მედიცინა

ახალი კვლევის თანახმად, წყალში B3 ვიტამინის დამატება გლაუკომისგან დაგიცავთ.

თაგვებზე ჩატარებული კვლევის შედეგებზე დაყრდნობით, მეცნიერები იუწყებიან, რომ B3 ვიტამინი თვალებს ჯანმრთელობას უნარჩუნებს და დაავადების განვითარების რისკს ამცირებს.

ექსპერტები აცხადებენ, რომ კვლევის შედეგებმა შესაძლოა  ხანდაზმული ადამიანების იაფ და უსაფრთხო განკურნების მეთოდს მისცეს დასაბამი, რომელიც თვალის წვეთების გამოყენებას ჩაანაცვლებს.

აშშ-ის შტატ მეინის ქალაქ ბარ-ჰარბორიში მდებარე ჯექსონის ლაბორატორიის მკვლევარები გლაუკომასადმი გენეტიკურად მიდრეკილი თაგვების წყალში ვიტამინს ამატებდნენ.

„იმის გამო, რომ თვალის უჯრედები ჯანმრთელი და მეტაბოლურად ძლიერია, მაღალი წნევის პირობებშიც კი, ისინი ზიანის მომტანი პროცესების მიმართ რეზისტენტულები არიან,“- აცხადებს კვლევის ავტორი – დოქტორი პიტ უილიამსი.

მკვლევარებმა ასევე აღმოაჩინეს, რომ ტვინის უჯრედების ენერგიით მომარაგებაზე პასუხისმგებელი ფერმენტის ერთჯერადმა გენურმა თერაპიამ თაგვებში გლაუკომას განვითარება აღკვეთა.

„პაციენტებისთვის, განსაკუთრებით კი, ხანდაზმული პაციენტებისთვის, საჭირო მედიკამენტების ყოველდღიური და სწორი დოზით მიღება არცთუ ისე მოსახერხებელია. ასე რომ, გენური თერაპია შესაძლოა, მკურნალობის ექსკლუზიურ მეთოდად იქცეს.

გლაუკომით მსოფლიოში დაახლოებით 80 მილიონი ადამიანია დაავადებული და ისინი, როგორც წესი, თვალის წვეთებს მოიხმარენ.

გლაუკომას თვალშიდა წნევის მომატება იწვევს, რომელიც ბოჭკოვან ნერვს აზიანებს.

დაავადებას თვალის წვეთებით მკურნალობენ, რაც ზოგჯერ გაღიზიანებას იწვევს და ამის გამო ყველა პაციენტისთვის ხელსაყრელი არაა.

უფრო მძიმე შემთხვევებისას პაციენტს ლაზერულ თერაპიას უტარებენ, რომელიც არცთუ ისე უმტკივნეულო პროცედურაა. რაც შეეხება მკურნალობის კიდევ ერთ მეთოდს – ქირურგიულ ჩარევას, ის ანესთეზიას საჭიროებს.

წყარო: Dailymail

მასალა მოამზადა: თამარ ტაბატაძემ

ანალიტიკოსთა და მეცნიერთა დარბაზი – ,,დოქტრინა”

   მეცნიერები გვაფრთხილებენ: იმისთვის, რომ თავიდან ავიცილოთ კიბოს განვითარების რისკი, პური, ჩიფსი და კარტოფილი ოქროსფერ -ყვითელ და არაყავისფერ შეფერილობამდე უნდა შევწვათ.

სახამებლის შემცველი საკვების მაღალ ტემპერატურაზე დიდი ხნის მანძილზე შეწვისას, მოხრაკვისას, გრილის მომზადებისას წარმოიქმნება ნივთიერება აკრილამიდი, რომელიც კიბოს იწვევს.

სურსათის სტანდარტების სააგენტო (FSA) საზოგადოებას რეკომენდაციას აძლევს, ყურადღებით დაიცვან საკვების მომზადების ინსტრუქცია. FSA-ის ინფორმაციით, არ შეიძლება კარტოფილის მაცივარში შენახვა იმის გამო, რომ დაბალ ტემპერატურაზე წარმოქმნილი შაქრის მაღალი დონე პოტენციურად ზრდის აკრილამიდის რაოდენობას.

   რა არის აკრილამიდი – ნიშნავს თუ არა, რომ საერთოდ უარი უნდა ვთქვათ შემწვარ საკვებზე?

