასეთი პროექტი იყო ილიაუნის Hardwareჰაკათონი, სადაც შეიქმნა Teddybot-ი. ტედიბოტი არის ის დამხმარე ტექნოლოგია, რომელიც მშობლებს ხელს უწყობს პატარების აღზრდაში. კერძოდ, ის არის ბეიბიმონიტორი, რომელიც  ინტეგრირებულია. ეს არის ხელოვნური ინტელექტი, რაც საშუალებას იძლევა, ბავშვის ასაკის მატებასთან ერთად, ზუსტად შეირჩეს პატარისთვის სასურველი ფუნქციები.

თუ ჩვილობის ასაკში ტედიბოტი მორგებული იქნება პატარის ძილის ანალიზზე, შემდგომ ის ნელ-ნელა შეიძენს საგანმანათლებლო ფუნქციებს.

გვიამბე პროექტის წარმატებებზე.

-ტედიბოტის საშუალებით ჩვენმა გუნდმა, რომელიც ჩემს გარდა დაკომპლექტბული იყო ფიზიკის ფაკულტეტის წარმატებული სტუდენტებისგან – ეკატერინე დადიანისა და ლანა რეხვიაშვილისგან, დაიკავა მესამე ადგილი. ჩვენმა პროექტმა ისეთი ინტერესი გამოიწვია ჟიურიში,  რომ გვირჩიეს მონაწიელეობა მიგვეღო Seed Forum Tbilisi-ში.

ეს არის სტარტაპების კონფერენცია, სადაც საშუალება ეძლევათ პირისპირ შეხვდნენ ინვესტორებს. მოცემულ ღონისძიებაში დავსახელდით ტოპ 6 სტარტაპში და უკვე ტალინის Seed Forum-ში დაგვპატიჟეს მონაწილეობის მისაღებად.

ესტონეთში შევხვდით საერთაშორისო მონაწილეებსა და ინვესტორებს და რამდენიმე საინტერესი წინადადებაც მივიღეთ. გვქონდა შემოთავაზება სტამბულიდან,  ასევე ჰოლანდიის ხელოვნური ინტელექტის ლაბორატორიიდან, სადაც 6-თვიანი კონტრაქტით უნდა გვემუშავა.

წინადადებები საკმაოდ მაცდური იყო, თუმცაღა ითვალისწინებდა იმ პირობას, რომ უნდა მიგვეტოვებინა უნივერსიტეტი. ამ ეტაპზე კი, ჩვენმა გუნდმა გადაწყვიტა თავი შეეკავებინა მსგავსი შემოთავაზებებისგან,  სანამ უნივერსიტეტს არ დავასრულებდით.

-რას საქმიანობთ ამჟამად?

ამ დროისთვის  უფრო აკადემიურ საქმიანობაში, კერძოდ ფიზიკის კვლევებში ჩავერთე, რაც საკმაოდ წარმატებული ნაბიჯი აღმოჩნდა კარიერული წინსვლისთვის.

ამჟამად ვიმყოფები კალიფორნიაში და დოქტორ ჯონსონთან ერთად ჩართული ვარ კვანტური ფიზიკის გარკვეული საკითხების კომპიუტერულ ანალიზში. აგვისტოში კი – მე და ეკატერინე დადიანი ჰელსინკში მინილექციებს წავიკითხავთ ფიზიკის საერთაშორისო კონფერენციაზე.

გისურვებთ წარმატებებს!