აკრილამიდი წარმოიქმნება სახამებლით მდიდარ პროდუქტში, როცა მას 120 გრადუსზე მაღალ ტემპერატურამდე აცხელებენ.

აკრილამიდის ყველაზე მაღალი შემცველობა აღმოჩენილია კარტოფილის „ჩიფსებში“,  შემწვარ კარტოფილში, სიმინდის ბურბუშელაში, ნამცხვრებში, ორცხობილებსა და ყავაში.

აკრილამიდი წარმოიქმნება, მაგალითად, როცა ტოსტს ვამზადებთ. რაც უფრო მუქი ფერისაა ტოსტი, მით მეტია აკრილამიდი. დაბრაწვის პროცესის დროს პურში შემავალი შაქარი, ამინომჟავები და წყალი წარმოქმნიან ფერსა და აკრილამიდს- ისევე, როგორც გემოსა და არომატს.

სურსათის სტანდარტების სააგენტო აცხადებს, რომ ჯერ-ჯერობით ზუსტად გარკვეული არაა, რა რაოდენობის აკრილიკის მიღება შეუძლიათ ადამიანებს, თუმცა ორგანიზაცია მიიჩნევს, რომ მას ზედმეტი რაოდენობით ვღებულობთ და გვირჩევს, საკვების მომზადების წესში ცოტაოდენი ცვლილება შევიტანოთ:

სახამებლის შემცველი საკვები, პური, კარტოფილი და ფესვოვანი ბოსტნეული მხოლოდ ოქროსფერ-ყვითელ შეფერილობამდე უნდა შევწვათ ან გამოვაცხოთ.

უმი კარტოფილი არა მაცივარში, არამედ ბნელ გრილ ადგილას უნდა შევინახოთ.

ვიკვებოთ სწორად ანუ ყოველდღიური რაციონი ხუთ ულუფა ბოსტნეულსა და ხილს უნდა შეიცავდეს.

  რა რისკებს წარმოქმნის აკრილიკის მიღება?

ცხოველებზე ჩატარებულმა კვლევამ აჩვენა, რომ აღნიშნული ნივთიერება დნმ-ისთვის მომწამვლელია და კიბოს იწვევს. მეცნიერები ვარაუდობენ, რომ იგივეა ადამიანების შემთხვევაშიც, თუმცა, საბოლოო მტკიცებულება ჯერ-ჯერობით არ არსებობს.

აკრილამიდი ზრდის კიბოს რისკს და უარყოფით ზეგავლენას ახდენს ნევრულ და რეპროდუქციულ სისტემებზე. თუმცა ეს დამოკიდებულია მიღებული აკრილამიდის რაოდენობაზე. მწეველი ადამიანის ორგანიზმში დაახლოებით ოთხჯერ მეტი აკრილამიდია, ვიდრე არამწეველისაში, ვინაიდან თამბაქოს კვამლი აღნიშნულ ნივთიერებას შეიცავს.

მეცნიერები მიიჩნევენ, რომ საჭიროა საზოგადოების ინფორმირება ნივთიერება აკრილამიდის შესახებ იმისათვის, რომ ადამიანებმა აღნიშნულ ნივთიერებასთან დაკავშირებული რეკომენდაციები გაითვალისწინონ და, შესაბამისად, მისი მოხმარების დონე შეამცირონ.

წყარო: Dailymail

მასალა მოამზადა: თამარ ტაბატაძემ
ანალიტიკოსთა და მეცნიერთა დარბაზი ,,დოქტრინა”