მასალა მოამზადა:  ანა ურუშაძემ

ახალგაზრდა ანალიტიკოსთა და მეცნიერთა დარბაზი ,,დოქტრინა”

სრულად ნახვა
AMGანათლებააქართველო

მეათეკლასელი მეკლდეურისა და მოჭადრაკის საინტერესო ცხოვრება სვანეთში

ლევან ფილფანი

ლევან ფილფანი  მესტიის რაიონის სოფელ ლენჯერში ცხოვრობს და საკმაოდ აქტიური ცხოვრების წესით გამოირჩევა. ახალგაზრდა  ჯერ მხოლოდ მეათე კლასშია, მაგრამ უკვე მოახერხა მეკლდეურეობასა და ჭადრაკის სფეროში საკუთარი სიტყვა ეთქვა, პარალულურად – მრავალ სასწავლო და სოციალურ აქტივობაშია ჩართული, რომელთა შესახებაც ის თავად გვიამბობს.

-ლევან, მეკდლეურობა ჯერ არცთუ ისე პოპულარული სპორტია, გვიამბე შენი გამოცდილების შესახებ.

-უკვე მესამე წელია, რაც მეკლდეურობაზე დავდივარ, ეს გახლავთ სპორტის ექსტრემალური სახეობა, რომელიც მთელ მსოფლიოში არის პოპულარული და ოლიმპიური სპორტის სახეობებსაც განეკუთვნება. ამჟამად, უკვე ორჯერ გავხდი სპორტის ამ სახეობაში საქართველოს ჩემპიონი, პირველად 2016 წელს თბილისში, ხოლო 2017 წელს კი, ლენტეხში ჩატარებულ საქართველოს ახალგაზრდულ ჩემპიონატებზე. აღნიშნული სპორტიდ დღესაც აქტიურად ვარ დაინტერესებული ცოტა ხნის წინ,  ლენტეხში ჩატარება 2018 წლის ივნისის ჩემპიონატზე, 2002-2003 წლებში დაბადებულთა შორის, მეორე ადგილის მფლობელი გავხდი.

-როგორც ვიცი, შენი კიდევ ერთი გატაცება ჭადრაკია.

-დიახ, სტრატეგიული თამაშები მიყვარს და, მათ შორის, ყველაზე მეტად ჭადრაკი, რომლის თამაშიც, დაახლოებით, 10 წლიდან დავიწყე, თავდაპირველად,  ასე ვთქვათ, ჩემი მთავარი მასწავლებელი და მოწინააღმდეგე კომპიუტერი იყო, მართალია კომპიუტერთან თამაში მოსაწყენია, განსაკუთრებით კი – ჭადრაკის, მაგრამ მიზნად მქონდა, რომ თამაშში საფუძვლიანად გავრკვეულიყავი. თავიდან ვერც კი წარმოვიდგენდი, რომ ოდესმე ჭადრაკის ჩემპიონატში მივიღებდი მონაწილეობას, თუმცა პირველი გამოსვლა 2016 წელს, მთელი ზემო სვანეთის მაშტაბით ჩატარებულ კონკურსში მქონდა და  როგორც ჩემ მიერ ამ ჩემპიონატზე მონაწილეობის მიღება იყო მოულოდნელი, ისეთივე მოულოდნელი იყო მეორე ადგილის დაკავებაც, ამ წარმატებამ კიდევ უფრო გამიღრმავა ინტერესი და უკვე წიგნიდან დავიწყე საჭადრაკო სტრატეგიების სწავლა. ვიმედოვნებ, რომ შემდეგი წლის ჩემპიონატზე კიდევ უფრო წარმატებულად ვიასპარეზებ.

-დატვირთული გრაფიკის მიუხედავად, ახერხებ, რომ სასწავლო აქტივობებითაც დაკავდე, გვიამბე შენი საქმიანობის შესახებ.

-ამ ეტაპზე, საჭიროებიდან გამომდინარე, ვცდილობ, რომ დიდი დრო დავუთმო ინგლისური ენის შესწავლას, უკვე მეორე წელია ვმონაწილეობ ამერიკის საელჩოს PH International-ის ინგლისური ენის შემსწავლელ ,,Access Program-ში”, ასევე – ვმონაწილეობ ჩვენი კოლეჯის ტერიტორიაზე შექმნილ პროექტში, რომლის თანავტორიც გახლავართ, პროექტი ეხება მესტიაში ველოსიპედების გასაქირავებელ და სერვისცენტრების მოწყობას, ეს პროექტი დაფინანსდა იტალიელი სპონსორის მიერ და, მის ფარგლებში, ცოტა ხნის წინ, სასწავლო ვიზიტით ვესტუმრეთ იტალიას, რათა გაგვევლო ტრენინგები და მიგვეღო უკეთესი გამოცდილება.

-დაბოლოს, შენი სამომავლო გეგმების შესახებ გვიამბე, როგორ გგონია რომელ პროფესიას დაუკავშირებ საკუთარ ცხოვრებას და რატომ?

-ჯერჯერობით, ზუსტად არ მაქვს გადაწყვეტილი ის, თუ კონკრეტულად რომელ პროფესიაზე შევაჩერებ ყურადღებას, მაგრამ ვფიქრობ, რომ ტექნიკური განხრით ავირჩევ მიმართულებას, რადგან  ყველაზე დიდ ინტერესს ჩემში მათემატიკა და ფიზიკა იწვევს. სამომავლო გეგმებს რაც შეეხება, სვანეთი ჩემი ცხოვრების ნაწილია და ვერ წარმომიდგენია ჩემი თავი მის გარეშე, ვაპირებ, რომ უნივერსიტეტში მიღებული განათლებაც ჩემი რეგიონის განვითარებას მოვახმარო.

 

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი ,,დოქტრინა”

 

სრულად ნახვა
AMGამოგონება - ინოვაციაანათლებააქართველოექნოლოგიები

ქართველი ბიოქიმიკოსი სტუდენტის გამოგონება სოციალური პრობლემების წინააღმდეგ

კესი კაციტაძე

უკვე საუკუნეებია, რაც მეცნიერებისა და მისი სხვადასხვა დარგის მნიშვნელობაზე მსჯელობენ. დღეს ყველა ერთხმად თანხმდება, რომ მეცნიერება მხოლოდ სირთულეებთან და ერთი შეხედვით გაუგებარ ფორმულებთან არაა დაკავშირებული. მეცნიერება ჩვენი ყოველდღიური ცხოვრებაა, რომელსაც ბევრი სიკეთის მოტანა შეუძლია ადამიანებისთვის.

მეცნიერების სოციალურ მნიშვნელობასა და მის მიერ მოტანილ სიკეთეებზე დაფიქრდა ქართველი სტუდენტი, რომელმაც თავის მეწყვილესთან ერთად ძალები გამოსცადა ჰაკათონში და თავისი ინოვაციური გამოგონებით დიდი მოწონებაც დაიმსახურა.

კესი კაციტაძე 21 წლისაა. ის  თბილისის სახელმწიფო უნივერსიტეტის სან დიეგოს ამერიკულ პროგრამაზე სწავლობს ბიოქიმიის მიმართულებით.

გამომგონებელს არ უწოდებს თავის თავს – უბრალოდ, მეცნიერული პროექტებითაა დაინტერესებული და ცდილობს თავის პროფესიაში თეორიული ცოდნა პრაქტიკულად გამოიყენოს. სწორედ ამ მიზნით, ხშირად მონაწილეობს ჰაკათონებში და სამეცნიერო, ამავდროულად – სოციალური მნიშვნელობის თემებზე მუშაობს.

რა სირთულეები ახლავს გამოგონების პროცესს და რას გეგმავს სამომავლოდ, ამ და სხვა თემებზე ,,დოქტრინას” ახალგაზრდა ბიოქიმიკოსი თავად ესაუბრა.

-გვიამბე შენ გამოგონებაზე, როგორ გაჩნდა იდეა, როგორ დაიწყე მუშაობა, რა სირთულეები შეგხვდა და საბოლოო შედეგი როგორია.