კანი სხეულის გარეგანი საფარველია, იგი მექანიკური დაზიანებისგან იცავს შინაგან ორგანოებსა და ქსოვილებს, ასევე ხელს უშლის უცხო ნაწილაკების შეღწევას ორგანიზმში. აქვს თბორეგულატორული ფუნქცია, რაც ნიშნავს იმას, რომ მონაწილეობას იღებს სხეულის ტემპერატურის შენარჩუნებაში, უზრუნველყოფს სითბოს წარმოქმნისა და გაცემის პროცესების წონასწორობას. აგრეთვე, კანში მოთავსებულია რეცეპტორები, რომლებიც აღიქვამენ ტკივილს, სითბოს, სიცივეს, ეს კი საშუალებას იძლევა, რომ ადამიანმა აირიდოს სხვადასხვა დაზიანება. აქვს გამომყოფი ფუნქციაც, კერძოდ, საოფლე ჯირკვლების დახმარებით ორგანიზმიდან გამოიყოფა წყალი, მარილები და შხამიანი ნივთირებები. კანში წარმოიქმნება D ვიტამინი, აგრეთვე, გამომუშავდება მუქი პიგმენტი, რომელიც ულტრაიისფერი სხივებისგან იცავს ორგანიზმს. როგორ შევინარჩუნოთ ჯანსაღი კანი ზამთარში? – ,,დოქტრინას” კითხვებს კლინიკა ,,ჰეალაინისა” და სამედიცინო კორპორაცია ,,ევექსის” დერმატოლოგი, მაკა დოღოზაშვილი, პასუხობს.

 ზამთარში კანი შრება, იქერცლება, კარგავს ტონუსსა და სიმკვრივეს, როგორ მოვუაროთ კანს აღნიშნულ პერიოდში?

ზამთარში სახის კანს განსაკუთრებული მოვლა სჭირდება, რადგან სიცივე და სუსხი აუწყლოებს და კარგავს ტენიანობას, ცივი ჰაერის ზემოქმედების გამო ცხიმის უჯრედები პასიურდება, შესაბამისად, კანი კარგავს სიმკვრივეს. განსაკუთრებით საყურადღებო მშრალი კანის მოვლაა, რადგანაც ამ სეზონზე მას ყველაზე მეტად უჭირს. ტანსაცმლისგან დაუფარავ კანზე –  ხელებსა და სახეზე – სასურველია, ინტენსიური მკვებავი კრემების რეგულარული გამოყენება, რომელთა შემადგენლობაშიც შედის E ვიტამინი, კერამიდები, ცხიმოვანი მჟავები, სელექტიოზა, დემეტიკონი, ქოქოსის ან შის ზეთი და ა.შ.

ტუჩებისა და თვალების გარშემო კანი განსაკუთრებით თხელი და ნაზია, როგორ ავიცილოთ თავიდან აქერცვლა და გამოშრობა?

ტუჩებისა და თვალის ირგვლივი კანის დაცვა აუცილებელია აღნიშნული ზონებისთვის განკუთვნილი კრემ-ბალზამებით. სიმშრალის თავიდან ასაცილებლად საჭიროა დიდი რაოდენობით სითხის მიღება. კანის სიცივისგან დასაცავად გამოიყენება ე.წ. ქოლდ კრემის ხაზი, რომელიც საკმაოდ ბევრ კოსმეტიკურ თუ ფარმაცევტიკულ ქსელს აქვს, მისი გამოყენებისას ხელებისა და სახის კანზე გაორმაგებული დამცავი ლიპიდური გარსი წარმოიქმნება, ეს კი კანს ტენს უნარჩუნებს.

კანის რომელი პათოლოგიები მწვავდება ზამთარში?

ზამთარში ხშირად მწვავდება ისეთი დაავადებები, რომელთაც ახასიათებთ კანის სიმშრალე, მაგალითად: ატოპიური დერმატიტი, სებორეა, ეგზემა, ფსორიაზი და ა.შ. ამის ძირითადი მიზეზი კი კანის გამოშრობაა.

როგორც ხედავთ, აღნიშნულ სეზონზე სწორედ კანი იღებს პირველად დარტყმებს, თუ მას არ მოვუვლით, დაკარგავს ზემოთ ჩამოთვლილ ფუნქციებს და ვიზუალურადაც არასასიამოვნო სანახავი იქნება. გაითვალისწინეთ, სამთო-სათხილამურო კურორტებზე დამატენიანებელ მალამოს აუცილებლად უნდა დაემატოს მზისგან დამცავი კრემი მაღალი SPF (Sun Protected Factor) ფილტრით. ქვიშა მზის სხივების 25%-ს ირეკლავს, თოვლი და წყალი – 80%-ს, სწორედ ამიტომ, ულტრაიისფერი სხივების ნეგატიური შედეგების თავიდან ასაცილებლად აუცილებელია დამცავი კოსმეტიკური საშუალებების გამოყენება.

ანალიტიკოსთა და მეცნიერთა დარბაზი ,,დოქტრინა”