-ბიოქიმიის პროგრამის ფარგლებში წელს,იანვარში ჩატარდა ჰაკათონი სახელწოდებით ,,Hackathon for Kristen-ი”. მისი მიზანი და ორგანიზების მიზეზი საკმაოდ მნიშვნელოვანი იყო. ამერიკაში მცხოვრებ ახალგაზრდა გოგოს, სახელად კრისტენს სჭირდებოდა ადაპტირებული ეტლი, რომლითაც გაუადვილდებოდა პატარა ბავშვის მოვლა. კრისტენი ეტლს არის მიჯაჭვული, რადგანაც წლების წინ სერფინგის შედეგად წელს ქვემოთ პარალიზებული დარჩა. ამ დაავადებას სერფერების მიელოპათია ჰქვია. სწორედ ამ ჰაკათონზე გაჩნდა იდეა, რომ ჩემს კურსელ ნიკა ალავიძესთან ერთად, რომელიც ელექტრული ინჟინერიის მიმართულებით სწავლობს, შეგვექმნა ეტლის მოდელი, რომელსაც ბავშვის ჩასაწვენი იმავე კონსტრუქციაზე აქვს მიმაგრებული. ჩასაწვენი ნაწილი 180 გრადუსით ტრიალებს და მისი სრულიად მოხსნა/დამაგრევაც მარტივადაა მოსახერხებელი ეტლში მჯდომის მიერ.

ამ გამოგონებაზე მუშაობისას ყველაზე დიდი სირთულე კონსტრუქციის უსაფრთხოებაზე ზრუნვა იყო, რადგანაც საქმე პატარა ბავშვს ეხება და კონსტრუქცია სრულიდ  დაცული უნდა იყოს ტექნიკური ხარვეზებისგან. ბაზრის კვლევის შედეგად, ბავშვისთვის ადაპტირებული ეტლის ბევრი ვარიანტი ვიპოვნეთ, თუმცა თითქმის ყველა საკმაოდ დიდი და მძიმე კონსტრუქცია იყო, რაც გულისხმობს ინვალიდის ეტლზე წინიდან მიმაგრებულ ბავშვის მთლიანი ეტლის კონსტრუქციას. მისი გამოყენება მოუხერხებელია და ასევე სახიფათოც ქუჩაში გადაადგილებისას, რადგან თითქმის შეუძლებელია, დაინახო, რა ხდება კონსტრუქციის მიღმა.

ჩვენი ეტლის მოდელი კი მარტივი და მოსახერხებელია. არ არის მძიმე და არც რთული სამართავად. სწორედ ეს არის მისი უნიკალურობა.

-რამდენად რთულია სიახლის შექმნა, რომელიც იქნება სასარგებლო და რამდენხნიანი მუშაობა დასჭირდა ამ ყველაფერს?

-გაგიჩნდეს იდეა, მარტივია. ყოველდღიურ ცხოვრებაში მრავალ სიცარიელეს ვაწყდებით და ვხვდებით, რომ მათი შევსება გაამარტივებდა ცხოვრებას. ეს პირველი ეტაპია, თუმცა შემდეგი ეტაპი უკვე რთულდება. რთულია, ისეთი იდეა შეარჩიო, რომელსაც სამომავლო განვითარების პოტენციალი აქვს და დადებითი შედეგის მოცემა შეუძლია. გასათვალისწინებელია ამ დროს როგორც მოგება, არა მხოლოდ მატერიალური, არამედ მორალური, ისევე რისკები. მესამე ეტაპია იდეის დამუშავება და პროტოტიპის აწყობა, ბოლო ეტაპი კი პროდუქტის მომხმარებლამდე მიწოდებაა.

ყველაზე რთული კი იდეის გაჟღერებისათვის საჭირო ადგილისა და მომენტის შერჩევაა. გაწერილი პროექტი, რომ წარმატებული იყოს, უნდა გყავდეს ადამიანი, რომელიც მის განხორციელებაში გვერდში დაგიდგება, წინასწარ გათვლილი აუდიენცია (არც თუ ისე პატარა), რომელსაც პროექტი დააინტერესებს და ასევე, პროექტის მიზანი იმ პერიოდში ქვეყნის და მსოფლიოს ბაზარზე არსებულ  მოთხოვნებს უნდა პასუხობდეს. ყველაზე რთულ შემთხვევაში კი პროექტის საშუალებით, უნდა შეგეძლოს ადამიანებს ახალი საჭიროება დაანახო, რომელიც აქამდე ბაზარზე პოპულარული არ ყოფილა.

მივიჩნევ, რომ ჰაკათონი კრისტენისთვის სწორედ ის საშუალება იყო, რომლითაც შეგვეძლო საზოგადოებისთვის ბაზარზე ჯერჯერობით არაპოპულარული საჭიროება დაგვენახებინა. იდეის დამუშავებასა და მოდელის შექმნას კი 1 თვის ინტენსიური მუშაობა დასჭირდა.

როდიდან დაინტერესდი გამომგონებლობით და რამ გამოიწვია ეს დაინტერესება ამ სფეროთი?

-კონკრეტულ დღეს ან ფაქტს, რომლის შემდეგაც გამომგონებლობამ დამაინტერესა, ვერ გავიხსენებ. ასე, კონკრეტულად, გამომგონებლის სტატუსიც არ მომირგია. უბრალოდსწავლის პერიოდში, როდესაც ახალ ეტაპზე გადადიხარ, გინდა, შენი ცოდნა გამოიყენო პრაქტიკაში და იმავე ცოდნით დაეხმარო ადამიანებს. ჰაკათონები კი – ზუსტად ამ მიზანს ემსახურება.

-ამჟამად ხომ არ მუშაობ რამე ახალ გამოგონებაზე და თუ მიგიღია მონაწილეობა სხვადასხვა კონკურსშიან საზღვარგარეთ ან საქართველოში?

-ამჟამად ახალ გამოგონებაზე არ ვმუშაობ. თუმცა ზემოთ აღნიშნული ჰაკათონის გარდა, რომელშიც პირველ ადგილზე გავედით, კიდევ ერთ ჰაკათონზე მივიღე მონაწილეობა ნიკა ალავიძესთან ერთად. ეს იყო ამერიკის საელჩოსა და დემოკრატიის ლაბორატორიის ერთობლივი პროექტი ,,კოსმოსური ჰაკათონი”. ამ კონკურსზე მე და ნიკამ მეორე ადგილი დავიკავეთ.

-სამომავლო გეგმების შესახებ რომ გვიამბოთ.

-სამომავლო გეგმები გამომგონებლობის კუთხით ჯერ არ მაქვს. როგორც უკვე აღვნიშნე, გამოგონება წინასწარ არ იგეგმება. იდეა ნებისმიერ წამს, ნებისმიერ ადგილას, ნებისმიერ თემასთან მიმართებით შეიძლება, გაგიჩნდეს. შესაბამისად, მსგავსი სიტუაცია ჯერ არ გამოჩენილა.

შეიძლება იყოს იდეაც, მაგრამ არა საჭირო მოცემულობა ან დრო ამ იდეის გასაჟღერებლად და მასზე სამუშაოდ. თუმცა, ვიცი, რომ გამომგონებელი ერთხელ თუ ,,მოიწამლაგამოგონების ხიბლით, ის მასში რჩება სამუდამოდ და ცხოვრების გარკვეულ ეტაპებზე ეს ,,ინტოქსიკაციააუცილებლად იჩენს თავს.

 

მასალა მოამზადა: ანა ურუშაძემ

ახალგაზრდა ანალიტიკოსთა და მეცნიერთა დარბაზი ,,დოქტრინა”

 

სრულად ნახვა
1 2 3 17
Page 1 of 17